لعلمك

لعلمك

إقرأ لي

دخلوا بكليك شمال :D

Blog Archive

الأربعاء، أبريل 02، 2008

postheadericon لحد امتى ؟!!

شفت النهاردة منظر وجع قلبى بجد ، هو مش جديد ، ولا اول مرة اسمع عنه
بس بجد اول مرة اشوفه .. كنت واقفة على موقف الميكروباصات مستنية اركب علشان اروح الكلية
وبعدين كان فى لجنة مرور ، ماسكين فى مواطن ماعرفش هو سواق ولا مواطن عادى ونازلين بهدلة فيه ..
بيهينوه ويضربوه وهو ياعينى بجد شكله غلبان ، مش فقر او كده بس مالوش ضهر ، وواقف معاه واحد عجوز
يهينوه وخلاص كرامته وجعاه ومش قادر يرد عليهم ، يبص بذل ومش قادر يتكلم
ليه وليه مش معاه بطاقة ، ايه المشكلة افرض نسيها ياعم ..
يقولهم اروح القسم يقولوا له وانت فاكر انك هتروح القسم من غير بطاقة دا بعدك ..
وضربوه ..
انا ماعرفش ايه الحكاية بالظبط ، بس كل اللى اعرفه ان دا انسان ، حتى لو غلط من حقه يتعامل معاملة محترمة وانسانية
دا برا بيبقى قاتل قتيل وبيفضلوا يعاملوه حلو لحد ما يعدموه !!
على حد علمى دا مواطن ما ثبتش انه اذنب ، وما ثبتش انه ارتكب جريمة ، ليه تعاملوه كده ؟؟!!
لحد امتى الناس هتبص بانكسار وذل وما تقدرش تعمل حاجة ؟؟!!
لحد امتى بتوع الشرطة هيفضلوا يتعاملوا معانا على اساس اننا من جنس وهما من جنس تانى ؟؟!!
لحد امتى هنفضل نكرههم ويذلونا ؟؟!!
مش عارفة ليه بجد العلاقة بينا وبين الشرطة وصلت لحد كده ؟
ليه بقوا متخيلين انهم ماحدش يقدر عليهم وانهم حقهم الطبيعى وواجبهم الرسمى ذل واهانة الناس مش حمايتهم وحماية امنهم ؟؟!!
لحد امتى هيفضلوا يعملوا كده ونكرههم بعد ما كنا بنحترمهم ؟!! بعد ماكنا نفرح بولادنا لما يقولوا عايزين يطلعوا
ضباط ..
الحدوتة كلها على بعضها باسبابها ونتايجها توجع بجد ..
ملحوظة : انا وقتها اترعبت ، انا لحد دلوقتى ماعملتش بطاقة ،
وكمان كارنية الكلية ضاع ، والكارنية الوحيد اللى فى حوزتى بتاع الجريدة ومش مختوم ،
وكمان كنت ناسياه فى البيت ، وقتها قلت بقى ، على كده ينزلونى من الميكروباص
يهينونى ويبهدلونى لأنى مش معايا بطاقة ؟!!!!

18 بوينتس أوف فيو:

أحمد منتصر يقول...

ما يا سارة لازم نحترم حقوق الإنسان ف بلدنا

أنا ف موضوع ف بالي من فترة طويلة عن فترة شغلي ف سايبر معفن ف حتة شعبية طلعت منه ف حيرة إزاي نعامل الناس الشعبيين باحترام ما عنهم مش بيحترموا بعض أصلا

فلازم ننشر بين الناس الشعبيين ثقافة احترام الآخر وتقبله الأول

وبعدين يبقى ده اتجاه الدولة من قاعدة شعبية كبيرة

ولازم أقول إن التفكير السلفي خصوصا والديني عموما بيزيد جرح رفض الآخر باطراد

تحياتي يا سارورة :)

أمـ الله ـة يقول...

لا حول ولا قوة إلا بالله

ربنا يهدي كل جبار

عمو احمد يقول...

ظباط الشرطه نسيو ان الحكومه بتقطع من مرتبات الشعب عشان تديهم مرتبتهم الى بياخدوها ويرجعو يضربو ويهينو فينا
نسيو ان شغلنتهم حمايه الشعب مش ضربه

Sherif Mesallam يقول...

ياااه يا ساروره .. انت جيتي على الجرح
انا الموقف ده لما بشوفه او بسمع عن مواقف مماثله ببقى بتقطع من جوايا بجد .. بتقطع عشان حاجات كتير اوي .. عشان الانسان ده .. و عشان الظلم اللي ملى البلد .. و عشان انا واقف ساكت و مش قادر اغير حاجه .. بجد حاجه تقطع
تعرفي ان موقف شبيه لده حصل مع واحد من أعز أصدقائي .. هو مش ككده بالظبط طبعا .. بس مشابه ليه .. خلاص يا ساروره المفروض كلنا نحاول نغير الوضع ده لأن ماعتش حد مستثنى منه !! الناس دي فجرت أوي .. تخيلي ان مره في برنامج 90 دقيقة عرضوا قصة واحد عامل غلبان و واحد ظابط شرظه اسمه يسري من الاسكندريه .. الظابط اهان كرامة العامل البسيط ده بطرق مش هقدر اقولها بدون اي سبب في وسط المنطقة اللي هو ساكن فيها !!!!!!
في ظلم أكتر من كده في الدنيا
بجد ربنا عالظالم ..
بس عارفه الحل مع العالم دي انك ماتخافيش منهم .. دول مجرد كلاب و عندهم نقص .. يعني معجبنيش كلامك في الاخر انك خفتي .. نظرة الخوف اللي في عيونا هي اللي بتخليهم يعملوا كده
يلا ربنا عالظالم يا ساروره
اسف اني طولت بس اصل الموضوع ده بينرفزني و بيستفزني جدا

kafrawy يقول...

لية متضربش ع قفاك.......؟

سارورة يقول...

احمد منتصر : معاك حق فى ان بعض الناس ما تعرفش تتعامل بانسانية ، لكن فى حاجة مش محتاجة تعليم وهى الكرامة اللى بتتولد فينا كلنا ، اعتقد انك لما تعامل انسان باحترام مش هيقدر يكون غير محترم ، كمان المفترض انك تعامل الانسان باحترام على اساس ان الطبيعى فى الناس الاحترام حتى يثبت العكس .. مش سبب ولا مبرر خالص يا احمد انهم يعاملوا كل الناس وحش لأن بعض الناس وحشين ..

سارورة يقول...

امة الله : فعلا ربنا يهديهم ، او يهدهم ويرحمنا بجد من شرهم .. نورتينى حبيبتى

سارورة يقول...

عمو احمد : والله فعلا معاك حق ، حقايق كتيييييييرة اوى نسيوها او تناسوها ووصلتنا للحال دا .. حسبى الله ونعم الوكيل هنقول ايه ؟؟!!

سارورة يقول...

ياااه يا ساروره .. انت جيتي على الجرح
انا الموقف ده لما بشوفه او بسمع عن مواقف مماثله ببقى بتقطع من جوايا بجد .. بتقطع عشان حاجات كتير اوي .. عشان الانسان ده .. و عشان الظلم اللي ملى البلد .. و عشان انا واقف ساكت و مش قادر اغير حاجه .. بجد حاجه تقطع
-----------------
فعلا بجد ساعتها حسيت انى عاجزة ، واقفة وشايفة الظلم دا والذل دا وما قدرتش اعمل حاجة

==============
تعرفي ان موقف شبيه لده حصل مع واحد من أعز أصدقائي .. هو مش ككده بالظبط طبعا .. بس مشابه ليه ..
----------
هى دى المشكلة ، انه النهاردة بيحصل لحد غريب وبكرة لحد عزيز علينا وبكره هيحصلنا احنا

==================

خلاص يا ساروره المفروض كلنا نحاول نغير الوضع ده لأن ماعتش حد مستثنى منه !! الناس دي فجرت أوي .. تخيلي ان مره في برنامج 90 دقيقة عرضوا قصة واحد عامل غلبان و واحد ظابط شرظه اسمه يسري من الاسكندريه .. الظابط اهان كرامة العامل البسيط ده بطرق مش هقدر اقولها بدون اي سبب في وسط المنطقة اللي هو ساكن فيها !!!!!!
في ظلم أكتر من كده في الدنيا
بجد ربنا عالظالم ..
----------------

دا بقى سيناريو يومي فى البرامج والجرايد كل يوم لازم مواطن عذبوه فى الشرطة من غير ذنب
==============
بس عارفه الحل مع العالم دي انك ماتخافيش منهم .. دول مجرد كلاب و عندهم نقص .. يعني معجبنيش كلامك في الاخر انك خفتي .. نظرة الخوف اللي في عيونا هي اللي بتخليهم يعملوا كده
------------
المشكلة ان الكلاب لما بتبقى سعرانة فعلا بتخوف يا شريف ، وانا فعلا خفت ، رغم انى الحمد لله ليا ضهر مش ماليش بس مش عارفة للاسف ولا الحمد لله من الناس اللى مش بتحب تستخدم سلطاتها وكده ، ففعلا ممكن اتبهدل خاصة وانا فى الاول ولا الاخر بنت ، والبهدلة ليا مش حلوة

=======================
يلا ربنا عالظالم يا ساروره

-------------
ياااااااااااااااارب اللهم اميييييييييين
=============
اسف اني طولت بس اصل الموضوع ده بينرفزني و بيستفزني جدا

--------------

بالعكس اسعدنى ردك جدا يا شريف وسعيدة انى فتحت مساحة للتنفيس

سارورة يقول...

كفرااااااااااااااوى : فكرتنى بموضوع مهم قريته فى الدستور (( علشان ما تنضربش على قفاك )) موضوع فعلا مهم والجميل انه تزامن مع الموقف دا .. هدور عله واحاول انزله لأنه فعلا مهم

no4denmark يقول...

فكرتنى بموضوع مهم قريته فى الدستور (( علشان ما تنضربش على قفاك )) موضوع فعلا مهم والجميل انه تزامن مع الموقف دا .. هدور عله واحاول انزله لأنه فعلا مهم
ـــــــــــــــ
ههههههههههه
مهم ايه بس
كتاب " علشان ما تنضربش على قفاك " لعمرو عفيفى
اللى كان فى فصول منه فى الدستور الأسبوعى بعنوان
الدستور ودليلك القانونى لمعرفة حقك فى التعامل مع الشرطه اللى هى مفروض يعنى " فى خدمتك "

كل اللى انتى قريتيه واللى كان فى الدستور ده كله
ولا ليه اى لازمه يا استاذتنا :)
قانون الطوارىءومن بعده قانون الأرهاب بيلغى كل الحقوق دى تقريبا
ما عدا موضوع تفتيش المرأه
غير كده
فهى كوووووووووسه
محدش فى البلد دي بيسلم من اذى الشرطه
الا اللى ليه ضهر يتسند عليه
او معاه فلوووس تحميه
منهم


وبعدين اوعى تقفى فكمين ويشوفو معاكى جرنان الدستور
نصيحه اخويه من مجرب يعنى :))
لو اى عربيه انتى راكباها ووقفت فكمين
ارمى الجرنان احسن :D

سمراء يقول...

والله ياسارة دى مجرد عينة من اللى بيتعمل فى المواطنين ما بالك بالباطن ما خفى كان اعظم ودى اها نة بسيطة
المستخبى مينفعش نوصف بشاعته فى كلمتين على مدواناتنا او فى صفحة جرايد دا الاشمئزاز يشمئز من عمايلهم وتلطيشهم فى خلق الله مصيبتنا ان الاهانة مش بتجينا من برا ومعاملتنا كحيوانات فى بلادنا ومن ولاد بلادنا هى اللى بتشجع اللى برا يعاملونا كبشر من الدرجة الاولى بعد المليون
حسبى الله ونعم الوكيل حسبى الله ونعم الوكيل

تسلم ايديكى على الموضوع يارائعة

مصر تاني يقول...

بجد هو انتي اول مرة تشوفي موقف زي ده؟؟؟
يبقا انتي اكيد مش من مصر

سارورة يقول...

فكرتنى بموضوع مهم قريته فى الدستور (( علشان ما تنضربش على قفاك )) موضوع فعلا مهم والجميل انه تزامن مع الموقف دا .. هدور عله واحاول انزله لأنه فعلا مهم
ـــــــــــــــ
ههههههههههه
مهم ايه بس
كتاب " علشان ما تنضربش على قفاك " لعمرو عفيفى
اللى كان فى فصول منه فى الدستور الأسبوعى بعنوان
الدستور ودليلك القانونى لمعرفة حقك فى التعامل مع الشرطه اللى هى مفروض يعنى " فى خدمتك "

كل اللى انتى قريتيه واللى كان فى الدستور ده كله
ولا ليه اى لازمه يا استاذتنا :)
قانون الطوارىءومن بعده قانون الأرهاب بيلغى كل الحقوق دى تقريبا
ما عدا موضوع تفتيش المرأه
غير كده
فهى كوووووووووسه
محدش فى البلد دي بيسلم من اذى الشرطه
الا اللى ليه ضهر يتسند عليه
او معاه فلوووس تحميه
منهم
---------------
يالهوى ، طب يعنى هم مش عارفين كده ولا ايه النظام يعنى ؟؟
=====================

وبعدين اوعى تقفى فكمين ويشوفو معاكى جرنان الدستور
نصيحه اخويه من مجرب يعنى :))
لو اى عربيه انتى راكباها ووقفت فكمين
ارمى الجرنان احسن :D

--------------
اهلا اهلا اهلا دا انا كنت معدية بي ه على 3 لجاااااااان كويس انك قولتلى يا نو لحسن كنت هبقى مراسلة من خلف الاسواااااااار

سارورة يقول...

والله ياسارة دى مجرد عينة من اللى بيتعمل فى المواطنين ما بالك بالباطن ما خفى كان اعظم ودى اها نة بسيطة
المستخبى مينفعش نوصف بشاعته فى كلمتين على مدواناتنا او فى صفحة جرايد دا الاشمئزاز يشمئز من عمايلهم وتلطيشهم فى خلق الله مصيبتنا ان الاهانة مش بتجينا من برا ومعاملتنا كحيوانات فى بلادنا ومن ولاد بلادنا هى اللى بتشجع اللى برا يعاملونا كبشر من الدرجة الاولى بعد المليون
حسبى الله ونعم الوكيل حسبى الله ونعم الوكيل

تسلم ايديكى على الموضوع يارائعة

_____________________________

تماااااااااااااااام والله ، لو كنا اهل بلدنا عاملين لنا كرامة ماكنش دمنا بقى رخيص برا

معاكى حق والله يا سمراء

سارورة يقول...

بجد هو انتي اول مرة تشوفي موقف زي ده؟؟؟
يبقا انتي اكيد مش من مصر
_______________________

لأ من مصر يا ( مصر تانى ) بس لحد اليوم دا ماكنت شفت اى حاجة من دى خالص غير فى الجرايد والتليفزيون .. وياريتنى ماشفت

ليكوريكا يقول...

الموقف ده حصل قدامي من 3 اسابيع تقريبا

بس الاختلاف انه كان لشحات

مش كفايه ظروفه خلته يمد ايده للناس

لأ كمان ده لازم ياخد علقه محترمه من سعادة الظابط اللي ملهوش كبير

----------------

عموما ربنا مبيضيعش حق حد وكلنا هنشوف مكانة الظباط المحترمين دول في النار باذن الله !

اللهم اهديهم أو انتقم لنا منهم !

سارورة يقول...

الموقف ده حصل قدامي من 3 اسابيع تقريبا

بس الاختلاف انه كان لشحات

مش كفايه ظروفه خلته يمد ايده للناس

لأ كمان ده لازم ياخد علقه محترمه من سعادة الظابط اللي ملهوش كبير

_________________________
عارف يا ليكو انا معترضة تماما على اهانة اى انسان ، بس على فكرة مش كل شحات الظروف هى اللى اجبرته على التسول ، بس بردو دا مش معناه نهينه ونموته علشان غلط ، خصوصاُ واحنا مش متأكدين من ظروفه وحالته ..
=================

عموما ربنا مبيضيعش حق حد وكلنا هنشوف مكانة الظباط المحترمين دول في النار باذن الله !

اللهم اهديهم أو انتقم لنا منهم
______________________
فعلا يا ليكو ربنا اكبر من الكل وان شاء الله ياخدلنا حقنا

المتابعون

اعتبرها بيتك ♥

وِش القفص

خليك ورايا

دليفري..