2008-12-30

حزينة على غزة .. ولكن !!




حزينة على غزة بلا شك .. لا يوجد انسان يحمل بين ضلوعه قلباً ولا يحزن على غزة




وقلبي يقطر دماً على طفلة لمحتها تبكي أمانها الذي سلب منها




تبكي أحلامها التي لن يكون بمقدورها أن تحلمها بعد اليوم




فهي لن تنام أبداً من هول ما رأت




أبكي امرأة هتكوا حرمة بيتها ، هدموا عشها فوق رأسها




وفجأة وجدت نفسها في العراء .. ولم تجد ما تستر به رأسها سوى المنشفة




وجدت عدسات الكاميرات تتفحصها باهتمام ، بشفقة ، تنقل للعالم صورتها لعلها تهز شعرة في ذوي القلوب المتحجرة




وكاميرات أخرى ترمقها بشماتة .. بعيون ملتمعة كعيون الذئاب التي أثارتها رائحة الدماء




وكاميرات أخرى ترى فيها مجرد سبق صحفي واعلامي آخر لا أكثر




أبكاني أن أرى العرب يخطون في أرضهم خائفين مرتجفين بعد أن كانت هذه الأرض لنا .. نخطوا فيها بكل عزة وثقة




ونمنح الأمان لكافة الاجناس والديانات التي تحيا عليها ليس فقط العرب أو المسلمين




ولكن .. أدمت قلبي الاتهامات التي وجهت لبلدي .. لشعبي ولكل أمتي بالخيانة




أحزنني ان ينسى العرب المرات العديدة التي زجت مصر بنفسها في حرب لا ناقة لها فيها ولا جمل .. اللهم إلا كي تدافع عن ارض المقدس




أحزنني أن ينسوا دم شهدائنا من المصريين الذين صعدت أرواحهم إلى بارئهم في حرب 48 وغيرها وغيرها ..




أحزنني أن ينسوا انه في العام الماضي فقط كانوا يشيدون بما فعلناه حين فتحنا المعابر و دخل اخواننا الفلسطينيون الى العريش ورفح




وأخذوا من البضائع والسلع ما يكفيهم ..




نسوا كل ما فعلته مصر واتهمونا كلنا حكومة وشعباً بالخيانة ؟!!




لماذا ؟!!




بل وقتلوا واحداً من ابناءنا ؟!!




وفي أغلب الدول العربية هاجموا سفاراتنا ؟؟ لماذا ؟!! ما هي جريمتنا ؟؟




ولمَ لا يوفرون كل هذا الغضب وهذة الحمية والشجاعة ويصبون غضبهم على الاسرائيلين ؟؟!!




كما إني إلى الآن لا أفهم سر تعنت حماس وتمسكها بموقفها ؟؟




يدعون أنهم مؤمنين بالله ونسوا أمر رسول الله - صلى الله عليه وسلم - بأن يتشاوروا في أمورهم ؟!!




لماذا رفضوا دعوة ابو مازن لهم بالتشاور مع باقي الفصائل حول ما يحدث في غزة ؟؟




وبماذا استفدنا حين قتلوا سيدة واصابوا 14 اسرائيلي ؟؟ هل يرون بهذا أنهم ثأروا لإخوانهم في غزة ؟؟






هناك 14 تعليقًا:

  1. موافقك غلى كل كلامك

    و مختلف فى جزئية ان ابو مازن يبحث عن المصالحة

    ابدا

    بالنسبة لمقتل الضابط المصرى اللى وزع الخبر لجريدة الرأى و كالة أنباء الشرق الاوسط
    وا نا لا أصدقها لانها موجهة

    ردحذف
  2. ميدو مع كامل احترامي لرأيك بس ايه المانع انهم يقعدوا ويسمعوا ؟؟ ما يمكن يكون ربنا هدى الراجل ؟؟ ماينفعش حد يكون عايز المصلحة و يرفض كده الموضوع من بابه .. طب ع الاقل يحضروا ويشوفوا ع الاقل يرضوا ضميرهم !!
    بالنسبة لخبر مقتل الضابط ، فالخبر اتقال في الراديو كمان وفي جروب ع الفيس بوك أكد الخبر

    ردحذف
  3. يؤسفني فعلا أسلوب المعايرة اللى بتتكلمى بيه ده ... مصر لم تقم بأي من كل ماذكرتيه إلا لكونها كانت دوما قائدة العرب وأم الدنيا فعلا ..بحكم التاريخ والجغرافيا والزمن العرب جميعهم مسئولية مصر .. ليس في هذا فضل ولا منه ... هذا قدر مصر دوما ..
    ومتهيألي واضح جدا لأى متابع أن اى هجوم لمصر أو اى اتهام بالعماله هو لنظام الحكم في مصر وليس للشعب .. هناك فرق كبير جدا بين هذا وذاك ... لم يذكر احد الشعب المصري بسوء قط .. لكن من لابد أن يذكر بسوء هم هؤلاء الخنازير المتحكمون فينا ..
    عندما تصبح اسرائيل هي الصديق الأقرب والحليف الاستراتيجي .. وعندما توجد تبريرات لكل تلك المجازر التي تهلك الحرث والنسل ..بأن حماس هي المسئولة فهذا بالتأكيد لا يستحق فقط الاتهام بالعمالة ..بل هذه هي الخيانة العظمي..

    ردحذف
  4. احلي بوست قريته عن غزه

    فعلا المشاعر خدت الناس اوي و نسيوا اننا مصريين و ماينفعش نقبل اي تجاوز

    مصر مقصرتش في اي حاجه من اوي يوم و المعبر مفتوح و في استعداد لاستقبال الجحي

    ليه نرمي نفسنا في نار الحرب

    نرمي ولادنا و دمنا و شهدا و في الاخر بردو هايتقال علينا خونه

    طيب انتو ليه مرمتوش طوبه حتي علي اسرائيل ولا هي مصر تحارب و الباقي هايصقف يعني

    تحياتي

    ردحذف
  5. بالنسبه للضابط الشهيد الجنازه اتغطت في العاشره مساء و البيت بيتك و 90 دقيقه
    رائد مصري استشهد بنيران حماس

    ردحذف
  6. بصى الموضوع ملخبط ومصالح داخله فى مصالح فى النهايه سورى كلهم فى الشوز ما عدا الناس اللى ملهاش ذنب علشان نبقى قصرنا فى الموضوع ده لازم نعمل حاجه للناس يا برنسيسه

    ردحذف
  7. الأستاذة/
    صاحبة مدونة / بنوتة لاسعة
    " تحية طيبة" وبعد..
    اعتذر عن الخروج من موضوع التدوينة المهم، لقد أرسلت لك دليل العمل (صفحتين)والجزء الأول من الاستمارة (8 صفحات) ، أرجو منك إرسال رسالة توضح أن الجزء قد وصلك بالفعل وأنه ليس هناك من مشكلة في إرساله أعاقت وصله لسيادتك .
    تحياتي وتقديري
    شيماء إسماعيل
    باحث ماجستير- كلية الآداب جامعة القاهرة.

    ردحذف
  8. بدون تعليق ودموع قلبي تسيل على خدي
    وانا اسمع وارى وليس بيدي الا ان يدمع قلبي

    ردحذف
  9. في الحقيقة اللي بيحصل في فلسطين ده أمر صعب للغاية وتعالوا نشوف مصر عملت ايه عشان توقف إسرائيل عند حدها:
    1_ مصر بتصدر الغز الطبيعي لإسرائيل بأقل من نص تمنه الحقيقي, ده غير اننا بنحرم المصانع المصرية منه وبنخليها تشتغل بالمازوت , وده غير ان الغز الطبيعي هيخلص في مصر في خلال 10 سنين, يعني المصيبة مش للفلسطينين وبس لاء ده لينا احنا كمان.
    2_مصر لم تطرد السفير الإسرائيلي ولم تسحب سفيرها من تل أبيب, بل راحت تحمل مسئولية المجزرة دي علي حركة حماس, من خلال كلام وزير الخارجية المصري .
    2_مصر مش راضية تفتح معبر رفح اللي هو حق طبيعي للشعب الفلسطيني عشان تدخل ليه المساعدات, وبيتم فتحه في وقت صغير جدا ومعظم الوقت مش بيكون مفتوح, واوعوا تصدقوا كلام التليفزيون المصري اللي عمال يقول كل شوية اننا فاتحين المعبر, ده حتي كان فيه طيارة جاية من قطر وجايبة مساعات وفضلت واقفة في مطار العريش لمدة يومين عشان خاطر تدخل لفلسطين.
    3_مصر قالت لإسرائيل انها تدخل فلسطين وتدمر حركة حماس, والكلام ده حصل علي لسان مدير المخابرات المصري عمر سليمان إلي واحد من المسؤلين الإسرائيليين.
    4_مصر المفروض انها تعلق اتفاقية كامب ديفيد للسلام مع إسرائيل وتعرضها علي استفتاء شعبي عشان نغرف رأي الشعب.
    5_مصر قامت باعتقال الدكتور جمال عبد السلام وده دكتور موجود في لجنة الإغاثة الإنسانية في نقابة الأطباء وبيقوم بجمع التبرعات للشعب الفلسطيني, وقامت باعتقاله لهذا السبب.

    نرجو تشريفكم لنا في مدونتي نظرة مختلفة:http://nazramokhtalefa.blogspot.com/

    ردحذف
  10. تعالوا بقي نتكلم عن موقف حماس
    في البداية يا جماعة هو أصلا كان فيه تهدئة بين حماس وإسرائيل في خلال ال6 شهور اللي فاتت, وإسرائيل لم تلتزم بهذه التهدئة علي الإطلاق,وكان دايما في خروقات إسرائيلية لهذه التهدئة,ده غير الحصار الظالم المفروض علي مليون ونصف المليون من الشعب الفلسطيني اللي موجودين في قطاع غزة, وبالتالي يعني مفيش بقي حل قدام حماس غير انها تواجه الإسرائيليين عشان حتي تفك الحصار ده, يعني حركة فتح عمالة تتفاوض مع الإسرائيليين ليل نها وفي الأخر ما قدرتش تعمل اي حاجة, يا جماعة اليهود هيفضلوا هما هما مالهومش وعد وخونة دايما وما ينفعش نتفاوض معاهم, وبعدين اوعوا تنسوا ان الأرض دي أصلا مش بتاعتهم وانهم احتولها واننا مش هنسيبهم إلا لما يطلعوا منها حتي لو كان التمن اننا كلنا نموت في سبيل اننا نحرر الأرش دي.
    أما بالنسبة للجندي المصري اللي اتقتل, مش معقولة نقول ان الشعب الفلسطيني هو اللي قتله الشعب الفلسطيني بيتعرض لمجزرة حقيقية, مش معني ان فيه واحد متهور من الفلسطينيين ارتكب الجريمة دي اننا نحمل الفلسطينيين المسؤولية او نحمل حرجة حماس مسؤولية كدة لإن ده مش حقيقي تماما.
    يا جماعة في عملية تحريف وتشويه للتاريخ ولازم ننتبه ليها, النظام المصري كل كلامه عن حماس وكإن عدونا هو حماس ومش اسرائيل.
    أما بقي عن دورنا احنا تجاه القضية الفلسطينية
    فالمفروض ان اي حد مقصر في دراسته أو بيرتكب معصية معينة يحاول فورا انه يتوقف عن كدة ويبدأ يصلح نفسه ويعرف كويس ان اللي بيعمله ده سبب رئيسي في هزيمتنا دلوقتي.
    كمان المفروض اننا نقاطع المنتجات الإسرائيلية والأمريكية, ونكون رجالة وشية مع نفسينا ونضغط علي نفسنا عشان نقدر ننتصر, مش معقولة هننتصر وفي واحد مننا مش قادر مثلا انه يقاطع منتج معيني بيبسي مثلا ده مش هينفع

    ردحذف
  11. أشاطرك الاحزان وكلامك مؤثر بالفعل
    ولكن عندي نصيحة بصراحة
    ــــــــــــــــــــــــــ
    بلاش تلومي علي حماس وتتكلمي عليهم كده عارفة ليه ؟
    عشان ربنا ما يوقع بلدك في حرب وبهدلة
    وتعملي مليووووووون هدنة وكلهم في الاخر علي دماغك بسبب شوية الكلاب الي حاكمنا كلنا
    انتي بتقولي ليه ميقعدوش ويتشاوروا؟
    وشايفة انهم كده نسيوا مبدا الشوري
    الشوري لأولي الأمر فقط يا سارة مش لأني اقعد أتفاوض علي ارضي مع عدو بيقول انه هيبيد شعبي عن اخره
    ومع رؤساء عرب أنجاس وكلهم خايفين علي كراسيهم وعملاء وولاد كلب أصلا
    هما دول الي هتتشاوري معاهم !!!؟
    والله العظيم أنا عرفت ناس من حماس دول عن قرب بجد ياريت في كل بلد محتلة في زيهم بجد دول قلة في العالم صدقيني
    وبالنسبة لمصر عملت ايه
    فمصر معملتش حاجة الي عمل شوية الرمم الي ماسكينها وعلي راسهم الواطي الكبير الي أوطي من الرصيف مبارك
    ليفني وزيرة الخارجية الأسرائيليه كانت عنده في القصر الجمهوري يوم الخميس ومتفهمنيش غلط :)أقصد للتشاور طبعا
    وقالت انها هتبيد غزة عن آخرها
    قوم ايه .. الأساتذة بتوعنا يطلبوا حركة حماس ويقولوا ان مفيش ضرب هيحصل علي غزة !!!
    يا ليله سودة دي خيانة باينة زي الشمس زي فيلم كتيبة الاعدام كده
    يلا كفاية كده وهروح اجهز شنطتي واسافر قبل متأفش

    ردحذف
  12. مش عارف اقول ايه ؟؟
    في عز ما الواحد متأثر باللي بيحصل في غزة وبيدعيلهم في صلاته .. حصل موضوع قتل الضابط المصري بايدي فلسطينية ليخلق نوعا من الارتباك لدى مشاعر المصريين ...
    شيء مؤسف جدا ان مشاعر الغضب الفلسطينية توجه الى المصريين اخواتهم ..
    لكن هقول ايه ؟ ... اهي بجملة العيوب اللي في الشخصية العربية بشكل عام .
    :(

    ردحذف
  13. الأستاذة الفاضلة/ سارة
    صاحبة مدونة/ بنوتة لاسعة
    وصل الجزء الأول بنجاح وستجد الجزء الثاني (7 صفحات) مرفق بالرسالة.
    تحياتي وتقديري ووافر احترامي.
    شيماء إسماعيل عباس
    باحث ماجستير قسم المكتبات والوثائق والمعلومات – كلية الآداب، جامعة القاهرة.
    Shimoo_771@yahoo.com

    ردحذف
  14. انا مش عارف انتوا ليه يا جماعه متحاملين على حماس كده؟؟
    هدنة ايه اللى بتتكلموا عليها ؟ من امتى اسرائيل بتحفظ معاهدات؟؟
    الناس متحاصره وبتموت فى غزه كل يوم وتقولوا تهدئه؟؟
    انتوا فاكرين ان اسرائيل كانت مستنيه صواريخ حماس علشان تضرب غزه؟
    هى كده كده كانت هتضربها ... دى حسابات سياسيه لقرب الإنتخابات الإسرائيليه...
    هذا الوقت وقت دعم حماس وان كان حتى معنوياً بما اننا مش قادرين نعمل حاجه تانيه فبلاش نهاجمهم...
    اللهم أعز الإسلام وانصر المسلمين.

    ردحذف

Say something...