لعلمك

لعلمك

إقرأ لي

دخلوا بكليك شمال :D

Blog Archive

الأحد، أبريل 27، 2008

postheadericon اعطنى الناى واياك تفتح بؤك ..

زمان السيدة فيروز غنت اعطنى الناى وغنى فالغنا سر الوجود
ايام ماكان بجد الغنى سر الوجود ...

ايام ماكان ناس بتنجح علشان كان صوت

ام كلثوم بيصبرها على المذاكرة ..

لكن دلوقتى السيدة فيروز لو تملك اعادة توزيع

وتاليف الاغنية لخلتها .. اعطنى الناى واياك تفتح بقك ..

ما بنكرش ان زمان كان

فى ناس بتنشز على غرار " الطشت قاللى والكلام الفاضى دا "

لكن دلوقتى اتنسوا

واتمسحوا باستيكة ..

السبب مش ان الجمهور عايز كده زى ما كلهم بيقولوا
السبب هو انهم عايزين كده

الجمهور مفتقد الصوت الحلو ومفتقد الاغانى

الكويسة بس هم بيستسهلوا وبيسترخصوا ..

زمان كانت الاذاعة ما بتذيعش عبد الحليم

نفسه بجلالة قدره لأنها مش معتبراه مطرب ..

دلوقتى ما بقتش بتذيعه علشان بتذيع

سعد الصغير وودانة والذى منه ..

العيب مش فى المستمع اللى اختار انه يكون متلقى

العيب فى اللى بيذيع ومش عامل حساب ان الناس دى عايزة تستمتع مش تنقهر وتتعذب

9 بوينتس أوف فيو:

mostafarayan يقول...

بصي ياسارورة
اناعايز اقولك شيء مهم قوي الأغاني زي اي نوع من انواع الفنون بتتأثر بالمجتمع المحيط بها عبد الحليم زمانه كان في ثورة وحرب وناس عايزة تحارب وتحرر ارضها وطبقة وسطى طالعة عايزة تعلم اولادها ويكون لها دور ومكانة عالية في الحياة فكان في عبد الحليم وام كلثوم ونجاة في الغناء ويوسف ادريس ونجيب محفوظ واحسان عبد القدوس في الأدب وانيس منصور وعلي امين في الصحافة كان كله واحدة كاملة متكاملة تشبه العصر اللي عايشين فيه دلوقتي زي مانتي شايفة حالتنا السياسيه فطبيعي تلاقي امتداد دة في الغناء والصحافة وجميع المجالات الأخري
دة مايمنعش بردة انهم بيستسهلوا لكن مايستسهلوش ليه اذا كان الشعب نجح هذا الأستسهال بدليل نجاح سعد الصغير وامينة مطربة الحنطور اللي عايشة في الدور وصدقت نفسها انها مطربة بجد وهي في الحقيقة مطرشة او متربة
بصي مرة سألو ايناس الدغيدي ليه بتعملي افلام بالنوعية دي رغم كل الهجوم اللي بتلاقيه قالتلهم وليه ماعملش إذا كان اللي بيهاجموني هما اول ناس بتقطع تذكرة و تتفرج عليا وبيجوا ورايا في كل الندوات
متهيألي ايناس لخصت الموضوع
تحياتي ليكي
وعذرا للأطالة

- ياريت تشيلي تأكيد الكلمة من التعليق

في حب مصر يقول...

لا لا يا سارورة
أنا مش متفق معاكي

يا شيخة انتي تقارني سعد الصغير وأغانيها العظيمة، زي أغنية بحبك يا حمار، والعنب العنب، وحمرا يا قوطة، بواحد زي عبد الحليم حافظ بيغني جبار ومن غير عتاب وقارئة الفنجان ، وشوية أغاني وطنية أي كلام كدة؟؟؟

لا يا شيخة حرام بجد؟؟

ومين ام كلثوم دي كمان اللي تقارنيها بهيفا ونانسي عظماء هز الوسط الغنائي، ولا روبي اللي بتغني بوشها وبظهرها.. لا زعلتيني بجد

وكمان مش عجباكي الاغنية العظيمة بتاعة "الطشت قالي" ربنا يسامحك

ويسامحنا اننا عايشين في الزمن ده

FaceMoon يقول...

عندك حق بقى فيه مطرب لكل مواطن
بس كل الاذواق موجودة وعلى المستمع انه يختار زى قنوات التليفزيون وكل واحد معاة الريموت وبيحول لان الحياة فيها الصح والغلط وفيها الحلو والوحش وفيه ناس مبسوطة بكدة وناس نفسها تسمع حاجة كويسة بس تقولى لمين بقى الجمهور هو اللى بيحدد الذوق والناس هيا اللى نجحت سعد الصغير وهيا برضة اللى نجحت عبد الحليم
تحياتى ليكى

دكتور مستكنيص يقول...

بصي اغلب اللي شغالين في الاعلام بيدوروا عالجمهور ونسبة المشاهدة والمكسب المادي قليل اوي اما تلاقي حد متبنس فكرة معينة أو وجهة نظر بعينها هو كل اللي يهمه ايه اللي يكسبني سواء بقي بحبك ياحمار بحبك ياجحش المهم البرنامج يتشاف والقناة تتابع ويجيله اعلانات والجيب يبقي عمران
ويمكن حتي زمان اما كانت ام كلثوم وحليم مسيطرين كان عشان جمهورهم قوي فانا شايف ان اللعبة عند الجمهور
الخوف بقي كمان عشر سنين نلاقي ان سعد الصغير بقي طرب اصيل وان المنتشر اغاني الست لما والبانجو مش بتاعي
تحياتي ومتشغليش بالك بالحاجات دي عشان دماغك متتعبش هيا بايظة من كله جت علي الاغاني يعني
كبري

سارورة يقول...

مصطفى ريان / بجد كلامك فى الجون جدا جدا ومعاك حق فعلا ، المفروض لو بجد مش عاجبنا ما نهتمش بيها ولا نديها الشهرة اللى هى اصلا بتسعى ليها .. بجد رأى جامد يا مصطفى تسلم ايدك

سارورة يقول...

مصطفى بالنسبة لتأكيد الكلمة هحاول والله اعرف بيتشال ازاى واشيله انت تؤمر ياباشا

سارورة يقول...

فى حب مصر / ربنا ما يحكمنى على يتامى هههههههههههه انا مفترية وظالمة هههههههههه والله فعلا مافيش وجه للمقارنة ، بس للاسف الواحد بيقارن المكانة او الشهرة اللى حصلت لكل طرف وبيزعل بجد

سارورة يقول...

فيس مون يا قمر ، عارفة لما بجيب اخرى فى الزهق واحس نفسى فى اغنية ، افتح التليفزيون اه فى زرار بيحول بس فعلا ما بقاش الحلو بيتعرض ، حد احساسه عالى زى كاظم زى اصالة زى منير الناس دى نادراً لما تلاقيها على التليفزيون ولا فى الراديو ، فبجد بتزهقى وبتحزنى واحيانا زهقك بيخليكى تتفرجى على التانيين .. بيقولك الزن على الودان امر من السحر والاعلام عمل كده علشان كده الناس دى نجحت

سارورة يقول...

كلامك مظبوط يا دكتور مستكنيص ، بس فى نقطة اللى شغالين فى الاهلام بردو هم السبب فى انتشار الحاجات دى عند الجمهور ، والسبب مادى هقولك ازاى .. فى البداية اول ما الاغانى دى ظهرت كانت طبعا ارخص من اغانى الناس الجامدة المحترمة فبالتالى لجأوا ليها الاعلاميين علشان يسدوا الوقت باغانى والناس شافت ومع التكرار اتعودت وشوية وحبيتها فعلا ..

المتابعون

اعتبرها بيتك ♥

وِش القفص

خليك ورايا

دليفري..