لعلمك

لعلمك

إقرأ لي

دخلوا بكليك شمال :D

Blog Archive

السبت، سبتمبر 27، 2008

postheadericon هو انا ليه ماحبتش ابن الجيران ؟

كنت قاعدة بسمع اغنية نانسى .. ابن الجيران
وبعدين افتكرت كمية الاغانى اللى بتتكلم عن ابن الجيران
مثلاً نجاة ساكن قصادى .. وغيرها وغيرها
وافتكرت كل ماحد يبقى في حوار فى التلافزيون ولا في الراديو
المذيع ولا المذيعة يقولوا له .. اكيد بقى كنت بتحب بنت الجيران
احكى لنا بقى وكده
فاستغربت كده وحسيتها حاجة من نواميس الكون ان كل واحد يحب ابن الجيران
وقعدت شكيت في نفسى قولت هو انا مش طبيعية ولا ايه يعنى ؟؟
انا ليه ماحبيتش ابن الجيران ؟؟
وبعدين از فجأة كده قولت يالهوى هو انا لو كنت قررت احب ابن الجيران
كنت هحب مين ولا مين
عندنا جيران كتير اووووووووووى
وبعدين شوية كده فكرت لقيته ماينفعش يعنى
الواحد مثلاً ابسط حاجة لازم يكون له برستيج قدام اللى بيحبه
لكن انا شايفة العيال - شوف بردوا بقول العيال - شايفة جيراننا عيال لسة
وكمان انا نفسى حاسة انهم شايفيننى لسة عيلة
دا مافيش واحد من ولاد الجيران ما موتناش من الضحك عليه انا وولاد عمتى
علشان عملنا فيه مقلب وهو كان زى العبيط
اللى اقنعناه ان في نداهة فعلاً
واللى عملناله رعب بالليل
واللى اقنعناه ان المكرونة الاسباجيتى بتطلع من شجرة ورقها ملولو
هههههههههههههههههههه بلاوووووووووى يعنى
دا اول هام
تاني هام .. يبقى خايب اوى اللى يحب ابن الجيران ولا بنت الجيران
ابسط حاجة هينكشفوا بسرررررررررررعة وهيبقى شكلهم وحششششششش اوى
يعنى لأنه هيشوفها في الرايحة وفي الجاية واكيد هيبان عليه
قدام باباه ولا قدام بابااها
ولا اخوها واحتمال يندب فيها علقة
وغير كده لما الحدوتة تفشل هيعااااااااااااانوا - غالباً حب ابن الجيران بيفشل على فكرة ماعرفش ليه ههههههههههههههههه - هيضطر بقى يحضر فرحها
ويقعد مكتئب ويحط كول تون اعذرينى يوم زفافك لمدة شهر
وبعد كده هيبدأ يدور على جيران جداد عادى ههههههههههههههههههه
وكل ما خطيبها يجي اكيد في مرة هيشوفه ولا مرتين تلاتة
و .... الخ الخ .. يعنى وجع قلب طويل المدى
الغريبة بقى انى اكتشفت في شارعنا حاجتين
نمبر وان : انى ممكن يعدى شهرين تلاتة ما اشوفش حد من الجيران
رغم انى بخرج وكده .. وعلى فكرة كلنا في الشارع كده ما حدش بيشوف حد
الا الناس الكبيرة .. اهالينا يعنى بيشوفوا بعض
نمبر تو : ان شكلنا كده كلنا واعيين وناصحين .. ما حسيتش ان في حد من الجيران حب وحداية من الجيران رغم ان الواحدات كتير اوى في شارعنا ههههههههههههههههه
اخر حاجة هقولها بقى في التوبيك دا
البتاع دا مالوش اى لازمة يعنى بس انا مش نايمة كويس وحابة اودعكم يعنى علشان هغيب شوية لحد بعد العيد
فقولت لازم اكتب توبيك واقولكم كل سنة وانتم طيبين وهتوحشونى اوى
وياريت لو حد بيحبنى ما يجيش يقولى العيد فرحة هيييييييييييه هيييييييييييه لأن الاغنية دى بتجيبلى اكتئاب اوى لما بسمعها
ههههههههههههههههه
وياريت لو حد هيصلى العيد في مصطفى محمود يقولى في الكومنتس علشان انا بصلى العيد هناك واتمنى اشوفكم
بس يارب اعرف ادخل نت واقرا الكومنتات
سلامووووووووووووووز

33 بوينتس أوف فيو:

Mohamed Hamdy يقول...

وأخيرا انا أول كومنت ...

بجد بوست جميل ومختصر ومفيد
وبما انك مش هتكونى هنا ساعتها يبقا كل سنه وانتى طيبه من دلوقت .. ومتتوقعيش اى حاجه اكتر من كل سنه وانتى طيبه عشان لو دماغك راحت لعيديات او اى بدعه من هذا القبيل .. انسى

أما عن البوست بتاعك .. انا على عكسك .. مكنش عندى بنات جيران احبهم . يا اكبر منى يا كل خلفتهم ولاد اساسا .. والله اريح

تحياتى ليكى ايها الكائن الكسول

رئيس جمهوريه نفسى يقول...

كل سنة وانتى طيبة وعيد سعيد عليكى وعلى جميع اهلك ان شاء اللة
موضوع بنت الجيران وابن الجيران على ايامنا يعنى كنا بنحترم الجيران فمكناش بنبص لبناتهم اصلا ثما كانوا بنات دحيحة بجد مقطعين الكتب ومكنوش فاضين للموضوع دة فيمكن احنا حبينا بنت الجيران بس متحبيناش منهم

انا ودماغي يقول...

كل سنة و أنتى طيبة يا قمر و ربنا يجعله عيد سعيد عليكى من غير مقالب فى الجيران


عارفة الموضوع ده كمان كان شاغلنى أوى و كنت برضه فاكرة إن فيا حاجة غلط.....بس فعلا الغلط هو حب ابن الجيران ؛)

بس بجد أنتى ضحكتينى اوى
و الله انتى بوستاتك كلها زى العسل

blue-wave يقول...

ههههههههههههههه
والله انتى عسل
وفعلا غريبه انك ماتحبيش ابن الجيران
طيب ازاى هاتوواجهى الدنيا والمجتمع والناس بعد كدا؟؟؟
عموما كل سنه وانتى طيبه وهاتوحشينا
وانا كمان بصلى فى مصطفى محمود وهايبقى سهل نتقابل
هما يادوب كام مليون واحد اللى بيصلوا هناك
هههههههههههههههههههههههههههه

عزت عادل يقول...

شكراااااااااااااااااااااااا

www.aflamcity.blogspot.com

ღღAhMedღ3LaMღღ يقول...

العيد فرحة هيييييييييييه
(:(ههه):)

Dexter! يقول...

هههههه

موش هرد علي البوست

هههههههه اللهم اني صائم بأه

وتروحي و رجعي بالسلامه

اه علي فكره

انا موش بصلي في مصطفي محمود :P

عبده الرايق يقول...

انا دخلت المدونه امبارح ولقيت الاسم بنت لاسعه
خفت احسن اتلسوع
جيت انهارده وانا عامل حسابى ولابس بدله مطافى
المهم موضوع ابن الجيران وبنت الجيران
الموضوع ده بدء يقل ويكتر
يقل علشان الجيران كل واحد من الهم بقى فى حاله
ويكتر لان التكنولوجيا خلت كل العالم جيراااااااااااااااااااااااااان
اما بقى عن الصلاه فى جامع مصطفى محمود
شكلك كده بترسمى على العيديه
عموما سمو الاميره
كل سنه وانتى طيبه
وعيد فطر سعيد

¨¨¨°~*§¦§ Appy §¦§*~°¨¨¨ يقول...

هههههههههه ولا انا
بس يخرب شيطانك الشجره اللى بطلع المكرونة
كل سنه وانتى طيبه يا قمر

كلمتى يقول...

كـــــــــــــــل سنه وانت طيبه

ياثوثتى ياجميله

وبالنسبه لابن الجيران فانا عمرى مافكرت انى احب ابن الجيران

مااعرفش ليه بس الحمد لله انها ماحصلتش

عشان ماكنوش يغنولى

طالعه من بيت ابوها رايحه بيت الجيران

أبلة نظيرة يقول...

موضوع إبن أو بنت الجيران مازال موجود حتى الآن وإن كان طبعا مش منتشر زى زمان
أما السبب فده عشان إن البنت زمان كان خروجها محدود ، وطبعا لما بتمر بفترة المراهقة بتكون فى إشتياق للحب ..حب أى شخص كان، وده طبعا بيكون طبيعى فى المرحلة العمرية دى ، وطبعا مش بيكون قدامها إلا إبن الجيران
لكن دلوقتى مع خروج المرأة لميادين العمل والدراسة إلخ ، ما أصبحشى إبن الجيران هو الخيار الوحيد إللى قدامهاعشان كدة إبن الجيران تقدرى تقولى أسهمه قلت حبتين
تحياتى

المحارب المتيم يقول...

سارة

والله شكلك كدة واقعة فى ابن الجيران بس بدارى

وبعدين حكاية الوحدات الكتير اللى

فى شارعكم دى ما تشوفيلى واحدة

وأهو يا بخت من وفق راسين فى الحلال

تصدقى فعلا انا كان معايا مشكلة مع بنت الجيران بس عدت

هتصلى فى مصطفى محمود تتعوض مرة تانى

يالا سلامووووووز

بالمناسبة انتى بتنفضى كتير هيه

مش هعديهالك

aya يقول...

كل سنه وانتي طيبه يا ساره
هههههههههه حلوه فكره نحب ابن الجران ياسلام بئا لو ابن الجران ده انتي اكبر منه ببتاع 10 سنين ولا مثلا هوه اكبر منك بس لسه عيييييييييييييييييل
هيبقي شغل عيال
كل سنه وانتي طيبه

أنا إنسان يقول...

كل سنه ومصر طيبة

المحارب المتيم يقول...

اللهم يا سامع النداء
ومجيب الدعاء
امنح قارئها راحة البال والخاطر
ونجه من المخاطر
وكن له ساتر
وبلغة الفطر مجبور الخاطر

عيد سعيد عليكم
وكل سنة وانتوا طيبيين
مستنى تهنائتكم بعيد ميلادى على المدونة

اول ايام عيد الفطر

انا ودماغي يقول...

كل سنة و أنتى طيبة ياسمر الأميرة
و عيد سعيد عليكى إن شاء الله

برنامج انت تسال والكمبيوتر يجيب يعود بعد رمضان يقول...

الأخت العزيزه صاحبة المدونه المميزه المبهجه
تحياتنا...نحن هنا بالصدفه ولكن بجد سررنا بمرورنا...وندعوك ان تشاركى فى اول برنامج أذاعى من المحطه الرئيسيه لمصر وايضا هو اول برنامج أذاعى عن النت والمدونات ...يسعدنا ان نسمع آراءك ولذلك ندعوك بحراره لمدونة البرنامج
وموقعه
المدونه
http://netonradio.blogspot.com
الموقع وبه كافة التفاصيل عن البرنامج وموعد أذاعته
http://dear.to/cairo

سمو الأميرة سارة يقول...

محمد حمدي .. كل سنة وانتي طيبة حاف كده ؟؟ فيييييين العيدية عمال تقولى انا اخوكى الكبير اخوكى الكبير طب فيييييين الدليل ههههههههههههه

كل سنة وانت طيب يا ابو حميد .. اما بالنسبة للجيران بقى فاحنا كمان جيراننا خلفتهم كلها ولاد ههههههههه بس هناك فرق هههههه

سمو الأميرة سارة يقول...

رئيس جمهورية نفسي .. كل سنة وانت طيب دايماً ياااااارب ..

نروح بقى للجيران ... كلمتين في الجون والله وكانوا في بالي وانا بكتب البوست .. سيدنا محمد عليه افضل الصلاة والسلام وصانا ع سابع جار ... اننا نراعي حرمة بيته ونراعيه في اقل حاجة فالمفروض ماحدش يبص ع بنات جاره

سمو الأميرة سارة يقول...

انا ودماغي .. هههههههههه شوفتي يا بنتى طلعنا احنا اللي صح .. يلا بقى اللى شربوا مقلب حب ولاد الجيران دول يعيشوا وياخدوا غيرها وادى جزاة اللى مايسمعش كلام سارة هههههههههههه نورتينى يا قمر وانتى اللى زي العسل بجد

سمو الأميرة سارة يقول...

د / عمرو .. هههههههههههه تصدق المفروض اخبي الجريمة دى واستعبط واعمل نفسى حبيت حد من الجيران هههههههههههه

كل سنة وانت طيب دايماً يارب بالنسبة لمصطفى محمود فانا اكيد لو كنت روحت كنت هتعرف تلاقينى من وسط الكام مليون اللى هناك علشان انا نوري بيغظي على نور الشمس كمان ههههههههههههه بس للاسف واحنا في الطريق للمسجد حصلت مشكلة ورجعنا تانى ع البيت ماكنش في نصيب بقى

اكيد صليتوا في نور خافت ههههههههههه

سمو الأميرة سارة يقول...

عزت عادل .. سامحنى يعنى في اللى هقوله .. ع فكرة انت مستفز جدا

سمو الأميرة سارة يقول...

احمد علام .. هههههههههههههههه ماشى متشكرين يا عم .. كل دا حب دا انت هاين عليك تقتلنى هههههههههه

سمو الأميرة سارة يقول...

دكستر .. هههههههههههههه على فكرة وانا كمان :P

سمو الأميرة سارة يقول...

عبده الرايق .. ههههههههههههه ماتخافش انا معلقة طفاية حريق على اول المدونة ناحية الشمال ههههههههه

معاك حق في موضوع التكنولوجيا دى بعد الناس وقربهم في نفس الوقت .. يعنى تخيل انى مش بعرف اتكلم مع قرايبى بروقان وعمق كده الا ع النت ولا بعرف شخصيتهم الحقيقية الا ع النت ..

بالنسبة لمصطفى محمود والعيدية شكل كده حد نق فيها ههههههههههههههههه

كل سنة وانت طيب وبجد نورتنى

سمو الأميرة سارة يقول...

آبي .. ههههههههههههههههههههههه ايه دا لو اعرف ان في بنات كتير كده ماحبتش ابن الجيران كنت اتطمنت من زمان هههههههههه

ع فكرة الواد دا وش استعباط اصلا دا كان امنية حياته انه يطلع سواق جرار ههههههههههههههه

كل سنة وانتى طيبة يا حبيبة قلبى ويارب كل سنة تبقى احلى من اللى قبلها

سمو الأميرة سارة يقول...

احلى بسكوتة .. ههههههههههههههه والله معاكى حق يا دودو .. دا كفاية الاغنية دى ولا العيال بقى لما يخلفوا .. هيبصوا لهم بصة مش هي خااااااااالص ههههههههه

كل سنة وانتى طيبة يا حبيبة قلبى

انا العيد عندى هيبقى يوم التلات باذن الله علشان هشوفك فيه ياااااااااااااااااااااااااه وحشااااااااااااااااااااااااااااااااااااااااااااانى يخرب عقلك

سمو الأميرة سارة يقول...

أبلة نظيرة .. معاكى حق والله تفسير منطقى جدا .. كان عندى مدرسة في الاعدادى كنت بحبها اوى كنا بنتكلم معاها في مرة عن حب المراهقة وكده وقالت لنا كلمة مش ناسياها لحد دلوقتى .. بتقول البنت في الفترة دى لو في زبال - دا مش معناه انى بحقر من مهنة الزبال بس اقصد انه اكيد مش ينفع فتى احلام بنت يعنى - قالها كلمة حلوة ممكن تحبه

نورتينى يا ابلة نظيرة وكل سنة وانتى طيبة

سمو الأميرة سارة يقول...

المحارب المتيم .. ههههههههههههههه لأ والله اغلبهم عندهم اولاد دلوقتى والباقيين بعيد عنى انا في اول الشارع وهم في اخره .. دا انا بنسى اساميهم وربنا وهم في سنة كام ههههههههههههه انت جاي تتبلى عليا ولا ايه يا عرفة هههههههههههههههههه

كل سنة وانت طيب يا اطيب عرفة في الدنيا

سمو الأميرة سارة يقول...

صحيح بخصوص يابخت من وفق راسين في الحلال فانت بس تعالى شارعنا وانا هوفق اربع روس في الحلال .. يلا خلينا نخلص من كمية البنات الرهيبة اللى في شارعنا دى ههههههههههههههه

سمو الأميرة سارة يقول...

انا ودماغي .. كل سنة وانتى طيبة يا حبيبة قلبى ويارب يكون كان عيد سعيد عليكي يا قمر

سمو الأميرة سارة يقول...

برنامج انت تسأل والكمبوتر يجيب .. انا اتشرفت جداً بالتعليق دا وانا زرت المدونة وعلقت وعكييييييييييت معلش .. ان شاء الله هتابع البرنامج دايماً

ahmed abobasha يقول...

كويسه اوى فكره ابن/ بنت الجيران انا حدور من النهارده

المتابعون

اعتبرها بيتك ♥

وِش القفص

خليك ورايا

دليفري..