لعلمك

لعلمك

إقرأ لي

دخلوا بكليك شمال :D

Blog Archive

الأحد، أكتوبر 05، 2008

postheadericon ياترى !!

.
.
.
ياترى هيجي يوم واحس فيه بأمان ؟؟
ياترى هيجي يوم واحقق احلامي ؟

ياترى هيجي يوم واعيش مع الانسان اللي بالمواصفات اللي بتمناها ؟؟
وياترى اساسا المواصفات دى فعلا ً تناسبني ؟؟
ياترى هيجي يوم وابقى زي ما انا عايزة ؟؟
ولا هبقى واحدة تانية وهحس كأني معرفنيش ؟؟
ياترى هيجي يوم وهتبقى الايام دي - اللي بعتبرها شدة وهتزول - بالنسبة لأيامى
أيام حلوة وهتمنى ترجع تاني لأنها اهون من اللي هبقى فيه ؟؟
ياترى هسمي أولادي زي ما بتمنى ؟؟
ولا هم اسمهم مكتوب عند ربنا حاجة تانية خالص ؟؟
ياترى هستحمل لحد امتى وهفضل متماسكة وبرسم على وشي الضحكة علشان خاطر الناس مش ناقصة هم
ياترى ممكن في يوم حد في الدنيا دي يحس بيا بجد ؟؟
يسمعني بجد وما يعتبرنيش مجنونة ؟؟
ياترى في يوم من الايام هقدر اقول لكل انسان في قلبى حاجة خنقاني من ناحيته اني مخنوقة منه علشان كذا وكذا وكذا ؟؟
..
.
ياترى هيجي يوم وحد يقول لي " خسارة يا سارة انتى ماكنتيش كده " ؟؟
ولا هلاقي حد بيقولي " برافو عليكي يا سارة انتى كده تمام " ؟؟
وياترى هموت امتى ؟؟
وهموت ازاي ؟؟
ياترى مين هيزعل عليا ؟؟ ومين هيفرح انى ريحته وغورت ؟؟
ومين هيفتكرني ؟؟
وهيفضل فاكرني قد ايه ؟؟
ياترى ربنا هيسامحنى على تقصيري في عبادته ؟؟
.
.
.
.
.
ياترى مين هيدعيلى بالرحمة ومين هينم عليا ويقول كل حاجة وحشة عرفها عنى ؟؟
ياترى القطة بتاعتي ماتت ولا اتخطفت ولا تاهت ؟؟
وياترى اوتوجرافي اختفى فين ؟؟
وياترى مين من اصحابي بيحبني بجد ؟؟
ياترى انا ليه بعشق اللون الاسود أوى ؟؟
وليه بحب الكتابات الحزينة والاغاني الحزينة رغم انى بحب الضحك والفرفشة ؟؟
.
.
.
ياترى ليه بحب اوى ع النت الاقي صفحة مسطرة
وفي الكشاكيل بتخنق من السطور اللى مش بتدينى مساحة من الحرية
ياترى انا ليه بحس انى عجوزة اوى وعندي يجي 80 سنة ؟؟
ليه بحس إني عارفة الدنيا أوى ومجربة فيها كتير
رغم انى ما شوفتش حاجة في الدنيا تقريبا ؟؟
السؤال الاهم بقى
ياترى ايه فايدة البوست دا ؟؟
ماعرفش هو مجرد فضفضة واسئلة كتير خنقاني وتعباني
وبجد دماغي حساها هتنفجر من كتر التفكير
في اللى فات واللى جاي واللى عايشة فيه دلوقتي
.
أنا بجد تايهة اوي وحيرانة اوي ومخنوقة اوى اوى اوى
وماحدش يقولي فضفضي لأني مش قادرة افضفض
لما باجي احكى ايه مزعلنى مش بلاقي حاجة محددة
وماحدش يقولي اتفائلي .. لأني متفائلة في نفس الوقت اللى انا فيه في عز اكتئابي
انا بس نفسي في حاجتين
1 / احس بأمان وراحة بال
2 / لما اسأل سؤال الاقي له اجابة مقنعة .
.
.

11 بوينتس أوف فيو:

د/ رامي شهاب الدين يقول...

ليه نضيع وقتنا فى إننا نقول ياترى؟؟
ليه نستعجل أمور لسة وقتها ماجاش؟؟

من ردك فى مدونتى وكونك كسبتى الرهان زى ماقلتى وبجدارة المفروض الحاجات دى مش تقفى عندها كتير

أنا شايف إنك إنسانة ممتازة فى الحياة العملية ..لكن إستعجالك ده ممكن يضيع منك فرص كتير

أهم شئ فى المرحلة الجاية من حياتك إنك تكونى فى حالة سلام مع النفس ، وعيشى فى حدود يومك ، وزى ماهو مكتوب فى كتاب دع القلق وأبدأ الحياة لمؤلفة ديل كارنيجى: ((ليس علينا أن نتطلع إلى هدف يلوح لنا باهتا على البعد ولكن علينا أنن ننجز مابين أيدينا من عمل واضح بين))
عشان بكرة يبقى جميل زى مابتتمنى يبقى النهاردة لازم نركز حماسنا فيه عشان يبقى على أحسن مايكون ، ساعتها هيكون بكرة إمتداد جميل للنهاردة

أتمنى إنك تكونى إستفدتى من كلامى وعذرا للإطالة ..تحياتى

سمو الأميرة سارة يقول...

د / رامي .. معاك حق .. تضييع وقت .. اللى بيخلينى انشغل بالاسئلة دي انى لظروف معينة ولأنى مش لازم استعجل لازم غصب عنى استنى وقت معين لما يجي فبلاقى نفسى ماقداميش غير الحيرة

ومعاك حق بردو في ان استعجالي بيضيع مني فرص كتير دا فعلاً عيب فيا .. بستعجل في كل حاجة صغيرة وكبيرة ودا بيخلينى اغلط او اعمل الحاجة مش مظبوطة أوي .. زي بالظبط الاكلة الحلوة اوى بس مش مستوية

نفسي بجد اعيش في حدود يومي زي ما بتنصحنى بس كل مرة بحاول اعمل كده بفشل يمكن لأن خيالى واسع اوى وعامل زي الخيل اللي من غير لجام دايما بيسرح بيا لبكرة وبيخلينى اتخيله مرة حلو ومرة وحش

هحاول صدقنى اعمل بنصايحك اللى بجد افادتني ومافيش اطالة ولا اى حاجة انا بجد سعيدة بيك وبمرورك

¨¨¨°~*§¦§ Appyplanet §¦§*~°¨¨¨ يقول...

اوعى توقفى حياتك علىالاسئله دى عيشى باى شكل بس منظمه ومرتبه فى حياتك
هتتعبى لو فكرتى فضفضى اه بس متقفيش عندها من فضلك

medolegend يقول...

بأذن الله كل شيىء ممكن ولية نقعد نقول ياترى اكيد هى دى اللى جايبانا ورا
ههههههه
تحياتى لك
وتقبلى مرورى

Emad يقول...

اشكرك علي الدعوة التي تلقيتها عبر فيس بوك

لو عايزةتعرفي بكرة هيكون ايه لازم تستعدي له

انا شوفت ناس كتير بتستسلم لليأس تصبح الستات عنيايت اللى ضاربة المنديل وبدال البوز بقي فيه ميت بوز والرجالة عبده مفتاح اللي راجع البيت معاه بطيخة وكرشة مترين قدام

الاحلام سهل تحقيقها لو عندنا ارادة لكن للاسف ارادتنا بتتزعزع قدامن ايى مشكلة لاننا مش واثقين في نفسنا

الاسئلة دي تنفيس مهم عن معارك افكار تدور في عقلك لكن هل سنقف عندها وسنظل دوما نسال ونكرر الاسئلة وفي النهاية نكتشف اننا ونحن نسال كنا نضيع الوقت

تحياتي

غير معرف يقول...

ليه نسأل أسئلة مش حنلقليها إجابة وممكن إجابتها تزعلنا وليه نفضل طول الوقت متعلقين ببكره وقلقنين عليه وعلى اللي حيحصل فيه واحنا مش ضمنين وجودنا حتى فيه وليه حنخاف من بكره ويومنا لسه منتهاش وليه حنفكر في اللي حوالينا بعد موتنا مادمنا مش حنحس بيهم ولا حنعيش معاهم وليه نعمل حساب لكلامهم مادامنا مش حنكون قادرين ندافع عن روحنا قدامهم بعد مانموت .... فكري في النهارده بس يا ساره لانك معندكيش دليل علي حياتك بكره حيكون شكلها ايه وممكن توصلك لايه المهم انك تبني حاضر كويس حتجني ثماره في المستقبل

ღღAhMedღ3LaMღღ يقول...

كلنا كده
حتي الي هينصح محتاج الي ينصحه
فكككك

kafrawy يقول...

مممممممممممممممممممممممممم



ربنا يشفى

حاتم عرفه يقول...

زي ماقالوا : وما نيل المطالب بالتمني.. قالوا برضوا: ياعم طريها الناس لبعضيها..
زي الواحد مابيتعب وبيعمل اللى عليه.. زى ما بيكبر دماغه بعدها ويسيبها على الله..
نفسك فى كام ولد؟ وهاتسميهم إيه؟؟
عرفنا..
ايه اللى هايحصل بقى فعلا؟ هانعرف..
واللى النهاردة بفلوس بكرة يبقى ببلاش.. ورزقى ورزقك على الله..

والسلام ختام

محمد داود يقول...

اقري الخنقة إما تروح، أو تقل خالص، أو يبقى لها معنى
اقري كتيييير خالص
هتحسي بفرق كبييير خالص
محمد داود
http://www.facebook.com/profile.php?id=1328766224&ref=profile

ZINGER يقول...

ربنا يعينك على نفسك....اللهم نعوذ بك من شرور أنفسناومن سيئات أعمالنـــا

المتابعون

اعتبرها بيتك ♥

وِش القفص

خليك ورايا

دليفري..