2008-04-25

ايوة انا اللى هغير الكون (2 ) عامل الناس كما تحب ان يعاملوك ..

كتير مننا بيكونوا ولاد ناس ومحترمين اوى فى كلامهم
ويخرجوا يتعاملوا مع العالم الخارجى يلاقوا الوضع مختلف كتير ..
فى ناس
بتفضل مصدومة .. وناس بتتغير للاسوأ ..
لكن بجد اللى بحترمهم اوى اللى بيغيروا
اللى حواليهم للافضل ..
الموضوع وببساطة قالوه اللى سبقونا فى كلمتين " عامل
الناس كما تحب ان يعاملوك " ..
انا عن نفسى فضلت فترة مصدومة من طريقة الناس فى
المعاملة وفى الكلام ..
وبعدين قلت لنفسى يا ابقى زيهم يا يبقوا زيي .. واصريت
انى ادخل التحدى دا ..
بقيت اعاملهم بالذوق والادب ، واصر انى استعمل كلمات
البعض
بيعتبرها انقرضت زى " لو سمحت " ، " اتفضل " ، " آسفة " ، بعد اذنك ..
الخ
فى الاول قابلت ناس كتير تتريق عليا ، بس بعد كده بقت الناس تعاملنى بالمثل
..
زى ما بقول للسواق اتفضل الاجرة بيقولى اتفضلى الباقى ،
وزى مابقول
للبياع لو سمحت بيقولى اتفضلى وغيره وغيره وغيره ...
حتى عندنا فى البيت كنت
اتضايق جدا لو عملت حاجة وفى البيت
عدت عليهم عادى من غير ما حد يقولى تسلم ايدك
ولا حاجة ..
بقيت انا اقول لماما ولاختى ولاخويا ولبابا تسلم ايدك على كذا لو
حتى حاجة بسيطة ..
لقيتهم مع الوقت اتعودوا عليها وبيقلولى تسلم ايدك على اى
حاجة ولو بسيطة ..
كمان انا مش من النوع اللى بيحب يأخد اوامر من حد ،
فعودتهم لما اطلب طلب ما اصيغهوش فى صورة امر ..
بقيت اقول معلش لو سمحت او
ممكن اطلب طلب رخم ،.... الخ ..
بردو نفس الموضوع انعكس عليا
بجد التجربة دى
من اكتر التجارب اللى حسيت انى بجد غيرت حاجة
و زادتنى اصرار على مواصلة محاولة
تغيير الكون ..

هناك 15 تعليقًا:

  1. هو فعلاا شي ممتاز
    الاحترام والاسلوب
    في التعامل بس للاسف
    في ناس كتير بتجاربي
    واحتكاكي بالناس بيفتكروة
    خوف اوضعف
    دومتي بخير

    ردحذف
  2. عندك حق انا لما اشتغلت وخرجت شفت الناس على حقيقتها واتصدمت ولحد دلوقتى مصدومة لانى بجد مش عارفة اتعامل معاهم وعملت زى ما انتى عملتى واتمسكت باللى اتربيت عليه وبأسلوبى فى الكلام والتفكير بس للأسف هما متعودوش ولا حاجة ناس كتير منهم متعودين على الهمجية فى كل حاجة ومتهيألى لو كل الناس حاولت تحافظ على الحدود وعلى الذوق والكلام الجميل اللى بتقولى عليه متهيألى كانت العلاقات الانسانية بين الناس كانت تبقى افضل بكتير والحب كان حيبقى كتير
    تحياتى وحبى

    ردحذف
  3. تمام يا ساره

    كنت قريت كتاب كدجه كان بيتكلم عن الشخصيه والتعامل مع الناس وازاي تأثري في اللي حواليكي وتمتصي غضبهم

    هوا كان كتاب بالانجلش ومفهمتش حاجه منه صحيح

    لكن كان بيقول نفس الكلام اللي انتي بتقوليه ده

    بمعني انك تقدري تخلي الناس كلها تعاملك ززي منتي عاوزه

    ممكن تتكلمي مع واحد بيتنرفز من اي كلمه وصوته عالي على طول ، واحد مثلا بيعاملك كأنك (كافره) لمجرد مثلا انك بنت جامعيه ، تتكلمي معاه بمتنهي الهدوء وصوتك يكون واطي اوي ، وكل مهوا يعلي صوته انتي توطي صوتك (لحد مماسمعكيش طبعا :))) ) ، لا اقصد انك لازم تكوني مرنه ولا بلاش مرنه دي ... لازم تكوني انتي الفعل مش رد الفعل

    يعني انتي تتكلمي بالراحه عشان غيرك يكلمك بهدوء ، تكوني محترمه عشان الناس تعاملك بذوق ...

    بس على فكره ... محدش يقدر يغير الكون ... ممكن تغيري البني آدمين آه ... لكن الكون لأ :)

    ردحذف
  4. عندك حق الناس فعلا بدات تنسى الزوق ولاحترام..وعوزه الى يفوقها بلمعمله الكويسه ويوريهم ان لسه فى احترام وزوق فى الدنيا ..ده انا حصلى موقف فى الاتوبيس ..شوفت ست وقفه وانا قاعد ومحدش عنده زوق يقعدها رحت قايم ومقعدها..ووقفت جنبها عشان الاتوبيس كان زحمه ووقفت جنبها..تخيلى انها اول موصلت للمكان الى ريحاله رحت زقانى وقلتلى انت مالك زاحم الدنيا كده ليه..ولا حتى بصتلى بنظرة شكر..الدنيا خربت

    ردحذف
  5. ياسر : فعلا يا ياسر معاك حق فى ناس بتعتبر دا ضعف ، وبتعتبر الناس المحترمة بسكوتة وفريسة سهلة لكل غشهم واستعباطهم ليهم .. بس اقولك ، ممكن تعرفهم كويس انك مش ضعيف وانك مش هفية زى ما بيقولوا وفى نفس الوقت ما تكونش مش محترم .. نورتنى وشرفتنى بجد يا ياسر

    ردحذف
  6. والله يا فيس مون لو اتعاملنا كلنا مع بعض على اساس ان الدنيا حلوة ، وان اللى قدامنا دا مش هو السبب فى شقائنا ولا التكشيرة والتعامل الوحش هو اللى هيحل المشاكل كان زماننا ارتاحنا كتير والوضع اختلف كتير .. لو اتعاملنا زى ما االرسول صلى الله عليه وسلم امرنا ، نبتسم فى وجه اخينا وعرفنا انها صدقة كان زمان الوضع اختلف بس هنقول ايه

    ردحذف
  7. ليكوريكا يقول...
    تمام يا ساره

    كنت قريت كتاب كدجه كان بيتكلم عن الشخصيه والتعامل مع الناس وازاي تأثري في اللي حواليكي وتمتصي غضبهم

    هوا كان كتاب بالانجلش ومفهمتش حاجه منه صحيح

    لكن كان بيقول نفس الكلام اللي انتي بتقوليه ده
    ---------------

    هههههههههههههههههههه ما فهمتش منه وبيقول زى اللى بقوله ربنا يكرمك يا ليكو ههههههههههه
    _______________________________


    بمعني انك تقدري تخلي الناس كلها تعاملك ززي منتي عاوزه

    ممكن تتكلمي مع واحد بيتنرفز من اي كلمه وصوته عالي على طول ، واحد مثلا بيعاملك كأنك (كافره) لمجرد مثلا انك بنت جامعيه ، تتكلمي معاه بمتنهي الهدوء وصوتك يكون واطي اوي ، وكل مهوا يعلي صوته انتي توطي صوتك (لحد مماسمعكيش طبعا :))) ) ، لا اقصد انك لازم تكوني مرنه ولا بلاش مرنه دي ... لازم تكوني انتي الفعل مش رد الفعل

    يعني انتي تتكلمي بالراحه عشان غيرك يكلمك بهدوء ، تكوني محترمه عشان الناس تعاملك بذوق ...

    ------------------------

    اه والله جيت على الوجيعة بموضوع كافرة علشان بنت جامعية دى ، وفعلا كنت قريت بردو حاجة زى كده اننا كل ما نعلى صوتنا اللى قدامنا تلاقيه هيعلى صوته والعكس صحيح
    ____________________________

    بس على فكره ... محدش يقدر يغير الكون ... ممكن تغيري البني آدمين آه ... لكن الكون لأ :)

    -------------------

    لأ على فكرة انا اللى هغير الكون دا ليه جزء اول يا ليكو , بشرح فيه الفكرة هتلاقيها فى بدايااااااااات المدونة خالص ، وهى المقصود بيها الرد على كلمة (( يعنى انت اللى هتغير الكون )) اللى الكل بيقولها لو حاولت تصلح حاجة فى المجتمع حواليك

    ردحذف
  8. eslam يقول...
    عندك حق الناس فعلا بدات تنسى الزوق ولاحترام..وعوزه الى يفوقها بلمعمله الكويسه ويوريهم ان لسه فى احترام وزوق فى الدنيا ..ده انا حصلى موقف فى الاتوبيس ..شوفت ست وقفه وانا قاعد ومحدش عنده زوق يقعدها رحت قايم ومقعدها..ووقفت جنبها عشان الاتوبيس كان زحمه ووقفت جنبها..تخيلى انها اول موصلت للمكان الى ريحاله رحت زقانى وقلتلى انت مالك زاحم الدنيا كده ليه..ولا حتى بصتلى بنظرة شكر..الدنيا خربت
    -----------------------
    بجد يا اسلام موقف يحرق الدم ، ومجرباه فى اشكال ومواقف مختلفة ... صحيح انت مش عامل الخير دا علشان مستنى شكر لكن على الاقل مش مستنى نكران للجميل واساءة .. بس بردو لسة عندى امل ان الوضع ممكن يتصلح يا اسلام

    ردحذف
  9. والله ياسارة الفكرة اللي عملتيها في حد ذاتها حلوة وفكرة تحدي يااغيركوا ياتغيروني دي عجباني اوي ومدياني شوية انطباع شقاوة عنك وده كميل
    لكن برضه متحصريهاش في حضرتك ولو سمحت
    مش تقليل من ده اطلاقا انما انا اعرف ناس احلي ناس تكلمك الكلام الحلو ده ويادوب تلف ضهرك يرفعوا القناع وتشوف الوش التاني وبلاقيهم ناس مش لزيزة خالص في التعامل فلو تقدري تدخلي التحدي بتاعك ده في طرق التعامل والمزايا الحلوة لاي انسان تبقي حاجة عظيمة
    مممممممممم انا عمال ارص كلام مجعلص كده ليه ....بصي يابنتي مدونتك دي روشة اوي ودماغك عجباني وشكلها دماغ متكلفة
    يالا فرصة نضيفة ياسارة

    ردحذف
  10. حاسس انك بتتكلمى بلسانى فى الموضوع ده والله :))
    تصدقى انا فى واحد صحبى بيتريق عليا علشان لما اروح اشترى حاجه من السوبر ماركت واقول للراجل لو سمحت عاوز كذا وكذا وبعد ما اخدها اقول للراجل شكرا
    او لما اجى اقول للسواق اتفضل الأجره واقوله متشكر جدا لما يقف ينزلنى

    بس كفايه عليا الأحترام اللى بشوفه وباخده من الناس لما بتعامل معاهم كده

    ــــــ
    وابقى اقعدى اون لاين ...علشان ببقى شايفك اوفلاين :))

    ردحذف
  11. الدكتور ممدوح المنير بلدياتنا المحلاويّ اعتقل عقب تغطيته إضراب السادس من أبريل في المحلة الكبرى. نرجوا من السادة المدونين الطنطاويين التنويه بخبر اعتقاله. والمطالبة بالإفراج عنه في أسرع وقت.

    http://almonnir.blogspot.com

    ردحذف
  12. دكتور مستكنيص يقول...
    والله ياسارة الفكرة اللي عملتيها في حد ذاتها حلوة وفكرة تحدي يااغيركوا ياتغيروني دي عجباني اوي ومدياني شوية انطباع شقاوة عنك وده كميل
    لكن برضه متحصريهاش في حضرتك ولو سمحت
    مش تقليل من ده اطلاقا انما انا اعرف ناس احلي ناس تكلمك الكلام الحلو ده ويادوب تلف ضهرك يرفعوا القناع وتشوف الوش التاني وبلاقيهم ناس مش لزيزة خالص في التعامل فلو تقدري تدخلي التحدي بتاعك ده في طرق التعامل والمزايا الحلوة لاي انسان تبقي حاجة عظيمة
    مممممممممم انا عمال ارص كلام مجعلص كده ليه ....بصي يابنتي مدونتك دي روشة اوي ودماغك عجباني وشكلها دماغ متكلفة
    يالا فرصة نضيفة ياسارة

    _____________________

    على فكرة يا دكتور اللى انت بتقول عليهم دول منافقين ، مش ناس محترمين ابداً بجد والله .. النضافة فى التعامل لازم تكون فى كل الوجوه .. وصدقنى انا مجربة كتييييييييير ناس من اللى انت بتقول عليهم دول وبجد بيخلونى اكره حياتى واكره الناس ، بس بردو برجع واقول لازم يكون فى حلو وفى وحش ..

    منوووووووووووووورنى يادوك وبجد ميرسىىىىى اوى ليك على رأيك الجميل فى مدونتى وفى دماغى

    ردحذف
  13. no4denmark يقول...
    حاسس انك بتتكلمى بلسانى فى الموضوع ده والله :))
    تصدقى انا فى واحد صحبى بيتريق عليا علشان لما اروح اشترى حاجه من السوبر ماركت واقول للراجل لو سمحت عاوز كذا وكذا وبعد ما اخدها اقول للراجل شكرا
    او لما اجى اقول للسواق اتفضل الأجره واقوله متشكر جدا لما يقف ينزلنى

    بس كفايه عليا الأحترام اللى بشوفه وباخده من الناس لما بتعامل معاهم كده

    ---------------------
    صح والله

    عارف كمان لما بتتعامل مع الناس البسيطة اللى الناس اتعودت تعاملهم بغطرسة وتعالى بالطريقة دى

    بجد بيحترمك جدا وبيحبك فعلا وبيدعيلك من قلبه ربنا يكرمك لأنك بتحسسه بانسانيته وبتعامله زى ما المفروض اى انسان يتعامل بيها لأنه فعلا مش اقل من اى انسان ..
    _____________________

    وابقى اقعدى اون لاين ...علشان ببقى شايفك اوفلاين :))

    ---------------

    ياااااااااادى الكثووووووووووف
    والله يا اما مش ببقى نافع اتكلم علشان مش فى المود واللى هيكلمنى هنكد عليه يا اما بكون داخلة تخاطيف او بعمل حاجة .. فسامحنى بجد يا نو لأنى مش من هواة الماسنجر اوى

    ردحذف
  14. ربنا يفك كربه يارب يا احمد

    ردحذف
  15. كلامك صح اكيد لوكلنا بدأنا بنفسنا وماستنياش الأخر يبدأ حاجات كتير قوي هتتغير في حياتنا للأحسن

    ردحذف

Say something...