لعلمك

لعلمك

إقرأ لي

دخلوا بكليك شمال :D

Blog Archive

الجمعة، فبراير 29، 2008

postheadericon .. وقبلت التحدى !!

كان حبك لى تحدياً ..
ليس فى الفوز به .. بالعكس انا لم افكر يوماً فى اجتذاب حبك ..
لكن فى مواصلة الطريق معك ..
رغم ان طريقنا كان غامضاً .. ملؤه الضباب .. بل والاشباح المخيفة ايضاً ..
الا اننى قبلت التحدى ولم ارفض يداك المدودتان اليا ..
اخترت ان اواصل معك الطريق وحين اخترت .. اتضحت معالمه ..
ورأيت فى الافق البعيد جنة .. لا ادرى بعد حقيقة هى ام سراب ..
قبل ان اقبل التحدى ..
وقبل ان اختار طريقى معك .. فكرت كثيراً ..
فأنت حبيبى ترانى اميرة متوجة ..
ترانى ملاكاً طاهراً ..
ترانى طفلتك التى تتمنى لو تريها العالم كله بعينيك ..
وكان التحدى ...
كان التحدى هو ان اكون بالفعل اميرة ..
لا اخفى عليك سراً .. انا اعشق ان اكون اميرة ..
وطالما حلمت بمن يرانى ويريدنى اميرة ..
كان التحدى ان اظل اميرة وانا اكافح كل يوم كى اصل لحلمى ..
ان اظل اميرة وانا اتعذب كل يوم من حافلة الى حافلة كى اصل الى جامعتى ..
ورغم هذا قبلت التحدى ...
ثم كان التحدى ان اكون ملاكاً وانا اطعن من كل جانب ..
وارى الغدر فى عيون اغلب من القاهم ..
ان اظل ملاكاً وانا ارى نظراتى البريئة ، الطفلة تصطدم بنظرات كراهية وحقد وحسد وغيرة ..
لكن حبك كما السحر ، عندما تسلل بداخلى محا من قلبى اى اثر للكره ..
اى اثر للحزن ..
اى اثر للرغبة فى الانتقام ..
تلاشى كل شئ ، وكأنما يفسحون مكانا لحبك الجياش ..
وكان التحدى ان اكون طفلتك ..
فوجدتنى بالفعلة طفلة بين يديك ..
وجدتنى قادرة على نسيان كل ماتعلمت ورأيت وعرفت فى حياتى ..
والتحقت بصفوف مدرستك الاولى ..
وتعلمت ان ارى بعيناك الدنيا ..
قبلت التحدى وكان اجمل تحديات حياتى ..
واكثرها ربحاً على الاطلاق ..

postheadericon اول سطور الركن الرومانسى الهادى ..

دائماً ما احاول ان انسى رومانسيتى التى يراها البعض (( هبل )) ويراها الاخرون (( سعة خيال )) وانا اراها (( حيــــــاة ))
حاولت فى هذه المدونة ان انسى حياتى التى اعشقها .. لكن بعدما اصبحت مدونتى جزء منى ..
وبعدما اصبحت وعاء لافكارى لم يعد من الممكن المزيد من الصمت ..
قد يرى البعض رومانستى بعيدة كل البعد عن ال ( بنوتة اللاسعة ) ..
ولكنى اراها قمة الجنون والاختلاف والخيال اى انها قمة اللسعان ..
فمن يمل الرومانسية ارجوه ان يغمض جفنيه ويعبر على كلماتى مرور الكرام لكن بالله عليك لا تهزأ بها
لأنها كيانى ..
ولمن يعشق الرومانسية .. فلتحلق معى فى سماء مختلفة من الرومانسية ..
وبس خلاص !!

postheadericon يوميات مستمعة مفروسة (3 ) الكدب مالوووش رجلين

فى برنامج متسجل المفروض يعنى ، قبل اذاعته بساعات
وسبحان الله المستمعين بيعلقوا على مكالمات بعضهم
وهو ايييييه .. هو متسجل !!!!
-----
نفس البرنامج هما هما المستمعييييين كل حلقة بيتصلوا
وبيقولوا اللى فيه النصيب بنفس الاسلوب بس اسامى مختلفة
بجد كنت فاكرة الكلام دا اتلغى من زمان
بس لسة الشرق الاوسط بتستعمل الاساليب دى
الخميس، فبراير 28، 2008

postheadericon يوميات مستمعة مفروسة ( 2 ) .. هم يضحك وهم يبكى ..

من المضحكات المبكيات فى حال اذاعتنا الاخطاء اللى تكاد تكون كوميدية للمذيعين ..
  • مذيع بيتكلم عن اديب وبيقول : فلان الفلانى احد الرمزة الفكرية ((( الرمزة جمع رمز واخدلى بال حضرتك )))
  • مذيعة بتقول (( انوه عنايتكم )) بجد ابداع .. الفاظ مبتكرة
  • مذيعة اخرى بتقول (( ونحن ننوه بهذا حتى لا يزعل منا احد )) وكل البرنامج على المنوال دا كلام كلاسيك جدا وكلمة فى النص ما تعرفش جابتها منيني غير ان البرنامج لسة وسيلة الاتصال الوحيدة بيه هى البريد على مبنى الاذاعة والتليفزيون ..

اما المستمعين فحدث ولا حرج واحد بيتصل باذاعة الشباب والرياضة وحصل الحوار دا

المستمع : انا متابع جيد لاذاعة الشباب والرياضة ، خاصة برنامج تليقون اخر الليل

المذيع : ايوة يا افندم بس تليفون اخر الليل مش فى الشباب والرياضة

المستمع : ايوة ما انا عارف !!!

postheadericon يوميات مستمعة مفروسة .. ( 1 )

بيقولوا المصائب لا تأتى فرادى ..
كنت فاكرة ان المثل دا افترا وتشاؤم على الفاضى ..
بس مؤخراَ اقتنعت وصدقت وآمنت بالحكمة او المثل دا ..
فى فترة الطوارئ و ذل الامتحانات ..
والحبس الانفرادى والنظام دا
كانت وسيلة الترفيه - او اللى يقال انها ترفيه يعنى - اليتيمة ليا هى الراديو
طبعا علشان حاجة عاملة زى البغبغان جنبك مش لازم لا تبحلق فى شاشة ولا تكتب على كيبورد ..
المصيبة بقى انى جبت اجل كل راديوهات البيت واتفضل رادو عقيم مش بيجيب غير اذاعاتنا المصرية المحلية الارضية الايه اميه
باختصار ولأنى بستحرم يكون القرآن شغال وما اسمعهوش بتركيز مش بينفع اشغل غير الشرق الاوسط والشباب والرياضة ...
بصراحة انا اتصدمت لما سمعتهم بعد انقطاع 6 سنين تقريبا ً ..
من 6 سنين كانوا بجد اذاعات متميزة وكانت فعلا مخليانى استغنى عن التليفزيون ..
للاسف الاذاعة مستواها بقى تحت الصفر .. جمعت كام نقطة كده مستفزين بجد ..
= لفت نظرى اوووووى التقليد الاعمى الفظيييييع او محاولة التقليد الفاشلة لنجوم اف ام
نجوم اف ام بجد تجربة اذاعية ناجحة جدا
شابة جدا مختلفة جدا ودا كان سبب نجاحها
لكن مش عارفة ايه اللى دخل فى دماغ اخواننا فى الاذاعات التانية ان السر فى نجاحها هو كلمتى ( نجوم ) و ( اف ام ) ..
فتلاقى بالذات الشرق الاوسط كل اعلاناتها بتتكلم عن النجوم والاف ام
ورغم ان موجتها الاشهر على ال ( AM ) الا انها بتصر اصرار رهيب فى كل اعلانتها على انها 89.5 اف ام وان النجوم على موجتها وبس
بطريقة اقرب للردح منها للاعلان (( وعفوا فى اللفظ )) ...
  • فى مشكلة تانية بتعانى منها الاذاعة دلوقتى ،وهى ان المذيعات بيعانوا من خفة ظل لا حدود ليها ، بتوصل لدرجة الاستظراف احيانا
- اعتقد انهم لو امتنعوا عن الماية الساقعة هتكون النتيجة احسن كتيييييييير -
  • مشكلة كماااان .. قلة الذوق الفظيعة اللى المذيعين بيتعاملوا بيها مع الضيوف ومع الرسايل او الاتصالات بتاعة المستمعين
والمصيبة انه فى الغالب بيكون المذيعين هما اللى مش فاهمين ، نتيجة جهل فظيع باخر الاحداث والمعلومات وحتى الاغانى والمغنيين
  • كمان مشكلة .. اسامى البرامج مالهاش اى علاقة بمضمونها وبهى بتتكلم فى ايه
مثلا : برنامج سهرة عائلية : - اللى يتفهم من الاسم انه برنامج بيتناول اسرة او عائلة لشخص مشهور او لأ
المشكلة الكبيرة انهم عمرهم ما استضافوا اسرة ، ولا عمرهم اتكلموا فى اى حاجة عائلية
بلاااااااااااش دا برنامج اسمه ( حبيبتى يجب ان تكون .. )) + مقدمة رومانسية جامدة تحسسك ان نزار قبانى هيطلع يتكلم
تلاقى البرنامج فى حلقة بيتكلم عن انفلونزا الطيور ومرة عن امراض مش عارفة ايه ومرة عن مجلس الشعب ... بجد حاجة تنقط ..
وللحديث بقية

postheadericon جزرة الشعوب ..

بص يا سيدى قبل ما تقرا الكلام دا هطلب منك طلب (( من طلباتى الرخمة ))
مطلوب من سيادتك تجيب جزراية (( ايوة جزراية من اللى بتقوى النظر ))
واقطم قطمة حلوة كده
استنىىىىىى قبل ما تقطم اطلب من حد يتكلم وانت بتقطم
ووانت بتمضغ الجزراية ..
هاااااااااا قولى بقى سمعت حاجة وانت بتاكل ؟؟؟!!
طبعاً لأ ، حتى لو كنت بتمضغ برقة
مش هتسمع حاجة
بس خلاص كده انا قولت اللى انا عايزاها
ماتخافش مش هجرى واستندل هفهمك ..
بص يا سيدى لو كنت مستغرب من عمايل الحكومات فينا
ومن غلا الاسعار
ومن لقمة العيش اللى بتلاقيها بطلوع الروح
بعد التجربة دى المفروض تفهم
لاااااااااااازم تاكل حاجة ناشفة علشان ما تحسش باللى حواليك
لا تسمع ولا تشوف ايه اللى بيحصل برا
تعالى كده مرة كمان نجرب حاجة تانية
معلش بقى ما احنا اتفقنا نكون لاسعين
هات خيارية (( من بتاعة شاهد ما شافش حاجة ))
وكلها كده
هتتاكل من غير دوشة ولا وجع سنان وهتفوقك وتنعنشك وهتسمع وتشوف كل حاجة
طب بالذمة دا بقى يعجب مين لما تشوف وتسمع كل حاجة ؟؟!!
--------
ملحووووووووظة : تقدر تعمل نفس التجربة بعيش ناشف وهتوصل لنفس النتيجة ، واللاسع يفهم بقى
الجمعة، فبراير 22، 2008

postheadericon مجنونة بس هعملها

اكيد كلنا فى بالنا حاجات مجنونة
مش قادرين نعملها
وانا منهم
مثلا نفسي اركب زي التباع على الباب
ونفسي انط بالباراشوت
ونفسي البس اسود فى فرحي
كتيييييييييييييييييير
ياترى انت منهم
وايه الحاجات المجنونة اللى نفسك تعملها ؟؟

postheadericon لو لم اكن مصريا ..

لو لم اكن مصريا .. لما كان دمى رخيصاً ..
لو لما اكن مصرياً .. لما اهدرت كرامتى لاجل المال ..
لو لم اكن مصرياً .. لوجدت رغيف العيش دون ان اتذلل لمن يسوى ومن لا يسوى ..
لو لم اكن مصرياً .. لوجدت فرصة عمل شريفة ومحترمة قبل ان اموت ..
لو لم اكن مصرياً ... لتمعت بحقى فى تعليم جيد ، وعادل ..
لو لم اكن مصرياً .. لتمكنت من طرح آرائى بكل حرية دون ان اخاف الاعتقال ..
لو لم اكن مصرياً ..
وبما انى ولدت مصرياً .. ولن اموت الا مصرياً ..
فيجب ان اقول ..
لو لم يكن هؤلاء يحكمون مصر .. لتمتعت بكل ما سبق ولظللت مصرياً

postheadericon لو لم اكن مصريا .. لوددت ان اكون ؟!!!

بيستفزنى اوى لما نكون بنلعب لعبة What if او ماذا لو ؟!!
اللعبة المفترض اننا بنتخيل او بنحلم .. يجي حد بقى ويقولك بابتسامة عريضة وفرحة رهيبة
ماذا لو لم تكن مصريا ؟!! ويبتسم كأنه بيديك الفرصة اللى ماتتعوضش علشان تثبت ولائك وحبك لمصر
وبيستنى يشوف مصطفى كامل يبعث من تانى ..
وياويلك ويسواد ليلك لو قلت لو لم اكن مصريا لوددت ان اكون مثلا اماراتيا ولا عراقيا ولا اى حاجة تانية
بيبقى هاين عليهم يرجموك ..
فى الحقيقة انا دايما بتحلى بالشجاعة اللى اقول فيها لو لم اكن مصرية لوددت ان اكون عراقية ..
والاسباب هقولها بعدين ..
ومش بشوف فى دا اى انتقاص لوطنيتى او حبى لمصر ..
بالعكس انا متأكدة انى بحب مصر بكل عيوبها وكل مافيها من سلبيات ..
بحب مصر ومش محتاجة انى اكون مصطفى كامل علشان اثبت كده
اللى برفضه بجد هو النفاق والتظاهر بالوطنية ..
واللى برفضه بردو اننا حتى لما حد يقولنا احلموا نمنع نفسنا من الحلم ..
ايه الماننع لما تقول لو لم اكن مصريا لوددت ان اكون مثلا امارتيا ..
او عراقيا او سعوديا او او اى حاجة ..
مش المشكلة فى انت عايز تكون ايه ؟!! المشكلة هى انت ليه عايز تكون حاجة تانية ..
يعنى انا مثلا لو لم اكن مصرية لوددت ان اكون عراقية ..
ليييييييه ؟؟
هقولك علشان العراق حضارة رائعة وقريبة جدا من مصر
فى الجو وفى التاريخ وفى الشعب نفسه ..
لو فكرت كده هتلاقى ان اصلا حبك للوطن التانى بينطوى على حب لمصر ..
احلم انك تكون اماراتى فى مصر وفكر صح زى ما بيفكروا وخليك انسان ايجابى وذكى ..
احلم انك تكون سعودي وعيش حياتك برفاهية بس اوعى تكون مسرف ..
احلم .. الحلم مش هيغير من اصلك حاجة ومن كينونتك ..
بس هيعيشك فى متعة وممكن يخليك تدى فى الواقع اللى انت عايشه دا
وفكر معايا بقى لو لم تكن مصريا لوددت ان تكون ايه ؟؟ وليه ؟؟!!
الجمعة، فبراير 15، 2008

postheadericon جننيه .. تكسبيه ..

انا دايما عندي هواية غريبة جدا ..
.لما بكون وسط ناس بحب اوي اتفرج عليهم ...
بمعنى اقعد اراقب تصرفاتهم ،
علاقتهم ببعض
دايما بحاول اكتشف سبب المشاكل والزعل ...
. ودايما شاغلني جدا موضوع ان الراجل عينه زايغة ....
وانه غالبا مش بيهتم بزوجتة .....
اكيد هو غلطان بس بردو هي كمان غلطانة .......
هي بتستسلم لما تلاقيه بدأ يبعد عنها ، بدا كلامه معاها يقل ....
مبقاش يفضفض لها زي زمان ،مبقاش يهزر معاها ....
حاجات كتير ...
.تبدأ تخاف وترتبك وتبعد كرد فعل سلبي .....
هو دا الغلط جنينيه تكسبيه هي دي نصيحتي ،
هتقولي اجننه ازاي؟؟
طبعا مش قصدي تطيري الكام برج من دماغه لأ ،
اشغيليه دايما بيكي ،خليه ما عندهوش لحظة واحدة يفكر في واحدة غيرك ....
.كل يوم اعمليله حاجة جديدة ،حتى لو مجنونة .....
.صدقيني حتى لو اظهرلك انه متضايق هو بيكون محتار بس مبسوط .......
.هينشغل بيكي دايما .....
هتلاقيه بيفكر حتى وهو بعيد عنك ......
ياترى ايه الجديد النهاردة ...
هايحس بشوق لرجوعه البيت ......
.ولو يوم بطلتي تعملي مفاجأة ،هايقلق ومش بعيد يخاف كمان هاتقولي هو انا فاضية ؟!!
هاقولك لأ انت المفروض تفضي نفسك لو طلبت تقعدي من شغلك لأن هو دا اللي باقي
لك رغم اني من اشد مؤيدي عمل المرأة
بس مؤيدة اكتر ان البيت يبقى ناجح وسعيد
ولو قولتي التكلفة مش لام تعملي حاجة مكلفة
لو في يوم تلبسي فستان فرحك من تاني وتقوليله البس بدلة الفرح ويلا نعيش اللحظات دي من تاني ،
لو في يوم يجي تديله كارت بسيط مش مكلف خالص
ويقولك بمناسبة ايه قوليله بمناسبة اني بحبك
لو في يوم تصحيه من النوم علشان تقوليله انا بمووووووووت
فيك هايتنرفز بس صدقيني هايفرح
لو في يوم تكتبيله جواب زى ايام المراهقة
وتبعتيهوله صدقيني حاجات بسيطة جدا بس هاتفرق
مستنية رأيكم

postheadericon " ممكن اطلب منك طلب رخم ؟؟؟ "

" ممكن اطلب منك طلب رخم ؟؟؟ "
الطريقة السحرية علشان تطلب اى طلب وتضمن انه يتنفذ
لأنك خلاص قلت كل الاسباب اللى يترفض بيها طلب فى جملة واحدة
قلت انه طلب صعب
وانه متعب
وانك عارف
ورغم من دا محتاجه ........
كمان اللى طلبت منه الطلب هايصعب عليه انك فاكر نفسك رخم
فاهينفذه وبجد الطريقة دي دايما والحمد لله بتجيب نتايج مبهرة
جربوا وادعولى
بس ممكن اطلب طلب رخم بقى ؟
اللى يقرا الموضوع يعلق

postheadericon انا بشتغل نفسى ..

كنت مرة بتفرج على فيلم اجنبى
كان فيه ولد صغير اللى بيربيه قاله
لما تخاف من حاجة البس النظارة دي
ماحدش هايشوفك هتخليك تختفى واتصرف ولا كأنك خايف
طبعا كان بيضحك عليه بس الولد صدق وعمل كده
وكان دا سبب انه مر من اصعب المواقف وبنجاح
هو دا قصدي باننا نشتغل نفسنا
نتناسى مخاوفنا واوهامنا ونتصرف كانها مش موجودة
نعيش بمبدأ انه لو مش قادر تلون الكون باللون اللى يعجبك
البس نظارة باللون دا)) مش عارفة هو مبدأ بجد و لا من اختراعى انا )))
بس حقيقى انا بجرب الاسلوب دا كتيييييييييير
وياما عملت نفسي عبيطة والحمد لله نجحت فى تخطى ازمات ومواقف كتير
الخوف كان ممكن يوقفنى ما يخلينيش اعديهاحاول تشتغل نفسك وجرب وادعيلى

postheadericon سيدى الرئيس .. يا بخت من زار وخفف ..

اتنين من الرؤساء بجد احترمتهم جدا السنة دى والسنة اللى فاتت ..
الرئيس اللبنانى والرئيس الكوبى اللى استقالوا ..
بجد ناس تحسهم مش خايفين من اى حاجة ..
لأنهم ادوا بكل طاقتهم لبلدهم ..
ولأنهم حكموا حكم عادل لاقصى ما يقدروا
او على الاقل مقتنعين باللى هما عاملينه
استقالوا لما حسوا انهم مش قادرين يدوا اكتر ..
ما مسكوش فى الكرسى لأنهم مش خايفين من حاجة ..
لكن تعالى لو واحد من اخواننا البعدا استقال ..
من اعماله الجميلة الرائعة المتألقة ... الى الذى منه يعنى ..
هيخاف يخرج للشارع هيخاف يقابل شعبه
اللى بهدله ورخصه ونزله الارض ..
هيخاف لأنه ما عملش اللى عليه ..
كلمة اخيرة بقولها وربنا بقى يستر : " سيدى الرئيس يا بخت من زار وخفف "

postheadericon لو ما لسعتش ماحدش هيحس بيك

لو ما لسعتش ماحدش هيحس بيك
مش مصدقنى ؟؟!! طب تعالى كده نتكلم بالعقل ..
المثل بيقول ايه :
" اللى اتلسع من الشوربة ينفخ فى الزبادى "
بالزمة لو ماكنتش الشوربة بتلسع كان حد افتكرها فى مثل ولا فى اى حاجة ؟؟!!
طبعا انا مش بقولك السع زى الشوربة
لأ تعريف لاسع فى قاموسنا (( الشباب يعنى ))
يعنى حد مختلف ، دايما بيعمل افكار جديدة
للاسف 3/4 اللاسعين لاسعين بطريقة مش حلوة
يعنى ماشى بمدأ خالف تعرف ...
طبعا دا مش دايما بيكون صح
اللى انا اقصده باللسعان بقى
انك تكون انسان مختلف
بمعنى مميز يعنى ترفع شعار لا للتقليد
لا لتقليد الغرب فى حاجات مش متفقة مع مجتمعك
لا لتقليد اى حد من غير اقتناع حقيقى باللى انت بتعمله
كمان اعملك اسلوب خاص فى حياتك
لأن ظروفك مش هى ظروف غيرك
واعملك اسلوب خاص فى الكلام
ماتتكلمش غير فى اللى تعرفه
وطبعا اللى انت تعرفه مش زى اللى غيرك يعرفه
فبالتالى هتكون انسان مختلف
وتكون لاسع فى الحق
يعنى دايما تقول الحقيقة وتدور عليها
هتلسع وتوجع بس صدقنى هتكون مختلف
وهتلاقى الناس بتحترمك وتبصلك بصة مختلفة عن اى حد
جرب وادعيلى

المتابعون

اعتبرها بيتك ♥

وِش القفص

خليك ورايا

دليفري..