2009-02-08

ايوة انا عملت محشي

تخيلوا اني عملت محشي ؟!!  اه وربنا.. انا اخري في المطبخ كان بطاطس محمرة، بيض مقلي، ويوم ما اتشطرت اوى عملت عصير برتقال في ساعة ونص :D

بس من اول لما الاجازة بدأت سافرت اقعد مع اخويا فطبعاً في خلال اسبوع طلعت بنتيجة مهمة جداً ان اخويا اشطر مني في المطبخ بمرااااااااااااااااااحل
وكان ضغطه خلاص على وشك يعلى و بجد بجد كان بيعاني مني وفي يوم قالى انه نفسه في المحشي :"وطبعاً انتى مش بتعرفي تعمليه " 
فأتا اتحمقت أووووي وقلت ازاي الراجل مظبطني فسح وخروجات وصابر عليا ومستحملني كل الوقت دا ياعيني وما اعملوش المحشى اللى نفسه فيه
رحت قمت من النوم وقررت قراري الحاسم القاطع الخطير الفظييع انى اعمل محشي
وقعدت افتكر مراسم عمل المحشي في البيت كده واتوكلت على الله ورحت السوق نزلت السوق واول بياعة قابلتني قلتلها انا عايزة كرنب طبعاً هي قرت العبط في كل ملامحي راحت حدفتني لواحدة تانية عندها كرنب انا انصدمت من احجام الكرنب المهوووووووولة اللى شوفتها 
فرحت بكل عبط اقولها عايزة واحدة صغيرة فبصت لي كده واديتني واحداية كبيرة مش صغيرة ولا نيلة قلتلها لأ اصغر اصغر اصل احنا اتنين بس 
راحت الست انشكحت اوى وقالت عبط زي كده مافييييييييش واديتني كرنباية مدية على خس كده :D وبكام يا حاجة اتنين جنيه ونص 
انا اذبهليييييييت يااااااااااااه كرنباية وباتنين جنيه ونص بس ؟؟!! زأططات  وانا ماشية الست راحت قالتلى ربنا يكتركم ياختى 
المهم اشتريت باقى الحاجات ورحت البيت وبدأت المعركة عايزة اقولكطم كان منظرى ولا اللى بتحارب
بفتح الكرنباية لقيت 3/4 ورقها بايظ قلت مش مهم مش مهم دي رخييييييييصة وبعدين جيت اسلقها اكتشفت حقيقة مرة انها لافة على بعضيها اوي ومش هتطلع الا بعملية جراحية صعبة أدت الى كسر الكرنب وطبعا بعد ما اتسلق اتبقى فتافيت كرنب !! 
بعد ما قطعته قلت اعمل الخلطة بقى جيت اعمل الخلطة عملتها تمام بس نسيت اي بهارات واي ملح واي حاجة بتتحط عليها 
لأنى عملتها شبه المنظر النهائي اللي بشوف ماما تحط عليه الرز بعدين استغربت انها مش مطلعة اي ريحة فافتكرت بقى انى المفروض احط عليها أي حاجة تعمل اي منظر فحطيت ملح ولسة مافيش ريحة حطيت شطة ولسة مافيش ريحة فافتكرت البهاااااارات فتحت دولاب التوابل وادعبس ع البهارات مش عارفة اوصل لها ادعبس مش عارفة كل البارطمانات شبه البهارات فقررت استعين بصديق ندهت لجارتنا وقريبتنا قلتلها والنبي تعالى شوفى انهى في دول بهارات :(
فدخلت ودعبست ودعبست ودعبست واخيرااااااااااااااااا قالتلى ولا واحدة من دول بهارات تعالي خدى من عندى 
المهم ربنا سترها وصلنا بقى للمرحلة الحاسمة الصعبة وهي انى الف الكرنب !!!  انا اخري محشي بتنجان بقعد احشيه مع ماما كده لكن العملية هنا صعبة ومحتاجة هندسيات وفنيات وحاجات من كده بعدين فلي الاخر قلت زي ما تيجي بقى و طلعت حاجة شبيهة بالمحشي حطيته بقى يستوي وحطيت له شوربة وافلام من دي وشوية وريحة شياط قوية جبارة جات لقيت بنت جيراننا اللي هي في نفس الوقت قريبتنا بس مش بتاعة البهارات بقى المرة دى كانت الصغننة بتقولى سارة في حاجة عندك بتتحرق ساعتها بس اكتشفت ان فضيحتي بقت بجلاجل في العمارة كلها دخلت جري وعملت عملية معملية فاسدة وانقذت المحشى من الحريق الحمد لله والله في الاخر طلع طعمه شبهه المحشي
 المشكلة بقى اللي تفطس من الضحك اني لما سيحت لنفسي في العيلة اني بعمل محشي حصلت حركة اتصالات مريبة والكل عايز يتطمن وتخيلوا سارة بتعمل محشي ولأ بجد وبابا يقولي شيليل صوباعين  وماما اتصلت تتطمن اخويا لسة في كامل وعيه ولا لسة 
ويويو جات زارتني يوميها وشافت المحشي والله فرجت نص قرايبنا عليه ما نفعش ادوقهم لأن الكرنباية ما كفتش اساسا :D
رحت بقى بكل فخر احكي لمرات خالي فانصدمت لما عرفت حق الكرنباية وقالتلى انهم بيجيبوا كرنباية ضخمة تأكل العيلة مرتين بتلاتة جنيه ونص
ولما حكيت لجارتنا اللى هي قريبتنا عن تمن الفراخ انصدمت
بس بردو 
بردو
بردو
دا كله ما ينسينيش فرحتي بالنصر الرهيب المهيب العظيم  
ع فكرة لسة في خمس صوابع من المحشى التذكاري دا بفكر احطهم في مزاد علني :D



ع فكرة انا لسة مسافرة ولسة مافيش نت فسامحونى بالنسبة للتعليقات

هناك 14 تعليقًا:

  1. يكفيكى شرف المحاوله يا بنتى انا بكره الكرنب مالها الكوسه والبتنجان

    ردحذف
  2. حقيقي انشكحت وكان ناقص ازغرد
    مبرووووووووووووووك يا بت يا بلدياتي
    فرحت لك والله مش هخاف على مستقبلك الحمد لله
    تعالي بأة أما أعلمك بجد عمايل المحشي بس مش الكرنب عشان مش بحبه قوي
    ههههههههه
    وحشتيني

    ردحذف
  3. عموما اول الغيث قطرة ..
    وطالما بدأت البحث والتنقيب فى ارجاء المطبخ من اجل اكلة حلوة ..
    يبقى فى امل فيك .. وان شاء الله ح تبقى طباخة بريمو ...

    ردحذف
  4. حلو المحشي
    بيفكرني بالفراخ بتاعة لينا في المتزوجون
    بس ده لو فكروا يجيبوا في مسرحية هتبقي اسمها المطلقون او المتسممون حاجة كده
    واضح ان معلوماتك عن المطبخ زي معلوماتي عن السرابنتينا الي كتبتها علي جوجل من كتر ما بسمع اسمها ونفسي اعرف ايه هي ومتطلعتش اي نتائج ولا حتي نتائج شبه الكلمة

    ردحذف
  5. المحشى هو التخديعة
    واللف
    اما الباقى كلة سهل
    يا عينى على ازواج المستقبل

    ردحذف
  6. ياااااااااه ياساروره

    عملتى محشى ؟؟؟؟؟؟؟

    يابنتى ده انتصااااااار عظييييييم

    وكمان روحتى السوق
    ايا كان اللى حصل بقى فيه بس برضه
    ده فخر ليكى

    اختك لا عمرها راحت سوق واخرها فى المطبخ بطاطس محمره

    وبتبقى كاهنا جابت الديب من ديله

    بجد اهنييييييييييكى
    :::::::::::::::::::::::::::

    ةحشتينى جدا ياساااااااااره ونفسى بقى الدراسه تبدا عشان اشوفك

    ردحذف
  7. مبرووووووووك ادعيلي عقبالي

    ردحذف
  8. my deeply congrates
    محشي الكرنب اول خطوات الاحتراف!

    ردحذف
  9. هاى ساره
    جيت أهو أثبت وجودي;)
    مبروك المحشي بس مش وسعت ده محشي مرة واحده
    ده مش بداية خالص
    ولا مزاد ولا حاجه. يابنتى الفلوس بتروح وبتيجى المهم الإنجاز انتى تحنطيهم وتبقى تحطيهم فى متحف للأجيال القادمة:)
    تحياتي
    شيماء:)

    ردحذف
  10. انا حاسه ان كان في حرب
    مش عمايل محشي :)
    الحمدلله الحاجه الوحيده
    اللي مش بعرف اعملها ولاعاوزه :)
    يكفيكي فعلا شرف المحاوله
    غيرك محاولش :D

    ردحذف
  11. طيب والله شاطرة
    اول تجربة فى الطبخ تكون محشى ..ده معناه انك مغامرة
    مش مهم بقى طلع الطعم ايه المهم انه شكله محشى ده انا اعرف واحدة عملت المحشى صينية زى الجلاش
    ههههههههه

    شوفتى بقى انك شاطرة

    المرة الجاية ركزى على الطعم و خلاص :)


    سعيدة انى اتعرفت عليكى يوم توقيع ساديزم

    ردحذف
  12. دعوه
    الأخ العزيز/او الأخت العزيزه
    تحيه طيبه
    برنامجنا الأذاعى عن النت والمدونات من الأذاعه الرئيسيه لمصر اى اذاعة البرنامج العام يذاع يوميا التاسعه وعشر دقائق صباحا عدا الجمعه
    ندعوك لزيارة مدونتنا والتعليق على ما نطرحه من موضوعات وهذه التعليقات تذاع باسماء اصحابها فى حلقات برنامجنا

    وبموقعنا رابط بالضغط عليه والأتنتظار قليلا وقت أذاعة البرنامج يمكنك الأستماع الينا
    المدونه
    http://netonradio.blogspot.com
    الموقع
    http://dear.to/cairo

    ردحذف
  13. ♥♫Happy♫ ♥ ♫ ♥♫ VaLnTiNe♫ ♥♫ ♥♫ DaY♫ ♥ ♥ ♥ ☺ √♫

    ردحذف

Say something...