لعلمك

لعلمك

إقرأ لي

دخلوا بكليك شمال :D

Blog Archive

السبت، يوليو 05، 2008

postheadericon على قد رجليك .. فصل لحافك .. خليك ايجابى بقى




مشكلتنا فى مصر اننا شعب طيب

بياكل الزلط وبيستحمل كل حاجة

بيتأقلم مع اى ظروف مهما كانت قاسية

ومهما كانت متعبة

كتير بيشوفوا دى ميزة بس انا حساها عيب

عيب لأننا طول ما احنا بنعود نفسنا على الاحساس ان مافيش مشكلة

عمرنا ما هنحاول نلاقى حل لمشاكلنا

وعمرنا ما هنطلع لقدام

لأن الحاجة ام الاختراع لكن احنا مش بنحسس نفسنا اننا فى احتياج لحاجة

دا طبعاً غير الرضا بالقدر والقضاء المطلوبين وغير القناعة تماماً

المفروض القنوع يعمل اللى عليه وهو رامى حموله على الله

ويرضى بالعائد اللى عاد عليه نتيجة مجهوده

يعنى على قد مجهوده ياخد مقابل يشتغل قيراط يلاقى قيراط

مش يشتغل قيراط وعايز يلاقى فدان


علشان كل اللى قولته فى الاول دا انا من اشد معارضى المثل اللى بيقول

(( على قد لحافك مد رجليك ))

المفروض على قد رجلينا نفصل لحفانا

على قد احتياجتنا نشتغل

علشان نغطي احتياجتنا

على قد زيادة سكاننا نتوسع فى بنا مدن ونزود فى الانتاج

لأنى مش معقول مثلا هقطع رجلى

ولو تنيت رجلى هتعب

يبقى ليه نرضى بوضع غلط ومتعب واحنا فى ايدينا نشتغل بجد ونحارب ظروفنا

ونسخرها فى خدمتنا؟؟

ممكن الناس تعتبر دا (( نمردة )) وطمع بس صدقونى دى مش اكتر من محاولة

لأننا نكون ايجابيين ونبطل نبقى الطرف التابع فى معادلة الحياة


22 بوينتس أوف فيو:

zOzO يقول...

يا تري انا اول كومنت ولا ؟
شكلي ولا
المهم انا حجزت هقرا وهرجع تاني

zOzO يقول...

حلو البوست ده
بس عايزه اقولك ان ف ناس
بجد مش لاقيه تاكل ولا تشرب
بتاكل باالعافيه
ربنا معاهم بجد
ويكون ف عونهم
يعني انهم مش يعملوا حاجه شئ طبيعي
بحييكي ع البوست ده
تسلمي يا قمر

Unique يقول...

فعلا يا سارة من اكتر الحاجات اللي بتدايقني في الشعب ده انه مش واعي لحاجات كتير غلط وحاجات كتير ناقصة
وزي ما قولتي فيه فرق بين الرضا بالقدر والرضا بالغلط والتقصير اللي بنرتكبه في حق نفسنا

امتى هنفوق ؟! مش عارفة

tota يقول...

سمو الاميره ساره
اكيد اما جيتي نورتي مدونتي المتواضعه
البوست ده جميل اوي لانه بجد لمس كشكله فعلا قائمه في البلد دي الامهم الي عايزه اقوله انه موقف حصل معايه وانا راكبه الميكروباص المفروض ان الاجره فبي الميكروباص ده 40 قرش من ساعت ما الاجره غليت المهم امبارح السواق اول ما طلع ومشي قال كل كرسي يلم الاجره مع بعضه والاجره بخمسين قرش محدش اتكلم والاجره اتلمت بخمسين قرش قلتله طب هيه مش كانت ب اربعين قال طب وانتو هتعملو ايه بالبريزه!!!!!!!1
طب وانت مالك انشالله حتي نجيب لبانه ونرميها يعني ده واقع بس ارحج السبب بتاعه ان الشغب المصرب بجد بئا خايف من كتر الي بيحصل فيه من كتر الضرب علي القفا الي اخده
عموما بجد بوست رائع وانتظر دايما زيارتك ليا

سمو الأميرة سارة يقول...

zOzO يقول...
يا تري انا اول كومنت ولا ؟
شكلي ولا
المهم انا حجزت هقرا وهرجع تاني
__________________

لأ اول كومنت من حظى الحلو يا زوزو ومنوراااااااااااانى بجد

سمو الأميرة سارة يقول...

zOzO يقول...
حلو البوست ده
بس عايزه اقولك ان ف ناس
بجد مش لاقيه تاكل ولا تشرب
بتاكل باالعافيه
ربنا معاهم بجد
ويكون ف عونهم
يعني انهم مش يعملوا حاجه شئ طبيعي
بحييكي ع البوست ده
تسلمي يا قمر
____________________

ماهى الناس دى يا زوزو مش لازم تستسلم أبدا
مش لازم ترضى بالامر الواقع
لازم يحاربوا علشان يغيروا الوضع دا لاخر نفس

نووووووووورتينى يا زوزو يا قمراية وشرفتينى بجد

سمو الأميرة سارة يقول...

Unique يقول...
فعلا يا سارة من اكتر الحاجات اللي بتدايقني في الشعب ده انه مش واعي لحاجات كتير غلط وحاجات كتير ناقصة
وزي ما قولتي فيه فرق بين الرضا بالقدر والرضا بالغلط والتقصير اللي بنرتكبه في حق نفسنا

امتى هنفوق ؟! مش عارفة

___________________

خايفة يا يونيك لنفوق بعد ما يفوت الاوان بجد .. ربنا يستر

منورانى حبيبة قلبى ومشرفانى

سمو الأميرة سارة يقول...

tota يقول...
سمو الاميره ساره
اكيد اما جيتي نورتي مدونتي المتواضعه
البوست ده جميل اوي لانه بجد لمس كشكله فعلا قائمه في البلد دي الامهم الي عايزه اقوله انه موقف حصل معايه وانا راكبه الميكروباص المفروض ان الاجره فبي الميكروباص ده 40 قرش من ساعت ما الاجره غليت المهم امبارح السواق اول ما طلع ومشي قال كل كرسي يلم الاجره مع بعضه والاجره بخمسين قرش محدش اتكلم والاجره اتلمت بخمسين قرش قلتله طب هيه مش كانت ب اربعين قال طب وانتو هتعملو ايه بالبريزه!!!!!!!1
طب وانت مالك انشالله حتي نجيب لبانه ونرميها يعني ده واقع بس ارحج السبب بتاعه ان الشغب المصرب بجد بئا خايف من كتر الي بيحصل فيه من كتر الضرب علي القفا الي اخده
عموما بجد بوست رائع وانتظر دايما زيارتك ليا

__________________

ربنا يخليكي يا توتا يارب دا انا لما زرت مدونتك اتشرفت وزاد شرفى بانك نورتينى يا قمر
بالنسبة للموضوع بقى
ففعلا الموقف دا بيتكرر كتير ويفقع مرارتى واللى بيغظينى بجد ان الناس بتستلم وانتوا مدام بتفرطوا فى بريزة هتفرطوا بعد كده فى جنيه واتنين ويمكن فى كل حاجة .. ما انتوا اتعودتوا على كده ..

كمان اللى يفقعك لو واحد اعترض وقال لأ مش هدفع يقولوا ياعم منك لله هتوقف حالنا ويروح حد تانى يدفعله

طب ما انتوا اغلبية والسواق دا واحد ليه تستسلموله

مش عارفة بجد

نووووووووورتينى يا حبيبتى ويارب تتكرر زيارتك تانى

mohra يقول...

مش بقولك يا بنتى انت دماغك عاليه
انا كمان بتفرسنى "نحكم عقلنا نتهبب كلنا" الحل زى ما قلتى فى الانتاج و وقف السرقه اللى ماشيه فى البلد

Emy يقول...

كلامك صح ياسارة وانا معاكى وعلى قدر حبى لهذه البلد وشعبها الا انى خايفة على هذا الشعب ومن كتر اللى بيحصله اللى خلت االالمبالاةوالسلبيات زدات عنده وكتر عنده مصطلحات طنش وكبر ونفسى القاى حد ايجابى حتى على الاقل فى المواصلات بس اكيد فى ناس ايجابين بس قليل وكمان نفسى الشعب كله يصحى ويفوق من اللى هو فيه وانا من الناس اللى بتحب المظاهرات بس تكون ايجابية ولها هدف مش مجرد انتفاضة بس وخلاص ويارت نحاول كلنا نبقى ايجابين بس هقولك ياسارة من كتر اللى شيفه الشعب اكيد قريب لازم هيفض به وانشاء الله هنشوف حاجة ايجابية .معليشى طولت عليك

Emy يقول...

ومن الحاجات اللى ضايقتنى من الشعب اكتر اننا بنعمل فى اليوم سبع دقائق فقط شوفتى تفرح وحاجة تشرفنا وسط العالم 7 دقائق من 24 ساعة فى اليوم حرام والله امال لومكناش بلد اسلامى وعارفين العمل عبادة كنا عمالنا ايه بصراحة حاجة تنسف الرقبة خالص مش تقصرها بس عيب علينا تبقى كل حاجة فينا صينى لبس صينى ادوات صينى موبيلات صينى مصليات صينى وكمان اكلات صينى وشوية بشوية نصبح نلاقى نفسنا صينى فى صينى

Blue Nile يقول...

بشكرك طبعاانك نورتيني في مدونتي وبشكرك على تعليقك وانا شاء الله نتواصل
موضوعك جميل جدا
وطبعا في فرق بين الرضا بالمقسوم والطموح اننا نبقى احسن

appy يقول...

بصى انا كمان متفقه معاكى فى اننا نفصل لحاف وبشده بس يا قمر الموضوع مش علينا لوحدنا على ظروف حوالينا كمان بس الشطارة اننا نتخطها
بجد تسلم ايدييكى

سمو الأميرة سارة يقول...

mohra يقول...
مش بقولك يا بنتى انت دماغك عاليه
انا كمان بتفرسنى "نحكم عقلنا نتهبب كلنا" الحل زى ما قلتى فى الانتاج و وقف السرقه اللى ماشيه فى البلد
____________________

ربنا يخليكي يا حبيبة قلبى انتى اللى دماغك جامدة

وفعلا لااااااااااااازم قبل اى حاجة نوقف السرقة اللى ماشية فى البلد

سمو الأميرة سارة يقول...

Emy يقول...
كلامك صح ياسارة وانا معاكى وعلى قدر حبى لهذه البلد وشعبها الا انى خايفة على هذا الشعب ومن كتر اللى بيحصله اللى خلت االالمبالاةوالسلبيات زدات عنده وكتر عنده مصطلحات طنش وكبر ونفسى القاى حد ايجابى حتى على الاقل فى المواصلات بس اكيد فى ناس ايجابين بس قليل وكمان نفسى الشعب كله يصحى ويفوق من اللى هو فيه وانا من الناس اللى بتحب المظاهرات بس تكون ايجابية ولها هدف مش مجرد انتفاضة بس وخلاص ويارت نحاول كلنا نبقى ايجابين بس هقولك ياسارة من كتر اللى شيفه الشعب اكيد قريب لازم هيفض به وانشاء الله هنشوف حاجة ايجابية .معليشى طولت عليك
_________________________


يالهوتى يا ايمى

بتحبى المظاهرات وقاعدة فى مدونتى ههههههههههههههههههههههه

هنروووووووووح فى داااااااااااهية

هههههههههههههههههههه

اول هام انتى منورة المدونة يا حبيبة قلبى

بالنسبة للموضوع فياااااااااااارب يسمع منك والشعب ينتفض بقى ويفوق قبل فوات الاوان

سمو الأميرة سارة يقول...

Emy يقول...
ومن الحاجات اللى ضايقتنى من الشعب اكتر اننا بنعمل فى اليوم سبع دقائق فقط شوفتى تفرح وحاجة تشرفنا وسط العالم 7 دقائق من 24 ساعة فى اليوم حرام والله امال لومكناش بلد اسلامى وعارفين العمل عبادة كنا عمالنا ايه بصراحة حاجة تنسف الرقبة خالص مش تقصرها بس عيب علينا تبقى كل حاجة فينا صينى لبس صينى ادوات صينى موبيلات صينى مصليات صينى وكمان اكلات صينى وشوية بشوية نصبح نلاقى نفسنا صينى فى صينى
_________________________

معلومة بجد اول مرة اعرفها يا ايمى

وبجد حزنت جدا جدا

بس اللى يحزن اكتر ان فى ناس مش بتشتغل حتى السبع دقايق دول

سمو الأميرة سارة يقول...

Blue Nile يقول...
بشكرك طبعاانك نورتيني في مدونتي وبشكرك على تعليقك وانا شاء الله نتواصل
موضوعك جميل جدا
وطبعا في فرق بين الرضا بالمقسوم والطموح اننا نبقى احسن

____________________

انتى اللى منورانى يا حبيبة قلبى وشرفتينى بجد

بالنسبة للموضوع ففعلا فى فرق بين الرضا بالمقسوم وبين الطموح وبين التكاسل والانهزامية

سمو الأميرة سارة يقول...

appy يقول...
بصى انا كمان متفقه معاكى فى اننا نفصل لحاف وبشده بس يا قمر الموضوع مش علينا لوحدنا على ظروف حوالينا كمان بس الشطارة اننا نتخطها
بجد تسلم ايدييكى
__________________

تماااااااااااااام يا آبى

المهم اننا نتحدى الظروف ونتخطاها

مش نستسلم ليها

نورتينى ياقمراية وشرفتينى بزيارتك الجميلة دى

dina يقول...

اه و الله معاكى حق المشكلة ان شعبنا دا استحالة تعرفى تتنبأى بردود فعله يعنى تلاقيه ساكت ساكت ساكت ساكت و مرة واحدة يهب و الحقيقة انا لحد دلوقتى على امل انه يهب بقى عشان السكوت طول و عمل بلاوى كتير

blue-wave يقول...

معلش انا مش معاكى
المقصود من المثل دا انك ماتحلمش احلام اكبر منك ومن امكانياتك وتتعذب وانت مش قادر تتطولها
ايوة لازم يكون عندك امل وطموح بس فى حدود امكانياتك
تحياتى

سمو الأميرة سارة يقول...

dina يقول...
اه و الله معاكى حق المشكلة ان شعبنا دا استحالة تعرفى تتنبأى بردود فعله يعنى تلاقيه ساكت ساكت ساكت ساكت و مرة واحدة يهب و الحقيقة انا لحد دلوقتى على امل انه يهب بقى عشان السكوت طول و عمل بلاوى كتير

_________________________

المشكلة يا دينا هيهب صح ولا هيهب غلط زى ما هب زمان والهبة تطلع ع فاشوش

بس كمان صدقينى اهم من انه يهب انه يفوق لنفسه ويشتغل صح

نوووووووووورتينى حبيبتى بجد

سمو الأميرة سارة يقول...

blue-wave يقول...
معلش انا مش معاكى
المقصود من المثل دا انك ماتحلمش احلام اكبر منك ومن امكانياتك وتتعذب وانت مش قادر تتطولها
ايوة لازم يكون عندك امل وطموح بس فى حدود امكانياتك
تحياتى

___________________

صدقنى يا دكتور عمرو ،، بالرغم من انه مقصود بيه ان الواحد ما يحلمش احلام اكبر من امكانياته لكن تطبيقه والاستشهاد بيه ما بيكونش كده خالص

المثل دا غالباً بيستعملوه علشان يكسروا مجاديف اى حد عنده طموح وتطلع للافضل

نوووووووورتنى يا دوك

المتابعون

اعتبرها بيتك ♥

وِش القفص

خليك ورايا

دليفري..