2008-04-04

موقف مستفز ..

وانا رايحة الكلية الصبح ، اما صدقنا لقينا ميكروباص
رحنا ركبنا فيه قدام جنب السواق ، لأن كان في رجالة كتييييييير اوى بتتزاحم على الباب الكبير
المهم بعد ما ركبنا اكتشفنا انه ملتحى ، وانه متضايق اننا بنات وقعدنا جنبه
رغم اننا روفيعين وكنا بعيييييييييد خالص عنه
المهم يادوبك ركبنا من هنا وراح مشغل شريط بتاع داعية
بيقول فيما معناه (( ان خروج البنات للتعليم والشغل مهزلة ، بهدلة واختلاط وقلة احترام
واننا كنا في بيوتنا معززين مكرمين بس احنا اللى هدمنا عرشنا بايدينا ))
انا قولت اصطبحنا واصطبح الملك لله ..
لأنى من اكتر الناس اللى بتعارض ان البنات والستات يقعدوا فى البيت
وانهم ما يخرجوش يتعلموا طالما التعليم مختلط والكلام دا
المهم عمال يتكلم يتكلم وانا دمى محروق وعمالة اركز فى الكلام واتنقط اكتر
حضرته بيقول (( خلى بالك على بناتك مش بقولك شك فيهم ،
ماشى هما محترمين وكل حاجة بس ايه المانع تاخد جدول محاضرات بنتك
وتنزلها فى يوم تقولها دلوقتى عندك محاضرة واقفة برة ليه !! ))
كل دا ويقوله ما تشكش فيهم .. الانقح انه بيقول (( راعى غنمك كويس )) بص الاستفزاز ..
تخيل لو واحدة بنت مش مسلمة راكبة او سمعت الشريط دا فى اى مكان .. كانت هتقول ايه ؟؟!!
هتقول المسلمين بيعتبروا بناتهم وستتاهتم غنم !!
حاجة هو مش واخد باله منها ، ان البنت لو حضرت المحاضرات والتزمت علشان خايفة من ابوها دى مش تربية صح
عمرى ما بابا سألنى جدول محاضراتى ايه ، وعمره ماجالى الكلية رغم كده انا عمرى ما بفوت محاضرة واقف فى الشارع ولا قدام الكلية علشان ضميرى ما يسمحليش اعمل كده مش اكتر ..
نسى ان المفروض يربى البنت صح و الولد كمان ويعلمهم يخافوا من ربنا وبس ويخافوا على مستقبلهم لأن ماحدش ضامن عمره
والاب اللى بيعمل كده ممكن اوى لما يموت ولاده يبقوا فاشلين وفاسدين ..
حاجة كمان ، بيقول لما بتصل بواحد صديقى وزوجته ترد عليا ، تقولى مش موجود وتقفل السكة .. ببقى عايز اقولها حاجة تقولهاله بس هى مش يتستنى بتقفل السكة .. بفرح بيها اوى والله واقول عرف يختار ..
مع كامل احترامى ليها ، ايه المانع لما حد يتصل يكون عايز زوجى فى حاجة اسمع منه واقول لزوجى لما يرجع ..
هل ذوقياً انى اقفل السكة فى وش حد بيكلمنى ؟!! هل دى الصورة الحلوة اللى المفروض نرسمها .. مش بقول اهزر معاه وادردش ونرغى لكن ايه المانع فى المكالمة دى مثلا
اى حد : السلام عليكم
انا : عليكم السلام ورحمة الله ، مين معايا ؟؟!!
اى حد : انا فلان لو سمحت ممكن اكلم ابو يوسف ؟؟
انا : اسفة ، هو مش موجود .. لو حضرتك عايزه فى حاجة مهمة قولى اقولهاله ، او مثلا كلمه على تليفون كذا
اى حد : ياريت تقوليله كذا كذا ضرورى ..
انا : حاضر ان شاء الله السلام عليكم
تيك تيك خلصت المكالمة ..
فين المشكلة فى كده ؟؟
ياريت يا جماعة لو انا فاهمة غلط توضحولى ..
حاجة كمان ، بيقول واحدة اتصلت بيه تشتكيله من عمايل ابنها فيها اللى وصلتها لدرجة ان جالها السرطان والعياذ بالله
بيقول قطعت قلبى وخلتنى هعيط ، بس انتوا اللى بتعملوا كده فى ولادكم
لما يجي ابنك عايز يحفظ قرآن تمنعوه ولما يكون عايز يلتحى تمنعوه
ولما بنتك تبقى عايزة تلبس نقاب تمنعيها ، بيقول الام اول يوم قبل
ما بنتها تنزل الكلية تقولها : اتصاحبيلك على واحد جدع علشان تعرفى تتجوزى !!
انا دخلت الكلية واختى دخلت قبلى وعمرى ما امى قالتلى كده وعمرى
ما ابويا قالى ما تكلميش زمايلك فى الكلية .. لكن عمرى ما كلمت واحد زميلى من غير داعى
ولا سالته فى اكتر من المدرج فين ولما مش بلاقى بنات خالص .. ليه الصورة البشعة دى عن البنات ؟!!
ليه تحسس الناس ان البنات اللى فى الكلية دى كلها مش بتفكر فى حاجة الا العريس والجواز وبس ؟؟
ليه ترسم صورة وحشة كده لبنات مسلمات ؟؟
ليه لازم اكون منتقبة علشان تحس انى محترمة ؟؟
بيفكرونى ببتاع انت من ديشنا ؟؟
لأ
تبقى من ديش العدو ، وطااااااااااااخ ..
بجد حقيقى حزنت .. حزنت لأنى بنت جامعية ، خرجت من بيتها زى ما بيقول ، بتعب فعلا لكن بقدر كويس اوى احافظ على كرامتى
حزنت لأنى بنت لو سمعت كلام الداعية دا ، مش هحقق اى حاجة لأن العصر غير العصر
لو قعدت فى بيتنا هبقى مجرد غسالة وشغالة لما اتجوز بعد كده
وزوجى يوم ما يحتاج يتكلم مع انسانة تفهمه وتفهم مشاكله فى شغله وتفهم الدنيا هيبص برا لواحدة متعلمة
واتحداه لو جابلى واحدة اليومين دول قعدت فى بيتها واتعلمت واتثقفت زى اللى بتتعلم
ومين اصلا هيعلمها والدنيا بقت زى الطاحونة والناس ماعندهاش وقت لأى حاجة ؟؟!!

هناك 15 تعليقًا:

  1. ياه يا ساروره .. ماتتخيليش الموضوع اللي انت بتتكلمي فيه بياخد كمية نقاش اد ايه بيني و بين صحابي .. أنا رأيي من رأيك بالظبط .. اللي بيدهشني و بيستفزني اني بلاقي في الزمن ده ناس لسه بتفكر زي الشخص اللي كان بيتكلم ده . أنا بجد مع كل محاولات تقبل الاخر و فهم وجهات نظرهم دي بالذات مش قادر افهمها خالص .. ازاي في العصر ده عايزين يعاملوا البنت بالشكل ده .. و ازاي شايفين اسلوب المنع و الحجز هو الحل السليم لمظاهر الانحلال اللي في المجتمع .. نظره سطحيه جدا .. و عجبني أوي في كلامك انك بتقولي ان عمر ما باباك سألك عن جدول محاضراتك و مع ذلك انت ضميرك مايسمحش انك تسيبي محاضره .. هو ده اللي انا بقوله لما بتناقش مع اي حد في الموضوع .. المهم من جوه الشخص ده عنده ايه .. مش مهم انت هتراقبه ازاي او هتديله ايه و تمنع عنه ايه .. المهم انت زارع جواه ايه ؟؟ لكن طبعا لا حياة لمن تنادي .. في ناس مقتنعه فعلا ان البنت لازم تقعد في البيت و ان تعليمها بعد التعليم الاساسي مالوش اي لازمه .. الغريبه ان في شباب مثقفين جدا و ارائهم كده لما انا ببقى هفرقع حلاص !
    و بالنسبه للناس اللي بيقولوا على نفسهم دعاة دول .. دي بقى مصيبه تانيه لوحدها , أنا بسمع حاجات على حاجات يا ساروره .. الواحد مش بيبقى عارف يعمل ايه .. و مش ببقى عارف هما بيجيبو الكلام اللي بيقولوه ده منين ؟؟ ده عمره ما يكون اسلام ابدا !! يعني بيخلوا وجهة نظرهم الشخصيه في الامور هي تعاليم الاسلام !! و يا سلام بقى على المؤثرات الصوتيه اللي بيعملوها في شرايطهم .. بجد بتبقى حاجات تفطس من الضحك .. و كمان الحزن و الله على دينا اللي بقى اي حد كده بيتكلم فيه..ربنا يقدرنا يا رب كلنا ولاد و بنات في يوم من الايام نقدر نوصل الدين ده بشكل صح للناس و للدنيا كلها ..

    ردحذف
  2. كبرى دماغك ياساره,دلوقتى اى حد بقى بيتكلم فى الدين,الواحد فى الشرايط دى بيسمع كلام مبالغ فى جدا لدرجه الاستفزاز
    الواحد بيبقى عايز يكسر الكاسيت
    والسواق الى كان مدايق منكو ده..لا مؤاخذه بيرسم عايز يفهم الناس انه متدين
    فلما قعدتو جمبو جاتلو على الطبطاب
    وبعدين النبى عليه الصلاه والسلام قال اطلبو العلم ولو فى الصين,مش قال يارجاله اطلبو العلم ولو فى الصين,يعنى من حق البنت انها تتعلم
    وف حكايه التليفون فدى اسخف من ان الواحد يرد عليها
    ملحوظه:تلاقى السواق هوه الى مسجل الشريط بصوته

    ردحذف
  3. ايه الكلام الجميل ده؟
    والله عشرة على عشرة، فعلا أسلوب الدعاة وكلامهم عن البنات والسيدات عامة بقت حاجة مستفزة، وعايزة أضيف كمان إن كلهم لما يجيبوا سيرة النساء يتكلموا على اللبس والحجاب، بيختذلوا الست بمشاعرها ومشاكلها وهمومها وطموحها وكل اللي بتحس بيه زي أي بنى آدم تاني في هيئتها بس، مش مهم أي حاجة تانية، يعنى أصلا الحجاب معمول عشان صرف النظر عن جسد المرأة لأنه جميل، هما بقى يركزوا عليه فابيلفتوا نظر الناس ليه أكتر!!! فاللى بيحصل إن المشكلة بتزيد مش بتقل.
    طب الشريط اللى عايز يسمعه هايشتريه، لكن إيه رأيك في اللي بيقتحمك عليكي بيتك ويشخط فيكي ويكلمك كأنك ممثل لإبليس في الأرض، كأن القرآن نزل عليكي ومانزلش على الرجالة، مابيتكلمش على الرجالة اللي سايبة بيوتها ومسافرة، واللى مابيصرفش على البيت واللي مابيشتغلش بضمير والباقي حضرتك عارفاه
    يعنى كفاية قوى أقول إن الحكومة كلها رجالة تقريبا D:
    تحياتي

    ردحذف
  4. حطي إيدك ف إيديا يلا ونحارب السلفية :)

    ردحذف
  5. اممممممممممم

    تصدقي لو البنات رجعو مثلا لبيوتهم

    كان زماني بقيت من الأوائل عالدفعه

    وكان زمان كل شاب يتخرج هيشتغل فساعتها

    وكمان ينقي الوظيفه الي هوا عاوزها

    -----------------------

    بس انا عاوز اقولك انه مينفعش

    مينفعش اننا نلغي المرأه عشان نكون احنا موجودين

    وايه يفيد اني اطلع من الاوائل وانا مستاهلش

    وايه يفيد اني اشتغل وانا مستحقش

    (صحيح البنات عاوزين الرمي بالرصاص في ميدان عام)

    بس برضو مينفعش !

    لو ركبتي مع السواق اياه تاني

    ابقي اسأليهولي (شربت اللبن الصبح ولا لأ)

    لحسن يكون زي ساروره :))

    ردحذف
  6. ياه يا ساروره .. ماتتخيليش الموضوع اللي انت بتتكلمي فيه بياخد كمية نقاش اد ايه بيني و بين صحابي .. أنا رأيي من رأيك بالظبط .. اللي بيدهشني و بيستفزني اني بلاقي في الزمن ده ناس لسه بتفكر زي الشخص اللي كان بيتكلم ده . أنا بجد مع كل محاولات تقبل الاخر و فهم وجهات نظرهم دي بالذات مش قادر افهمها خالص ..
    _____________________
    فعلا كأننا بنرجع لورا ، لمرحلة سى السيد الغبية دى تانى .. ماعرفش بجد هما متخيلين ان بعدم تعليم البنت الاحوال هتتظبط تانى ولا ايه والدنيا هترجع زى زمان .. يعنى هو خلاص كل الاوضاع زى زمان ومش فاضل غير البنت اللى بتخرج تتعلم هى اللى لو قعدت الدنيا هتتصلح بجد فعلا زى ما بتقول نظرة سطحية جدا

    ____________________________
    ـــــــــــــــــــــــــــــــ

    ازاي في العصر ده عايزين يعاملوا البنت بالشكل ده .. و ازاي شايفين اسلوب المنع و الحجز هو الحل السليم لمظاهر الانحلال اللي في المجتمع .. نظره سطحيه جدا .. و عجبني أوي في كلامك انك بتقولي ان عمر ما باباك سألك عن جدول محاضراتك و مع ذلك انت ضميرك مايسمحش انك تسيبي محاضره .. هو ده اللي انا بقوله لما بتناقش مع اي حد في الموضوع .. المهم من جوه الشخص ده عنده ايه .. مش مهم انت هتراقبه ازاي او هتديله ايه و تمنع عنه ايه .. المهم انت زارع جواه ايه ؟؟
    __________________

    تمام المهم انت زارع جواه ايه ، لأنك مهما بلغت قدرتك على المراقبة مستحيييييييييييييييييييل تراقبه فى كل مكان ، اكيد هيجي يوم ويخرج من تحت سيطرتك وساعتها هيبقى عفريت وطلع من قمقم

    ________________________
    ـــــــــــــــــــــــــــــ
    و بالنسبه للناس اللي بيقولوا على نفسهم دعاة دول .. دي بقى مصيبه تانيه لوحدها , أنا بسمع حاجات على حاجات يا ساروره .. الواحد مش بيبقى عارف يعمل ايه .. و مش ببقى عارف هما بيجيبو الكلام اللي بيقولوه ده منين ؟؟ ده عمره ما يكون اسلام ابدا !! يعني بيخلوا وجهة نظرهم الشخصيه في الامور هي تعاليم الاسلام !! و يا سلام بقى على المؤثرات الصوتيه اللي بيعملوها في شرايطهم .. بجد بتبقى حاجات تفطس من الضحك .. و كمان الحزن و الله على دينا اللي بقى اي حد كده بيتكلم فيه..ربنا يقدرنا يا رب كلنا ولاد و بنات في يوم من الايام نقدر نوصل الدين ده بشكل صح للناس و للدنيا كلها ..
    ____________________

    على رأيك ، جه فى جزء مش مؤثر خالص وراح ال ايه صوته بيعيط وخلاص الدمعة هتفر من عينه .. بجد حتى لو صادق بيدى انطباع انه بيمثل .. ربنا يهديهم هنقول ايه بس يا شريف

    ميرسى بجد على تعليقك الرائع وعلى موقفك الاروع

    ردحذف
  7. كبرى دماغك ياساره,دلوقتى اى حد بقى بيتكلم فى الدين,الواحد فى الشرايط دى بيسمع كلام مبالغ فى جدا لدرجه الاستفزاز
    _______________
    فعلا اه بيستفزك لدرجة انك تحمد ربنا لو السواق شغل اغانى بجد
    =============
    الواحد بيبقى عايز يكسر الكاسيت
    والسواق الى كان مدايق منكو ده..لا مؤاخذه بيرسم عايز يفهم الناس انه متدين
    _______________
    الله اعلم والله ياعمو احمد بنيته بس بجد اسلوبه كان بايخ جدا
    =================
    فلما قعدتو جمبو جاتلو على الطبطاب
    وبعدين النبى عليه الصلاه والسلام قال اطلبو العلم ولو فى الصين,مش قال يارجاله اطلبو العلم ولو فى الصين,يعنى من حق البنت انها تتعلم
    ______________________
    يسلم كيبوردك ودماغك يا عمو احمد ، جبت كلام فى الجون
    ==========================
    وف حكايه التليفون فدى اسخف من ان الواحد يرد عليها
    ملحوظه:تلاقى السواق هوه الى مسجل الشريط بصوته
    ____________________
    هههههههههههههههه ممكن مش بعيدة ، لأنى عارفة اغلب الدعاة المحترمين وعارفة صوتهم كويس اوى واسلوبهم كمان

    نورتنى يا عمو احمد

    ردحذف
  8. ايه الكلام الجميل ده؟
    والله عشرة على عشرة، فعلا أسلوب الدعاة وكلامهم عن البنات والسيدات عامة بقت حاجة مستفزة، وعايزة أضيف كمان إن كلهم لما يجيبوا سيرة النساء يتكلموا على اللبس والحجاب، بيختذلوا الست بمشاعرها ومشاكلها وهمومها وطموحها وكل اللي بتحس بيه زي أي بنى آدم تاني في هيئتها بس، مش مهم أي حاجة تانية، يعنى أصلا الحجاب معمول عشان صرف النظر عن جسد المرأة لأنه جميل، هما بقى يركزوا عليه فابيلفتوا نظر الناس ليه أكتر!!! فاللى بيحصل إن المشكلة بتزيد مش بتقل.
    __________________________
    بجد بجد يا نهى انتى جبتى نقطة فعلا مهمة جدا ، والله بجد ما عارفة اقولك ايه بعدها

    فعلا ليه بيختصروا المرأة فى الجسد وبس وينسوا عقلها واللى ممكن تعمله .. بجد ربنا يكرمك فتحتى نقطة مهمة اوى
    =====================================
    طب الشريط اللى عايز يسمعه هايشتريه، لكن إيه رأيك في اللي بيقتحمك عليكي بيتك ويشخط فيكي ويكلمك كأنك ممثل لإبليس في الأرض، كأن القرآن نزل عليكي ومانزلش على الرجالة، مابيتكلمش على الرجالة اللي سايبة بيوتها ومسافرة، واللى مابيصرفش على البيت واللي مابيشتغلش بضمير والباقي حضرتك عارفاه
    يعنى كفاية قوى أقول إن الحكومة كلها رجالة تقريبا D:
    تحياتي
    __________________________
    والله معاكى حق بجد ، كمان مش بيراعى ان الكلام ممكن يكون فيه احراج لو بنت سمعته فى وجود رجالة ، والله دا حصل والشريط كان فيه اكتر من نقطة محرجة وبقينا فى وسط هدومنا .. هنقول ايه ربنا يهدى

    ردحذف
  9. يعني لو اكتفيتي بالابتدائية مش احسن ؟؟؟
    والا لازم تكوني طماعة
    والطمع يقل ما جمع
    والقناعة كنز لا يفني
    بنات آخر زمن
    المفروض الواحدة تطلع من البيت مرتين
    مرة لبيت زوجها
    ومرة لقبرها
    ودمتم
    عشان زحام المرور
    والازمة السكانية
    ورغيف العيش
    والقضية الفلسطينية
    ومشكلة تايوان مع الصين
    والدالاي ليما اللي منفي
    ده كله بسبب خروج المرأة من بيتها
    اما التلفون فهذه الكارثة
    وسببت احتباس حراري للكرة الارضية
    ومشاكل في الغلاف الجوي
    ورفعت سعر الحديد والاسمنت
    عرفتي السبب يا استاذة سارورة
    تحياتي

    ردحذف
  10. حطي إيدك ف إيديا يلا ونحارب السلفية :)
    _______________
    والله يا احمد مش شرط يكون بيعمل كده علشان هو سلفى ، وغلط جدا اننا نحارب كل الفئة دى ونحارب اختيارهاوحريتها فى اعتقادها علشان فئة صغيرة منها عبرت عن افكارها غلط .. انا اخويا كان فى يوم من الايام سلفى وماكنش وحش ابدا ، وعمره ما فرض علينا اى حاجة وانا بالذات رغم انى اصغر منه بكام سنة وكان يقدر يفرض عليا اراءه ..

    ردحذف
  11. تصدقي لو البنات رجعو مثلا لبيوتهم

    كان زماني بقيت من الأوائل عالدفعه

    وكان زمان كل شاب يتخرج هيشتغل فساعتها

    وكمان ينقي الوظيفه الي هوا عاوزها

    بس انا عاوز اقولك انه مينفعش

    مينفعش اننا نلغي المرأه عشان نكون احنا موجودين

    وايه يفيد اني اطلع من الاوائل وانا مستاهلش

    وايه يفيد اني اشتغل وانا مستحقش

    (صحيح البنات عاوزين الرمي بالرصاص في ميدان عام)

    بس برضو مينفعش !
    _____________________
    تمااااااااااااااام يا ليكو ، تعرف انا اول ما قريت تعليقك فى الاول اتخضيت قولت يالهوى احنا كارثة فى نظركم للدرجة دى وبعدين انت قلت الرد اللى كنت هرد بيه عليك ، فى جملة رائعة ليوسف السباعى فيما معناها يعنى انه لولا وجود المرأة ماكنش الرجل عمل اى انجازات ، لأن مافيش راجل يقدر ينكر انه بيعمل كل حاجة حلوة علشان ينال اعجاب المرأة ، اى مرأة بقى امه بنته زوجته اخته حبيبته ..
    ========================

    لو ركبتي مع السواق اياه تاني

    ابقي اسأليهولي (شربت اللبن الصبح ولا لأ)

    لحسن يكون زي ساروره :))
    _________________________

    ههههههههههههههههههه مااااااااااااااااشى يا ليكو .. شكلك هتذلنى بكوباية اللبن هههههههههههه هبقى اساله بس لو اغتالنى دمى فى رقبتك هههههههههههه

    ردحذف
  12. يعني لو اكتفيتي بالابتدائية مش احسن ؟؟؟
    والا لازم تكوني طماعة
    والطمع يقل ما جمع
    والقناعة كنز لا يفني
    بنات آخر زمن
    المفروض الواحدة تطلع من البيت مرتين
    مرة لبيت زوجها
    ومرة لقبرها
    ودمتم
    عشان زحام المرور
    والازمة السكانية
    ورغيف العيش
    والقضية الفلسطينية
    ومشكلة تايوان مع الصين
    والدالاي ليما اللي منفي
    ده كله بسبب خروج المرأة من بيتها
    __________________
    صحيح ، وكانت كل مشاكل الدنيا تحلت .. لأ فى حل تانى هما يرجعوا وأد البنات واهم يوفروا اكلنا بالمرة

    ههههههههههههه
    =====================
    اما التلفون فهذه الكارثة
    وسببت احتباس حراري للكرة الارضية
    ومشاكل في الغلاف الجوي
    ورفعت سعر الحديد والاسمنت
    عرفتي السبب يا استاذة سارورة
    تحياتي

    _________________
    صحيح والله معاك حق ، مش بيلاقوا شماعة يعلقوا عليها عجزهم عن حل المشكلات الا القوارير اللى الرسول صلى الله عليه وسلم وصاهم بيهم ..

    نورتنى يا استاذ احمد وشرفتنى وقلت كلام كتير باختصار بجد

    ردحذف
  13. والله يا غزال دى حاجه بسيطه
    من اللى الواحد بيشوفها وبيسمعها من ناس فاكره نفسها انها كده بقت متدينه
    يللا ربنا يهدينا جميعا ويرزقنا الأخلاص يارب
    اصلا من غير النساء مش هيبقى فى حياه..
    وعلى فكره النساء كانت ايام الرسول صلى الله عليه وسلم كانو بيخروجو معاه فى الغزوات
    وده كان بدايته فى غزوة احد
    تخيلى بيخرجو فى اعظم حاجه كان الرسول بيعملها....يبقى ازاى بقى نقول ما يخرجوش علشان يتعلمو اللى هو ابسط حقوقهم
    ________________________

    يسلم كيبوردك يا نو ، فعلا اذا كان الرسول صلى الله عليه وسلم سمح للنساء انهم يخرجوا فى الغزوات .. ازاى نمنعهم يتعلموا .. بجد مش لاقية رد بعد ردك يا نو

    ردحذف
  14. لا ياسارة انت مش غنمة ولاحاجة انت بنوتة زي العسل وانسانة جميلة ومحترمة قوي
    لكن ياسارة في الزمن دة الواحد لازم يخلي باله انت بنفسك عاملة حفظ للتعليقات علشان انت بنت وماحدش يقل ادبه
    مش عيب الأب ياخد جدول محاضرات بنته مش شك لكن اطمئنان انت مش بتقفي قدام المدر لكن في بنات كتير بيعملو حاجات يعاقب عليها القانون وانت
    في الجامعة وعارفة دة بنفسك
    لكن طبعا الرك علي التربية
    ربنا يوفقك وماتزعليش من الشرايط دي
    بس انا لو منك كنت قلتله اقفل الشريط دة وشغل اذاعة القرآن الكريم

    ردحذف
  15. كلامك جميل يا مصطفى ولازم نعمل احتياطتنا لكن فى شعرة رفيعة اوى بين الحذر والشك لو اتعديناها صدقنى حاجات كتير هتبوظ ، واللى هو بيقول عليه دا شك .. اما بالنسبة لموضوع انه يقفل الشريط دى ماقولتهاش لسببين الاولانى : انه اصلا متضايق من وجودى جنبه فتخيل لو كلمته التانى انه هيفتكر انه بقى خلاص افحمنى بحججه وبراهينه وانتصر عليا وانا بهرب من الكلام علشان كده كان مستحيل يغير الشريط

    ردحذف

Say something...