لعلمك

لعلمك

إقرأ لي

دخلوا بكليك شمال :D

Blog Archive

الأربعاء، يونيو 25، 2008

postheadericon ياترى القطط بتحلم بإيه ؟؟

طول عمرى بعشق حاجة اسمها قطط

وكنت من درجة حبى ليهم بقعد اتفرج عليهم حتى وهم نايمين

فكنت بلاحظ انهم قاعدين يتشنجوا وعينهم بتتحرك

زينا كده لما نكون بنحلم

وسألت كتيييييييير هل فعلا القطط بتحلم ؟؟

وياترى لو بتحلم بتحلم بإيه ؟؟


قعدت اتخيل بقى توم اند جيرى وياترى هى بتحلم

انها مسكت فار ولا ايه نظامها

وبعد كده استسخفت الموضوع

وقلت اكيد حاجة مش مهمة

المهم بعد سنين كنت نسيت الحوار دا اصلا

اكتشفت ان القطط من الحيوانات القليلة جدا اللى بتحلم

وبعد ما كنت مستسخفة انها بتحلم

ومتخيلة انها مترفهة وعايشة حياتها

ومرتاحة اربعة وعشرين قيراط وايه ممكن يضايقها

قولت لأ ماهى دى حياتها وزى ماهى بسيطة وحياتها بسيطة مشاكلها البسيطة بالنسبة ليها هى كبيرة


وبالقياس على القطة

المفروض اننا ما نستهونش بمشاكل حد ولا متاعب حد

ولا أحلامه وطموحاته

لأن كل واحد على قد تفكيره وعلى قد ظروفه وخياله اللى ربنا اداهمله بيحلم وبيفكر

ممكن اوى تستهون بحلم حد وتحبطه فتضيع مستقبله

تكون شايف ان دا حاجة تافهة والمفروض ما يفكرش فيها وهى بالنسبة له كل حياته

وصدقنى هيكرهك اوى لو عملت كده

وهتحس بالذنب اوى لو سيبت نفسك تعمل كده واكتشفت بعد فوات الاوان ان دا كله كان غلط

وزى ما انت شايف احلام حد تافهة ومالهاش لازمة ومش مستوعب ازاى اساساً هو بيحلم

انت بالنسبة لحد تانى كده

فحط نفسك مكانه وتخيل لو حد عمل فيك كده رد فعلك هيكون ايه ؟
الأحد، يونيو 22، 2008

postheadericon كل عام وانت حبيبى .. كل عام وانت بخير



جميل أوى لما ربنا يكون بيديك هدايا ونعم من قبل ما تتولد


من قبل ما اتولد بأربع سنين


بالتحديد يووووم





23/6/1985





ربنا ادانى احلى هدية فى الدنيا دى




ربنا ادانى




الشاب الامور


ابو دم زى العسل


واطيب قلب فى الدنيا


.

.

.

.



.













كل سنة وانت طيب يا احلى واغلى اخ فى الدنيا



كل سنة وانا بموت فيك على قد ما زعلتك



وعلى قد ما فرحت علشانى



وعلى قد ما انت شايل دايماً همى وبتتعب علشانى


كل سنة وانت احلى حاجة فى حياتنا كلنا



كفاية كده لحسن هدمع


ههههههههههههههههههههههههههههههههه


يلا نعمل حادى بادى ونشوف هوريك التورتة ولا الهدية الاول





حادى





بادى





كرنب





زبادى





شالوا





وحطوا





وكله





عليــــ ....



.

.

.

.








النهاردة عيد ميلادك



وانا عايزة اريحك



هتتفرج وبس



مش هتاكل خلى عنك يا حبيبى ههههههههههههههههههههههههه



فااااااااااااااااااضل الهدية









ايه رأيك ..



أروبة انا مش كده



هههههههههههههههههههه





كل سنة وانت طيب يا مودى



ويااااااااااااااااااااارب عقبال مليون الف سنة





ويارب السنة الجاية تكون فرحان بيا

هههههههههههههههههههههه



احم قصدى فرحان بينا وبيك





ونعمل لك عيد ميلادك فى بيتك وبيت منى وبيتنا





3 عيد ميلاد اهو بس انت ادعى



هههههههههه




.;.;.;.;.;.;.;.

نسيت اقول ان دخول المدونة النهاردة بالهدايا الرسمية

كل لازم يبارك ويهنى لأخويا ويجيب الهدايا فى الامانات هنا معايا هههههههههههههههه



نسيت اقول كمان حاجة تخيلوا انكم سامعين اغنية هابى بيرز داى تو يووووووووو

من اول ما فتحتوا المدونة
وتخيلوا ان الماوس شكلها اتغير لشكل تورتاية

وتخيلوا ان فى بلالين والعاب نارية فى الخلفية لأنى حاولت اعمل كل الحاجات

دى وفشلت


انا افسة يا مودى :(
السبت، يونيو 21، 2008

postheadericon شوية سياحة







لما بنمشى فى طريق احنا متعودين عليه مش بناخد بالنا اوى من ملامحه

ولا بنهتم اننا نعرف مميزات الطريق دا ايه

ولا اجمل حاجة فيه ايه ؟

لكن لما بنروح سياحة فى اى مكان

بنهتم اوى بالطريق وبكل ملمح من ملامحه

واى حاجة حلوة فيه ولو بسيطة بنحطها فى اعتبارنا ونكون طايرين بيها فى السما

نفس الحكاية بنعملها مع البشر ..

الناس اللى متعودين نشوفهم كل يوم وبنعيش معاهم حياتنا

ما بنحاولش ابداً ندور جواهم على مميزات

ما بنحاولش ندقق فى ملامح نفوسهم ولا نعرفهم كويس

احنا محتاجين شوية سياحة .. شوية سياحة جوا نفوس اللى حوالينا

نبص لهم كويس

وندرسهم كويس

ونحبهم اوى كاننا هنشوفهم لمرة واحدة ومحتاجين بس نشيل الذكريات الحلوة

ونفرح اوى بمميزاتهم ولو كانت حاجات صغيرة

متهيألى لو عملنا كده هتفرق معانا كتير ..



___________________________________________

كلام مالوش دعوة بالموضوع

" بحبكم اوى وربنا وحده العالم وقفتكم جنبى فرقت قد ايه

انا كنت متخيلة انى مش هبقى كويسة ومش هرجع سارة تانى الا بعد يجي سنة قدام

بس بجد كلامكم وسؤالكم عليا رد فيا الروح

ربنا ما يحرمنى منكم "



الثلاثاء، يونيو 17، 2008

postheadericon توضيح واعتذار ووداع

انا رخمة اوى فى الفترة الاخيرة وزعلت من غير قصد ناس كتير غاليين عليا بتسرعى وغبائى و لأنى كنت حادة جدا وعصبية
يارب تسامحونى لأنى بجد مضغوطة جدا الفترة دى وفى اكتر من حاجة خنقانى واللى خانقنى اكتر انى مش قادرة احكى لحد
باختصار شهر يونيو كان شهر اخفاقات متتالية من كل ناحية بالنسبة لى
حاولت اقاوح واكمل حياتى عادى بس اكتشفت انى بعك الدنيا
وكتير حسوا انى مش سارة اللى يعرفوها وانا اولهم
حتى تدويناتى مابقتش بالمستوى اللائق
علشان كده لازم ابعد فترة اعيد ترتيب حساباتى وافكارى واعيد تقييم قراراتى
وعلشان مااخسرش الناس اللى عايشة بحبهم
وهحاول استعيد شوية حاجات فى حياتى سرقتها منى حياتى الالكترونية
بس قبل دا حبيت اعتذر لكل حد غلطت فى حقه او خيبت ظنه او كنت رخمة معاه
بالله عليكم لو بتحبونى سامحونى
وياااااااااااااااريت تدعولى ارجع انا من تانى علشان سارة وحشتنى اوى
__________ رســــــــائل ممكن ما توصلش _________
روكا حبيبة قلبى وحشاااااااااااااااااانى اوووووووى .. مفتقداكى بجد ونفسى افضفض معاكى
حسام & الجينيرال سامحونى ع التأخير بس لازم علشان اقدر اغير العالم اغير نفسى الاول
د/ ابو يحي وآدم سامحنى لأنى ماكونتش ايجابية بما يكفى فى حملة لغتى هويتى بس صدقنى مش نسياها
أ/ احمد ( الصحفى المصرى المشاغب ) سامحنى انى ماكونتش قد وعدى بالنسبة للتقدير بس والله غصب عنى
منمن MY HOPES اوعدك هفكر ف اللى قولتيلى عليه
أ/ ابراهيم عادل .. أنا بجد اسفة
شمعى اسعد .. اسفة ع التأخير بس صدقنى اول ما ارجع انا هفكر بجدية وهشتغل بحماس ف اللى قولتلى عليه
السندبادة .... كان نفسى اقدر اكون ملاك زيك
روشا احمد .. انتى احلى حاجة حصلتلى الشهر دا
واخيراً من عروسة النيل ..... انا اسفة ، خيبت ظنك وعملت زى كل الناس ما عملت
________________ للى بيزورنى لأول مرة ______________
أسفة لو ما لقيتش حاجة تستحق زيارتك
بس لو تحب فعلا تقرالى ممكن تجيب من الارشيف البوستات دى
العاشقان
العدد اليتيم من مجلة الاصدقاء
علشان خاطرى قلب كويس
________________ كام ملحوظة ______________
انا هبعد بس عن اى اتصال بالناس لأنى لما بتكلم حاليا بعك
وطبعا دا يتضمن الرد ع التعليقات والتعليق فى مدونات اخرى
لكن مش هقدر ما ازورهمش ولا ازور مدونتى
وفى 3 حاجات مش هسيبها لو بموت
حملة السرطان لا يعنى الموت
رابطة محبى الشاعر احمد بخيت
برنامج عايز الحق
________ اخر حاجة __________
بحبكم فى الله لدرجة ما يعرفهاش الا ربنا
استودعكم الله
السبت، يونيو 14، 2008

postheadericon الشعر العبرى .. سبة فى جبين الشعر







وقع فى يدى كتاب به عدة اعمال عبرية يسمونها قصائد

لكن الحقيقة انها سبة فى جبين الشعر وبعيدة كل البعد عنه

الشعر دوما يعبر عن احساس مرهف وراقى ..

كلماته مهما كانت قاسية فانها تقطر عذوبة ورقة

لكن هذه الكلمات تقطر كرها لكل الدنيا

كلمات اقل ماتوصف به انها بشعة ، مضللة

مما جعلنى اتسأل : يالهى اذا كان هذا حال شعرائهم ، ارق من فيهم

وزبدة مجتمعهم ، كيف يكون تفكير المجرمين ؟؟!!

حقا لا عجب مما يفعلونه فى الفلسطنين

وفى ارض فلسطين من خراب ودمار

ولأنى لا احب ان يكون كلامى بلا دليل

اتيت لكم بجزء من قصيدة عبرية

والحكم لكم

مع القصيدة او ما يسمونها قصيدة اترككم

" اطفال صور وصيدا "

اطفال صو وصيدا

انى اتهمكم .. العنكم

لأنكم مخربون

ارهابيون صغار

لو انكم تلاميذ مجتهدون

تذهبون الى المدارس

لو ان لكم شفاه صغيرة تبتسم وترد بالشكر

لقدمت العاباً

وقوالب الشوكولا وهدايا جميلة

لكنكم مخربون

ارهابيون صغار

تحملون الاربى جى

بدل الحقائب والكتب

اطفال صور وصيدا

انى اتهمكم .. العنكم

ستنامون محطمى العظام

فى الحقول والطرقات

لا تسألوا لماذا فانه العقاب

والان حان عقابكم

الجمعة، يونيو 13، 2008

postheadericon تاج اصلاااااااااانى اصييييييييل



ياااااااااااااااه يا ولاد وحشنى اوى انى احل تاج

لدرجة انى كنت هعمل لنفسى تاج واحله

يقوم ربنا يرزقنى بتاج من حيث لا أدرى

لأ ومش أى تاج دا من الباشا شادى اصلان

انا طول عمرى بقول ان الحاجة بتدعيلى


حااااااااااضر هقصر فى الكلام وهحل التاج اهو

.
.
.
.


1- هواياتي : - القراية طبعاً دى اساسى ،

والنت دا حياتى مش هواية بس

يبقى فاااااااااااضل ..

القطط ، بجد متعتى انى العب معاهم وكمان انى ادور ..

ادور على اى حاجة فى اى حتة بس المهم انى ادور واكتشف حاجة جديدة ..

وفى وقت من الاوقات كانت هوايتى انى اعمل حاجات بالصلصال و بالشمع ،

كنت بعمل حاجات جامدة والله بس حكم السن بقى ):

الواحد مابقاش فيه صحة ولا نفس ..

2 - أشهر عيوبي :

انى عصبية اوى ، متسرعة جداً ،

انى احيانا بكون حادة ، ماعنديش وسط

يا حلو يا وحش يا ابيض يا اسود


أحيانا بصدم الناس بالحقيقة فى وشها كده من غير تمهيد ،

دعاء صاحبتى مؤخراً لقيتها بتقولى انى احيانا بكون رغاية ،

و السندبادة بتقولى انى صعبة اوى مش بسامح فى حقى بسرعة

وبابا بيقول انى باردة وكل الدنيا

شايفة انى كسولة اوى فى البيت ):


3 - حاجات بكرهها جدا

-ان حد يحرج حد قدامى

- ان حد يكون بجح

(( معلش ما عرفتش اجيب لفظ مهذب ليها ))

بمعنى انه يكون بيكدب وعارف ان كل الناس عارفة

انه كداب ويفضل يكدب بكل بجاحة ولا كأنه بيعمل حاجة

- انى اكون مخدوعة

- الغباء

- الروتينية

4 - حاجات بحبها قوي ومش بمل من تكرارها

-غير النت طبعا والكمبيوتر -

انى اقرأ كتاب بحبه ، وانى أقرأ كلمات ليها ذكريات معايا ،

انى احل اختبارات نفسية ،

رغم ان غالبا حلولها بتكون بعيدة عن الواقع

او عن حقيقتى لكن بستمتع بالاسئلة اللى تحطنى فى موقف معين ..

وانى الون اى حاجة .. مش بحب ارسم بحب الون

5 - سؤال بيستفزني جدا

هو انتى يعنى اللى هتغيرى الكون ؟؟
وهو انتى ما بتتهديش ؟؟


6 - أمنيتي في الحياة

انى ماشوفش أى بنى آدم إمعة

نفسى كل حد يبقى ماشى باقتناعاته الخاصة ،

اللى نابعة من تفكير منطقى مش من منطلق مخالفة

الناس وبس لأ لازم يكون شايف ان دا صح

وهو بيعمله علشان صح ،

ويكون عارف هو صح ليه
علشان حتى لو هو فاهم غلط ، لكن الاساس عنده

انه عايز يمشى صح هنقدر نقنعه بالصح .. حد فاهم حاجة ؟!؟!

7 - حاجات مؤمن بيها جدا

- ان ربنا بيدي كل حد على قد نيته

- انك لو ابتسمت للدنيا هتبتسملك لو كشرت هتركبلك الوش الخشب

- ان مع الارادة والاصرار مافيش مستحيل .. يعنى مش مع برسيل بس هاااااااا

8 - أكتر حاجة فاشل فيها

- المطبخ ): بحس بغباااااااء منقطع النظير وفشل ذريع وانا واقفة فيه

- انى اتكلم مع حد وافتح حوار معاه ،

حد اعرفه او ما اعرفهوش لو مافيش موضوع للحوار ما بقدرش ابداً ابدأ حوار

9 - وظيفة بحبها
الصحــــــــــــــافة

يالهووووووى وانا بتدرب ما حدش يتخيل سعادتى

ايه لما كنا بنروح نعمل مثلا مقابلة اوى اى حاجة واسمع سارة درويش .. صحفية .... يا خراااااااااااااااااشى عندى بالدنيا

10 - أخيرا وصلت للنهاية مثلي الأعلي في الحياة :

كل حد فى حياتى بعتبره مثل اعلى حتى لو حد بكرهه

يعنى بابا مثلى الاعلى فى الدقة فى الشغل وحب الشغل لاقصى درجة
وانى ماحبش اعمل حاجة بإسمى تكون مش كويسة

وماما مثلى الاعلى فى طيبة القلب ، بحاول قدر الامكان اكون حنونة وطيبة زيها ، اى نعم بفشل بس بحاول

واخويا مثلى الاعلى فى الجدعنة مع اصحابه

ومع اخواته (( اللى هما احنا يعنى )) وفى انه بيحب يتعلم اوى

من ا ى حد حتى لو بيكرهه

واختى مثلى الاعلى فى اسلوب تعاملها مع الناس ..

اجتماعية جدا وبتعرف ازاى تكسب قلوب الناس

وفى الصحافة مثلى الاعلى كل حد صاحب كلمة حق وقلم حر

وفى التعليم ماليش مثل اعلى انا عايزة اخلص وخلاص ههههههههههههه

وفى ... الخ الخ الخ ..


أى حد والله بقابله بخليه مثلى الاعلى بالحلو

او بالوحش بحاول اتعلم من شخصيته ومن اسلوبه فى الحياة ومن عيوبه ومميزاته

(( يعنى رسالة لكل حد يعرفنى .. ابسط ياعم بقيت مثل اعلى هههههههههههههههه ))


أمرر التاج ل

الجميلة منمن My Hopes

الجميلة ولاء .. القادم أجمل

ابراهيم معايا .. أنا وأنا

د/ أبو يحي وآدم ..

عرفة السيوطى .. الأديب العاشق اللى خلص امتحانات وبنق عليه هههههههههه

الجينرالـــــ

وأى حد يعدى ونفسه فى التاج انا مش هحرمكم من حاجة

يلا كل واحد يا خد التاج يدعيلى دعوتين حلوين بمناسبة الامتحانات

يدعيييييييييييلى مش يدعى عليا

الاثنين، يونيو 09، 2008

postheadericon حدث بالفعل لما حاولت اذاكر بالنهار


كل ما ادخل النت وحد يشوفنى يقولى " روحى ذاكرى يمكن تفلحى " ، وكل ما حد يقابلنى فى البيت يقولى " روحى ذاكرى يابنتى انتى كده مش هتفلحى " وكل ما ارد على التليفون اللى بيكلمنى يقولى انتى بترد ليه روحى ذاكرى ومهما احلف للبشرية كلها انى مش بعرف اذاكر بالنهار ماحدش يصدقنى .. فشكيت فى نفسى وقلت يمكن انا بستهبل ومافيش حاجة اسمها مابعرفش اذاكر بالنهار وقلت يابت حسى على دمك وادخلى ذاكرى .. دخلت اذاكر على الساعة واحدة الضهر كده واليكم النتيجة :



جبت هاى سكور

( High score )

حلو اوووووى فى قتل الدبان ..

اكتشفت ان قتل الدبان حاجة ممتعة اوى مسكت المضرب وهاتك يا تنشين وضرب ، ولما اوضتى مابقاش فيها خرجت برة فى كل الشقة الدبانة اللى اشوفها تبات ليلتها فى العالم الآخر ..



* قريت بابين من المادة وحسيت انى مافهمتش ولا عمرى هفهم حاجة فيها




* علشان اشجع نفسى على المذاكرة قريت مجلد كامل من مجلة ماجد (:



* قمت علشان اكل حوالى 5 مرات



* جربت كل انواع واشكال الميك اب اللى عندى


* سمعت الراديو حوالى 5 ساعات لما جالى حالة تخلف مؤقت






* بدلت بين النضارتين حوالى 10 مرات



* غيرت تسريحة شعرى بكل الطرق الممكنة واللى مش ممكنة



* عملت لوجو (HAVE ANICE DAY ) لذيذ اوى بالجليتر على الحيطة



* قمت حوالى 20 مرة علشان اقول لماما حاجة افتكرتها ، او اشوف بابا عايزنى فى ايه او احكى حاجة لاختى او اشوف اختى عايزة تورينى ايه



* ع الساعة 7 المغرب كنت زهقت من المذاكرة ومش طايقة اقعد فى الاوضة




* ع الساعة 8 الا ربع كتبت البوست دا




.×. كل دا علشان ماحدش صدقنى لما قلت انا مش بعرف اذاكر بالنهار .. وكل دا علشان اريح كل حد شايف انى مش هفلح طول ما انا مش بذاكر الا بالليل

تعالوا بقى نشوف مذاكرة بالليل



* بذاكر من 1 صباحاً لحد 4.30 الفجر







* مش بقوم من المذاكرة غير مرتين مرة اعمل شاى بشع
ومرة اعمل نسكافية



* بخلص كل الجزء اللى قررت اذاكره ، والله مرة خلصت 3 ابواب بحالهم





* مش باكل خالص لأن ماما بتكون نامت فبكسل اعمل اكل



* المذيعين اللى خارجين من الترب بيكونوا ناموا فبسمع برامج محتملة نوعا ما




* كل البيت بيكون نام فلما بعوز ارغى مش بلاقى غير الدبدوب المشنوق لكن لأنه مش بيرد عليا فبزهق وبنكتم

* بيصعب عليا نفسى انى اكون سهرانة ومعذبة نفسى ومش بعمل حاجة مفيدة فبذاكر


* بذاكر بكل حماس علشان اقعد ع الكمبيوتر ساعة الفجر وانا ضميرى مستريح ( آل يعنى بحس اوى هههههههههههههههههههههههههه )


.×. من الاخر ابوووس ايدك لو شوفتنى على الميل او لمحتنى على الفيس بوك ولا لقيتنى بشارك فى منتدى او وانت بتعلق على المدونة ما تقوليش ذاكرى بالنهار .. مش علشان حاجة الا علشان ما اوجعش قلبك ببوست مالوش لازمة زى دا









السبت، يونيو 07، 2008

postheadericon اختلاف الرأى يفسد كل القضية .. فقط فى مصر !!






تعلمنا دوماً ان الاختلاف فى الرأى لا يفسد للود قضية

وكثيرا ما نقولها ونرددها فى احاديثنا ، لكنها للاسف لا تتحق الا فيما ندر ..

بل وفى بعض الاحيان الاختلاف فى الرأى يفسد كل القضية كما هو الحال فى نظامنا فى التعليم ،

فمنذ عدة ايام كنت اؤدى اختبار اخر العام فى احدى المواد

وفى احدى الاسئلة اضطررت لكتابة كلمات كادت تقتلنى قهراً عن الرئيس الراحل انور السادات ..

بغض النظر عن مدى صحة ما كتبته - وهو فى الحقيقة رأي استاذى - الا اننى غير مقتنعة بهذه الكلمات

شعرت وكأننى اخون قلمى واخون عقلى واخون السادات نفسه وانا اكتب هذه الكلمات

لكن لو لم اكتبها لن انجح ولو لم انجح ............ البقية معروفة ..

وليس غريب ان ندرس فى نفس الوقت مادة اخرى لاستاذ اخر يرى عكس هذا تماماً

وفى الاختبار يجب ان نكتب هذا ايضاً ...

لأنك اذا لم تكتب ما يراه فانت لم تذاكر ولم تواظب على الحضور وبالتالى لا تستحق النجاح ..

للاسف نتعلم كل يوم فى مدارسنا وجامعاتنا كيف ننافق ونهادن ..

نتعلم كل يوم ان نتقبل كل المتناقضات بلا اى اعتراض ..

نتعلم ان نلغى المنطق ونلغى التفكير وننشط فقط الذاكرة ..

نتعلم كيف نردد آراء الاخرين بلا اقتناع وبلا فهم ...

وكانه تدريب عملى ليفيدنا فى المستقبل ، او ربما ليفيدهم !!

اتخيل حالنا ونحن ثلاثمائة طالب وطالبة ، ندرس الاعلام اى اننا من المفترض ان نشكل صحافة الغد واذاعتها واعلامها ككل ..

اتخيل الوضع ونحن اليوم نتعلم ان نتفنن في اخراج ما لم نقتنع به ، تعلمنا ان هذا هو الطريق للنجاح

وغداً يطلب منا ان ننافق وان نشوه حقائق وان نضلل الرأى العام ..

ما المانع ان نفعلها ؟!!

سنفعلها ، بل وبكل احتراف فقد تدربنا على هذا كثيراً ..

واتخيل حال غيرنا من طلاب فى كافة المجالات ، فالمهندس لن يجد مانعاً فى عمل ابنية غير مطابقة للمواصفات

والطبيب لن يمانع فى تزوير التقارير الطبية ، والمحاسب لن يجد غضاضة فى التهرب من الضرائب وفى سرقة المال العام

والموظف لن يشعر بوخز فى ضميره وهو يزور فى الطلبات ..

لن تكون هناك اى مشكلة فقد تعلمنا كيف نخدر ضميرنا بالتدريج استعداداً لاستئصاله ..

الخميس، يونيو 05، 2008

postheadericon نعم يا أبى احبه !!

نعم يا أبى احبه ، لمَ اللوم ؟!
أحبه يا أبى فقد اهتم بى ومنحنى من وقته ما ضننت انت به عليَّ ..

احبه فقد اهتم بكل حرف انطقه ولم يعتبره سخافات اطفال ..

بل واهتم بما لم انطقه بعد ..

اهتم بكل تفصيلة فى حياتى اهتم بفرحى ، بحزنى ، بجدى ولهوى اهتم أن يتمنى لى نهاراً مشرقاً ..

واهتم ان يتمنى لى احلاماً سعيدة

يخدعنى ؟!!

لا يهم على الاقل هو اهتم بخداعى ،

على الاقل منحنى لحظات من السعادة شعرت انها صادقة ..
منحنى الكثير من المشاعر التى طالما حلمت بها وهذا يكفينى يا أبى ..
يكفينى ان هناك من شعر بوجودى فى هذه الدنيا يكفينى ان هناك من يدرك انى لم أعد طفلة ..
ان هناك من يهتم بمعرفة آمالى واحلامى

ولا يعتبرها ضرباً من ضروب الخيال بل هو منحنى ما يكفى من الثقة

التى تشعرنى انى بإمكانى الوصول الى المحال
احبه يا ابى ولا اخجل وانا اقولها لك ..
فحين احتجت حضنك الدافئ لم تخجل وانت تقول لي

" ابتعدى ، ليس لدى من الوقت ما اضيعه "

ولم تخجل وانت تقف امام الله كل صلاة دون ان ترعانى

لأ اخجل كما لم تخجل انت وانت منصت لكل حرف يصدر عن التلفاز وتصم اذنك عنى وتعرض عنى بوجهك ..
________________________

دى مش وجهة نظرى الخاصة ..

دى وجهة نظر بنات كتير بيعملوا حاجات غلط

مش بس حب ،

وانا بصراحة مش شايفة الحب الطاهر غلط

لكن المشكلة فى اللى بيعملوه تحت اسم الحب

المهم بيعملوا حاجات كتير غلط

ويقولوا اهلنا اهملونا وكانوا السبب

عن نفسى شايفة ان للموضوع دا دور مهم جدا فى ان الاولاد يقعوا فى الغلط لكن ..

مش شايفة انه مبرر او انه حاجة تنفى مسؤلية الابناء فى ارتكاب الغلط ..

ياترى ايه رأيكم ؟!!

هل اهمال الاب مبرر للبنت انها تدور برة على اللى فقدته ؟!!

هل انتوا شايفين معايا ان البنت دى شايفة انها كده بتعاقب والدها وبتنتقم منه علشان اهملها ؟؟

- يعنى دا من وجهة نظرها ، هى شايفة انها بتعاقبه -
وياترى ليه لما فى اهالى كتيييير بتهمل اولادها مش كل الولاد بتنحرف ؟؟

اتمنى اشوف تفاعل لأن بجد رأيكم يهمنى

المتابعون

اعتبرها بيتك ♥

وِش القفص

خليك ورايا

دليفري..