لعلمك

لعلمك

إقرأ لي

دخلوا بكليك شمال :D

Blog Archive

الأحد، يناير 11، 2009

postheadericon نصايح من واقع خبرتي اللي مش متواضعة خالص في الامتحانات

أحب أقولكم اني بحسبة بسيطة كده اكتشفت اني بقالي 13 سنة بتعلم
يعني اللي قدامكم دي اتهرت امتحانات ، لما خلاااااااااص قربت أخد الايزو في الامتحانات
تخيلوا كده .. 13 سنة بتعلم بواقع امتحانين كل سنة ما عادا الثانوية العامة .. يعني 25 موسم امتحانات دا غير امتحانات الشهر
دا غير ان الثانوية العامة المفروض تتحسب بـ 10 لوحدها
المهم علشان ما تقولوش عني - لا سمح الله يعني - رغاية ولا حاجة
هدخل في النصايح على طول
وأنا هطلع أصيلة معاكم على الاخر وأقول كل اللي عندي
مش هشتغل بقى بنظام استنوني البوست الجاي والحوارات دي ، ولا هقولكم خد فكرة وعلق بكرة هههههههه

نصيحة نمبر وان .. من واقع خبرتي في الشهادة الابتدائية

حاول تحفظ جدول الضرب بالذوق ، وما تعتمدتش على الكشاكيل اللي عليها جدول الضرب من ورا لأنك بكده هتحتاس في الامتحان

(( ممكن تعتمد على المساطر اللي عليها جدول الضرب دي جاااااامدة أوي ، وكمان العيال كانوا بيقسموها نصين ويحطوا ورق يغشوا منه في النص هههههه ))

نصيحة نمبر تو .. بردو ابتدائي .. حاول في أول اسبوعين في الترم التاني تقف في الطابور .. معلش يا بنى تعالى على نفسك

بدل ما يندهوا عليك علشان يكرموك لأنك طالع الأول على المدرسة ويكتشفوا انك مزوغ من الطابور وشكلك يبقى وحششششششششش زي واحدة صاحبتنا :D

نصيحة نمبر ثري .. إعدادي بقى .. لما يكون اللي جنبك في اللجنة غبي اوعى تحاول تغششه لأنه هيوديك في داهية
ويستحسن تقطع علاقتك بيه فورااااااا


نمبر فور .. ثانوي .. ما احنا كبرنا بقى .. إووووووووعى تذاكر التاريخ وانت قاعد على المرجيحة .. لأن دا ممكن يخليك تجيب 34.5 من 50 :((

نمبر فايف : لسة ثانوي .. وبردو لسة تاريخ .. ف امتحان التاريخ لما تكون محتاس وخايف وقلقان ومتوتر لدرجة انك ما تفتكرش عاصمة السودان

غير من ااغنية محمد منير نعناع الجنينة .. احب اقولك الحق نفسك واستعبل في الامتحان واعمل اي حاجة تأجل بيها المادة
والا هتجيب الرقم الفلكي 34.5 من خمسين

نمبر ستة ... لسة ثانوي .. لما كل المدرسين يقولولك ادخل علمي انت مالكش في الأدبي

اسمع كلامهم والا هتلاقي نفسك لا دخلت اعلام ولا السن ، وهتلاقي نفسك بتفكر بجدية في انك تاخد بكاليريوس هندسة بعد الاداب :D

نمبر سبعة (( للبنات فقط )) لو عايزة تسهري للصبح في حل رووووووووعة .. لفي شعرك طاقية ، ومن كتر البنس والتوك اللي هتحطيها فيه
كل ما دماغك تميل البنس هتشكشكك فتفوقي على طووووووول


نمبر تمانية .. في الكلية بقى .. بردو للبنات .. لو كنتي رفيعة ومعصعصة وبتكرهي المذاكرة ونفسك تتخني
اقعدي ذاكري ، هتلاقي نفسك بتقعدي في المطبخ اكتر ما بتقعدي في أوضتك وانتى بتذاكري

نمبر تسعة .. حاول ما تزعلش الست والدتك أيام الامتحانات ولا أيام النتيجة لما تكون في الكنترول

نمبر عشرة .. اوعى تصدق أي حد يقولك ان البيض بالبقدونس طعمه حلو

نمبر اليفين .. لو حليت الامتحان كله صح اوعى تروح بكل عبط تقول كده في البيت .. لأن دا معناه امتياز حضرتك ودا مش بيحصل

إلا ببركة دعاء الوالدين ، انت لو حليته كله ارجع مكشر على خفيف .. لو سبت سؤال ولا اتنين ارجع معيط .. لو ماحليتش خالص

ارجع مغمن عليك

نمبر تويلف .. اوعى تسمع كلامي دا كله والا هتبقى معاك أيزو امتحانات بخبرة 26 سنة

_______________________________________
جديد زوجي الذي مازال حبيبي
جديد بيت الرعب يا بيتنا

12 بوينتس أوف فيو:

لماضة يقول...

ما شاء الله يا ساره
مذاكرتك في دماغك مطوتك في جيبك
لو حد قالك غششه غزه على طول
هههههه
كله كوم وحكايه الاكل دي كوم
ربنا مع كل اللى بيمتحنوا يارب ويخلصوا على خير
عجبتني بتاع الابتدائيه
فكرتيني بايام الشيطنه

farahmarh يقول...

شطورة با لماضة فكرتينى بايام الامتحانات ورزالة المراقبين كانوا بيحيبولى العصبى اصل انا طول عمرى لجنة 1 مقعد 1 حروف ابجدية بقى
وياريت تقبلينى صديقة farahmarh
www.fengankahwa.plogspot.com

farahmarh يقول...

اسفة جدا سمو الاميرة سارة

EmY يقول...

انا بقي 14 سنه خبره في التعليم

انا اشوف الكتاب اجووووع مش عارفه ليه
و بعد ما اكل طبعا عايزه انام و اريح و اخد دش و اسأل علي اهلي و صحابي علشان دي صلة رحم بردو و علي ما اخلص يكون الامتحان شخصيا خلص خلاص

بوست بجد جميل و ف وقته

Mounir يقول...

نمبر اليفين .. لو حليت الامتحان كله صح اوعى تروح بكل عبط تقول كده في البيت .. لأن دا معناه امتياز حضرتك ودا مش بيحصل

عجبنى اوى
بس ليا تعليق
فين دعاء قبل المذاكرة ؟؟؟؟

سمو الأميرة سارة يقول...

لماضة .. يا مرحبا يا مرحبا بجد منوووووووووووووووورة المدونة يا احلى دكتورة .. دعواااااااااااتك بقى لحسن خلاص فاضلي شوية وهيودوني برنامج الرابح الاكبر هههههههههه

سمو الأميرة سارة يقول...

farahmarh

ههههههههههههههههههه ولا يهمك يا بنتى شكلك بتمتحنى ليس على الممتحن حرج نورتي يا قمر

dodoo يقول...

بالنسبه لنمبر تمانيه دى بقى

صدقينى يابنتى حتى لو دخلت المطبخ طول النهار

هفضل كده مش انتى بتقوليلى بسكوته ما ينفعش البسكوت يبقى فطير

ولا ايييييييييه ؟؟؟؟

عسل ياساروره وحشتنى مدونتك وكتاباتك
يارب نخلص بقى

سمو الأميرة سارة يقول...

إيمي برخم ان معاناتك اكبر يا ايمي بس بحسدك مدام 14 سنة يبقى خلاص هتخلصي السنة دي وتاخدي افراااااااج

ههههههههههه حلوة صلة الرحم أوي في الامتحانات انا للأسف في بلد والعيلة كلها في بلد تانية فالحجة دي ما بتنفعش :((

نورتيني يا قمراية

dodoo يقول...

بالنسبه لنمبر تمانيه دى بقى

صدقينى يابنتى حتى لو دخلت المطبخ طول النهار

هفضل كده مش انتى بتقوليلى بسكوته ما ينفعش البسكوت يبقى فطير

ولا ايييييييييه ؟؟؟؟

عسل ياساروره وحشتنى مدونتك وكتاباتك
يارب نخلص بقى

سمو الأميرة سارة يقول...

منير .. بصراحة يا منير انا عمري في حياتي ما افتكرت اقول دعاء قبل المذاكرة ..انا ممكن اصلي ركعتين وادعي ربنا بأي حاجة بس مش دعاء المذاكرة .. انا في البوست قولت عمايلي السودا فبما إني مش بقوله ما حبيتش انصح الناس بحاجة انا ما بعملهاش

نوووووووووووووورتني يا ابو النور كله

بطوط حبوب يقول...

بوست جامد يا ساره بجد
ربنا يهونها عليكى ايام الامتحانات وتعدى على خير
قولى يارب

المتابعون

اعتبرها بيتك ♥

وِش القفص

خليك ورايا

دليفري..