2009-12-31

صباحاتُ أفتقدها





(1) صباحٌ طفولي




صباحٌ طفولي مشبع برائحة الندى ، يبدأ في السادسة .. أرتجف برداً لكن لسع الشتاء يمنحني لذة خاصة


استيقظ على مداعبة قطي الصغير لوجهي .. أقبله ونلعب قليلاً ثم أبدأ في تحضير نفسي للدرس بسرعة

فيبدأ في اللعب بجواربي وأقلامي حتى لا أخرج


وبعد معركة صاخبة ضاحكة والكثير من القبلات وبعض اللبن أختطفهم منه


واتسلل حتى لايشعر بي


قطي الحبيب .. أفتقد دفئك .. دفء الدماء التي تسري في جسدي حين نلهو معاً 

... أفتقد براءة حبك








(2) صباحٌ بين يدي الله 


أشرقت شمسه وانا ساجدة لربي .. شكرته كثيراً وطلبت عفوه كثيراً


وبكيتُ بين يديه كثيراً .. وتضرعتُ إليه كثيراً 


وطلبتُ إليه كل ما أتمنى .. وكل ما آمنني أحبتي أن أطلبه منه


وشكوتُ ضعفي وخوفي .. 


فأرفع رأسي من سجودي مطمئنة راضية .. واثقة بأن الله لن يرد دعائي


ولن يخيب رجائي .. أرفع رأسي وأشعر أني أقوى .. وأنقى وأطهر 





(3) صباح لقاؤك 


أو صباح عيدي .. أتحير كثيراً في اختيار الثوب الذي سينال شرف لقاؤك .. وأبدل رأيي في الدقيقة الواحدة مئات المرات


هذا قلتَ عنه جميل .. لكنه ثوب اللقاء السابق .. لا لا 


هذا أيضاً قلتَ عنه جميل .. لكننا تشاجرنا يوم ارتديته لا لا لا 


هذا هو المطلوب .. جديد وتراه لأول مرة واشتريته خصيصاً لأنه باللون الذي تحبه .. 


لكن .. لن يناسبه الحذاء الذي تحبه


!


وأخيراً ... تدق الهاتف تسألني عما بقي من الوقت على مجيئ


يا إلهي .. داهمني الوقت واضطررت لارتداء الثوب الذي يأخذ اقل وقت ممكن

أسرع باحثة عن سيارة .. يداهمني شعور غريب بأني سأموت قبل لقاءك


لأني لا أتخيل أن الدنيا ستمنحني كل هذه السعادة 


أركب السيارة وأنا أحضر آلالاف المواضيع التي أجلتها لشهور حتى أحدثك فيها وجهاً لوجه


وآلالاف الأسئلة التي تقلق منامي وأتمنى أن تجيبها وعيني في عينيك 


وآراك .. فأنسى كل شيء إلا سعادتي بك 


......


أفتقدك .. أفتقد طقوس أعيادي بك 







(4) صباحٌ بدونك


أحياناً .. أفتقد أيامي قبلك .. أفتقد أيام جهلي بالشوق .. بعذابات الحب


أفتقد راحة بالي وقلبي من الغيرة .. من القلق .. من الخوف عليك


من الخوف من فقدانك .. الخوف من أن اؤلمك .. أن أغضبك



أفتقد حريتي في الجنون .. في إيذاء نفسي


في الإكتئاب في الإنغماس في الحزن 


في تمني الموت .. دون أن أخشى حزنك لأجلي





(5) صباح الرضا


أفتقد صباح راضيةٌ فيه عن نفسي .. أنجزت فيه هدف طالما خططت له وسلبني نومي 


صباحٌ يبدأ بفرحة ٍ في عيون إنسان أحبه ونجحت في إسعاده ولو لثانية


أو فرحة إنسان وجد عندي ضالته و قرأ من قلمي ما لم يقو على البوح به


أو فرحة غريب شعر مع حروفي بالمؤانسة 




(6) صباحٌ  مختلف 




صباحٌ إنتويت فيه أن أبداً صفحة جديدة في حياتي .. صفحة مثالية نوعاً ما


أستيقظ فجراً .. أؤدي حق ربي ، ثم أصعد إلى سطح المنزل ومعي كوب من الشاي وكتاب أحبه


أجلس على الأرجوحة وأستمتع بالشروق مع كتاب وكوب من الشاي الدافيء 


وأحاول ان امارس حياتي بإيقاع أبطأ قليلاً من إيقاع حياتي اللاهث لعلي أستمتع بها 








2009-12-28

فيس بوك وحركات ;)





أول ما الفيس بوك دا بدأ يتشهر الاعلام صور للناس انه عبارة عن موقع موبوء ومشبوه

ومافيش بنت بتدخله الا وتحصل لها بلاوي الدنيا والأخرة والناس اللي ع الفيس بوك بيغرغروا بيها هههههههه

والله لدرجة ان واحدة صاحبتي بتقول لي في يوم انا نفسي ادخل نت والله ياسارة بس خايفة لحسن الفيس بوك دا ياخد صوري 

اقولها يابنتي هو انتي هتحطيها عليه ليه ؟ تقول لي مش هحطها عليه هو اللي هياخدها

طب هياخدها ازاي ؟ حتى بفرض انك متخيلة انه زي الهاكر انتي صورك ع الجهاز ؟

قالت لي لأ اومال هياخدها ازااااااااااااي ؟؟

قالت لي ف التليفزيون بيقولوا ...........


وبعد اضراب   6 ابريل اتحول من موقع مشبوه لموقع مشبوه من ناحية تانية

الاعلام صور للناس ان اي حد بيدخل ع الفيس بوك هيتقبض عليه

وكل يوم لوك لوك ف موضوع اسراء وكده لدرجة ان بابا حذرني كذا مرة 



ودا كله طبعاً ناتج عن ان اللي بيتكلموا دول مش فاهمين اي حاجة في اي حاجة

ومن هواة التعميم والتهويل


اه الفيس بوك عليه حاجات مش محترمة بس مش اجباري يعني اللي بيدور عليها بيلاقيها
زيه زي النت

اه عليه شات وصحوبية ورغي بس في ناس تانية عارفة تستفيد منه صح

وايوة الشباب بعضهم بيحاول يحور ع البنات بس زيه زي الموبايلات والشات والخ الخ الخ


انا بشوفه قريب اوي من الحياة ، انت لما بتختار اصحابك بتحدد صورة لنفسك

والناس بتحكم عليك من خلال اصحابك

وانت بتصرفاتك بتخلي الناس تحترمك او بتخليها تبص لك بصة مش تمام

ع رأي ام تي ام 

"امشي علي مهلك خد طريقك اسلك وانت تسلك "

أم هند بقى جايبة لكم شوية حركات م الفيس بوك


صفحات وانشطة وشوية حاجات كده يمكن تهمكم


أول حاجة :: صفحة الجنوبي .. حبيبي الأسمراني أمل دنقل


ادخلها من هنا هتلاقي قصائد ليه ومقالات عنه وكل يوم بيت من اشعاره .. حياة دنقلية يعني :)


وتاني حاجة :: صفحة محمود درويش .. الشاعر الفلسطيني الرائع الراحل 


من هنا .. بردو نفس الوضع قصائد ومقالات ودواوين وكله


و معانا كمان صفحة مجلة بحلقة .. مش هتلحق تبربش عنيك ;)


من هنا .. اخر اخبار المجلة ومواضيعها واستفتاءتها وسلاطتها وكله كله :)


وخد في ايدك بقى وانت معدي من الناحية دي صفحة حبة ثقافة التابعة لمجلة بحلقة


والصفحة دي بقى جديدة طازة .. كل يوم نصيحة طبية علشان صحتك تبقى مية مية 

ندخل بقى ع الجروبات ..


دا جروب اطبخي يا جارية اطلب الاسعاف يا سيدي .. ساحة للفاشلين في ميدان المطبخ 


علشان نتبادل خبراتنا الخايبة وماحدش ينكسف من نفسه :)


وفي جروب الكاتب الساخر العظيم محمد عفيفي عليه مجموعة محترمة اوي من كتبه ومناقشات لكتبه ومقالاته وكده


وفي جروب شخلع مدونتك لهواة شخلعة وتشييك وتعديل شكل مدونتهم  .. ياريت اللي عنده خبرة ف الموضوع دا ينضم لنا ويفيدنا 


وجروب أنشودة البساطة الرائع جداً " يحيي حقي " كتبه ومقالاته بردو



والجروب الأهم والأفيد " السرطان لا يعني الموت " محاولة لمحاربة السرطان بالتفاؤل والأمل ومحاولة لمعرفة عدونا علشان ما نخافش منه زيادة عن اللزوم




حاجة أخيرة .. الجروبات دي والصفحات دي انا اللي بديرها .. وطبعاً الوقت ما بيسمحليش ادي كل الحاجات دي حقها


بقصر في حاجات وبشتغل تمام في حاجات ... علشان كده اتمنى ان اللي يلاقي في نفسه القدرة على المشاركة بجدية 


وتحمل مسؤولية صفحة من دول او جروب يبعتلي علشان يكون اوفيسر او ادمين على اللي يقدر عليه


دا طبعاً بعد التأكد من جديته 


وطلبي دا عام لكل حاجة ماعدا صفحة مجلة بحلقة وصفحة حبة ثقافة وصفحة أمل دنقل


الباقي يااااااااااااريت لو حد يقدر يكون مسؤول عنهم يقول لي 

















2009-12-25

ياسلاااااااام لو الدنيا تبقى كده







يا سلااااااااااااام لو الحياة تبقى كده


نجيب من الآخر ..


لما يبدأ المدرس في المدرسة يديك المحاضرة الطويلة العريضة بتاعة


انهم سموها وزارة التربية والتعليم


والتربية قبل التعليم علشان الأدب فضلوه ع العلم و ...... إلخ إلخ



تضغط نو وتخلص 



لما يجي الدكتور في الكلية يسمع سيرة حياته في كل محاضرة

وانجازاته العلمية في المهلبية فتضغط نوووووو وترتاح


لما يقعد جنبك في الميكروباص بني آدم لزج ورغاي



ويقعد يكلمك في مليوووون موضوع ما يهموكش في اي حاجة

وانت نفسك تغمض عينك وتقعد ساكت تروح مديله نووووو ع طول


واحد غتيت عايش في دور سيد العاطفي


ومصر يقنعك ترتبطي بيه و حاولتي مليووووون مرة تفهميه انه ما يدخلش دماغك ببصلة


ومااااااااافيش فايدة تديله بالــ نووو


يااااااااااااااااااه محتاجين بجد الأوبشن دا في الحياة


وياسلاااااااااام بقى لو ضافوا عليه اوبشن البلوك والإيجنور


ياااااااااااااااه .. احلى حاجة في الدنيا



بني آدم بيستفزك بكلامه ، بفشره ، بحواراته .. تعمل له بلوك ..


مهما يتنطط قدامك انت مش شايفه




يااااااااااه متعة بجد


امتى يجي اليوم اللي تبقى الحياة فيه كده






في سؤال بيطرح نفسه بقى دلوقتي  .. لو الحياة فيها اوبشن البلوك والإيجنور


هتستخدمهم مع مييييييييين ؟؟

2009-12-24

ياما نفسي كل شيء ينكشفن ويباااااان








كلنا عارفين ان الفحوصات الطبية قبل الزواج بقت اجبارية منعاً للأمراض الوراثية والمعدية

واكيد طبعاً هي مهمة علشان في ناس ما بتكونش عارفة انها عيانة
وفي ناس بتكون عارفة وبتستعبط 
وبتخبي على الانسان اللي هو المفروض شريك حياتهم << بيدبسوه >> بمعنى أصح !
وطبعاً دا ما يرضيش ربنا .


أي نعم الاختبارات دي في مصر نص كم وما بتكشفش المستخبي ولا بتنيل 
بس المفروض انها تكون صح يعني 


نفسي بقى يعملوا اختبارات نفسية اجبارية قبل الزواج 
منعاً للأمراض الاجتماعية !

يعني يعملوا اختبار للزوجين يشوفوا الاتنين دول قد تحمل المسؤولية ولا لأ  ؟


يعملوا بردو اختبارات علشان يعرفوا عيوب الشخصيات دي ايه ؟!


وكل شيء ينكشفن ويبان 

ومش شرط يسيبوا بعض لما يعرفوا عيوب بعض  ،

بالعكس ممكن اوي يكملوا   بس يبقوا عارفين هم مقبلين على ايه ؟ 

وكل واحد من حقه يعرف شريكه بجد علشان يقدر يحكم بجد هو يقدر يعيش معاه ولا لأ 


لأن كتييييييييير أوي الناس بتكون في وقت الخطوبة حمل ودييييييع وبعد الجواز كله بيبان على حقيقته

وناس كتير بتقول عمري ما كنت اتخيل انه يكون كده او انها تكون كده

ولأن مش كل الناس عندها قوة ملاحظة وبتقدر تاخد بالها من التصرفات العفوية اللي بتبين حقيقة البني آدمين دول ايه قبل الجواز


الفكرة دي لو اتنفذت صح والله بجد هتتغير حاجات كتير

ومتهيألي معدلات الطلاق هتقل ، لأن كل واحد هيبقى عارف اللي فيها من اولها

وكل انسان هيقدر يتعرف على عيوب نفسه هو كمان ولو هو بني آدم بجد كويس هيحاول يصلح من نفسه


وياسلام كمان لو يعملوا كورسات اجبارية في تربية الأطفال تربية سليمة 

ولازم يحضروها علشان يتم عقد الجواز ياااااااااااااااااه الدنيا تبقى فللي 


عارفة اني بحلم بس مين عارف يمكن الحلم دا يتحقق في يوم من الأيام 


2009-12-18

زهقت



زهقت من الانتظار ...



من القلق ...



من الخوف  ...



من الاحساس دايماً ان احلامي وحياتي كلها مهددة


والمشكلة ان كل دا مش ذنبي ومش حاجة عملتها بإيدي


زهقت بجد ، اوقات بتحمل وبعمل نفسي مش هامنني


بعمل نفسي بضحك وبعيش وبنبسط وبنسى 


بس ساعات بيفيض بيا


وأنا دلوقتي  فاض بيا

2009-12-14

سامحوني بالله عليكم





في حملة ع الفيس بوك اسمها اللهم اغفر لكل من اغتابني عجباني اوي الفكرة دي


وفي ناس كتير عملت استيتساتها " أنا اغتبتك من فضلك سامحني " لأي حد ممكن يكونوا جابوا سيرته


احنا كلنا مسحوبين من لساننا أساساً واسهل حاجة عندنا الكلام ..


ع نفس المنوال بقول سامحوني .. ع حاجات كتير  أوي


سامحوني لو وعدت حد اني اعمل حاجة وما عملتش << غالباً بكون نسيت او ما قدرتش أعملها 


سامحوني لو قصرت في السؤال عليكم <<  أنا مقصرة مع كل اصحابي للأسف ودا عيب كبير فيا بس والله بحبكم اوووووي


سامحوني لو كنت رخمة معاكم << لأني  اوقات ببقى في حالة نفسية ربنا اللي عالم بيها ما ببقاش طايقة نفسي ذات نفسها


سامحوني لو قولت كلمة عليكم من وراكم << بقالي اكتر من سنتين واخدة عهد على نفسي اني ما اغتابش حد بس والله غصب عني أحياناً حاجات بتفلت مني :D




سامحوني لو ظنيت بيكم سوء <<أنا باخد وقت كبير عقبال ما اثق فـ الناس ، غصب عني والله


وأخيراً .. سامحوني لو ما كنتش عند ظنكم الكويس بيا << بحاول والله اكون احسن وربنا يعينني 




طبعاً الكلام موجه لكل اصحابي ، وكل الناس اللي اتعاملت معاها حتى لو تعامل بسيط


انا حبيت ابرأ ذمتي لأن ماحدش عارف العمر باقي منه قد ايه

2009-12-13

انا قررت اذاكر




ايون .. انا  - بكامل قواي العقلية - قررت أذاكر


كفاية بقى لعب وتضييع وقت لحد كده .. 


كل سنة كده اضيع وقتي واجي وقت الامتحانات اتلخم


لأ انا قررت اتغير

انا بس هقرا زغازيغ بتاع د / احمد خالد علشان نفسي تتفتح ع المذاكرة واذاكر بعدها بقى 


ايون


قريت زغازيغ وكل ما اقرا حبة واحس بالساقعة اسحب اللحاف اكتر وانزل تحتيه اكتر


ونزلت نزلت نزلت  لحد .........


zzzzzzzzzzzzzzzz

- سارة انتي نمتي


ها ؟ اه


 - سارة انتي مش هتسهري تذاكر


هه ؟ مش قـ ـ ـ ـ ادرة  .. بكرة بكرة


تاني يوووووووووم


خلصت زغازيغ الحمد لله 


اذاكر بقى


امممممم يوتوبيا شكلها مغري ، كل الناس بتحبها وانا بكرهها ياترى ليه ؟


اقراها كده واكملها يمكن كرهتها علشان قريتها ع الكمبيوتر


بعدين لازم اخلصهم علشان ارجعهم لــ الوكيل ، عيب كده لما أأخرهم


صح


اقري يوتوبيا 


بس المرة دي بقى هشرب شاي علشان اصحصح كده وما انامش زي امبارح


شربت الشاي


الله الدفا حلو اوووووي 


الله اللحاف والبطانية دول نعمة من ربنا والله


 - سارة اوعي تنامي


* انااااااام ؟؟ هع يابنتي انا شربت شاي

اسكتي بقى علشان اركز ف يوتوبيا


-------


لحظات من الصمت ثم 


zzzzzzzzzzzzzzz

سااااااااااااااارة انتي نمتي تاني ؟


- هه ؟ لأ خالص انا صاحية اهو


zzzzzzzzzzzzz



سااااارة يابنتي قومي ذاكري


- بصـ ـ ـ ـي انــ ـا هـ ـقـ ـولك هعمل ايه .. انا هصحى بكرة بدري


بدري .. بدري اوي اوي 


واخد دش واعمل نسكافيه علشان افوق


واقعد اذاكر بقى


- بس انتي بتقعدي نت بالنهار ما بتذاكريش


* لالالالالالالالا ، هذاكر مافيش وقت اساساً


- طيب




*****


صحيت النهاردة ، وكالعادة فتحت الجهاز قبل ما افتح عيني ، وصحيح اخدت دش وشربت نسكافيه بس وانا مبحلقة قدام الجهاز


ورغم ان الفيس رخم جداً اليومين دول ، ورغم اني  مش لاقيه حاجة اعملها إلا إني لسة قاعدة لحد دلوقتي


عاااااااااااااااااااااااااااااااااااااااا نفسي اذاكر والله


عندي امتحان يوم التلات ويوم الأربع وكل ما اجي افتح الكتاب انااااااااااام




2009-12-06

الحزن نَشِن ما جتش فيا


إمبارح ع بالليل كنت فرحانة :) وصبحت متفاءلة


وبقالي كام يوم مستبشرة وراضية عن حالي ونفسي 


صباحكم تفاؤل ورضا

:)

اسمعوا دي بقى .. وإدعولي ربنا يديم عليا روقان البال والرضا بالحال :)





إدَن ياديك كمان شوية

الضلمة ليك و الفجر ليا

والدمعة راحت و الضحكة جاية

والحزن نَشِن ما جتش فيا


إدَن ياديك إدَن ولالي

الشمس بكرة تسكن قُبالي

وتمد إيدها تلقاني عالي

وتقول يا غالي

من يوم سكوتك غيرت حالي

وجيه عزيز :)

2009-12-05

ساعات بحس ...





ساعات بحس إن بكرة هيبقى حلو أووووووي


وساعات بحس اني عمري ماهفرح الفرحة اللي بتمناها :(


ساعات بحس إني محظوظة أوي في حياتي 


وساعات بحس إني مش عايشة أصلاً


ساعات بحس إني خايفة أوي من الناس 


وساعات بحس إني نفسي اترمي في حضنهم واتدفي بيهم


ساعات بخاف مني أوي ، وساعات بخاف عليا 


ساعات بكون كلي أمل وتفاؤل ومرح ومافيش قوة في الدنيا تقدر تهزمني


وساعات بحس إني أضعف من إني افتح عيني ، وإني حتى لو قادرة افتحهم مش عايزة


وكتيييييييييييييير بحس إني شيلت هموم كتيرة بدري


بحس اني بجري ورا سراب وإن كل تعبي دا ولا يسوى حاجة


كتير بحس إني عمري ما هنجح في شغلي ، ولا هقدر أفيد الدنيا بحاجة


ولا هقدر  أسيب بصمة في الدنيا


وكتير بحس إني عمري ما هبقى زوجة ولا أم ، عمري ما هبقى عروسة 


زي ما عمري حسيت اني طفلة و عمري ماحسيت اني شابة


أنا عارفة إني أنا اللي بشيل نفسي الهم


وعارفة إن دماغي دي مودياني في داهية


وإن أخرتي هتكون يا إما سكتة قلبية يا إما جلطة فـ المخ يا إما حادثة تحصل لي  من كتر استعجالي


بس هي دي دماغي ماينفعش أغيرها .. أو بمعنى أصح فات الأوان على تغييرها


لأني ما اتعودتش اقعد ساكتة واقول 


" اللي يحصل يحصل بقى "

2009-12-04

حبيبي الأسمراني .. 2 ..

" إنت الوحيد منهم .. تقدر تريحنا "


أسمراني دماااااااااغ .. طيبة وأصالة وعبقرية 


أول ما معنوياتي تنزل الأرض .. ببقى عارفة ومتأكدة انه هو اللي هيظبطها


احساسه أعلى من برج القاهرة :) .. حدوتة مصرية بجد 


ما بيقولش أي كلام .. لأ بيقول كلام موزون ويتاقل بالدهب


يعلمك الحب والحلم والجنون والطموح 


بصراحة كده .. لا يُعلى عليه


و " ع الأصل دور :) "





2009-12-02

حبيبي الأسمراني .. 1 ..

 اسمراني وسيم وزي القمر ..  طول وعرض وخفة دم

شهم وطيب وجدع أوي ،   والضحكة مش بتفارق عينيه ولا وشه


مافيش حد عرفه وما حبهوش ... ومافيش حد  عرفه زعل منه


وجوده في أي مكان ليه طعم تاني .. وجوده يعني ضحك وفرفشة ومافيش هم


بيحب الدنيا أوووووووووي وبيحب يعيش حياته صح


ويحافظ على صحته وعلى شياكته 


هو نور عيون أمه وفرحة قلبها


وسند اخواته وضهرهم


من بعد ما الموت خطفه ماعرفش البيت طعم الفرحة اللي بجد


و راحت فرحة الشارع كله مش بيتهم بس


.........


وحشتني اوي رغم اني عمري ما شوفتك


واخدت من طباعك وملامحك من كتر حب أمي ليك


كان نفسي أشوفك ولو مرة واحدة من كتر كلامها عنك


لما بقلب في جواباتك واشوف خط ايدك اللي كان هو نفسه بيضحك 


بحس اني فاتني كتيييييييييير أوي علشان ماعرفتكش


بحبك أوي ياخالو



ربنا يرحمك


2009-11-29

احميهم بكلامك !! إيه الحلاوة دي ؟




احميهم بكلامك !! إيه الحلاوة دي ؟

لما شوفت الاعلان دا حسيت ان فعلاً هو دا اللي بيحصل وهو دا اللي احنا عايزينه

مش عايزين نتكلف حاجة .. لا مجهود ولا وقت ولا فلوس ولا أي حاجة

احنا كل اللي علينا نتكلم والدنيا بقى تبقى تتظبط

عايزين الدنيا تمشي بحاجتين .. الكلام والنيات

ليه احمي ولادي بإني اعمل  خطوات الوقاية السليمة  مدام ممكن احميهم بالرغي ؟؟

ليه اتعب واشتغل علشان احقق كل احلامي مدام ممكن استنى قدام الزيرو تسعمية واعمل كل الحاجات دي ؟؟

ليه اكون ايجابي واكون مسلم على حق وارفع من شأن المسلمين


وبكدة ابقى بدافع عن الاسلام وعن الرسول الكريم


مدام ممكن انزل كول تون لأغنية ربنا يا ربنا واكون بكده ساعدت على نصرة النبي زي ما الاعلان بيقول ؟؟

وليه افكر في الطرق اللي احافظ بيها على جوزي واملى عينه وعقله وقلبه


مدام ممكن اشتري كاميه وهو هيترزع جنبي على الكنبة وما يسبنيش خالص ؟؟

ايييييييييه دا ؟؟ ايه اللي احنا فيه دا ؟

ايه السلبية والتواكل دول ؟؟


ليه عايزين كل حاجة تيجي بالطريق السهل اللي من غير تعب ؟

ليه عايزين كل حاجة في الدنيا تتقدم لنا على طبق من دهب

هتقولوا لي دي اعلانات وشغل دعاية .. لأ دي الحقيقة

هم عارفين اننا بنحب الرحرحة علشان كده بيشتغلوا على النقطة دي في كل اعلاناتهم

هم عارفين اننا عايزين بس البرستيج والمنظر فبيقدموا لنا كل اللي يساعد على اننا " نظهر " ايجابين ومتعاطفين و و و



كل حاجة عندنا في مصر بقت بالكلام ..

المسؤولين بيحسوا انهم عملوا اللي عليهم لما يتكلموا ويقولوا انهم قالوا لفلان وفلان يشتغلوا

والبني آدم مننا بيبقى راضي عن نفسه طول ماهو بيقول كلام صح

او بمعنى أدق الكلام اللي الناس عايزة تسمعه

بيقينا بنقول  " إننا عارفين ربنا " وبنقول " اننا ما بنحبش الظلم " وبنقول " اننا احسن شعب في الدنيا "

وبنقول ونقول ونقول .. وما بنعملش أي حاجة


2009-11-27

عيد ؟ امممممم انا سمعت الكلمة دي فين قبل كده ؟!

ااااااااااااااااه صحيح دا النهاردة عييييييييييييييد


مش عارفة ليه عمري ما حسيت ان عيد الأضحى عيد ؟


يمكن لأننا غالباً مش بنسافر فيه ويمكن لأنه بيجي قريب من عيد الفطر فبنكون لسة ما اشتقناش للعيد


عامة .. انا حاسة اني في اجازة مش  في عيد


حتى كمان ما لحقتش صلاة العيد ولا سمعت التكبيرات فشكيت ان العيد لسة ماجاش :(


ماعلينااااااااااااااااااااا


كل سنة وانتم طيبين يارب


ويارب يكون العيد دا فرصة لبداية صفحة جديدة لكل حد متضايق من اسلوب حياته


ويارب تشوفوا احبابكم وما تنحرموا من اللمة والهيصة بتاعة العيلة أبداً





2009-11-21

لأ




لأ ..  حياتي مش ملك إيدك ، ومش من حقك تخططهالي .. حياتي دي بتاعتي أنا 

ربنا إدهاني أنا وهيحاسبني أنا عليها ..

لأ .. انت ماتعرفش مصلحتي اكتر مني ، لأني عارفة نفسي أكتر من أي حد

لأ .. مش هسكت بعد كده على حقي ، ماحدش مستاهل أتنازل علشانه عن سعادتي والحاجة اللي تبسطني 

لأ .. مش هخاف من مواجهتك .. سكتت سنين وبردو مافيش حاجة بتتغير واعتبرت سكوتي حق مكتسب

لأ .. مش همشي جنب الحيط لأني هبقى أول واحدة تموت لما الحيطة تقع

لأ .. مافيش حاجة اسمها مستحيل ، لو عايزة حاجة بجد هقدر أعملها ..  ولو فشلت مرة واتنين وتلاتة أكيد في يوم هنجح

لأ .. مافيش حاجة اسمها مافيش أمل .. طول ما ربنا موجود يبقى في أمل

لأ .. دا مش اسمه رضا بالنصيب .. دا اسمه استسلام وضعف وجبن

لأ .. أنا مش بنفخ في قربة مخرومة ، حتى لو نتيجة شغلي مش ملموسة كفاية اني حاسة اني بعمل حاجة .. والثواب عند ربنا مش هيروح 

لأ .. كله مش محصل بعضه ربنا سبحانه وتعالى قال

بسم الله الرحمن الرحيم

‏﴿ قُلْ هَلْ يَسْتَوِي الَّذِينَ يَعْلَمُونَ وَالَّذِينَ لا يَعْلَمُونَ ﴾ ‏[‏الزمر‏:‏9‏]‏‏ 

صدق الله العظيم

لأ .. أنا مش هعمل حاجة طول ما انا مش مقتنعة بيها .. وطظ في أي حد عايزني أرضيه على حساب نفسي 

لأ .. مش هسمع أي كلام وحش عن أي حد ، لأني ما احبش اكره حد وما احبش اني اسمع كلام زيه عني

لأ .. مش عايزة أقرب من حد ، انا كده مرتاحة وحياتي فيها ناس عندي بالدنيا بحالها

لأ .. مش هتغير علشان انت عايزني اتغير .. أنا هتغير لو حسيت إني محتاجة أتغير 

لأ .. مش هنافقك علشان احسسك اني بحبك .. أنا هقولك الحقيقة لأني بحبك

لأ .. مش هخبي واداري وجهة نظري أو رأيي في أي حاجة لأن " كل الناس " رأيها غير كده 

لأ .. مش معنى ان كل الناس مقتنعة بحاجة تبقى الحاجة دي صح ، 

على أيام سيدنا ابراهيم كان كل الناس مقتنعة إن الاصنام هي آلهتهم ماعدا سيدنا إبراهيم .. 

وكانوا كلهم غلط وهو لوحده اللي صح 

لأ .. مش هسمح لأي حد إنه يعاملني بطريقة ما تناسبنيش .. اللي عايز يدخل عالمي لازم يلتزم بقوانينه 

لأ .. مش هنفذ أوامرك من غير تفكير ، لأن الحيوانات  الأسيرة بس هي اللي بتعمل كده .. وأنا ربنا خلق لي عقل علشان افكر بيه



هتشتري الكتاب .. تبقى حبيبي وكفاءة



أغلب الدكاترة في الكلية بنشتري كتابها علشان ورقة البحث وترمي الكتاب لأنه ما ينفعش ببصلة


وفي دكاترة - نادرة - بتستفيد من كتابها حتى بعد ما السنة تخلص


المهم ان كلنا عارفين اننا بنشتري الكتاب علشان البحث .. وبنعمل البحث علشان الدكتور يتأكد اننا اشترينا الكتاب


عارفين .. وساكتين .. وراضيين


والموضوع ماشي من تحت لتحت فلة جداً


لكن بقى التهديد يبقى عيني عينك كده ؟!!
حاجة مستفزة أوووووووووووي


الدكتور وهو بيشرح - او بيعمل ما يسميه شرح يعني - بيدينا مثال على الخبر


وعلى الخبر المفسر والمجرد


يقولك الخبر المجرد لما نقول



" د / عبد السلام سقط دفعة صحافة طنطا كلها "


أما الخبر المفسر بقى لما يقول :



" د / عبد السلام سقط دفعة صحافة طنطا كلها علشان ما اشتروش الكتاب !!! "


حاجة قمة في الـــــ ........
مش عارفة الاقي وصف مهذب بصراحة




يعني احنا متحملين انه بيخلينا نطلع من بيتنا الساعة 6.5 الصبح علشان نلحق محاضرته


متحملين انه بياخد غياب والمحاضرة مالهاش أي لازمة


بنروح المحاضرة علشان يقعد يحكي لنا قصة حياته


بيحكي لنا كل محاضرة قصة كفاحه واتخرج امتى واخد الدكتوراه امتى


وبيحكي لنا على بيته الــلي - عقبال عندكم 3 ادوار - وانه لازم يصحى بدري علشان يرش السقف


وبعدين يدي العمال المفتاح ويجيب الطي اللي ناقص و .......... إلخ الخ كل محاضرة كده


كأن المادة اسمها " محاضرات في السيرة الذاتية لدكتور عبد السلام " مش محاضرة تحرير صحفي


كل دا مستحملينه ومكتومين .. كمان يجي يقول اللي مش هيشتري الكتاب هيسقط ؟؟


ويقول لنا بصريح العبارة كده


" ادفعوا ادفعوا فلوس الكتب اشمعنى بتدفعوا فلوس في الشيبسي والحاجة الساقعة "


وانت مااااااااااااااااااااااااااااااااااالك ؟؟؟

انت مالك يا اخي


محسسني  اننا في ابتدائي



بندفع فلوسنا في الشيبسي والحاجة الساقعة




وختمها بقى بإيه ..


مسك كشف الاسامي ونادى اسم اسم .. واللي حجز الكتاب .. يبقى " موفق يا بني .. ناجح ان شاء الله " واللي ما حجزش


ما حجزتش ليه ؟؟


ويوقفه يستجوبه


طب انت ايش عرفك ما يمكن ظروفه ما تسمحش يا أخي انت مالك ؟؟ مالوش دعوة


وفي الآخر .. الكتاب ولا ليه أي لازمة


نص الصفحة كلام ممسوح وخط صغير


ولا بتفهم منه اي حاجة في اي حاجة


انا قولتها حكمة من زمااااااااااااان


" الدكتور اللي ياخد غياب في محاضرته يبقى واثق ان كلامه مالوش أي لازمة وإن الطلبة اكتشفوا ان كلامه مالوش أي لازمة "






2009-11-12

عايش صح ولا عايش الدور ؟




في ناس كتير بتحاول تعيش صح .. بتحاول تعيش حياة ايجابية وبتحاول تتجنب الأخطاء اللي شايفاها في المجتمع


فيكون رد الناس عليهم - بدل التشجيع - هو .. ايه ياعم دا البني آدم دا عايش في الدور أوي .. دا خنيق


احياناً بتتقال من وراهم ، واحياناً بتتقال في وشهم


رغم انه هو بيعمل الصح ..


يعني مثلاً ما يرضاش يرمي حاجة في الشارع ولو حد من اصحابه حاول يرمي بيقول له ما ينفعش ترمي حاجة في الشارع


وكده ما يصحش واحتفظ باللي عايز ترميه لحد ما تروح البيت او تروح مكان فيه باسكت وارمي فيه اللي انت عايزه


أو مثلاً لما حد يدخن في الميكروباص يقول له بعد اذنك ما تدخنش في مكان مقفول وضيق كده علشان ما تضرناش


أو مثلاً يكون بيحب القراءة ولما يكون في مواصلات مثلاً يقرأ حاجة بدل ما هو بيضيع وقت


وغيرها وغيرها من المواقف ..


دا بيكون انسان فعلاً حابب يكون ايجابي ، ومش بيخاف من الناس ومن رد فعلهم على تصرفه اللي هو صحيح لكن للأسف عكس الشائع في المجتمع


فبالتالي بيكون تصرفه غريب وأحياناً مثار سخرية من الناس ..


في ناس قوية وبتتحمل نظرات وتعليقات الناس لحد ما الناس تقتنع أو تتعود على سلوكهم دا أو تزهأ من التريأة فتسكت عنهم


وفي ناس ما بتبقاش بالقوة دي وبتضعف وتستلم وتقول " يعني هي جات عليا أنا " " هو انا يعني اللي هصلح الكون " ودا غالباً بيكون انسان مش واثق في نفسه أوي


أو انسان مش مقتنع أوي باللي هو بيعمله


وكمان في ناس بقى عايشة الدور فعلاً .. يعني بتحب تعيش دور الايجابي ، والانسان الصح .. وبيعمل كل الحاجات اللي اتكلمنا عنها فوق دي من باب حب الظهور وبس


مش عن اقتناع بإن دا الصح أو بأهمية انهم يكونوا ايجابيين


ازاي بقى تعرف البني آدم العايش في الدور ؟؟


تعرفه لما تشوف تصرفاته في مكان ماحدش يعرفه فيه .. هتلاقيه عادي بيرمي أي حاجة على الأرض وهتلاقيه بيسكت عادي على السجاير ومش بعيد يكون هو نفسه بيدخن


وتلاقيه ما يفتحش كتاب ويقعد يقرا الا لما يلاحظ ان في حد واخد باله منه ...


الانسان العايش في الدور مش بيعيش بجد لأ دا بيمثل انه عايش


ياترى بقى انت مين ؟؟


انت عايش صح ؟ ولا عايش الدور ؟؟ ولا عايش وخلاص ؟؟


صحيح هي كلها عيشة .. بس الفرق كبير



- نُشر في مجلة شخبطة بتاريخ 5 نوفمبر 2005 -