2009-01-05

آخر كلمتين علشان ضغطي علي

وانا بدعبس النهاردة في جروبات الفيس بوك
شوفت جروب اسمه " الحلول العملية لإسقاط نظام مبارك " بصراحة دمي اتحرق
مش لأنه من بقية أهلي مثلاً ولا حباً فيه
لكن من جهل الناس واستهبالها
آه نظام مبارك مورينا الويل
أه الفقر في زيادة والأحوال في النازل
لكن بصراحة مش الحكومة لوحدها اللي مسئولة عن كده
احنا كشعب بردو فينا العبر
ما بقاش عندنا ريحة الضمير ولا الذمة
وأغلب الموظفين بياخدوا رشوة وبيرحوا الشغل يحلوا كلمات متقاطعة
الشعب هو اللي بيذل في الشعب بردو على شبابيك المصالح الحكومية
الشعب بردو هو اللي بيخرب في المرافق العامة وبيبهدل الحاجات اللي هو احوج ليها من أي حد تاني
وبكرر لتاني مرة أنا مش ببرأ الحكومة لكن بردو احنا كشعب مسئولين
نيجي بقى لنقطة اسقاط نظام مبارك
انتوا فاكرين المشكلة هتتحل لما نظام مبارك يسقط ؟؟
طب بالذمة كده قولولي في ايه نظام سياسي عدل في مصر قادر يمسك البلد وينهض بيها ؟؟
الاخوان اللي عملوا صفقة بجزء منهم علشان يخففوا الحمل ؟؟
الاخوان اللي استغلوا الدين علشان يوصلوا بيه للسلطة وهم ما بينفذوا منه سطر ويسيبوا سطر ؟؟
ولا حزب الغد اللي كان على راسه واحد مزور ؟؟
ولابتوع الشرطة اللي ممرمطين الشعب ومسففينه التراب ؟؟
مين والنبي قولولي كده ؟!!
طبعاً كل دول وغيرهم وغيرهم هيقعوا في بعض وهوب يا تقطيع علشان ياخدوا الحكم
واللي هياخد الحكم فيهم هيقعدوا الباقيين يحاربوه ويطلعوا فيه القطط الفاطسة
وطبعاً علشان يريح دماغه هيرمي في المعتقلات وهيبقى نسخة تانية من نظام مبارك
يبقى ايه الفرق ؟!!
يا جماعة بجد والله احنا محتاجين نتصلح من جوانا
محتاجين نبقى شعب محترم علشان نستحق حاكم محترم
" كل شعب يستحق حاكمه "
عايزين حاكم زي سيدنا عمر بن عبد العزيز نبقى زي شعبه
عايزين نعيش زي ما ايام الخلفاء الراشدين كانوا حاكمين ، يبقى نبقى كويسين زي الناس ايامهم
نتفق بجد كلنا ع اللي فيه الخير لبلدنا والا هنبقى زي العراق كده وفلسطين
وهندي فرصة للاجانب يتدخلوا في امورنا علشان ما عندناش حقوق انسان
وكلام فاضي من دا ومش بعيد كمان حد من اللي بيتخانقوا ع السلطة هم اللي يدخلوهم
ونرجع بقى لعصر المماليك والعثمانين
يا جماعة والنبي فوقوا وصحصحوا
انا عارفة ان الكلام دا هيزعل مني ناس كتير جداً
وعارفة اني ممكن الصبح الاقي حبة بيقولوا عليا كافرة وحبة بيقولوا عليا حزب وطني
وحبة بيقولوا عليا متخلفة ومش فاهمة حاجة بس مش مهم
وعارفة اني ممكن اصحى الصبح الاقي مدونتي متهكر عليها بس بردو مش مهم
آخر حاجة بقى
بجد انا تايهة ومش عارفة اصدق مين واكدب مين في موضوع غزة
انا مقتنعة انه ما ينفعش نسيب المعبر كده سداح مداح ومقتنعة ان ما ينفعش نسيب ناس بريئة مالهاش ذنب تموت
بس بردو متغاظة من الاتهامات اللي عمالة توجه لمصر و بأكد ان في مواطنين فلسطينين طلعوا
في التليفزيون وقالوا المصريين خونة ومش عايزين منهم حاجة ، ماقالوش النظام بس زي ما الناس بتقولي دا بيقولوا النظام
طبعاً حاجة تحرق الدم ورغم كده بردو بنستقبلهم في مستشفياتنا وبنتبرع ومقدرين انهم في ضغوط
فلحد ما افهم وادعبس كده واحاول اعرف الحقيقة مش هتكلم في الموضوع دا
لأني ما احبش اتكلم عن جهالة وعلشان كده اجلت ردودي على بوست غزة
تحديث مهم
بخصوص موضوع غزة ، كده الكلام اللي فوق مابقاش اخر حاجة بس ماعلينا
في ناس قالت ان ليفني لما جات القاهرة اخدت الاوكي علشان
تضرب في غزة
طب سؤال يعني هم لما هيخونوا هيكونوا بالغباء دا
يعني جات النهاردة يا حسحس انا هضرب
اضربي يا ليفني
تقوم بكرة تضرب ؟!!
اكيد لو في بينهم اتفاق هيستنوا شوية علشان ما يتفقسش
ماحدش ليه فكر ان دا مخطط صهيوني علشان الكل يقلب على مصر
هم مقررين يضربوا
تقوم تيجي مصر علشان يتقال على مصر عميلة
يقوموا العرب يسيبوا غزة ويتلهوا في مصر الخاينة العميلة
ماعرفش دا صح ولا غلط بس دا مجرد احتمال خطر في بالي
تحديث كمان
بخصوص السلفيين ، أنا بعتذر لأني غلطت وشلت الجزء الخاص بيهم

هناك 9 تعليقات:

  1. وأغلب الموظفين بياخدوا رشوة وبيرحوا الشغل يحلوا كلمات متقاطعة...

    واضح انك بقالك كتير مشزورتيش مصالح حكوميه..دلوقتي بقا فيه حاجه اسمهاseduco

    anyhow, ur post may be true, however the change idea may be helpful

    و مااظنش ان الفساد هيبقي اكتر من اللي احنا شايفينه ..لان اللي احنا فيه دا البييك ..ونايس اني واي

    ردحذف
  2. لابد ان نقيم عليكي الحد ايتها العميله المزدوجه يا جاسوسه يا مش عارفه ايه و ايه و ايه

    ايه الجمال ده بقي انتي لاسعه لاااا حاشا و ماشااا ده انتي اعقل من ناس كتير اوي ماسين اقلام و ينطبق عليهم المثل الشهير هبله و مسكوها طبله

    انا مش ضد مبارك بس مش عاشقه نظرة عنيه

    هو راجل ليه عيوبه و مميزاته و المعارضه العن و اضل منه

    و بدل الفيس بوك ليه مايكونش في تحرك ايجابي ولا لازم نستخبي ورا شاشه

    و فعلا كل شعب يستحق حكامه

    و معاكي كمان في موضوع غزه الي حصل عيب اوي ان العرب يسيبوا المشكه الرئيسيه و يمسكوا في مصر و يشتموها ده مش لاقياله اسم مناسب

    بوست جميل اوي اوي

    ردحذف
  3. السلام عليكم

    اول مره أعلق عندك او ادخل مدونتك

    لا أنكر انك طريقه السرد جذبتنى أكمل ولكن ليس لاتفاقى معاكى فى كل حاجه

    اولا عندك حق فى الفساد الموجود فى بعض عناصر الشعب

    موجود عارفه ليه لان كل واحد حلل لنفسه اللى بيعمله كل واحد شايف نفسه صح وكل الناس غلط

    او موضوع أسقاط مبارك

    ان شاء الله هو هيسقط لوحده

    لو عملنا حاجه واحده بعوده قويه لربنا نصلح حالنا وحال بلدنا بجد بنهضه وتنميه بالأيمان


    نجيى ع الاختلاف

    مين قالك ان الاخوان عملوا صفقه وضحوا بنصهم

    والله لم نترك اخواننا واباءنا واعمامنا المعتقلين ابدا يوما

    شئ لو كنت متابعه قضيه المحاكم لو كنتى تقصدييها مكنتش قولتى كده

    جماعه الأخوان اسمى وأجل وارفع انها تترك رجالها وخيره شبابها عشان نخفف الحمل زى ماقولتى


    وصدقينى لوكان هدفنا كأخوان مسلمين حكم كنا اتنازلنا عن حاجات كتير اوى وماكنش مؤسس الجماعه اغتيل ومكنتش الاعتقالات تدق ابوابنا كل يوم

    حبيبتى صدقينى افتحى قلبك وتعاملى مع افراد الجماعه كأفراد بشر يعنى يصيب ويخطأ

    عشان موضوع بيأخدوا من الدين سطر ويسيبوا سطر
    الله ظلمتينا بهذا مش كون يأخذ بعضنا بأراء موجوده لعلماء وعشان مختلف فيه مع اخرين نبقى بنسيب سطر وناخد سطر
    لم تتعاملى مع الملايين اللى بينتموا للأخوان حتى تحكمي
    ولكن تعاملى مع منهج الجماعه بقى بعين واعيه
    وهو القرآن والسنه والله لم ناتى بالجديد
    ام حزب الغد

    فالراجل مسجون ويعامل معامله غير انسانيه

    قد اختلف معاه تماما فكريا ولكن أتضامن معه

    لان كما يقولون قضيه ملفقه

    ام السلفيين فهم علمائنا واجلاء وأفاضل وليس كل السلفيين يرجعوا لورا قرون

    والدليل علماء أفاضل كلنا بنحبهم وبنسمعهم

    الحكم والسلطه ياحبيبتى يوما سيتولاه من يصلح كان اخوان كان غيرهم سيولى الله من يصلح

    اما غزهفغلق المعبر بالطريقه هذه ليس شرعيا دوليا مينفعش نقفل معبرنا امام جرحى

    الفلسطينين مقدرين ان الحكومه المصريه وحكومات اخرى هى اللى متخاذله

    هما بيحسبنوا على حكام العرب وحقهم

    عشان رائحه الخيانه زادت

    موضوع ليفنى

    ماتستبعديش حاجه الأيام دى

    ممكن جدااااااا مصر كحكومه تكون عارفه عادى يعنى بس مكنتش بتاخد طبعا الأذن

    وتكفى صور ابو الغيط معاها قمه الخزى والعار

    ولغزه الله

    وطبعا جهود كل انسان وكل مسلم كل عربى

    مازال فى عروقه قطره دماء

    وبس عذرا على الاطاله

    ردحذف
  4. عاوزه تلخصى الحكومه فى كلمتين
    هى حكومه سابت الاساسيات ومسكت فى الفرعيات فده بوظ ده وبالتالى الشعب بقى عدوانى يعنى عندك اساس مخوخ هيطلع باقى البيت بايظ ومايل

    ردحذف
  5. موش متفق معاكي يا سمو الاميره

    بالنسبه لحسني .. يتحرق . يولع . يتشنف يجراله اي حاجه

    بلاش دي

    طب نسيب الناس تتطحن و احنا زي البطيخ كدا

    لا بنهش ولا بننش

    اللهي يرزقه بدبور أحمر يخرم صرور صبغه شعره

    ردحذف
  6. اولا
    مينفعش نبقى زي شعب عمر ابن الخطاب لان مش هانعرف نجمع كم وسبعين مليون على حاجة واحدة زي ما كان زمان
    دلوقتي بقى فيه اخوان على شيعة على مش عارف ايه على وهابيين ده غير طبعا
    العلمانيين على الشيوعيين على الى ما لانهاية
    ولو قدرنا نجمعهم على دين صح ومعتقدات صح يبقى نستاهل فعلا ريس بجد

    بلاش سياسة علشان مبحبهاش

    ثانيا بقى
    لو انا بقول ايه لو
    احنا الغلطانين في موضوع غزة ده
    ده لو يعني محدش يعرف فين الحقيقة
    ليه يتهمونا بالخيانة
    نسوا احنا عملنا ايه علشان غزة السنة اللي فاتت
    نسوا احنا مين وعملنا للعرب دول ايه

    وعلى ماي ظهر المستخبي أحب أقول
    بس خلاص




    وبوست جامد يا سارة بجد

    ردحذف
  7. كنت حأكتب لك كلام كتير بس لقيت عاشقة الاقصى قالت بعض اللي كنت حأقوله

    عموماً لو انتي محتارة بخصوص غزة و المعبر اقري الموضوعين دول عندي و اعتقد بشدة انك حتفهمي حجات كتير و حيرتك حتروح

    http://egyptioneng.blogspot.com/2009/01/blog-post.html

    و

    http://egyptioneng.blogspot.com/2009/01/blog-post_07.html

    و اي سؤال منك بعد ما تقري الموضوعين دول انا مستعد ارد عليه

    ردحذف
  8. السلام عليكم ورحمه الله وبركاته

    لاسعه لاسعه لاسعه

    إيه يابنتى إنتى مش عاجبك حد خالص

    لا أخوان ولا سلف ولا أيمن نور

    بصى أنا معاكى إن الناس خلاص بقت وحشه

    وإن الفساد إنتشر وتوغل فى الناس

    مش حسنى وبس

    لكن برضه لو الحكومه كلها

    من جذورها

    أتقلعت

    فيمكن يقل الفساد تدريجيا

    لو ظهر لنا حاكم

    زى عمر ابن عبد العزيز

    دا مش هيقل بس دا هيختفى الفساد

    جميل قوى إنك تقرى كتير

    عن الأخوان وعن السلف وعن كل شئ

    _______________


    من خلال دعباستى بقى ياستى

    هدف الأخوان مش السلطه خالص

    هدفهم أسمى من كده ياسااااروره بكتير

    أقرى عنهم وإنتى هتحبيهم

    وإن شاء الله بكره أحلى ياقمر طول ما

    فيه بنات زيك بتقرى وبتدعبس دعابيس

    وألف سلامه عليكى من الضغط

    سلاااااام

    ردحذف
  9. عارفة ده اجمل تحليل عفوى لما يجرى الان على الساحة .. كلامك برئ لكن مش ساذج انت بتقدرى توصلى للسان حال وفكر وتساؤل المواطن المصرى.. فكل ما فكرت به بصوت عالى هو ما نفكر فيه جميعا ..
    وكل ما يدور بخلدك لما يحدث بداخل المصالح الحكومية وضمائر موظفيها لااستطيع ان اجزم ان كان نتيجة مباشرة لسلبيه المجتمع ام هو نوع من اليأس وقلة الحيلة ...
    كلامك بسيط وعميق فى نفس الوقت
    تحياتى

    ردحذف

Say something...