2008-10-15

مين البت الساقعة اللي قاعدة جنبي دي ؟؟!!



قبل ما انزل من البيت وقبل ما البس الحجاب بحط الهاند فري


وقبل ما انزل ع السلم بشغل نجوم اف ام علشان تسلينى وانا ماشية لوحدي




لما بركب الميكروباص بقفل الراديو وبسيب الهاند فري علشان ما تبوظش الحجاب





وعلشان مش كل شوية اخلعها وارجع احطها تاني





فـ فيوم عادي ركبت الميكروباص ولما استقريت كده روحت فتحت الشنطة قفت الاف ام وقفلت الموبايل تاني وقعدت عادي





ودقيقتين ولقيت اللي جنبي طلعت المصحف وبدأت تقرا





دقيقتين اديتها الاجرة وقولتلها اتفضلي





وهي كمان ادتنى الباقى





وقعدنا ساكتين


بعد نص ساعة الراجل اللي جنبها نزل


فلأني كنت قاعدة ع القلاب (( من المستضعفين في الارض انا )) هي نقلت مكان الراجل وانا نقلت مكانها


وانا بتنقل غصب عني قعدت على طرف خمارها



فهي بتبصلى علشان تشده وانا ببص لها علشان اقولها آسفة



" يخرب عقلك اماااااااااااااااااااني "


" مش ممكن سااااااارة !! "


اكتشفت - كان عدى نص ساعة - انها واحدة من اعز صديقاتي في اعدادي


سلمنا ع بعض والناس في الميكروباص قعدت تبص لنا


مين المجانين دول هم لسة فاكرين ماهم جنب بعض من بدري


بعد ما نزلنا لقيتتها بتقولي


" يالهوى طلعتي انتى اللي جنبي وانا اقول ايه البت الساقعة دي اللي لما ركبت حطت السماعات علشان ما اتكلمش معاها "


- امانى على فكرة حبوبة جدا واجتماعية أوي فبتكلم طوبات الأرض ههههههه -


ماحدش يتخيل كلمة (( البت الساقعة )) دي عملت فيا ايه


كان بقالي سنييييييييين ماحدش قال الكلمة دي قدامي


حسييتنى رجعت سنيييييين ورا وروحت اعدادي من تاني


حسيتنى لسة بالدريل الرصاصي وبتنطط هنا وهنا


وأماني بتهزر معايا زي زمان


وبتقولي يا ساقعة ولا بتقولها لحد


وحشتنى اوى الالفاظ البريئة أوي دي في الشتيمة


لما كنت تحس ان الطفل مننا محتاس بعد حمار وكلب مش لاقي شتايم خلاص


- مش دلوقتى بقف مذبهلة قدام شتايم الاطفال مش الكبار حتى -


لكن للأسف فجأة بردو رجعت كبرتني تاني .. لقيتها بتبص لايدي وبتقولي


" انتى اتخطبتى ولا لأ يابنت ؟ "


فأنا تلقائياً قولتلها


" لأ برئ يا بيه "

" زيي يعنى "

بس سرحت في السؤال حسيته فوقني


لأني أول مرة حد يسألهوني .. لأن شكلي مدي على ثانوي هههههههه


ايه دا انا كبرت لدرجة انى ممكن اتخطب ؟؟!!


انا كبرت لدرجة اني في أي لحظة المفروض هشيل مسئولية بيت واسرة وراجل


انا خلاص جه الوقت اللى ممكن اطبق فيه كل طرق التربية اللى بتعجبني لولادي


وطرق احكام القبضة على ديل الزوج علشان ما يلعبش ؟؟


حسيت انى كشيت من الفكرة


المهم ماعلينااااااااااا


جينا بقى قعدنا كل واحدة تسأل التانية عملت ايه في الدنيا


- احنا الاتنين كنا بنحب العمل الاجتماعي جداً -


فحكيتلي هي عملت ايه وراحت فين وكده


وانا بحكيلها فلاقيتها بتقولي


" يااااااااه يا سارة هو انتي لسة ؟!! "


كانت تقصد لسة بحب الصحافة ولسة حاطة الموضوع في دماغي



- زماااااااان كل الناس فكراني حلم الصحافة والاعلام دا حاجة كده


زى نزوة وهتعدي ومش هحط الموضوع في دماغي ومش ناوية اكمل


فهى استغربت انى لسة ما خرجتش من احلامي -


قولتلها انا نسيت اقولك اني في قسم اعلام

وروحت اتدربت وخلاص الحلم قرب يبقى حقيقة





وبعدين كالعادة وزي ما الدنيا ماشية


افترقنا


ركبت حاجة وهي ركبت حاجة


لأن طريقنا مش واحد


:(




هناك 15 تعليقًا:

  1. ساعات كتير قوي بتحصل الصدف دي
    وحصلت معايا اكتر من مرة
    واغرب مرة فيهم اني ركبت تقريبا نفس الميكروباص اللي انت كنتي راكباه (في طنطا برضو ) هههههههه ولقيت واحد اعرفه وقعدنا نتكلم مع بعض كتير قوي والاخر باقوله والله فرصة سعيدة يامحمود من زمان ماشفتكش قالي بس انا مش محمود
    وبعدين قالي مش انت سعيد قلتله لا
    المقصود اننا طلعنا مانعرفش بعض اساسا لا هو يعرفني ولا انا اعرفه بس احنا الاتنين شبه اتنين نعرفهم طبعا اكيد مش فاهمة حاجة ههههههههه
    يعني احنا الاتنين طلعنا مش احنا الاتنين (زي النكتة اياها )
    تحياتي

    ردحذف
  2. ساسا
    ههههههه
    وحشتيني جدا موت خالص
    مالص

    وحشتني كتابتك الشقية
    العسولة
    ويارب ياوختي
    تتقدري تتحكمي في الديل

    وتنصري بني جنسك ههههههه

    اي افيو

    سلام

    ردحذف
  3. اكيد الي كانو في الباص قالو ايه الجنان ده

    وبعدين فكرة البيت والمسؤوليه بتكون اسهل لو في تفاهم

    لو بطلنا نحلم نموت

    ردحذف
  4. اد ايه الذكريات جميله
    واد ايه بيكون حلو لما نقابل حد ويفكرنا بزمان
    واد ايه حلو خوفك من الزواج واحساسك بالمسئوليه اللى فيه وعارفه انه مش مجرد خروج وفسح وكدا
    بجد عجبنى البوست كله

    ردحذف
  5. مفيش أحلى من أيام اعدادي على فكرة أنا لسة في اعدادي أتمنى تبقي تزوري مدونتي

    ردحذف
  6. صديقتى العزيزة

    للاسف جميعنا نتمنى رجوع تلك الايام
    فهى الاجمل على الاطلاق والصداقات التى تتكون فيها غالبا لا تنفصم

    تحياتى على الموضوع الذى اثار في الشجون

    ردحذف
  7. سمو الاميره ساره
    تحياتى
    فعلا بوستك جميل بيتكلم عن ايام ذكريات جميله
    فعلا والله ياساره ممكن الواحد يكون جنبه صديق ومش يعرفه
    وبرضه لو اتكلموا كتير مع بعض
    هيفترقوا
    لان الدنيا كده
    اللى عاجبنى بجد هو اهتمامك بمستقبلك وحلمك اللى انتى نفسك تحققيه
    اصرار جميل

    ردحذف
  8. منامينو .. لأ ع فكرة فهمتك والله .. ع فكرة ضعف الذاكرة اهو كسبك صديق جديد وذكرى حلوة .. وع الاقل حسيت انك مش غريب في الميكروباص .. بقولك ايه شكل العيب من الميكروباصات مش مننا ههههههههههههههه

    ردحذف
  9. ماي هوبس .. حبيبة قلبي منمن وحشااااااااااااااااااااني بجد .. نورتي يا حبيبتى ويارب تكون الظروف الصعبة عدت وكله تمام .. ع فكرة انا كنت دايما بدخل مدونتك بقرا القديم واخرج بس ماكنتش بعلق .. ماجاليش قلب اعلق وانتى مش موجودة ..

    بالنسبة للديل .. انا شكلي هقطعه وارتاح ههههههههههه

    نورتينى يا قمر

    ردحذف
  10. على فكرة آي افيو توووووووووو

    ردحذف
  11. احمد علام .. اه والله اللى ورانا كان عمال يحاول يطول نفسه ويبص علينا هههههههههههههههه .. معاك حق التفاهم بيحل كل حاجة بس اعمل ايه وانا واحدة موسوسة غاوية اوجع دماغى بالتفكير

    ردحذف
  12. د / عمرو فاروق .. بمناسبة كلامك الجميل ع ان الزواج مش مجرد فسح وخروج في جملة لانيس منصور عجباني أوي .. بتقول .. المشاكل الزوجية تعني انا اناسا قد ناموا في فترة الخطوبة وافاقوا بعد الزواج ..
    مرورك اسعدني جدا ربنا يكرمك ياااارب

    ردحذف
  13. بنوتة .. انا فرحانة بيكي بجد وان شاء الله اكيد هزور مدونتك .. فرحانة انك في اعدادى وبتستغلى النت الاستغلال الصح دا .. يعنى عاملة بلوج وكده .. ربنا يحميكي حبيبتى .. ع فكرة انا بالنسبة لي ايام اعدادى كانت جميلة جدا وثانوى وكلية .. كل الايام اللي بعرف فيها اصحاب كويسين بعتبرها احلى ايامى

    ردحذف
  14. الأزهري .. عارف كمان اللي بيثير الشجون اكتر ايه ؟؟ انك يكون بينك وبين صديق ذكريات روووووعة بس للأسف تخسروا بعض .. غلطة منك او غلطة منه او توقيع من حد .. المهم انكم خسرتوا بعض للأسف .. وتشوفه ويبقى جنبك وما تقدرش تكلمه زي زمان ولا تهزر معاه ولا تحكيله .. بجد بتقتل اوى

    ردحذف
  15. رومانسي .. عارف اللي بيزعل الواحد بجد انه المفروض قلبه يحس بصاحبه ..
    بالنسبة لمستقبلي .. اصل هقولك حاجة .. النهاردة مش عاجبنى وقولت مش ذنبي اصل انا ماكنش في ايدى انى اختار حاجات كتير .. علشان كده بهتم ببكرة اللي في ايدي اختار شكله يكون ايه الى حد ما

    ردحذف

Say something...