2008-03-06

كلمات لن يقرأها هو ....!!

عندما تتكلم عن انسان فان اصدق الكلمات هى تلك التى تكتبها وانت على يقين انه لن يقرأها ..
دى حكمة استخلصتها مع نفسى ، ولأن من المستحيل ان د احمد خالد توفيق يوصل للمدونة الغلبانة دى فانا حابة اتكلم عنه
وانا متأكدة انه مش هيقرا الكلام دا ..
والسبب ببساطة انى عايزة اتكلم عنه بصدق لأنه بجد انسان لم يكتب يوما الا باحساس صادق ..
القصة ومافيها انى مغرمة بحاجة اسمها كتابات د احمد خالد توفيق ،
وشوية شوية اكتشفت ان د رفعت اسماعيل هو فارس احلامى ..
الكلام دا من ايام ابتدائى يعنى انا تربية ايدين د احمد ، المهم كبرت واتلطشت فى متاهة الزمن واتحطيت فى مواقف كتيرة صعبة وكنت دايما بفتكر اسلوبه وافكر كتير على هدى اللى بقراه ليه .. واخترت مهنة البحث عن المتاعب وانا مترددة من كتر ما الناس شككتنى فى انى مختارة صح ..
وعدت الايام والفاس وقعت فى الراس وانا لسة شاكة انى صح ..
لحد ما كانت السبب او الحجة اللى اتحججت بيها ورحت قابلته ..
من الصدمة نسيت كل اللى اتعلمته ، نسيت كل اللى قريتهوله وكل اللى اعرفه عنه وكنت بس بدور على رفعت اسماعيل...
على العكس تماما من كل حاجة بيوصف بيها نفسه د احمد انسان مهذب وطيب ودود لابعد حد
وحقيقى من الناس النادرة اللى اتكلمت معاها كانه حد اعرفه من زماااااااااااااان اووووووووى
بجد من فرحتى بمقابلته ومن خوفى انه يعتبرنى بجامله ما قولتلهوش انى بجد بشكره من كل قلبى على كل حرف كتبه
وعلمنى كتيييييييييييير اوى ومتعنى اكتر ...
وبرغم مرور اكتر من اربع شهور على مقابلتى ليه الا انى بجد لسة روحى منتعشة من لقاؤه ..
احساس رائع جدا لما تلاقى نفسك على بعد خطوات من حد متخيل انه وهم او سراب او مجرد كلمات على ورق ..
ممكن ناس كتير جدا تقول ايه لازمة الكلام دا ؟!!! هقولكم
وانا بقلب فى المدونات ووانا بقرأ فى الدستور (( الجرنال ، مش بتاع الحكومة )) لقيت ناس كتير جدا بتحبه وناس كتير جدا متأثرة باسلوبه وناس كتيرة كان هو طوق النجاه بالنسبة ليها وكتاباته الحاجة الوحيدة اللى قالتلهم انتوا صح خليكوا زى ما انتوا ...
وقارنت دا بانى لما بحكى لاصحابى عنه ماحدش يعرفه الا قليل جدا ، ولما رحت مكتبه فى كلية الطب لقيت اغلب الناس هناك ماتعرفوش .. حسيت انه بجد والله حرام .. حرام حد زى دا يعيش ويموت - بعد عمر طويل باذن الله - وفى ناس كتيييير ماتعرفش عنه حاجة
وبعدين سرحت كده واسترجعت اغلب عظماء الادب فى بلدنا لقيت ان ناس كتيربردو ما تعرفش عنهم حاجة ..
وبعدين فوقت كده واكتشفت انى فى مصر ، فزالت دهشتى ..
المهم بقى علشان لسانك حصانك والذى منه فانا بجد حابة اوجه كلمة شكر من كل قلبى للانسان دا ولكل حد زيه ونفسى كل حد يقرا البوست دا ويكون يعرف د احمد خالد يقولى فى التعليق هو اتعلم منه ايه ونفسه يقوله ايه .. ولو حد مايعرفوش وبيحب الادب والابداع انصحه يعمل سيرش جوجل عنه وعن ماوراء الطبيعة وسفارى واى عمل من اعماله وانت هتكتشف حد عظيم ..

هناك 7 تعليقات:

  1. عندما تتكلم عن انسان فان اصدق الكلمات هى تلك التى تكتبها وانت على
    يقين انه لن يقرأها
    ولن يسمعها ايضا
    عارفة احنا اجيالنا تعرف قصة حياة هيفا ونانسى
    ومتعرفش قصة سيدنا يوسف
    بحس دايما بتفاهة الافكار وسفاهتها
    تحياتى

    ردحذف
  2. عندما تتكلم عن انسان فان اصدق الكلمات هى تلك التى تكتبها وانت على
    يقين انه لن يقرأها
    ولن يسمعها ايضا
    عارفة احنا اجيالنا تعرف قصة حياة هيفا ونانسى
    ومتعرفش قصة سيدنا يوسف
    بحس دايما بتفاهة الافكار وسفاهتها
    تحياتى

    ردحذف
  3. ازيك ياسارورتى
    مبروووووووووووووووووووك
    على رجوعك لحياتك اللى هى النت
    اقصد رجوع النت ليكى
    وعلى فكره ده ببركة دعايا
    اما بالنسبه لموضوعك فا ان اوعدك انى حبحث عنه فى جوجل ومنك نستفيد ياجميل
    سلام ياسارورتى

    ردحذف
  4. محمد : معاك حق والله فعلا ، لسة امبارح كنت سامعة واحدة فى الراديو المذيعة بتسألها سؤال فى الفن جاوبت زى البرابنت جات تسألها عن قصة بلقيس مارديتش لا من فوق ولا من تحت .. ربنا يرحمنا
    ميرسى لمرورك الجميل

    ردحذف
  5. دودو وحشااااااااااااانى يا بنوتة اوووووى ، وللاسف النت ماجاش اوى يعنى دا بيفوق شوية ويرجع يغمن عليه تانى هههههههه وبركاتك يا حاجة دودو ههههههههه

    ردحذف
  6. دكتور أحمد إنسان متواضع جدا ربنا يباركله بجد

    قال عني كلام مشجع أوي قبل كده أنا مقولهوش في حد أصغر مني (عنتزة بقى)

    لا لا بجد راجل بركة والله

    ربنا يحفظه

    تحياتي

    ردحذف
  7. هههههههههههه ايه التواضع دا ياعم احمد هههههههههه

    ربنا يسمع منك يارب ويخليه لكل محبيه

    ردحذف

Say something...