لعلمك

لعلمك

إقرأ لي

دخلوا بكليك شمال :D

Blog Archive

الأحد، نوفمبر 09، 2008

postheadericon بصراحة كده هتروحي تبلغي البوليس ؟؟

أنا هدخل في الموضوع على طول من غير مقدمات


لأن الموضوع مش متحمل مقدمات


بصراحة كده والكلام أولاً للبنات اتعرضتي - لاقدر الله - للتحرش


هل هتجرؤي تبلغي ؟؟ ولا هتخافي من الفضيحة ؟؟


خاصة لو ماكنش الموضوع سايب آثار مادية ؟؟


بصراحة فكرت فيها ألف مليون مرة مش من دلوقتي بس


من ساعة مسلسل قضية رأي عام وانا بفكر فيها


هل فينا بنت بالشجاعة دي ؟؟


هل فينا بنت تعمل اللي اتقال ان نهى رشدي عملته


- لأني بصراحة ما عرفش الحقيقة فين - لكن اللي عارفاه اللي اتحكى


انها جريت وراه وانها بلغت عنه وودته القسم ؟؟

بصراحة انا فكرت فيها ولقيت نفسي مش هقدر


وبعترف ان دا ضعف وان دي سلبية لكن فعلاً مش هقدر


لأن للأسف اللي بتبلغ بتبقى فضيحة


مش اقصد ان الناس تبص لها بصة وحشة أبداً خالص


لكن أقصد انها لو اتحملت انها تروح وتحكي اللي حصل


اللي هو أصلاً مخجل للظابط في القسم


بعد ما يتعمل المحضر والقضية تتعمل


هتلاقي الصحافة عرفت وهتلاقي الاعلام بدأ يطاردها


وهتلاقي نفسها مضطرة تحكي اللي حصل تاني قدام كل الدنيا


ما اعتقدش في بنت تقدر تتحمل كل دا


اعتقد دا سبب رئيسي بيخلي بنات كتيييييييير جداً ترفض تبلغ



المفروض بجد الموضوع يبقى فيه سرية


في بعض الناس هتقول لأ احنا بنعلن علشان البنات تتشجع


لكن دا ما بيحصلش


بصراحة كده الاعلام بيعلن الحكاية علشان يعمل فرقعة


وعلشان يشتغل


- وبرغم اني اعلامية لكن للأسف دي الحقيقة -


الاعلام عايز جنازة ويشبع فيها لطم


و البنت هتلاقي نفسها فجأة لما تمشي في الشارع مش قادرة ترفع راسها


أو ع الاقل هتحس ان كل الناس بتبص عليها


حتى لو دا مش حقيقي لكن هي هتحس بكده


ونسيان اللي حصل هيبقى أصعب

واهلها هيعانوا و صعب جداً تتجوز بعد كل دا


تفتكروا بعد كل دا في بنت هتبلغ ؟؟


رسول الله صلى الله عليه وسلم أمرنا


اننا اذا بلينا نستتر


فياااااااااااااااااريت يوفروا للبنات السترة


والأمان بعدين يطلبوا منهم يبلغوا ويبقوا ايجابيين






30 بوينتس أوف فيو:

رئيس جمهوريه نفسى يقول...

بلغي والفضيحة مش ليكى حتكون من نصيب اللى اتحرش
بلغي علشان تبقى انسان بيتميز بعقل مش بيتميز بجسم
بلغى لانى جسمك منحة ربنا ليكى لية كرامتة وحرمتة مش علشان حيوانات يتحرشو بية

blue-wave يقول...

والله فعلا معاكى حق
كله بيخاف يبلغ علشان الفضيحه ومهما قلنا برضه هاتفضل فضيحه للبنت
فعلا المفروض يبقى فيه سريه

سمو الأميرة سارة يقول...

رئيس جمهورية نفسي .. صدقني مقتنعة بكل كلامك بس انا مش بلب من البنت ما تبلغش انا بطلب من الجهات المسئولة يستروها مش يفضحوها لو كانوا فعلا عايزين البنات تبلغ

سمو الأميرة سارة يقول...

بلو ويف .. مظبووووووووط كده كل اللي اقصده السرية تتوفر زي علاج الادمان كده بالظبط

واحد من الناس يقول...

اتفق معك فى كل ما قلتيه..
اللى ايده فى الميه مش زى اللى ايده فى النار!!
فى مجتمعنا صعب انك تبلغى.. مصيرك هيبقى زى نهى
كل يوم والتانى اخبارك فى الجرايد وفضايح..
عشان كده لازم يبقى فى حل تانى ممكن تكون سريه زى ما بتقولى بس مش عارف ازاى؟
المهم يبقى فى حل.. عشان يكون فيه رادع للناس دى..

المحارب المتيم يقول...

سمو الاميرة

امال لو مكنتيش اعلامية كنتى هتقولى ايه

انا موافقك فى دور الاعلام السلبى

لكن ده مينمعش ان البنت تطالب بحقها وممكن ترفع قضية تشهير ضد الاعلام ولازم يكون فى وقفة من مؤسسات المجتمع المدنى

مش يسيبوا البنت تتبهدل يعنى

والمفروض الرجالة يكون عندهم شوية نخوة مش يشوفوا بنت فى الشارع وحد يتحرش بيها ويضحكوا وأنا شفت المنظر ده بنفسى وللاسف قلت على البلد كلها لفظ مش محترم علشان الموقف ده

عندنا فى الصعيد بتحصل مشاكل لا حد لها بسبب التحرش يعنى لو ولد تحرش ببنت فغالبا هياكل علقة مشفهاش حمار فى مطلع

ولا حول ولا قوة الا بالله

تحيتى

شبــ اون لاين ـــاب يقول...

اولا بما انى ولد مش بنت

انا بتمنى ان البنت تتشجع و تسحب الواد من قفاه

وتروح بيه ع القسم

و هى اكيد حتلاقى اللى حيساعدها !!!!!!

لا ممكن متلقيش اللى حيساعدها

الموضوع مهم جدا جدا

ولازم يكون فيه شويه ادب واحترام من اللى بيفكر يعاكس بالطريقه الحقيره دى

تحياتى

------------------------
كان معكى من امام الكيبورد
واحد مخه لاسع شويه
شبـــ اون لاين ــاب
الاسكندريه
------------------------

شفقة هانم واحسان بك يقول...

بجد يا سوسو الموضوع شائك وغائر جدا جدا
الواحد بجد مش عارف لو اعوذ بالله حصل معاه موقف زى ده هيعمل ايه؟؟
بس تعرفى انا لو من اى واحدة حصلها كده من شعره وعلى القسم عدل مفيش كلام او كام روسية على حبة شلاليت تخليه يتوب وعلى بيتهم عدل
وساعتها مش هيفكر يعاكس لا ده مش هيفكر يخرج من بيتهم اصلا
بس البوست حلو اوى يا سارة بجد لانه موضوع مهم ومثير للجدل

شبــ اون لاين ـــاب يقول...

انا معاكى فى موضوع السريه ده بس فى حل يمنع كل الكلام ده
لو فى عسكرى واقف فى الشارع محدش هيفكر يعمل كده
وغير كده التربيه بتلعب دور ده لو اللى بيتحرش كان
متربى اصلا
واللى عند ربنا مبيضعش

فى رعايه الله

شبـــ اون لاين ــاب

joker

kafrawy يقول...

مممممممممممممممممممممممم
و الله القصه مش فى البنات ولا الصبيان
القصه فى ان النفوس بقت ضعيفه

ألِف يقول...

ما ينفعش يكون الموضوع سري، لأن دا جزء من عملية تقاضي و التقاضي لازم يكون علني، و إلا يبقى مجال للفساد و الانتقام و الافترا.

و بعدين الهدف هو أنه بعد شوية من الصراع ال تخوضه الشجاعات المستعدات يتحملوا الصعوبات دي (و كلنا عارفين أنه شيء صعب..جهاد يعني)، أن السلوك العام يتغير و يقل التحرش، مش يستمر التحرش بيحصل و المجرمين بتعاقبوا أو حتى يعدموا في السر من غير ما حد يعرف. حراك الرأي العام هو أهم شيء في الموضوع. دا رأيي.

و بعدين إيه ال زي الإدمان في الموضوع يعني؟ تقصدوا أن النساء مدمنات تحرّش؟

وميض ابتسامة يقول...

بصراحة ده كان رأى مجموعة كبيرة من الفتيات ..
فالخوف من الفضائح والاعلان وما يعقبه من مضايقات من نوعية المواساه واظهار التعاطف .. جعل معظم المتعرضات للتحرش تحجم وتمتنع عن الابلاغ ..
ربما لو سار الموضوع بعيدا عن الاعلام وفى حماية قضائية ربما نسمع عن كثير البلاغات ما كانت ترى النور لولا هذه الحماية.. انهن فتيات ونساء يرفضن العلانية حياءا وخجلا مما تعرضن له .. وكذلك مواجة المجتمع
تحياتى

ahmos يقول...

بصي يا سارة انا قريت وسمعت عن حوادث التحرش دي كتير وبقت للاسف سهل تحصل اما حكاية انك تبلغي او لا فدي مشكلة لان ثقافتنا في مصر مش مستوعبة ان البنت يحصلها حاجة زي دي وتبلغ عنها وتحكي اللي حصل واول واحد ممكن يبص لها بصه مش كويسة هو الظابط اللي هتبلغه للاسف اللي هو اكتر واحد يحميها طبعا بقي ده غير الصحافه والناس في الشارع زي ما انتي قولتي
بس عشان الظروف دي تتغير لازم يكون فيه خطوات جريئة شويه بس مش من البنت لا من كل الناس اولا اهلها والناس اللي حواليها ثم المسؤلين في البلد
احمس

My Hope$ يقول...

يااااااااااااا

وصلنا لمرحلة صعبة قويييييييييييي

يعني فعلا لو بنت بلغت بتتفضح

ولو مبلغتش يبتمادو

ف الغلط

والسرية دة شئ مستحيل

مع ان المشكلة مش مشكلة البنت
ف الاول وف الاخر
واللي حصلها مش ذنبها
بس
بتتفضح بردة لاننا شعب متخلف

يبقي الحل يبقي فية قانون صارم للموضوع دة

ويبقي فية امن في الشوارع

بالذات الاماكن الضلمة والضيقة

علشان اللي يتحرش يتقبض علية في ساعتها

حلول كتير
ويارب الموضوع دة ينتهي

بقي لانة مزعج اوي
ويخلي الانسان يبقي في بلد الامان مش حاسس بالامان

عيزاكي يابت ضروروي

اوكشن
متنسيشششششششششش موضوع مهم
سلام

الازهرى يقول...

صديقتى العزيزة

من رأيي انك لازم تبلغى

صحيح ان الاعلام يعامل الموضوع معاملة غير انسانية ولكن المبدأ ان من رأى منكم منكرا فليغيره بيده

وما دام مستطيعا فلم لا

تحياتى

M.K يقول...

السلام عليكم...
أوافقكي الرأي يجب توفير السريه لمن تبلغ عن أي حادث تحرش حصل لها ...
لكي تستطيع الإستمرار برأس مرفوعه...
بالرغم من أنها الضحيه..
ولاكن للأسف لدينا نظره غريبه لضحيه في عالمنا العربي..
......
دمتي بخير

المحارب المتيم يقول...

سمو الاميرة

انا فاكر رديت على البوست ده

المهم

سأرحل ولكنى سأتابع من بعيد

ألقاك فى عالم آخر

سمو الأميرة سارة يقول...

واحد من الناس :
مظبوط كلامك يا واحد من الناس .. ممكن يحظروا النشر في المواضيع دي
على أيام جمال عبد الناصر كان ممنوع نشر أخبار الحوادث .. يرجعوا القانون كده تاني احسن

سمو الأميرة سارة يقول...

المحارب المتيم :
علشان اكون اعلامية مظبوطة لازم ابقى موضوعية واعترف بالغلط حتى لو كان في مجالي
صدقني انا بحس بالقرف من المجال بسبب الناس اللي واخداه وسيلة لانهم يحققوا اغراضهم وبس
بالنسبة للبنت وقضية التشهير ففعلاً فكرة حلوة جداً
وياااااااااااريت فعلاً كل راجل يرجع راجل تاني ويفتكر ان اخته او بنته او مامته ممكن يحصل لها نفس الموقف

سمو الأميرة سارة يقول...

واحد مخه لاسع :
مظبوط جداً ويكون في شوية مراعاة لمشاعر البنت دي من البوليس ومن الاعلام

سمو الأميرة سارة يقول...

شفقة حبيبتى :
والله انتي مية مية .. فعلاً طول ما البنات منكسرة وبتتكسف وتسكت هيسوقوا فيها
انتى عارفة انا ماما دايما تقولي خلي معاكي دبوس طويل زيادة وانتي في المواصلات لو حد حسيتيه بيرخم عليكي وهو قاعد ولا واقف جنبك
شكيه على طول ان شاء الله تغرسى الدبوس كله فيه ولا يهمك هيحترم نفسه ومش هيقدر يفتح بؤه

سمو الأميرة سارة يقول...

جوكر :
فعلاً العسكري كان بيقف زمان في الشارع خاصة بالليل ماعرفش ليه لغوا الموضوع دا
معاك حق كمان في موضوع التربية بس انا قولت بقى بما ان الموضوع بقى يحصل خلاص ومابقاش في تربية يبقى نحاول ننقذ ما يمكن انقاذه ونساعد البنات انها تبلغ وتاخد حقها وفي نفس الوقت كرامتها تبقى متصانة

سمو الأميرة سارة يقول...

كفراوي :
النفوس بقت ضعيفة والظروف بقت مهببة .. بس بردو دا مش مبرر

سمو الأميرة سارة يقول...

ألِف :
نقطة ماكناش واخدين بالنا منها موضوع التقاضي
لكن يا ألِف ماهي اغلب قضايا محكمة الأسرة بتتم في سرية
وبعدين مش قصدي سرية بمعنى السرية أنا اقصد ان الاعلام ما يقعدش يتكلم ويلت ويعجن في الموضوع
بس مش أكتر .. تبقى زيها زي أي قضية تاني
زي ما واحد يدخل القسم يبلغ عن واحد نشله

وفعلاً احنا عايزين السلوك العام يتغير وعلشان كده قولت
يعلنوا ان في عدد مثلاً 50 واحد اتحاكم في قضية تحرش واخد جزاته ويقولوا ممكن اساميهم لكن اسامي الضحايا وصورها لأ
لأن دا بيضر الضحية أوي

بالنسبة للإدمان وعلاقته بالموضوع
فأنا اقصد بيها مراكز علاج الادمان اللي بتكفل السرية للمرضى
فبالتالي الناس بقت تلجأ لها علشان حست انها هتبقى مستورة مش هتتفضح

سمو الأميرة سارة يقول...

وميض ابتسامة
مظبوط كلامك .. بجد الله يفتح عليكي
هو دا اللي كنت عايزة اقوله
ودا الهدف اللي عايزة اوصله

سمو الأميرة سارة يقول...

أحمس
اه والله فعلاً أول حد هيبص لها بصة مش حلوة الظابط
وللأسف ممكن يستهبل ويتعمد يسألها اسئلة محرجة بزيادة
معاك حق في موضوع اننا محتاجين خطوات جريئة
بس الخطوات دي مش أي حد هيقدر عليها
فأنا قولت الحل اللي ممكن نقدر عليه كلنا

سمو الأميرة سارة يقول...

ماي هوبس
الله ينور عليكييي بجد
كان زمااااااااان في عسكري بيقف في الشارع بالليل
ماعرفش ودوه فين
شكلهم خلوهم حرس جمهوري :p
والله نفسي اشوفك يا منمن واتكلم معاكي اوي
بس النت اقسم بالله ما بيرضى يفتح صفحة الياهو
لما بدخل حلو بيبقى من سيبر الكلية

سمو الأميرة سارة يقول...

الأزهري
كلامك جميل جداً بس المبدأ كمان
اننا اذا بلينا نستتر
خاصة كمان ان ممكن أوي نبلغ ونتاكل حقي
يبقى اتفضحت واتأذيت وحقي ضاع
دا يرضي مين ؟؟

سمو الأميرة سارة يقول...

M K
عارف المثل الرخم بتاع مش عارف ايه وقع فكترت سكاكينه
اهي الناس كده ما تصدق حد يقع ويبقى ضحية
وتلاقيه الكلام من كل شكل ولون عليه

سمو الأميرة سارة يقول...

المحارب المتيم
ايون ردك وصل يا عرفة بس انا ماكنتش بدخل نت فعلشان كده ما وافقتش على التعليق الا بعدين
انا اسفة بس زي ما انت عارف اليومين دول لازم الواحد يحرص
مستغربة كلامك اوي
مش عارفة في ايه
والظروف مش مساعداني اعرف
ياريت تطمني في ايه ؟؟

المتابعون

اعتبرها بيتك ♥

وِش القفص

خليك ورايا

دليفري..