2008-07-09

أفكار لحياة زوجية لاسعة ..

الأول قبل ما أقول الافكار عايزة أفكركم تانى بمعنى ((اللسعان )) وكمان عايزة أفكركم

بتوبيك
((
جننيه تكسبيه )) علشان البوست دا يعتبر مكمل ليه

الفرق بينه وبين جننيه تكسبيه بس إن جننيه تكسبيه أفكار للبنات

لكن دى أفكار للطرفين

البنانيت والشباب

يلا بينا بقى نشووووووف الأفكار


***

(1)


نكتب اسئلة دمها خفيف أو حتى محرجة مكتوبة فى ورق صغير

ونوزعها فى كل مكان فيه ادراج مثلاً أو فى البونبونيرة

أو فى المطبخ أو فى جيوب الهدوم واللى يطلعله سؤال لازم يروح للتاني

ويجاوبه مهما كانت الظروف

* تخيلوا كده مثلاً هما متخاصمين وحد منهم طلعله سؤال

ايه اكتر حاجة بتحبها فيا ؟؟

ويروح للتانى - وهم زعلانين - ويقول له

مثلا "
أكتر حاجة بحبها فيك قلبك الطيب أو اى حاجة " تخيل بعد الحركة دى

ممكن يفضلوا زعلانين من بعض ؟!


***

(2)


كل يوم يقطعوا ورقة النتيجة وكل واحد منهم يكتب على ضهرها أحلى حاجة

التانى عملها ليه النهاردة

ويشيلوا الورق فى مكان مخصوص

أكيد الورق دا هيعرفهم انهم مهما كانوا تعبانين من بعض أو بيزهقوا

او لو شكوا ان حب التانى قل

ورق النتيجة هيثبت لهم انهم عاشوا أيام حلوة

وان مافيش يوم بيعدى من غير ما حد فيهم يحاول يسعد التانى

ولو بحاجة بسيطة خالص

***

(3)


مفجأة ضيف على الغدا

الزوجة تعزم حد كان واحش زوجها أووووووووى على الغدا وتعملهاله مفجأة

والزوج كمان ممكن يعملها

يتفق مع حد كان واحشها اوى وبتحبه جدا

ويعزمها برا على الغدا من غير ما يقولها

أكيد دى هتسعد كل يومهم


***
(4 )


حد منهم يبعت للتانى جواب من غير توقيع

لازم يخلى باله ويكتبه على كمبيوتر بحيث ان الخط ما يتعرفش

أو ايميل من ايميل مجهول

يقول له
( سامحنى على غلطي فى حقك .. انا بعتذر ليك أوى وبتمنى من ربنا تسامحنى )

طبعا هيتجنن / هتتجنن وياترى مين دا ؟؟

لما يجي يسأل الطرف التانى - اللى هو اصلا بعت الجواب او الميل -

يقوله بما انك ما تعرفش هو مين

يبقى احسن حاجة تسامح كل حد غلط فى حقك

وبكده قلبه مش هيبقى جواه غير كل حب

وهيحس فى نفس الوقت ان اعتباره اترد له


***

بس خلاص كفاية كده المرة دى

ولو عجبكوا لسة ياما فى الجراب يا لاسع

ههههههههههههههههه







هناك 19 تعليقًا:

  1. بعد السلام عليكم

    ههههههههههه
    ايه يا بنتى دا ؟
    والله موضوع جميل

    وأفكار رائعة
    بس الكلام دا ما ينفعش غير مع اتنين فعلا بيحبوا بعض حب صادق مهما كانت الظروف والعقبات
    يعني عايزين زمن الرومانسية يعود

    عامة في انتظار بقية افكارك

    وتحياتي ليكي
    وأتمنى دوام التواصل

    ردحذف
  2. تصدقى فكرة بس عوزة اقولك الحر والحياة بقت مخليه الناس مش متحمله نفسها اساسا
    بس يا ريت يحاولوا يجربوا يا ريت

    ردحذف
  3. ههههههههه
    والله كلام جميل .. ولطيف وأفكار لوسعية لطيفة..

    بس هى فين دى .. ألاقيها بس وإن شاء الله نقطع بعض فى الخناق .. بس هي فين ؟؟ و إمتى؟؟ .. إزاى ؟؟

    إهيء إهيء إهيء

    (ضحكة ودمعة)

    مرحبا بيكى فى أى وقت

    ردحذف
  4. سارورة الامورة

    اولا اسف جدا على تقصيرى معاكى بس غصب عنى

    تايه اليومين دول فى وسط البلد وسط البلد الحقيقى مش المدونة سافرت القاهرة ومش عارف اروح فين ولا استقر فين والدنيا واخدانى

    معلهش طولت بس انا حسيت انك زعلتى من تقصيرى

    ردحذف
  5. السلام عليكم تانى

    اعلق بقى على البوست

    كلام جميل قوى وحلو خالص خصوصا حكاية السؤال دى بجد ممكن يعيشهم فى هنا

    انتى بتحسسينى ان عقلك كبير قوى
    ياريت كل المتجوزين يعملوا بنصايحك واسمحيلى اخد كام فكرة منهم وانصح بيهم شوية ناس

    وهنستنى باقى النصائح الغالية قوى دى

    هتفيدنا بكرة وبعدة

    حاجة تانى

    واحدة عاقلة اوى وفاهمة اوى كدة زيك

    لو متجوزة يبقى يا بخت اللى متجوزاة

    ولو لسة متجوزتيش يبقى يا بخت اللى

    هتتجوزية ولو بتحبى يا بخت اللى

    بتحبيه

    تحياتى

    ردحذف
  6. حاجات حلوة أوي

    بس مشكلتها إنها مش واقعيةةةةةةةةة

    عايزه اتنين حبيبة رومانسيين دارسين أدب رومانسي أو قروه كتير

    عالم رايقة هع هع :)

    ردحذف
  7. السلام عليكم ياسارورة وحشانى اوووووى عاملة ايه اما تعليقى على البوست فهو جميل جدا وافكار رائعة وانا عن نفسى قررت ان اكتبها علشان تبقى معى استفيد بها فى حياتى المستقبلية ان شاء الله و انا عارفة شخصيا نوعية الاسئلة المحرجة بتاعة سارة هى فعلا محرجة ولكن هذه الاسئلة وبقية الافكار لاتتناسب مع كل الازواج لان كل الازواج ليسوا على درجة عالية التفاهم لمثل هذه الافكار والتعليم والقراءة وربما البعض يقول دا كلام فارغ واحنا مش فاضين وهذه الافكار عاوزة زوجين يكونوابينهم علاقة ود ومحبة صادقة لله لبعضهم لبعض فان احب بعضهم لبعض من اجل الله فلم يكن بينهم ابدا كره اوخصام او اى نوع من الزعل وسوف يولى الشيطان ويهرب الذى هو اساس المشاكل الزوجية اساسا والذى يفرح اذا اوقع احد اعونه فى التوقيع والتفريق بين الزوجين ويقول له نعم انت ويدنيه منه منزلة فلماذا يسمح الزوجين للشيطان ان يوقع بينهم ويفرحه ليه ما نحرقش دمه ليه . واسال الله العظيم ان يصلح مابين الازواج وان ينفع يا اختى سارة بهذه الافكار وان تكون لك زيادة وينتفع بها الكثير وجزاك الله خيرا

    ردحذف
  8. اخيرا لى نصحية الاخوات والبنات العسولة ليه يااختى ما تحاوليش تبقى 4فى1 يعنى تبقى متنوعة كل يوم عن الاخر فى الشكل والمضمون ارضاء لزوجك والذى من ارضائه رضا الله عز وجل ومن اجل حياة سعيدة وكمان تضمنى انه لايبوص لحد غيرك ولا يبوص برة وانا حددت اربعة علشان الشرع حدد اربع زوجات فقط وعلشان تبقى عاملتى اللى عليكى وماترجعيش تشتكى تعدد الزوجات وكان عندى اقتراح كمان ولكن ان شاء الله فى وقت لاحق لانى مشغولة الان. وسلاااااااااااام ياسارة هتوحشنى اوووووووووووووى.اختك فى الله

    ردحذف
  9. دة مش لسعان خالص على فكرة دة بجد كلام ناس عاقلين وافكارهم جديدة وحلوة

    ردحذف
  10. نايس أفكار يا ساروره


    ههههههههه يا بخت مين هتجوزك

    و مستني بوست افكار الطلاق

    ردحذف
  11. بصى
    هى كل الأفكار جميلة قوى خاصة بتاع النتيجة
    لكن
    !
    !
    مممممم فى حاجة تانيه مش تمام قوى وهى بتاع الأميل المجهول والجواب وكده بقى
    افرضى راحت المدام قبلت الأميل يقولها جوزها مش عيب يا مدام تقبلى اميلات من حد متعرفهوش وتكبر فى دماغه يروح عاملها زعله تانيه
    ههههههه
    سعيدة بمعرفتى للمدونة دى وشكرا

    ردحذف
  12. والله حلوين اوى شوية الأفكار دول
    بس انا هاخاف انفذهم لا تقوليلى حقوق الطبع وتبهدلينى زى ما انتى كاتبه من فوق::))

    ردحذف
  13. بجد افكارك تجنن يا ساره
    اقتنعت بيها جدا وانا عن نفسي احب الافكا الروملنسيه دي
    واكتر 2 عجبوني
    اول واحده بتاعت ورق النتيجه فعلا سعات بتمر وقت بالزوجه ممكن للحظه تحس انه نسيها ومش بيحبها زي الاول وساعتها ممكن بس تفتح الورق ده وتعيش معاه
    تاني واحده بئا بتاعت الجواب الغرامي بس ياريت هوه بعد كده يعبرها ومش يطنش
    باذن الله اوعدك اما ان شاء الله اتجوز اعمل كده
    سعدت بمروري واسفه للتاخير ومنتظراكي

    ردحذف
  14. موضوعك جميل كالعاده يا ساره .. بجد قلمك جميل اوى

    تحياتى ليكى .. ومستنى رايك فى اخر بوست ليا

    ردحذف
  15. ههههههههههههههههه

    ع اساس ان فى وقت نلعب وكدة ......يعنى

    ههههههه
    انتى بتحلمى يابنتى
    لاوقت للندم
    _البلد بتنهار بخلطتنا يا جمال_

    ردحذف
  16. صباحو ابيض

    انا مش داخل غير غير علشان اعلق على تحذير حضرتك الاخير اللى فى راس المدونة

    وباقولك

    ايه البلطجة دى؟؟؟

    ردحذف
  17. انا دخلت على مدونتك عن طريق الفيس بوك انطباعي الاول عنها التحذير اللى فوق ده اللى بالاحمر بيديكي نفس الاحساس وانتى داخله على كمين مدينة السلام ومفيش بطاقه مع كل احترامي لكتاباتك بس وحقوق ملكيتها بس ملناش ذنب ناخد التهديد ده فى وشنا
    بالتوفيق انشاء الله تحياتي

    ردحذف
  18. هههههههههههههههههه

    فكره جامده جدا
    بس فى حاجه
    لو هو صديقوا الى وحشه جدا
    وهو قلها دى فلان صحبى وحشنى موت ونفسى اشوفه اوى
    راحت هى عزمه صديه على الغدا
    طبعا مفاجاءه
    يعنى الباشا ميعرفش

    قام طب عليهم
    صديقه قاعد فى الانتريه
    وهى فى المطبخ
    وجوزها قام شك فى اخلاقهم وقتلاهم
    يبقى نعتبر البوست ده دليل براءتهم ولا نعتبره بلاغ للنائب العالم

    هههههههههههه
    تحياتى

    ردحذف
  19. اول زياره لمدونتك ولن تكون الاخيره
    لانها اعجبتنى بصراحه
    وانا اللى كنت فاكر نفسى مدون
    ده انا طلعت غلبان
    ومتزعليش على اللى يتسرق منك
    غيرك بيتسرق منه افكار وتتعمل حلقات وافلام مش بوستات بس
    الشاطر اللى يحافظ على فكرته
    تحياتى

    ردحذف

Say something...