2008-05-28

هكذا يقتلون الابداع





اكتر حاجة فى مصر بلاحظها

طريقتهم المبتكرة فى قتل الابداع ..

فى طرق كتييييييييييرة اوى

تخلى اللى عنده بذرة موهبة يدفنها بالحياة

احسن ما يجي حد تانى يدفنها

اول الطرق :

" انت كتبت كده ليه ؟؟ "

او رسمت كده ليه

او عملت كده ليه ؟؟

مع ابتسامة خبيثة ...


( يا جماعة هو اتسمى ابداع ليه ؟؟ علشان بنقل اللى حصل

ولا علشان بغوص فى اعماق الخيال واتخيل ان دا حصل

وانقله فى صورة عمل فنى ؟؟ !!


وطبعا خوفا من السؤال والابتسامة الخبيثة ..

بيقول احسن لى بلاها ابداع ..

الا طبعا اللى بيكون عنده اصرار وبيغمض عيونه ويسد ودانه عن الكلام


تانى طريقة : ايه الجنان دا ؟؟!!

مع اشارة مجنون بالايد ..

ودا طبعا لما يكون عامل حاجة غريبة ومميزة

بدل من بذل الجهد فى التفكير فى معناها

بيلجأوا بسرعة لاتهامه بالجنون ..

ماهو لازم يكون مجنون احسن ما يكونوا هما مش فاهمين ..


تالت طريقة : معاملة المبدع والحاجة الابداعية زيها زي اى حاجة

- المبدع لازم يحس انه متقدر

لكن لما يلاقى الناس ما اكتشفت ايه المميز فى عمله

او اه المختلف واتعاملت معاه زيه زي غيره

اكيد هيوفر مجهوده ويقول بلااااااااها ابداع


على فكرة انا قلت فى الاول ان الطرق دى بتحصل فى مصر

عفوا هى حصلت فى كل العالم

من ايام آينشتين والناس دى

بس باقى العالم اتنبه لأنه كده بيقتل الابداع

فسابها


لكن فى مصر

لسة متمسكين بيها وكأننا من غيرها نموت


عارفة ردود البعض هيقولوا المبدع ما بيستناش تكريم

من حد علشان يعمل حاجة

بس هاقول : للصبر حدود

والتشجيع هو مولد طاقة الابداع
...



هناك 12 تعليقًا:

  1. طبعًا مشكلتك نكأت جراحًا عديدة يا سارة، ولكن أحب أقول لك إن الإبداع الحقيقي (للأسف) لا ينمو بالتجيع، بل ربما لا ينمو إلا بالإهمال والاستفزاز للمزيد من الإبداع
    .
    .
    كان عندي كلام كثييييييييير بدي أقوله
    يمكن أعدي مرة تانية
    بعد ما حجزنا أول تعليق
    .
    .
    تحياااااتي

    ردحذف
  2. ابراهيم معاك حق عبد الوهاب يوم قال " انبغ مافى الحياة الالم " لكن صدقنى لازم حد يحس باللى المبدع بيعمله لازم يحس انه ليه فايدة والا هيفقد الثقة فى ابداعه وهيحس انه بيضيع وقت على الفاضى .. دى وجهة نظرى بس مش عارفة صح ولا غلط .. مستنياك من تانى تقول كل اللى عايز تقوله وبجد شرف ليا انك حجزت اول تعليق .....

    ردحذف
  3. سارورة

    تحياتى

    والله دول تلات طرق من طرق قتل الابداع

    نسيتى سرقة الافكار والمصادرة وعدم

    المبالاه وكمان الامكانات الضعيفة اذا

    توفرت اصلا

    تحياتى

    ويارب يتعلموا زى ما العالم كله

    اتعلم

    ردحذف
  4. أنا متفق معاكي على فكرة على سياسة قتل الابداع المنتشرة في مصر

    و خاصة في التعليم و نظام القولبة
    الواحد يدخل و الطبق فاضي ـ دماغه يعني ـ ويخرج مليان

    بس المبدع سموه مبدع لإنه مختلف ، فمن رأئي إن المبدع لأزم يبدع أساليب يثبت بيها للناس إنه مبدع فعلاً و إن أعماله مبدعة

    الخلاصة إن إحنا لازم نكون مبدعين في دفاعنا عن إبدعنا و قضيتنا أياً كانت

    أسف للإطالة

    ردحذف
  5. اولا انا لا اقبل تعميم اى فكره وربطها بشعب ما او طائفه ما


    ثانيا
    اسمحيلي ازكرلك قصتين الاولى حصلتلى ف الابتدائي والتانيه ف الاعدادى

    قصة الابتدائي دى لن انسااها ما حييت

    كان عندنا سؤال متعلق بالديك مش فاكره صيغته يا ف اولى او تانيه ابتدائي
    الابله بتاعتى كانت مصره ان الديك حيوان وانا كنت متاكده ان الديك طائر ومعجبهاش رائي وانا مسمعتش كلامها وكتبت جمب الديك انه طائر
    بعد فتره ما جه موجه ليها ولقيتها جايه تقولنا نصلح الاجابه لان الديك طائر مش حيوان ساعتها حسيت بزهو فظيع

    ف الاعدادى على ما افتكر ف تانيه اعدادى ف حصة التاريخ سئلت المدرسه سؤال عن شجرة الدر
    رفعت ايدي وقمت اجاوب وقلتلها انا ليا رئيين الاول اللى ف كتاب المدرسه اللى هكتبه ف الامتحان لو جالى والتانى رائي اللى انا مقتنعه بي
    ولما قلت الرئيين ضحكت وقالتلى اكتب المكتوب ف كتاب المدرسه

    من الموقفين الواضح ان مناهجنا التربويه ضد الابتكار الحاجه زي ما اتحفظت بنمشي عليها الناس بتخاف من التجديد مدام القديم ماشي ليه نجدد

    فى شخصيات بتكون حاقده وناقمه على المبتكرين وفى شخصيات تفكيرها محدود
    بلادنا مليانه عباقره بس ناقصهم الدعم

    ردحذف
  6. انا قريت كلامك اللى نزل فى جرنال الدستور ، وعرفت انه انتى لأنى كنت قريت البوست ده فى مدونتك
    كلامك كان عجبنى جدا من البداية من ساعة ما قريته فى مدونتك
    لكن بصراحة رد كساب عليكى ما عجبنيش ، حول الفكرة العميقة اللى فى كلامك لتهريج ، وده مش ريحنى ابدا
    عامة انتى جامدة وقلمك جامد
    تحياتى

    ردحذف
  7. أعجبتني المدونة...

    وأعجبنتني كلماتك عن أحمد بخيت في أكثر من موقع على الإنترنت...

    تابعي سلسلة مقالتي عنه... على مكتوب

    ردحذف
  8. عرفة الاسيوطى ، معاك كل الحق بجد .. كل حاجة قلتها فعلا بتحصل والله اعلم باللى بيحصل فى الخفاء كمان .. يارب يسمع منك ويتعلموا زى ما العالم كله اتعلم يااااااااارب .. نورتنى بجد يا عرفة يارب دايما تفضل تنورنى

    ردحذف
  9. محمد فعلا معاك حق ، ودا يمكن اللى بيميز المبدع اللى ارادته قوية وهدفه كبير وواثق بنفسه وبين آلاف المبدعين اللى بيدفنوا موهبتهم لما مش بيلاقوا بيئة مناسبة ليها .. بجد نورتنى يا محمد واضفتلى اضافة جميلة جدا

    ردحذف
  10. ملكة النيل ، صدقينى كمان انا مش بحب التعميم

    لكن اكاد اقسملك ان السمة الغالبة علينا فى مصر كده
    حكومة وشعب مش بنحب الجديد ابداً
    وعايزة اقولك ان كل العالم كان كده بس الشعوب المتخلفة بس هى اللى لسة كده .. بيقولوا دايما الانسان عدو لكل ماهو جديد ..

    والقصتين اللى قولتيهم لخصتي بيهم مآساتى فى التعليم .. كل اساتذتى بيقولولى عقلك الكبير هو اللى بيدويكى فى داهية لان تعليمنا مش عايز عقل

    نورتينى يا جلالة الملكة واتمنى تكررى زيارتك تانى

    ردحذف
  11. استراحة محمد حاسة انك تقصد على موضوع انتى ما بتتهديش صح ؟؟!!
    والله يا محمد انا بطلت اراسل الدستور بسبب كده .. حسيته انه عايز يهزر وبس .. برغم انى لما دخلت جروب ضربة شمس ، لقيته بيتكلم كلام جد جدا وعاقل جدا وعايز انضباط فى الجروب ...
    بس بجد سعيدة جدا ان كلامى مش بيتنسى بسهولة

    ولما بتشوفه فى مكان تانى بتفتكر انه بتاعى بجد ما تتخيلش مرورك دا اسعدنى قد ايه ربنا يخليك يارب

    ردحذف
  12. د وائل انا لحد دلوقتى مش مصدقة عينى ان حضرتك نورت مدونتى .. بجد اشتغربت جدا .. انا مريت بمدونة حضرتك مرور الكرام وماتعرفش سعدت قد ايه بمقلاتك التلاتة عن احمد بخيت .. وماعلقتش لأنى للاسف مش من مشتركى مكتوب .. استغربت جدا لما لقيت حضرتك هنا بجد دا شرف عظيم ليا ..
    بالنسبة لكلامى عن احمد بخيت ، فبجد دى اقل حاجة المفروض اعملها علشان خاطر مبدع بالروعة والتالق دا .. يارب ينصره يارب ويوفقه فى كلاب كتير بتترصدله .. وهو لا يستحق الا كل الحب .. اتمنى زيارة حضرتك تتكرر ليا واتمنى تتقبل مرورى اللى هيكون شبه يومي على مدونة حضرتك علشان استمتع بما خطته يمناك

    ردحذف

Say something...