لعلمك

لعلمك

إقرأ لي

دخلوا بكليك شمال :D

Blog Archive

الاثنين، مارس 24، 2008

postheadericon وحشتينى يا ورح الجماعة

ماحدش يفهمنى غلط يا جماعة .. انا عمرى ماعرفت واحدة اسمها روح الجماعة غير فى مسلسل (( لما بابا ينام )) .. روح الجماعة اللى انا اقصدها وبقول انها وحشتنى هى روح الفريق .. روح التعاون والتكاتف فى (( البر والتقوى )) .. روح الجماعة اللى محتاجينها علشان المجتمع دا يبقى صح وفى التمام ..
محتاجين بجد نتعلم ازاى نتقبل فكرة العمل المتكامل ، ان كل واحد يقبل انه يقوم بدوره حتى لو صغير ، من غير ما يستهتر ولا يتحكم .. محتاجين نتعلم نتقبل الافكار التانية علشان نوصل بالعمل اللى بنعمله لأعلى مراحل الكمال الممكنة .. محتاجين نتعلم ازاى نكمل نواقص بعضنا مش كل واحد يهز كتفه ويقول وانا مالى ..
حاجة كمان نفتقدينها بجد فى مصر .. دايما بنستسهل وننسب نجاح او فشل العمل لفرد واحد .. رغم اننا دايماً بنقول ان ايد لوحدها ما تصقفش .. دايماً لو العمل نجح كل واحد ينسب الفضل لنفسه او لحد بيحبه او اللى عايز يكسب رضاه .. لو فريق الكورة كسب ننسب الفضل لرئيس الجمهورية !! لو الاغنية حلوة ننسب كل الفضل للمطرب اللى بنحبه وننسى المؤلف والملحن (( برغم ان اداء المطرب ممكن يكون اسوأ مافى الاغنية !! )) لو الاولاد طلعوا كويسين الاب والام كل واحد فيهم ينسب الفضل دا لنفسه وبس وينسى اى عوامل تانية .. ولما العمل بيفشل بنجرى ندور على شماعة نعلق عليها غلطنا ..
نفسى بجد نتعلم نبطل الاستسهال دا وندى كل ذى حق حقه ونحط كل انسان فى مكانه الحقيقى وساعتها بجد كل انسان هيتفانى فى اتقان عمله ، ومش هيهتم ان كان شغله دا تحت الاضواء ولا ورا الكواليس لأنه هيكون واثق انه لو عمله كويس هياخد حقه من التكريم ولو غلط هيتعاقب .. تفتكروا ممكن روح الجماعة دى ترجع ؟؟

8 بوينتس أوف فيو:

رئيس جمهوريه نفسى يقول...

المشكله مش فى كده المشكله انى كل واحد عايز يبقى رئيس ليس مرؤس وعلشان كده كل واحد حر نفسه ده مالهوش دعوى بالاسم بتاعى ليه اسباب تانى
ثانيا مفيش هدف قومى نتوحد علشانه مش بس فى البر بس والله لو لقينى هدف يجمعنا كلنا حتلاقى كتير يشسارك وافتكر يوم الزلازل وروح التعاون والتبرع بالدمكانت من كل طبقات الشعب المصرى بس تلاقى فكره وهدف وتاكدى انها لسه موجوده ووحشتنى انا كمان والله

monaliza يقول...

ذكرياتنا الحلوة دايما بتكون اثناء العمل الجماعى حتى لو كانت عشان طبخ اكلة بسيطة مع الام والاخوات

سارورة يقول...

المشكله مش فى كده المشكله انى كل واحد عايز يبقى رئيس ليس مرؤس وعلشان كده كل واحد حر نفسه

-------------
تمام ، كل الناس مش قادرة تستوعب فكرة ان ربنا خلقنا طبقات وكل انسان ليه قدرات معينة لازم يوظفها فى المكان الصح والمنصب الصح

=================
ثانيا مفيش هدف قومى نتوحد علشانه مش بس فى البر بس والله لو لقينى هدف يجمعنا كلنا حتلاقى كتير يشسارك وافتكر يوم الزلازل وروح التعاون والتبرع بالدمكانت من كل طبقات الشعب المصرى بس تلاقى فكره وهدف وتاكدى انها لسه موجوده ووحشتنى انا كمان والله
-------------
فى هدف اكبر من انقاذ بلدنا من الحال المنيل اللى واصلاله دا ؟؟ الوضع بقى صعب وصدقنى مش غلطة حكومة وبس احنا كمان مستهترين وبنهمل فى حاجات كتييييير اووووووى وبنستهتر ونقول يعنى هى جت علينا ؟!!

احناعارف مشكلتنا ايه ؟؟ اننا لازم مصيبة علشان نفوق ونتحد
===========

مرورك شرفنى جدا جدا ويارب تبقى عادة باذن الله

سارورة يقول...

ذكرياتنا الحلوة دايما بتكون اثناء العمل الجماعى حتى لو كانت عشان طبخ اكلة بسيطة مع الام والاخوات

---------

تماااااااااام والله يا موناليزا ، بجد متعة ماتسويهاش متعة فى الدنيا

تخيلى كمان لما يكونوا شباب ومتجمعين مع بعض على هدف راقى .. بيستمتعوا ويكون ليهم ذكريات حلوة وفى نفس الوقت الملائكة بتحفهم .. بجد احنا محروومين من الاحساس دا

نورتينى يا جميلة بمرورك

صحفى مصرى مشاغب يقول...

من الجميل ان نبحث عن الكمال
ولكن ثقي أنه غير موجود علي الارض
مهمتنا ان نحاول ولا نتعثر في الطريق
ويكفينا شرف المحاولة وليس علينا النتائج
من الكمال هو ان نكون يدا واحدة وصوتا واحدا
ومن الواقع اننا سنظل مختلفين وهكذا خلقنا الله
علينا ان نبحث عن مساحات مشتركة واعمال مشتركة ولكن قبلها ان تكون لنا امال واحلام واهداف مشتركة

سارورة يقول...

كلام مظبوط جدا ومنطقى جدا جدا بس صدقنى يا استاذ احمد انى بغير لما بلاقى غيرنا شعوب كتير ، مهما كانوا مختلفين بس بيتفقوا على حاجة واحدة مصلحة بلدهم .. لكن احنا مش كده مش عارفة ليه ؟!!!

صحفى مصرى مشاغب يقول...

مين مبيغرش لما بيلاقي الاتحاد الاوربي علي اختلاف الوانهم واعلامهم وعملاتهم وثقافتهم وتاريخهم ودينهم وكل شئ وقد توحدوا
مين مبيغيرش لما بيشوف ان العالم كله بيتجه للتكتلات واحنا بس اللي بنتفرق
كلنا كده
لكن تعليقي كان علي المستوي الخاص بنا كأفراد داخل أوطان لا نملك فيها أي قرار
وقد أكون مخطئ

سارورة يقول...

فعلا احنا لا نملك اى قرار سياسي او قرار كبير او اقتصادى وكده لكن نملك قرار اننا نعيش صح على قد ما نقدر .. مانخربش فى الممتلكات العامة ومانرميش حاجات فى الشارع ومانهينش بعضينا ومانهملش فى شغلنا .. احنا واللى فى ايدهم القرار غلطانين ، لأن احنا الاتنين بنفرط فى الحياة الكريمة .. سعيدة جدا بنقاشك يا استاذ احمد

المتابعون

اعتبرها بيتك ♥

وِش القفص

خليك ورايا

دليفري..