لعلمك

لعلمك

إقرأ لي

دخلوا بكليك شمال :D

Blog Archive

الأربعاء، يناير 14، 2009

postheadericon مش عمتو ماجدة اتجوزت !!!!

مش انا طبعا اللى بقول


دى بنت جيراننا

بنوتة لسة صغننة اوى فى الحضانة

بجد عرفتنى حاجات مهمة اووووووووى


- اوعى تقول اى حاجة قدام الاطفال لو ماكنتش عايز الجمهورية كلها تعرفها

- خدعوك فقالوا (( الاطفال بريئة )) والله احنا اللى بريئين ، او احنا اللى اطفال

عرفت دا كله من الحوار دا :

هى اسمها سارة على فكرة


سارة : (((((( دخلت الاوضة عندى وبتتفرج على اللعب والدباديب وكده ))))

هى القطة دى بتاعتك ؟؟؟؟

لاسعة : ايوة يا حبيبتى بتاعتى ..

سارة : طب والدبدوب دا كمان بتاعك ؟؟؟؟؟

لاسعة : ايوة يا حبيبتى دا كمان بتاعى ، واللى فى المكتبة كمان (( بوفر عليها سؤال ))))
سارة : طب وحاطاهم كده ليه ؟؟؟

لاسعة : عشان شكلهم حلو يا سارة

سارة : طب مش بتديهم لاى حد ليه ؟؟؟؟؟

لاسعة : عشان بتوعى وبحبهم يا جميل ....

سارة : (((( بخبث بقى ))))

طب وحتى انا ؟؟؟؟

لاسعة: حتى انتى يا حبيبتى عشان بتاخديهم تكسريهم

عايزة تلعبى العبى بيهم هنا


((((( زعلت كده وفجأة لقيتها بتقولى )))))

مش عمتوا ماجدة اتجوووووووووووووووووووووووزت

انا كنت بلم حاجاتى وماشية

برقت كده

وقلتلها عمتو ماجدة مين ؟؟؟

قالتلى كانت بتيجى تقعد عندنا

وجوزها ادانى خمسة جنيه ادتها لبابا

اصل بابا ..........................................

وحكتلى تاريخ بيتهم كله



بجد حسيتنى عبيطة وانا واقفة قدامها


خلوووووووووووووووووووا بالكم من عيالكم

34 بوينتس أوف فيو:

bos bos يقول...

هههههههههههههههههه

والله عندك حق الاطفال دول ممكن يعملوا فضيحة
وحصلى منهم موقف بس اكتر موقف محرج جدااااااااااااااا مش هقدر احكية هنا على العلن كده
هههههههه

Alaa El-Shaikh يقول...

ههههههههههههه عسل قوي .. سواء كانت سمو الأميرة .. ولا سارة الصغنونة .. أحلى حاجة في الأطفال برائتهم .. تحسي كدا انهم بتلقائية بيقولو أي حاجة .. ومش فاهمين انهم هيجو عليهم يوم ويقعدو يدحكو قووووي على نفسهم .. احم احم .. هههههههههه .. بفتكر نفسي وأنا صغننة بس .. يلا للأمام دائما يا سمو الأميرة الجميلة الرائعة والمتألقة دائما .. سارة العسل
( أختي الحلوة كمان على فكرة )

Alaa El-Shaikh يقول...

الا صحيح البنوتة دي عندها كما سنة ؟؟ عارفة يا سوسو .. صعبت عليا وهي بتسأل على اللعب عاوزة تاخدهم .. أنا وكما تعلمين .. عندي الأوضة مليااااانة دباديب وعرايس وحاجات من دي .. لما قرايبيني الصغننين بيجو عندي .. ويقعدو يمسكوهم كدا ويحصل حوار مشابه للي حصل معاكي كدا .. بيبقى نفسي أقولهم ماشي خدوهم ليكو .. بس جوايا الطفلة الاء .. بترجع وتتخانق معاهم .. وبعملها كتير على فكرة .. أتخانق مع العيال الصغيرة على الدباديب والعرايس .. وأقول لهم لا دي بتاعتي محدش هياخدها .. ببقى نفسي اكلهم كدا ولا إن حد يلمس لعبي وحاجتي .. هههههههههه ولا كأن اللي بتكلمك دي في هندسه وعلى وش ....... تخرج والله مش حاجة تانية .. ههههههههههه

77Math. يقول...

هههههههههههههههههههههههههه

الحمد لله عيالي كلهم خرس

أنا اللي بكتبهم وبعمل لهم run

بيشتغلوا بأمري ويقفوا بأمري !




*أصلك ما حددتِ إن العيال لازم يكونوا بشر يعني !*

كاتب مصري يقول...

هههههههههههههههههههههه
دمها خفيف البنوتة دي أو انت الي دمك خفيف وكتبتيها بفرفشة
ربنا يكرمك
فعلا الأطفال معندهومش كنترول ع الكلام وملهومش ذمب طبعا مش مسؤولين المسؤول هما الأهل
ربنا يوفقك يارب
مودتي

نعكشة يقول...

متعاملتش مع الاطفال من قريب لدرجة اننا نبقى صحاب لإن معنديش جيران أو قرايب صغننين او لأن تعاملاتي مع الناس قليلية فمحدش بيسيبلي عياله

بس أنا بحب براءة الاطفال قوي و بحب اتكلم معاهمو العب معاهمطالما مبيعيطوش

سمعت انا عن الاطفال اللي بيحكوا كل حاجة دول
طيب اهلهم يودوهم فين ماهم كدةكدة عايشينمعاهم و هيحكوا يعني هيحكوا

ربنا يتولى الاهل برحمته بقة

ههههههههههه

سلام عليكِ

adel يقول...

مممممم

هههههه

برضه بحب الاطفال و بموت فيهم

بس شكل سرة دي مشكلة ...هههههه

اول مرة اجي هنا و عاجبني قوي المدونة

كيب جونيج....لول

هههههههه

Reem يقول...

على فكرة ده شيء معروف جدا

عشان كدة ما ينفعش تخلي الاطفال ترد على التلفيون دايما الا و انتي محافظه يرد ازاي لانه سهل اي حد يستدرجهم ويعرف اخبار اهل البيت

و مش اي حاجة تعملها او تقولها او تخبيها قدام الطفل لأنه هيقول عليها
دي من المسلمات المتعارف عليها على فكرة

بس البوست كويس ينيه اللي مش عارف

أميرة الجنة يقول...

السلام عليكم
حرام عليكى يا سارة كده مش تديلها اللعب زمنها بتدعى عليكى حالا هو بصراحة انا لو منك هشيلها وارميها من الشباك اصلا لان الدباديب واللعب بتمثل ليا حياتى واوعى تنسى تباركيلها على عمتو ماجدة ولا اقولك خدى دبدوب معاكى وروحي باركيلها بنفسك.........
دمتى بخير وتقبلى منى مرورى الاول على مدونتك الرائعة

~*§¦§ Appy §¦§*~ يقول...

دى حقيقها بس لازم اللى يوعى الاطفال اتنين بقى يا حبيبى اولا مامتها ووالدها تانى حد المتلقى اللى هو حضرتك كان المفروض يا قمر تقولى لها لا متحكيش ولا عاوزه اعرف
يعنى ده منقسم على الاهل واللى حوليهم

المحارب المتيم يقول...

ازيك يا سمو الاميرة

عقبالك يارب كدة لما نيجى بنوتة صغيرة

تقولى مش عمتو سارة أتجوزت

هههههههههههه

والله العيال دول مشكلة بجد

مبتتبلش فى بقهم فولة

عاملة ايه فى الامتحانات

ابقى طمنينى

سلاموز بالموز والفراولة

وميض ابتسامة يقول...

مش قالوا زمان براءة الاطفال فى عينيه

اظنك فاكرة البرنامج اللى قدمه احمد حلمى فى مستهل حياته فى التليفزيون وكان قائم على حوار مع اطفال لم يتجاوزوا الرابعة من عمرهم وبصراحة لو كنت عايزة تشوفى البراءة والطعامة والعبارات العفوية الغير منتظرة كانت فى حواره مع هؤلاء الاطفال .. هذا بالاضافة لبعض الاسرار الغير متوقعة والعفوية ايضا!!

وعليه فالاحتراس من الآت التسجيل هؤلاء امر واجب ومهم ... والا ...!!

funny photo يقول...

مدونة جميلة استمرى فى الابداع

حسام
http://egyphoto.blogspot.com/

Shimaa Esmail يقول...

الاستاذة/ سارة
صاحبة مدونة/ بنوتة لاسعة
ارسلت لك رسالة عبر البريد الإلكتروني تتعلق بالجزء الثاني، أرجو الاهتمام والرد.
شيماء إسماعيل

رئـــــيسـة حزب الأحلام يقول...

ههههههههههههههه
العيال دول مابقوش عيال

تحياتى

آية مش هنا يقول...

:))

كنت اسهل طفلة في التاريخ تفضح مش بس بيت واحد .. لا منطقة كاملة ..

دي احلى حاجة في الاطفال انك تستدرجيهم .. او انهم يحكوا يحكوا يحكوا و هم مش عارفين هم بيحكوا ايه

خلي الزمن هيعلمهم زي ما علمنا ان في حكايات بتموت جوه من غير ما نعرف نقول لحد انها موجودة اصلا

:)

enjy يقول...

مين قال ان الاطفال بريئين؟؟؟
شهد بنت الجيران مونكن تقعد تحكى لحضرتك بتاع 125487حكاية فى الدقيقة وانتى تبقى قدامها قاعدة متنحة كدة ومش عارفة تردى....حلو البوست اول زيارة بس مش الاخيرة باذن الله

Tamer Diab يقول...

جــــامد أوي :) البوست ده
فكرني في مره كنت في مسجد أنا واخويا وأول ما بدأت الصلاة كان ابن دكتور صاحب أخويا معانا حط ايده علي جيب اخويا الي ورا وهو بيصلي وراح قعد يضحك ويقول ( ههههههههه عمو لابس بامبرز ) عشان المحفظة انا أتقلبت علي جنبي من وضع السجود من الضحك أنا والي جنبي كلهم.

Shimaa Esmail يقول...

الاستاذة الفاضلة/ سارة
صاحبة مدونة / بنوتة لاسعة
اعتذر عن الخروج من موضوع التدوينة لقد أرسلت لك الجزء الثاني من الاستمارة (7صفحات)، أرجو منك إرسال رسالة توضح أن الجزء قد وصلك وأنه ليس هناك مشكلة في إرساله أحالت وصله لسيادتك .
تحياتي وتقديري
شيماء إسماعيل
باحث ماجستير- كلية الآداب جامعة القاهرة.

Shimaa Esmail يقول...

الاستاذة الفاضلة/ سارة
صاحبة مدونة / بنوتة لاسعة
اعتذر عن الخروج من موضوع التدوينة لقد أرسلت لك الجزء الثالث من الاستمارة (7صفحات)، أرجو منك إرسال رسالة توضح أن الجزء قد وصلك وأنه ليس هناك مشكلة في إرساله أحالت وصله لسيادتك .
تحياتي وتقديري وربنا يوفقك يا قمر.
شيماء إسماعيل
باحث ماجستير- كلية الآداب جامعة القاهرة.

dodoo يقول...

ههههههههههههههه

اللى يفرس ياساره كمان انهم يقولولك

الاطفال ماتعرفش تكدب

هما مين دول اللى مابيعرفوش يكدبوا
دول هما دول اساس الكدب

ودى عن تجربه شخصيه
:::::::::::::::::::::::::::::::

بجد وحشتينى ووحشتنى مدونتك اووووووى

Tamer Diab يقول...

أن شاء الله يكون غيابك خير ومفيش حاجة

الرابطة وبناء الأمة يقول...

السلام عليكم ورحمة الله وبركاته
نتقدم بدعوي لك أخي ( أختي ) المدون بمناقشة
محاكمة عادلة
مبارك بين التأييد والرفض
ملف يناقش ويحلل ويضع الحلول
رائيك يهمنا جدا
مع خالص تحياتنا الكتيبة السياسية

فتافيت يقول...

هههههههههههههههه

طيب اهم حاجة ان بابا خد الخمسة جنيه.. اكيد كان مزنوق واخر الشهر .. وجواز عمتو ماجدة جه بفايدة

العيال دول وكلات انباء

بوست عثثثثثثثثل .. اول زيارة
وهاكررها كتير

شكلك لاسة بجد :)))))))

حاتم عرفه يقول...

سؤال رفيع بعد إذنك ..
لخبرتي السابقة بخبث ولؤم السيادة .. بزيادة
..
هي البت هى اللى قعدت تحكي ..
واللى انتى اللى مسكتيها قررتيها ؟

قولى .. قري .. أعترفي..
أنا عن نفسي كنت الحمد لله بافضح الجميع في طفولتي .. وأعتقد أن أولادي احتراما لتراثهم وجيناتهم مش هايرحموني ..
و ربنا يستر على ولايانا

سمو الأميرة سارة يقول...

بسبس : هههههههههههههه طب ايميلك بسرعة علشان تحكيهولي انا بمووووووووت في الفضايح ههههههههه منورة يابنوتة

سمو الأميرة سارة يقول...

لؤلؤتي : استنى استنى دا في اسراااااااااار وانتي صغيرة ايه ايه ؟؟ احكي والنبي بموت في الفضايح ههههههههه انا ليا قعدة معاكى ع رواقة كده اعرف كل حاجة

سمو الأميرة سارة يقول...

لؤلؤتي تاني ( نسيت حاج وجات تقولها في حاجة ؟؟ ) ههههههههه
انتى عارفة انا بردو كان عندى لعب كتير زمان وانا ف ثانوي وكنت اما اعرف ان ف احتمال اي عيل يجي عندنا كنت بخفييييييهم علشان ماحدش يشبط في حاجة واتجنن انا المهم في يوم جه على خوانة بنت الجيران وشبطت في اكتر لعبة بعشقها كانت عربية بيبي وفيها بيبي صغير وكانت ايامها واحدة بس من نوعها بجد خدتها وانا في المدرسة ورجعت لقيت البيت كله مش عارف يوصل لي الفجيعة دي ازاي ههههههههه لحد دلوقتي مش طايقة البت دي والله وعزلوا من الشارع وجم يزورونا في يوم كنت عايزة ارميها من البلكونة

واخدة بالي انا انه وش تخرج هههههههههههههههههههههههه

سمو الأميرة سارة يقول...

حماس ههههههههههههههههههههه تصدقي انا عايزة عيال من دي والله هههه اريح بجد

سمو الأميرة سارة يقول...

كاتب مصري : معاك حق والله المسئول هو الأهل
بس تصدق ان احيانا العيال بيتبلوا على الناس بحاجات ما حصلتش

انا وانا صغيرة كان اول ما بابا يجي من السفر
اجري عليه واقعد على بطنه كده وهو نايم واقعد احكي له كل حاجة حصلت في خلال الاسبوع

بكل صدق وموضوعية وحياد والخ الخ بس بتعديل بسيط

كل حاجة عملتها بشيل اسمي من عليها واوزعها بالعدل ( آه احنا ما نحبش الظلم ) على اخواتي هههههههههههه

نورتني بجد

سمو الأميرة سارة يقول...

نعكشة على فكرة الحال من بعضه ، بس اهلها كانوا سايبنها لماما واختى المفروض بس اختى ماكنتش هنا .. انا مش بحب اتعامل مع الاطفال عن قب .. بحب اتفرج عليهم من بعيد والغريب ان دا بيستفزهم جدا ويجوا عليا يكلمونى ويلعبوا معايا

وانا اصلا عيلة ودماغي قفل هههههههههه

منورة ياقمر

سمو الأميرة سارة يقول...

عادل هي من ناحية مشكلة فمشكلة فعلا خاصة ايام الامتحانات لما اكون قاعدة ع الكمبيوتر خلسة وتنزل تحكي لأبويا كل حاجة وتقوله اني قاعدة ع الزفت اللى والله ما انا فالحة طول ما انا قاعدة قدامه ههههههههههههههه منورني

سمو الأميرة سارة يقول...

رييييييييم : فكرتيني باسطورة العلاممات الدامية بتاعة د/احمد خالد لما بيتصل بواحد عشوائياً عرف من طفل رد عليه السيرة الذاتية للعيلة كلها هههههههههههه من غير ما يستدرجه كمان يعني توماتيكي توماتيكي

سمو الأميرة سارة يقول...

ضهري وجعني من الكرسي هاخد ريست وارجع اكمل تعليقات يا احلى ناس

المتابعون

اعتبرها بيتك ♥

وِش القفص

خليك ورايا

دليفري..