لعلمك

لعلمك

إقرأ لي

دخلوا بكليك شمال :D

Blog Archive

الجمعة، مارس 28، 2008

postheadericon القوقع والقط وبغداد ..

وانا فى اولى ثانوى ، كنا بندرس البلهارسيا فى الاحياء
مدرس الاحياء قعد يشرحلنا بتعمل ايه فى الانسان وخطرها ايه على حياته ..
وبعدين بندرس دورة حياة البلهارسيا و جينا لمرحلة حياتها فى جسم القوقع ..
المدرس بيقول انها بتدخل القوقع وتدمر الكبد بتاعه وتطلع ..
فانا رحت شهقت وقلت له يا عينى والقوقع بيموت ؟؟!!
المدرس برقلى وبحلقلى وكان عايز يضربنى باللى فى ايده ...
[ CUT ]
[ FLASH BACK ]
وانا فى ابتدائى كان عندى قط بحبه اوووووى وكان بالنسبة لى ابنى .. فى يوم القط خرج الشارع وتاه ..
وبعد كام يوم لقيته مرمى جنب الاسفلت ، جيراننا اللى فى الشارع اللى ورانا قتلوه
انا انهرت وبالنسبة لى الدنيا وقفت .. لأنه كان رفيقى الوحيد فى الدنيا
وعيطت جامد وكتبت له قصيدة رثاء .. وكل يوم كنت بعيط قبل ما انام لما بفتكره
وبكتبله جواب اوعده انى هنتقمله (( ماعرفش ازاى هنتقم )) ووعدته اول اما ابقى صحفية هثير
قضية الرفق بالحيوان ووصل تفكيرى انى ابلغ عن الناس اللى ماعندهاش رحمة دى
[ CUT ]
من خمس سنين ...
بابا كان زعلان .. وماما زعلانة ..
والبيت فيه حالة غريبة اوى ..
ببص فى التليفزيون لاقيت تمثال صدام بيقع ..
وناص بتهيص وناس بتبكى ..
وشفت دخااااااااااان ودمار فى بغداد ..
عرفت انها وقعت فى ايد الامريكان ..
دخلت اوضتى وقعد ت اعيييييييييييط جاااااااااااامد قوى
حسيت كان قلبى بيتقطع ..
وكتبت قصيدة ارثى فيها بغداد ..
[ CUT ]
من 3 سنين ..
صحباتى بيقروا كشكولى اللى فيه خواطرى واشعارى ..
قروا القصيدة اللى كاتباها للقط بتاعى وقعدوا يضحكوا اوى اوى ...
وواحدة اتريقت عليه ، خاصمتها شهر وحسيت كان مشاعرى اتهانت ..
وبعدين قروا قصيدة بغداد اتأثروا اوى ..
استغربت !! انا بحب القط وبحب بغداد ليه بتفرقوا ؟!!
[ CUT ]
السنة دى ...
شفت الناس بتموت من الجوع
شفت اطفال بتنام على الرصيف جعانة ..
شفت بنات شرفها بيضيع علشان الظروف رمتها فى الشارع ...
شفت الناس بتتقل وهى مستنية رغيف العيش ..
وشفت الناس المسئولة عن البلد دى مطنشة ومش حاسة بحاجة ..
شفتهم بيقلبوا الدنيا علشان فنان مات وما بيتهزوش وكل يوم الاف بيموتوا من الجوع ..
ساعتها كرهتهم وحسيت انى عايزة اموتهم ..
وعرفت بس وقتها ليه استاذى اتضايق علشان صعب عليا القوقع ومافكرتش فى البلاوى اللى البلهارسيا بتعملها للانسان ..
عرفت ليه صحباتى اتريقوا على القصيدة بتاعة القط ..
عرفت انه ما ينفعش تكون معاك كاميرا وتصور بيها ممثلة وتسيب عالم محترم يعيش ويموت نكرة
وعرفت انه ما ينفعش يبقى معاك قلم وتكتب عن لعيب كورة وتسيب واحد محبوس ظلم وممكن يموت فى السجن ظلم وما تكتبش عنه ..
قطى الحبيب : لم انساك لحظة ، وحبى لم يقل لك لحظة ، ولم انسى وعدى لك ..
لكن سامحنى ، لن افى بوعدى لك قبل ان يرفقوا فى بلدى بالانسان ..
لن يسمعنى احد وانا انادى بحقك فى الرحمة والمعاملة الطيبة واخوانى وانا نفسى لا انالها ..

12 بوينتس أوف فيو:

واحد بيدور علي قلبه يقول...

حلو اوي كلامك دا جميل احساسك بكل حاجه والاجمل انك تحسي وتطلعي كلامك في رثاء بس في اوقات مش هيبقي كفايه علينا الكلام زهقنا من كل حاجه ومدونتك جميله قوي .

عمو احمد يقول...

مؤثره اوى ياساره..بس انا شايف الرحمه مبتجزاش الى مبيرحمش الحيوان مبيرحمش الانسان
وربنا يفك اسر بغداد والعرب كلهم

عمو احمد يقول...

وكمان احب اضيف ان صحابك والمدرس بتاعك استغربوا من رد فعلك مش عشان الى شيفينه
بيحصل للانسان,لان الرحمه فى نظرهم مقتصره على الانسان بس

Wael يقول...

تدوينة اكثر من رائعة

محتاجين انها توصل لناس كتير عشان الانظار والكاميرا والاعلام كله يتوجه للمكان الصحيح , ويبص عالشارع بدل مايبص عالملاعب , ويحلل المشاكل بدل مايحلل المباريات , وينتصروا لحقوق الانسان بدل مابينتصروا لحقوق القطط والسلاحف .

هاقول ايه ؟ بيستحضرنى الان شكل الراجل اللى ف فيلم جاءنا البيان التالى :
" حسبى الله ونعم الوكيل "

صحفى مصرى مشاغب يقول...

عرفت انه ما ينفعش تكون معاك كاميرا وتصور بيها ممثلة وتسيب عالم محترم يعيش ويموت نكرة وعرفت انه ما ينفعش يبقى معاك قلم وتكتب عن لعيب كورة وتسيب واحد محبوس ظلم وممكن يموت فى السجن ظلم وما تكتبش عنه .. قطى الحبيب : لم انساك لحظة ، وحبى لم يقل لك لحظة ، ولم انسى وعدى لك .. لكن سامحنى ، لن افى بوعدى لك قبل ان يرفقوا فى بلدى بالانسان .. لن يسمعنى احد وانا انادى بحقك فى الرحمة والمعاملة الطيبة واخوانى وانا نفسى لا انالها ..


قطعا هذه جميلة جدا
ومؤثرة فعلا
وهادفة وموحية
ما قبلها كان يحتاج لاعادة صياغة
ارجو لو امكن تعيدي صياغتها وتبعتيهالي عالايميل

mohamed يقول...

رغم انى منقطع عن التدوين فى مدونتى استراحة لكن ده ما منعش انى امرر على المدونات اللى حبتها .. ومدونتك منهم .. قلمك محترم ويحترم وكلماتك بتنقط احساس .. الموهية منحة الهية والمنحة دى عندك وبتظهر فى كتباتك على المدونة .. تحيات عقل يحترم عقلك

سارورة يقول...

واحد بيدور على قلبه :
فعلا ، فى وقت المفروض نبطل الكلام ونشتغل من غير ما نتكلم ، علشان الفعل ابلغ بكتير من الكلام .. ميرسى جدا لمرورك الجميل ورأيك الاجمل

سارورة يقول...

عمو احمد : مؤثره اوى ياساره..بس انا شايف الرحمه مبتجزاش الى مبيرحمش الحيوان مبيرحمش الانسان
وربنا يفك اسر بغداد والعرب كلهم

-----------------

معاك حق يا عمو احمد ، فعلا اللى ما بيتعلمش يرحم الحيوان مش هيرحم الانسان واسلامنا امرنا نرفق بالحيوان .. لكن دلوقتى لو ما رحمناش الانسان عمره ما هيقدر يرحم الحيوان .. هيقول يعنى هو حد بيرحمنى علشان ارحم .. لأن فاقد الشئ لا يعطيه .. رغم انى معترضة على المقولة دى بس احياناً بتكون صادقة

سارورة يقول...

وكمان احب اضيف ان صحابك والمدرس بتاعك استغربوا من رد فعلك مش عشان الى شيفينه
بيحصل للانسان,لان الرحمه فى نظرهم مقتصره على الانسان بس

-----------------

بالنسبة لأستاذى هو اكيد استغرب لأن القوقع مش مفيد فى اى حاجة وما ينفعش اهمل الضرر اللى بيحصل للانسان وافكر فى الضرر اللى هيحصل للقوقع

اما صحباتى فعلشان بيعتبروا ان القطط الحاجة الوحيدة اللى ممكن نعملهالها اننا نشوطها برجلينا او نحطلها الفار بالمصيدة علشان تخلصنا منه

سارورة يقول...

wael : تدوينة اكثر من رائعة

محتاجين انها توصل لناس كتير عشان الانظار والكاميرا والاعلام كله يتوجه للمكان الصحيح , ويبص عالشارع بدل مايبص عالملاعب , ويحلل المشاكل بدل مايحلل المباريات , وينتصروا لحقوق الانسان بدل مابينتصروا لحقوق القطط والسلاحف .

هاقول ايه ؟ بيستحضرنى الان شكل الراجل اللى ف فيلم جاءنا البيان التالى :
" حسبى الله ونعم الوكيل

------------------------
عارف محتاجين ايه كمان يا وائل ؟!! محتاجين ان الجيل اللى يطلع من الاعلاميين الحاجات دى تتزرع فيه ... بس هنقول ايه غير حسبى الله ونعم الوكيل فى اللى بيبوظوا اجيالنا من اول يوم يدخلوا فيه المدرسة نورتنى وشرفتنى بجد يا وائل

سارورة يقول...

صحفى مصرى مشاغب :
قطعا هذه جميلة جدا
ومؤثرة فعلا
وهادفة وموحية
ما قبلها كان يحتاج لاعادة صياغة
ارجو لو امكن تعيدي صياغتها وتبعتيهالي عالايميل
============

ميرسى يا استاذ احمد ربنا يخليك ، على فكرة حاولت اعيد صياغتها بس للاسف فشلت ، ياريت لو تساعدنى وتدينى حتى كلمة السر للتغيير ، يعنى تدينى ملحوظة تفتجلى الطريق فى انى اعيد الصياغة .. وبجد ميرسى جدا لنقدك البناء اللى بيخلينى اثق فى رأيك جدا

ميرسى جدا يا استاذ احمد ومنتظرة بجد الملحوظة ، علشان احيانا بنبقى عايزين بس طرف الخيط علشان نقدر نكمل

سارورة يقول...

محمد : رغم انى منقطع عن التدوين فى مدونتى استراحة لكن ده ما منعش انى امرر على المدونات اللى حبتها .. ومدونتك منهم .. قلمك محترم ويحترم وكلماتك بتنقط احساس .. الموهية منحة الهية والمنحة دى عندك وبتظهر فى كتباتك على المدونة .. تحيات عقل يحترم عقلك

----------------
يالله على الكلام ، بجد مش عارفة ارد ميرسى جدا جدا يا محمد والله اعجزتنى عن الرد كل دا من ذوقك .. شرف كبير ليا كلامك دا يارب ابقى عند حسن ظنك يااااااارب

المتابعون

اعتبرها بيتك ♥

وِش القفص

خليك ورايا

دليفري..