لعلمك

لعلمك

إقرأ لي

دخلوا بكليك شمال :D

Blog Archive

الأحد، مارس 22، 2009

postheadericon قعدة عرب بين " أنا المحترمة " و " أنا النص كم " ((1))




كل يوم والتاني أنا المحترمة وأنا النص كم يبدوا خناقة مع بعضهم لا دي عاجباها دي ولا دي عاجباها دي ، وطول الليل بقى كل واحدة منهم تنط لي تشتكي لي
" الحقى نفسك وربيها كويس ، دي هتوديكي في داهية ، دي هتكره كل الناس فيكي ، انتي ما بقيتيش سارة بتاعة زمان مابقيتيش طيبة ولا صافية زي زمان .. لازم ترجعى كويسة تاني "

دي طبعا ً أنا المحترمة ..
وأول ما ابدأ افكر في كلامها الاقي أنا النص كم جيالي
" طول ما انتي ماشية وراها هتفضلي كده ، هبلة ومسكوها طبلة والكل بيستعبطك ، يابت فوقي لنفسك واخلصي منها .. اديني الأوكي بس وأنا اموتها ونخلص منها بقى دي خنقتني طول ما انتي عاملة فيها علي ابن الناس الكويسين كده مش هتسلكي في الدنيا دي "
ويادوب ابدأ أفكر في كلام أنا النص كم أصحى من النوووم ، أو انام هع هع هع المهم بقى أنا تعبت أوي من شغل الضراير دا وزهقت من الزن ع الودان اللي على طول دا وأخلص بقى روحت لميت أنا المحترمة وأنا النص كم وقولت لهم " بصوا بقى أنا مش فاضية للعب العيال دا ، احنا لازم نتفق ونعمل هدنة كده وياسلاااااااااااااااام لو عملنا معاهدة سلام وارتاح من وجع الدماغ دا خالص "

.. وبعد محاولات مستميتة قدرت أقعدهم مع بعض أخيراً

ولسة بنقول يا هاااادي يارب ابدأي يا ست " أنا المحترمة "
راحت " أنا النص كم " طلعت فيا : واشمعنى هي بقى ان شاء الله اللي تبدأ ؟! "

قولتلها علشان هي الكبيرة
قالتلي ومين بقى قال انها الكبيرة ، احنا هنستهبل من أولها ولا ايه ؟؟
قولتلها طب استنى نحسبها .. هي جوايا من يوم ما ربنا خلقني ، كل الناس كده وكل الناس كمان عارفة كده ، ان البني آدن بيتولد محترم وبعدين بقى انتي جيتي مش فاكرة امتى بس أكيد يعني من أول ما بدأت اتحرك واقدر اعمل البلاوي اللي كنتي - ولا زلتِ - بتوسوسي لي بيها طبعاً أفحمتها حصرياً ولأول مرة ههههههه وبدأنا قعدة العرب اللي اتفقنا فيها ان كل واحدة منهم هتقول حاجة مش عاجباها في التانية والتانية ترد وأنا احكم ما بينهم في الآخر .
وبدأت " انا المحترمة " وقالت :
بصراحة انا مش بيعجبني فيها انها دايماً بتظن بسرعة السوء في الناس وما بتعذرهمش ولا بتفكر انهم
نيتهم حلوة الا بعد لما افوقك انا واقولك انه احتمال يكون الناس مظلومة وانهم ليهم عذرهم و .......
قبل ما تكمل كانت " انا النص كم " هبت فيها وقالت : لأ يا حبيبتى اللي انتى بتعمليه دا الهبل بعينه مش تفويق ، انتي اللي بتوديها وتودينا معاها في داهية و دايماً في الآخر بتنصدم في الناس وتقول ياريتنى صدقت انهم فعلاً نيتهم وحشة وياريتني ما اديتهمش أمان .. مش فاكرة كام واحدة كانت فاكراها صاحبتها وطلعت أي كلام ؟؟ ولا نسيتى كام مرة كانت بتقعد تندب وتعيط وتقرفنا علشان اكتشفت انها مخدوعة في بني آدمين ما يستاهلوش ؟؟ ولو نسيتي دي ودي ما اظنش تقدري تنسي انها كل ما تصدق كلام حد تكتشف ان الكلام دا فشنك وواخد ماركة مسجلة في الخداع ؟؟
بصراحة انا احترت اقول ايه .. الاتنين معاهم حق ، يااااااااما وثقت في ناس ماكانوش قد الثقة ، وياما بصدق وعود ما بتتحققش ولا أصلاً اللي وعدوا بيها بيفكروا ينفذوها .. وكتيييييييييير أوي بعيط بعد ما بكتشف قد ايه كنت عبيطة وهبلة بس بردو ما انكرش اني كتيييير أوي ضميري بيأنبني اني اسأت الظن في ناس ما تستحقش مني كده خالص طب بعدين وايه العمل في الحكاية دي ؟؟؟؟؟
سكتت كتييييييير وقعدت افكر فجأة لقيت ماية غرقتني دي طبعاً كانت " أنا النص كم " بصيت لها وانا هموت واموتها

قالتلي
يلا يا اختى انا مش فاضية لك اخلصى واحكمي بيننا انتى نمتي ولا ايه ؟؟
لطشتها قلمين وقولتلها هاحكم ع كل حاجة في الآخر
اتفضلي يا ست " نص كم " قولي اللي عندك ايه اول حاجة مضايقاكى في " أنا المحترمة "

-
هي كلها على بعضها أصلاً مش عاجباني عايش في الدور أوي وبتفكرني بسميرة أحمد هيهيهيهي
أنا المحترمة بصت لها وهي هتعيط وبصت لي زي ما تكون بتقول لي خدي لي حقي

فقولت لـ " أنا النص كم " ماقولنا لمي نفسك ، لو هتتكلمي يبقى تتكلمي عدل قولي حاجة واحدة مش عاجباكي

-
أبسط حاجة ، ودي اسألي كل اصحابها عليها انها ممكن أوي تعمل حاجة علشان تساعد او تسعد حد وتيجي عليا وعليكي وعلى نفسها وياريته بيتمر

- انا المحترمة : وانتي ايه اللي مزعلك .. ياستير يارب انتى وحشة اوي كده ليه
فيها ايه لما اسعد الناس وفيها ايه لما اريحهم ايه يعني لما اتعب شوية ؟؟
وبعدين يعني ايه ياريته بيتمر دي ؟؟ حتى لو ما اخدتش منهم مقابل كفاية عليا اني حسيت اني بسعدهم
وكفاية الثواب عند ربنا

-
أنا النص كم : ايه ايه ايه ؟؟ يعني ايه ايه اللي مزعلني كلنا في مركب واحدة حضرتك ولما بنغرق بنغرق كلنا سوا ولما بتحصل حاجة وحشة بسبب كده بتحصل لنا كلنا ولا ايه ؟؟ ماتردي يا حضرة الاستاذة .. فين حكمك ؟؟
انا بصراحة كلام الاتنين حساه صح .. ومش عارفة اعمل ايه انا المحترمة معاها حق واللي بتخليني اعمله بيسعدني وانا النص كم كمان عندها حق .. لأن كتير الناس بتتوقع مني افضل اجي ع نفسي واساعدهم وانا ببقى تعبانة او مش قادرة او نفسيتي مش متظبطة وما بيعذروش دا غير كلام اصحابي اللي حذروني اكتر من مرة من كده ومافيش فايدة مالقتش رد فقولت كالعادة

"
انا قولت الحكم في آخر الجلسة اخلصوا .. هاتوا اللي بعده "

الدور كان على
انا المحترمة فقالت : اللي ما بيعجبنيش فيها بردو انها ع أقل حاجة تتنرفز وتتعصب وزرابينها تطلع

لسة أنا النص كم هتهب فيها لحقتها وقولتلها
لأ الحق يتقال .. دي عندي دي .. أنا السبب هي دي طبيعتي هي دي أنا .. أنا النص كم مالهاش ذنب
طبعاً انا النص كم قعدت تطلع لها في لسانها وتعمل فلفل شطة فزغدتها علشان تقعد

وقولتها :
بطلي هبل وقولي ايه مضايقك تاني في أنا المحترمة

-
أنا النص كم : عيبها انها خايبة ومخيباكي معاها آل ايه ما اقدرش احرج حد واقوله مثلاً اني عارفة انه كداب او عارفة انه وحش او انه عمل حاجة ضايقتني وتقعد بقى تخليكي تكتمي في نفسك وتهري وتنكتي فيها وما تقوليش حاجة آل ايه بتراعي شعورهم وهم مافيش مرة واحدة راعوكي فيها طب الناس اللي بتبقى ذوق معاكى نقول ماشي لكن الناس المدب اللي بتجرح فيكي عمال على بطال وكلامهم زي الطوب ليه تراعيهم ؟؟ ما تحسسهم مرة باللي بيعملوه وقد ايه بيوجع
قبل ما
انا المحترمة ترد قولتلها

بصراحة في دي انا النص كم معاها حق
ونفسي تبطلي الخصلة دي وتبطلي تنيمي فيا علشان ما اخدش بتاري ولا ابعبع واقول اللي في نفسي
- انا المحترمة : يعني دا ذنبي يعني اني عايزة اخليكي ذوق واخلي الناس تحبك ؟! بقى دي جزاتي ؟!!

قولتلها
آه بقى جزاتك مش عايزة ابقى ذوق يا ستى عايزة اخد حقي وافضفض علشان ما يجيليش الضغط ولا السكر الذوق هينفعني لما اتشل م الغيظ ؟؟


((
طبعاً انا النص كم كانت مظاطاة أوي وانا المحترمة كانت مقهورة ))

يلا قولى ايه تاني مضايقك من انا النص كم


قعدت تفكر فأنا نمت منها وقولت نكمل الجلسة في يوم تانى



9 بوينتس أوف فيو:

مــحــمـود نــشــــأت يقول...

أنا بصراحه مستنى تكمله الجلسه دى

بس كويس فعلا يا ساره انك عملتى القاعده دى

حاولى بقى توفقى بين الاختين دول وتشوفى ايه اللى متفقين عليه الاتنين

اخوها يقول...

جامده جدا بجد ويا ريت كل بني ادم فينا يقعد قعده زي ديه مع نفسه ويشوف ويحكم علي نفسه (وعلي فكره اجمل حاجه بقي استخدامك ل"يا ستير يا رب " عشان الناس تعرف الصح من الغلط فالالفاظ اللي بتدعي بيهااو بتستخدمها يوميا )

سمو الأميرة سارة يقول...

محمود نشأت : انا بقالي 3 شهور بكتب في الجزء الاولاني ر بنا يسهل بقى ممكن ع عيد الفطر اكمل بقيتها هههههههههه

ع فكرة لو قعدت ادور ع اللى متفقين عليه مش هلاقي لازم اشكمهم واجبرهم الاتنين ع اللى شايفاه صح

سمو الأميرة سارة يقول...

اخويا اللي منورني : عارف كمان يا محمد ياريت لما الانسان يقعد مع نفسه يكون صريح ما يقعدش يطبطب على نفسه ويقنع نفسه انه صح

بالنسسبة لـ ( ياستير يارب ) الحمد لله بجد انى اتعودت عليها فبقى اساسي اني اقولها ويارب حد كمان يلقطها مني واخد ثوابه :)

bosysendrella يقول...

حلوة اوي القعدة دي يا سارة :)
تصدقي ان انا حاولت مرة اقعد الاتنين مع بعض قبل كده....بس ماطلعتش بنتيجة
كنت بحس ان هما الاتنين بيتكلموا في نفس الوقت وانا مبقتش فاهمة ولا عارفة افكر عشان احكم بينهم...
يا اما مبتبقاش ولا واحدة فيهم عايزة تنطق وتقول اللي جواها.....
بصراحة اتخنقت منهم قولت اسيبها لظروفها.

kafrawy يقول...

انا المحترم - الله عليك يا ساره

انا النص كوم- ايه الهبل دة يا ساره

SuperNova يقول...

this piece is awesome.

SuperNova يقول...

this piece is awesome.

محمد الوكيل يقول...

فكرة المناظرة دي ظريفة أوي، بس إنك تنصبي نفسك حكم على الاتنين دي صعبة لأن مهما عملتِ عشان تحكمي بالعدل ممكن حكمك ميكونش محايد.. فاهمة قصدي؟ ^^

وشكراً سارة-سان والله مناظرة ظريفة جداً وأسلوبها كفاءة ^^

المتابعون

اعتبرها بيتك ♥

وِش القفص

خليك ورايا

دليفري..