2008-02-22

لو لم اكن مصريا .. لوددت ان اكون ؟!!!

بيستفزنى اوى لما نكون بنلعب لعبة What if او ماذا لو ؟!!
اللعبة المفترض اننا بنتخيل او بنحلم .. يجي حد بقى ويقولك بابتسامة عريضة وفرحة رهيبة
ماذا لو لم تكن مصريا ؟!! ويبتسم كأنه بيديك الفرصة اللى ماتتعوضش علشان تثبت ولائك وحبك لمصر
وبيستنى يشوف مصطفى كامل يبعث من تانى ..
وياويلك ويسواد ليلك لو قلت لو لم اكن مصريا لوددت ان اكون مثلا اماراتيا ولا عراقيا ولا اى حاجة تانية
بيبقى هاين عليهم يرجموك ..
فى الحقيقة انا دايما بتحلى بالشجاعة اللى اقول فيها لو لم اكن مصرية لوددت ان اكون عراقية ..
والاسباب هقولها بعدين ..
ومش بشوف فى دا اى انتقاص لوطنيتى او حبى لمصر ..
بالعكس انا متأكدة انى بحب مصر بكل عيوبها وكل مافيها من سلبيات ..
بحب مصر ومش محتاجة انى اكون مصطفى كامل علشان اثبت كده
اللى برفضه بجد هو النفاق والتظاهر بالوطنية ..
واللى برفضه بردو اننا حتى لما حد يقولنا احلموا نمنع نفسنا من الحلم ..
ايه الماننع لما تقول لو لم اكن مصريا لوددت ان اكون مثلا امارتيا ..
او عراقيا او سعوديا او او اى حاجة ..
مش المشكلة فى انت عايز تكون ايه ؟!! المشكلة هى انت ليه عايز تكون حاجة تانية ..
يعنى انا مثلا لو لم اكن مصرية لوددت ان اكون عراقية ..
ليييييييه ؟؟
هقولك علشان العراق حضارة رائعة وقريبة جدا من مصر
فى الجو وفى التاريخ وفى الشعب نفسه ..
لو فكرت كده هتلاقى ان اصلا حبك للوطن التانى بينطوى على حب لمصر ..
احلم انك تكون اماراتى فى مصر وفكر صح زى ما بيفكروا وخليك انسان ايجابى وذكى ..
احلم انك تكون سعودي وعيش حياتك برفاهية بس اوعى تكون مسرف ..
احلم .. الحلم مش هيغير من اصلك حاجة ومن كينونتك ..
بس هيعيشك فى متعة وممكن يخليك تدى فى الواقع اللى انت عايشه دا
وفكر معايا بقى لو لم تكن مصريا لوددت ان تكون ايه ؟؟ وليه ؟؟!!

هناك 9 تعليقات:

  1. بصى ياسارورتى
    بجد ومن غير نفاق لو لم اكن مصرياً لوددت ان اكون مصرياًمش عشان مصطفى كامل لكن لأنى فعلاً معتزه بالبلد دى بالرغم من اللى بيحصل فيها دلوقت
    لأن مش ذنبها ان حكامها كده ولا ذنبها ان ولادها بقوا كده
    مصر هى البلد اللى بجد مش هلاقى نفسى غير فيها حتى ولو فى خيالى عارفه ذى الطفل اللى ماشفش غير مامته لو سألتيه تحب مامتك تكون مين هيقولك ماما لأنها دى اللى عرفها

    ردحذف
  2. دايما سؤال ماذا لو بيكون انك لو مش كذا تختارى تكونى ايه؟والاختيار اكيد اكيد بيكون عندك انتى احسن من الحقيقه .مثلا لو مكنتش فى كلية طب تحب تكون فى كلية ايه مثلا يقوم يقول مثلا حقوق.معروف انه الطب اعلى من الحقوق بس ده بيكون دليل على انه الشخص اللى جاوب بتكون الحقوق عنده احسن.انا شايف كده!!!
    ياترى بقى العراق عندك احلى من مصر طبعا هتقولى لاء وانت مين عشان تزايد عليا فى حب مصر و.... بس انا شايف كده!!!
    تبريرك انه العراق زى مصر وفى شبه فى الحضارة والتاريخ اقولك انا بلسان واحد دارس تاريخ بجد انه اخر بلد تتشبه بمصر هى لبنان والعراق ومش بمزاجى وفهرس التاريخ بيقول انه اهل العراق اهل غدر ونفاق ...مليش عداء مع حبة رمل فى ارض العراق بس ده اللى التاريخ والحضاره بيقولوه...تفتكرى العراق لسه زى مصر!!!
    اقول انا بقى عن نفسى لو لم اكن مصريا لوددت ان اكون ايه وبصراحه ........مصرررررررى والله العظيم مصرى قسما بالله عايز اكون المواطن مصرى...وان فضلت وحشه كده علطول انا راضى بيها وفيها علطول ومش هقول انا اكتر واحد عاشق لدخان البلد دى بس هقول ياااارب كل اللى فيها يحبوها نص مابعشقها ...وكمان موضوع اللى فيها ده مش ذنبها ده اكيد ومفيش اختلاف عليه لانه مصر وطن ارض وهوا وسما ومعالم خضره اثار جبال انهار وديان ده الوطن والشعب جزء من الوطن اه ولو الشعب وحش الوطن وحش اه بس انا بحب الشعب مع انه بقى وحش اه وبصراحه بس الشعب ده ابويا وابوك واخويا واخوك وعمى وعمك وابن خالى وابن خالك ...يارب بقى يبقوا كويسين عشان بلدنا تبقى كويسه ولو لم يكونو كويسين لوددت ان يكونو كويسين ...
    واخر حاجه صلاح الحاكم من صلاح الرعيه ولو عايزين عدل عمر لازم نوجد الرعيه اللى كان عشانها العدل رعيه فيها الصغيره بتقول فان رب عمر يرانا والكبيره قال عنها الفاروق اصابت امراه واخطا عمر هاتو الناس دى هيجى الفاروق يحكمهم .

    ردحذف
  3. دودو حبيبتى ، انتى قولتى اهو زى الطفل لو سالتيه مامته يتمنى تكون مين هيقولك ماما لأنها هى اللى يعرفها .. ايه المانع لو عشنا فى بلاد تانية ولو حبينا بلاد تانية نتمنى نكون زيهم .. كتير بنتمنى لو كان اهلنا ربونا بالطريقة اللى فلان اهله ربوه بيها .. انا مش هغير البلد لكن هقتبس طريقة حياة وطريقة تعامل من بلد تانية .. عارفة التقمص اللى فى الاعلام والتنمية ؟؟ هو دا بالظبط اللى اقصد عليه

    ردحذف
  4. عارف يا احمد كلامك مظبوط فى ان اللى بيتمنى حاجة غير اللى هو فيها بيكون شايفها احسن ، ولو سألتنى عندك العراق احسن من مصر هقولك ايوة .. ومش لازم الاسباب تكون منطقية ولا تكون واقعية بس الاكيد ان دا احساسى بيها ودا رأيي .. كتير هيقولى كفاية ان مصر حرة والعراق محتلة لكن بالرغم من كده انا افخر بالعراق وبفخر بكل ذرة رمل عراقية ودايماً بقول العراق ابية وعزيزة ..
    اما عن ان العراقيين اهل غدر ، فبردو انا سألت استاذ كبير فى التاريخ عن صحة الكلام دا ونفاه تمام ، واكدلى ان الكلام دا بيشاع زى الكلام اللى بيشاع عن الفلسطينين لاضعاف ايماننا بقضيتهم .. كمان صدقنى انا شفت غدر من المصريين بردو لحد ماخلاص حاسة انى اتخنقت .. كمان صعب اوى نوصف اخوان لينا مسلمين بالصفة دى ...
    وكونك تفخر بمصريتك ، فانا بحييك ، وصدقنى انا كمان بفخر بكونى مصرية ومش بقبل حد يقول ربع كلمة عن مصر ، لكن فى نفس الوقت معتزة بانتمائى للعراق ومش بطيق حد يقول عنها ربع كلمة ..
    وصدقنى اتفضيلى للعراق مالوش اى دعوة بالاوضاع اللى حاصلة فى مصر ابدا ً ..
    وكلامك مظبوط جدا فى نقطة صلاح الحاكم من صلاح الرعية ، صدقنى بجد انا مؤمنة ايمان كامل بالمقولة دى نورتنى يا احمد

    ردحذف
  5. لو سالتك عندك العراق احسن من مصر هتقولى ايوه.ده كلمه اصغر من الواحد يعلق عليكىمع احترامى للى قالها ودى مش مجامله يعنى بس البنى ادم حر مالم يضر انا بقى مابستحملش واحد عراقى يقولى ان العراق احسن من مصر مابالك لو مصرى قال كده .ومن غير زعل انا عايز اوصلك للايمان بفكره انه اللى مصر فيه دى سببهم ناس امامير كده برضوا مصر عندهم مش كل حاجه.
    استاذ التاريخ اللى قالك انه ده بيتقال عشان نضعف ايمانهم بقضيتهم قوليلو المقوله دى بتتقال من قبل حرب 2001 بكتييييييييييييييييييير يمكن بقى انا شخصيا صدقتها وامنت بان الاشارات اللى مكتوبه على جدار التاريخ علامات ارشاديه ولازم ناخد بيها عشان ما نتوهش يوم ما صحينا الصبح لاقينا امريكا بتسرح وبتتمخطر على حبية الرمل اللى انتى بتعشقيها والجيش مش موجود بالمره مش اتهز لاء ده مفيش جيش !!
    وبجد اذا كان كلامى هيزعلك فى حاجه فعشان اواسيكى هقوزلك انه زعلك مايجيش واحد على المليون فى زعلى انى دخلت هنا بالصدفه وعلقت على كلامك .زعلان انى لاقيت ناس كده بجد انا كنت مفكر النوعيه اللى زيك دى بتبقى قليله زى الاسطى تامر حسنى وهيثم شاكر لما يقولو ارحمى حمولك عليا وبعد يومين تلاقيهم هربانين من الجيش ومزوروين شهاده من اعلى الشهادات فى مصر هى شهادة الجيش .مش بزايد عليهم فى الوطنيه لانهم ماعندهموش وطنيه ازايد بيها اهو انتى زيهم ماقبلش حد يقول كلمة على مصر طب والعراق عندك احسن من مصر .دى مش كلمة على مصر ؟واقولك كمان انا مش هحترم بنت من النيجر لو قالت انه مصر عندها احسن من النيجر لانه لو كل انسان حط بلده احسن حاجه عنده العالم كله هيتغير .وانا ماليش اى مصلحه انى اجرح لا فى العراق ولا فى النيجر ويارب ويارب ويارب زى ماحب الوطن من الايمان قوى ايمان الناس باوطانها وقوى ايمان العراقيين بعراقهم ويحرروه.وعايزك تعرفى انه لو مش الاماكن المقدسه فى السعوديه وفلسطين ماكنتيش تلاقى بلد ذكرت فى القران زى مصر وكمان اطهر الناس اهل النبى لما خيروهم تروحوا فين قالو مصر .انا مش ببررلك مصر تتحب ليه لان حتى لو مصر عباره عن جبل اصفر هى وطنها وهنعشقها بس عايز اقولك انك غلطانه بكل المقاييس واقولك اكتر انى لو لاقيت بنت عراقيه بتقول مصر عنمدى احسن من العراق اعرفى انها رخيصه فى مشاعرها ووطنيتها واخلاصها وساعتها احزنى الف مره لما تعرفى انه مفيش حد فى العراق مخلص يها.يارب مصر جديره بعطفك ورضاك

    ردحذف
  6. كلامك بيناقض نفسه يا احمد .. منين بتقول ما تستحملش حد عراقى يقول العراق احسن من مصر ومنين بتقول لو بنت عراقية قالت مصر احسن من العراق مش هتحترمها ؟؟!!
    نشرت تعليقك رغم انك تعديت كتير عليا فى كلامك بس كان لازم ارد عليك
    اولا التعصب دا مش وطنية افتكر اننا ايام الخلافة كنا دولة واحدة كلنا دولة اسلامية .. واعدائنا بيشتتوا الوحدة الوطنية بالطريقة دى التعصب والتفاخر بالبلد وبالتالى شوية شوية تكره باقى الدول ، لأنها ببساطة مش مصر ..
    _______________
    يمكن بقى انا شخصيا صدقتها وامنت بان الاشارات اللى مكتوبه على جدار التاريخ علامات ارشاديه ولازم ناخد بيها عشان ما نتوهش يوم ما صحينا الصبح لاقينا امريكا بتسرح وبتتمخطر على حبية الرمل اللى انتى بتعشقيها والجيش مش موجود بالمره مش اتهز لاء ده مفيش جيش !!
    ---------------
    ارحموا عزيز قوم ذل يا استاذ احمد مش من حق اى حد انه يسخر من العراق علشان امريكا دخلتها ولا انه يعتبر دا دليل على خسة اهلها .. هقولك حاجة بسيطة اوى قبل ما تقول كده مافكرتش ان مصر سمحت لسفن امريكا تعدى ؟؟ ولا دى عدت وهى مش واخدة بالها ؟؟
    __________________________
    شكرا جدا على ((( النوعية اللى زيك )) .. اولا حضرتك ماتعرفش نوعيتى
    ولا تعرف ان كنت بخاف على مصر او لأ ولا تعرف اى حاجة علشان تقول النوعية اللى زيي ..
    اولا انا ما جاليش التجنيد وهربت منه زى الاتنين اللى بتقول عليهم واللى حضرتك ما تعرفوش انى جاتلى اكتر من فرصة انى اسافر برا مصر لدول اجنبية ولدول عربية خرافية زى الامارات ورفضت لأنى شايفة انى ممكن اعمل اى حاجة ولو محاولة صغيرة لأنى اخلى الوضع هنا احسن
    ___________________
    اما كونك تحترم او ما تحترمش فللاسف بعد ما شوفت طريقة تفكيرك وطريقتك فى الحوار اعتقد انه ما يهمنيش اعرف تحترم مين وما تحترمش مين ..

    نصيحة .. خليك واقعى وبص حواليك وكفاية تمسك بشعارات من غير ما تكون مقتنع بيها .. الدنيا كلها اللى اتقدمت اتقدمت علشان عرفت هى وضعها ايه بالظبط ..

    ردحذف
  7. هغهمك كلمةبكلمة زى ماحضرتك رديتى .موضوع انه كلامى متناقض ازاى بقول مااستحملش واحده عراقيه تقول انه العراق احسن من مصر .ده قدامى زى لو حد جه قال لحد ابويا احلى من ابوك اه ابوك على العين والراس وعايزك تفخر بيه زى مانا فخور بابويا بس مش قدامى ولا تقارن ابوك بابويا .اظن كده مفهوم يعنى مش هحترم اى حد مش عاجبه ابوه وعنده ابو واحد تانى احسن منه وفى نفس الوقت مش هحترمه لو فضل ابوه على ابويا. وعلى فكره انا عمرى ماكرهت اى دوله وبرضوا مش بقول كده عشان ارضيكى لاء ابقى اسئلى لما عزيز القوم اعتدى على الدوله اللى جمبه مين اللى راح ساعد وقال احوش بدال مااتفرج مش دى مصر لو كنا بنكره حد ماكناش حاربنا مع حد ضد حد عشان احنا يهمنا كل حد يقف عند الحد بتاعه .واسالى العالم كله هتعرفى انه المصرى اكتر عربى منشغل بقضية فلسطين ولا انا بالف؟ويمكن اكتر من بعض الفلسطنبن انفسهم عندنا يااسيدتى الجميله الالاف من الطلبه والشباب القضيه الفلسطنيه العادله هى كل حياتهم وفكرهم ودى انا ساعات بنقد فيهم عشان عايز القضيه المصريه هى اللى تحوز على كل نشاطاتهم ويتوجهلها كل طاقتهم .وبعد ده كله كلمة انى شتمان لما الجيش فص ملح وداب ولا سخريه لا بالعكس دى اسمها الاحساس بالمراره مراره لانه ده بلد على الاقل عرفت انه المصرى لما راح اشتغل فيه كان بيبرطع كانه فى بلده واقولك حاجه كمان ماتعرفيهاش انه صدام الاسد كان بيتجبر على العراقى ويطبطب على المصرى تفتكرى اللى بيحب مصر يكره بلد كانت مصر فيها عايشه كده.بس والنبى برضوا والحق يتقال اسئلى عزيز القوم ده لما راح عزبة الكويت كانت عامل فيها شمشون الجبار وكانو عزاز القوم دول بيتهجموا على البيوت اسو او على نفس منوال اسرائيل فى فلسطين ولا دى من عندى؟واوعى تقولى دول قله عشان الالاف كانو بالطريقه دى ؟والحق يتقال برضوا هما الالاف الاسود دول فين الايام دى عشان يطلعلونا امريكا ؟واوعى تانى تقولى كلامى متناقض منين بتحترمهم ومنين بتقول عليهم كده اقولك انا قضيه فلسطين على العين والراس بس الفلسطينى اللى بيبرطع فى دول الخليج لا على اتعين ولا على الراس اظن مفهومه ؟
    اما بقى النوعيه اللى زيك مش قصدى زيك انك مش كويسه لا لاسمح الله ومش عشان حاجه لا لانى مؤمن انى بكلم بنت وعيب حد يكلم بنت بالطريقه دى .اوعى بقى والنبى تقوليلى ايه بنت دى هى البنت مش زى الولد اقولك ده موضوع تانى وعندنا مابنعاملش اخواتنا البنات زى الولاد.ومؤمن كمان انى بكلم بنت واعيه ومثقفه وليها فكرها وعقلها اللى زيك بقى اقصد زيك فى الفكر زيك فى التصور .وضرب مثل الاتنين اللى بيغنوا علينا عايز اوصلك لنقطه انى مابقولش بحبها كلام ولا شعارات زى مانتى فهمتى وبرضوا مش علشان الشعارات عيب لا شوفى واحد زى السادات حياتها كان كلها شعارات بس المهم مين يطبق الشعارات دى ويخليها حقيقه مش طموح ولا خيالات.اعيش فى الواقع الواقع اللى مصر فيه واقع مرير ومؤلم بس مرير ليه ومؤلم ده مننا ولا عشان كده محدش هيغيره الا احنا
    وانا طول عمرى مؤمن ومتاكد انه احنا الجيل اللى لما شافونا واحنا صغيرين غنوا وقالو الله الله ع المستقبل باين فى عيون كل ولادنا .هو ده الواقع اللى انا عايشه وعايش فى ريف مصر كمان فى بلد يمكن الصرف الصحى هيشتغل فى المستقبل البعيد وببص حواليا كتير اوى واعرف صحاب انتيم اوى وتعليم عالى وسافروا اشتغلوا فى السودان مش فى اوربا ولا خرافة الامارات ودى حقيقه.بس اقسملك بالله وبقول الكلام ده عشان اوصلك انه مش شعارات انى انا خريج السن وكنت شغال فى شرم وشغلانه احلى من الحلاوه واريح من الراحه ودخل اعلى من العلاوه وسيبتها وادينى بشتغل موظف اهو وعندى اخت وحوزها فى دوله خليجيه وصاحبى الانتيم فى الامارت وبيتحايل عليا واقولك اكتر انى لو رجعت اقعد جمب امى هعيش مستريح اوى .ده ليه عشان برضوا اوصلك لنقظه انه الشعارات مش وحشه بس للى يحققها واحنا لازم نحققها.والله العظيم لو ماتحققت الشعارات يبقى ربنا يلطف بينا وبولادنا واللى بيشتغل فى اوربا مسيره راجع وان ماسعاش عشان يغير وضحى يبقى يضمن بقى انه ولاده كمان يعيشوا متغربين .ارجو بقى انه يكون غرضى من الكلام وصل وارجوا كمان انى اكون عابر خفيف على مدونتك ويارب يكرم مصر وينصر العراق والفلسطنين ويهدى نفوس اللبنانين ويكرم السودانيين واليمنين ويصلح حال الخلايجه والسعوديين والعمانين ويقوى السوريين ويقرب لينا المغاربه والتوانسه والجزائريين والليبين .امين امين امين.

    ردحذف
  8. ونسيت اقولك انى مش بسال نفسى ليه السفن الامريكيه بتعدى لا دى يمكن سهله انما انا بسالها طب ليه البمبوطى اللى اتقتل فيها ماتاخدتش حقه وهى القناه دى بتاعت مين اومال عبد الناصر كان بيقول تاميم ايه ولا دى كانت حبكة دراميه فى الفيلم؟
    وعشان كده بقول انه لازم للوضع ده من رجاله عندهم شويه شعارات كده يجى كيلو ونص شعارات او اكتر ويغيروا ولا هتبقى الوضع اسو مما نتخيل وعشان كده انا كمان مؤمن انه لو مصر الحال فيها ماتعدلش يبقى ماتنتظريش امل فى اى بلد تانى
    مصر يوم ما قدرت عفت ويوم ماتقدمت شدت معاها ناس كتير وانا عايزها تعلى لينا ولجيرانا ولولاد عمنا وبرضوا الشعار اللى هختم بيه انه اطهر الناس قالولهم تروحوا فين قالو مصر

    ردحذف
  9. D007a Says
    عشان مش عارف اسجل اسمي كتبته هنا :D

    علي فكره بقي انا مش حابب إني عايش في مصر لكن فرحان إني اتولدت فيها لاني اتعلمت حاجات اعتقه بيئة مصر ساعدتني فيها .. لو لم أكن مصرياً لوددت أن اكون من الفايكينج و لو في الوقت الحاضر ابقي من قبائل البشتون الافغانية .. ليه فايكينج لأني بحب اوي تفاصيل حياتهم ونفسي أموت و أنا في إيدي سيف ولابس الزي بتاعهم و يكون بطريقة عنيفة و أنا لسه بصحتي مش عاوز أموت زي الخرفان اللي فضلوا يعالجوا فيها لحد ما جه اليوم و نفقت ... ليه بشتون أفغاني لان حياتهم بسيطه جداا و عندهم كبرياء و كرامه ونخوة و دماغهم ناشفه و حاجات كتير اووي

    D007a

    ردحذف

Say something...