لعلمك

لعلمك

إقرأ لي

دخلوا بكليك شمال :D

Blog Archive

الثلاثاء، مارس 03، 2009

postheadericon آآآآه يا مرارتي


من كام يوم كنت قاعدة بتفرج ع 90 دقيقة

بالظبط بالظبط يوم ما جابوا التقرير بتاع مدرسة الفيوم اللي ما نجحش منها غير 4

(( شكلهم كده ابن الناظر وابن المدير وابن اخت الفراش والرابع نجحوه تمويه ما علييييييييينا ))

اكتر حاجة فقعتني في التقرير

1/ ناظر أو مدير المدرسة - هم ما حددوش هو مين فيهم - المهم الراجل
شكله وأسلوبه في الكلام يطفش بلد بحالها مش طلبة اعدادي بس .. أولاً بيتكلم بشخيط كده
وتبريقة وبأسلوب
" ما بين البايع والشاري يفتح الله "
بيقول " العيال ما بيجوش وبيروحوا مصانع الطوب .. العيل بيكسب عشرين جنيه في اليوم في المصنع هيروح المدرسة ليه ؟؟!! "

اسلوب مستفز بجد وحاسة انه هو اللي قايل للعيال كده أصلاً
تاني حاجة تحرق الدم لما جابوا طالب بيقول انه مش عارف ميعاد الامتحان اصلاً
هو أصلاً مش عارف انه عنده امتحانات .. طيب وأهله ما سألوهوش ازاي عن ميعاد امتحانه ؟؟
طيب سيبك من اهله .. هو مش حاسس انه المفروض يمتحن ؟؟

طب ما سمعش طشاش كده في التلافزيون ولا الراديون ان في امتحانات شغالة ؟؟

طب هو عارف هو في سنة كام ؟؟ بالمرة بقى

اللي يشلك بقى المذيعة تقوله طب وازاي هم ما وزعوش عليك الجدول في المدرسة ؟؟

محسساني انها ما دخلتش مدارس في مصر .. انا بقالي 13 سنة باين بتعلم عمرهم ما وزعوا علينا جدول

يمكن انا مدرستي كانت معفنة .. أي كابتن ولا كابتنة معديين هنا والنبي يبقوا يقولولي هم كان في مدارسهم بيوزعوا عليهم جداول ؟؟

ع فكرة هو مش يمكن هو اكيد :d


سيبك من اللي عدا خلينا في النقطة اللي جاية دي .. المدرس لما جابوه

المدرس بيقول .. انه بيجي ومافيش طلبة (( كان لابس جلابية وكوفية )) المهم بيقول انا باااااااااااجي والله لو في تلميذين اتنين بس هشرحلهم
فاكرة انا نفس الحلفان دا لما كنت ف المدرسة وكنا بنصدق ونروح ونبقى 8 ويهزأنا ويقولنا ايه اللى جابكوا وما يعبرناش

دا غير بقى اللقطات اللى جابوها للعيال .. مافيش وااااااااااااحد لابس زي المدرسة

وشكلهم اطفال شوارع اصلاً

وطبعاً كل شيء انكشفن وبان لما القناة راحت تصور تاني يوم وضربوا المصورين وبهدلوهم


سيبكوا من دا

هحكي لكم حاجة ع هامش المؤتمر الدولي الثاني لتطوير التعليم

ركزواااااااااااااا في الاسم

المفروض اننا (( انا ومجموعة من زمايلى في قسم الاعدام )) بننظم المؤتمر دا

تحت اشراف دكتور من كلية طب الأسنان

المهم أولاً : الدكتور مش بيحترم مواعيده نهااااااااائي الميعاد يبقى 12 يجي لنا واحدة او اتنين

ثانياً : بيعاملنا وحش جداً وبيستخف بينا جداً فلما دعبسنا وسألنا عرفنا انه بيعاملنا كده علشان كلية آداب

وفي نظره ان الكليات النظرية دي كلها مالهاش لازمة

وان اللي في كلية الاداب كلهم ( سوري يعني ) بقر

وان احنا مش فارقة اصلاً عندنا حضور من غياب علشان كده يجيبنا كل يوم اجتماع من اول النهار لآخره وما يقولش لينا اي حاجة

خلوا بالكم ان دي أفكار حد مسئول عن مؤتمر (دولي ) لـ ( تطوير التعليم ) المهـــم


تالت حاجة : دور المجموعة اللي أنا فيها ايه ؟؟

تنظيم الاتصال بين الصحفيين والمؤتمر

بنقول له يا دكتور طب في صور للي هيجوا ولا هنعرفهم ازاي

فاتكلم بقرف كده وقال هتلاقوهم قدام باب الاوضة بتاعة المؤتمر الصحفي زي الــ ............ ( وشه كان بيقول الكلاب ) بس لما برقناله

لأن كلنا قسم صحافة قال زي النمل !!!


دورنا ايه بقى ؟؟

دورنا آل ايه ما نخليش الصحفيين يكتبوا غير اللى هو عايزه يتكتب ولحد دلوقتي مش عارفة هنعملها ازاي دي اصلاً ؟؟


و ع فكرة نحن نعيش ازهى عصور الحرية احم احم

المهم بقى ع هامش المؤتمر بردو

هم عندهم خبر بميعاد المؤتمر من اكتر من شهر

والنهاردة بس دهنوا الارصفة بتاعة المجمع والنهاردة بس دهنوا حيطان قاعة المؤتمرات من جديد والنهاردة بس

بدأو يحضروا في الملصقات

وبكرة الصبح لسة هيدونوا الأي ديهات


آخر حاجة بقى فاقعة مرارتي .. بعد ما حولت من تسعين دقيقة يوميها شوفت حتة من يوميات ستار اكاديمي 6

ويااااااااااااااريتني ما شوفت

هو سؤال واحد هسأله

هي كان ناقصة مسخرة علشان يضيفوا لهم حصة سباحة ؟؟؟؟؟؟؟!!

يا خوفي لحسن يضيفوا لهم حصة تانية كده ع السنة الجاية


:-S

بالنسبة لتعليقات البوست اللى فات والله انا اسفة انا لازمن ولابد وحتما اقوم علشان احضر شوية حاجات علشان بكرة

ان شاء الله قريب ارد

بالمناسبة لو حد هيعلق ياريت ماحدش يدخل يقول لي سلامة مرارتك ويطلع علشان ما يفقعهاش اكتر ماهي مفقوعة :D



14 بوينتس أوف فيو:

mohamed ghalia يقول...

أدام إحنا فى مصر يبقى كل ده يحصل عادى !!!!!!!!!!!!!!!!!!

حياة يقول...

ابتسمى انتى فى مصر المشكلة لما الواحد يحضر شئ خارج مصر ويشوف الاحترام والنظام ويفاجئ ان المشرفين والمنظمين مصريين الغلط فين؟؟؟؟؟؟؟؟

تحياتى

عاشقه وغلبانه يقول...

من 9 سنين كانوا بيوزعوا في مدرستي جدول
اي والله
ههههههههههههههههه

سلامه مرارتك
ولا بلاش احسن تزعلي

Tamer Diab يقول...

عمااااااااار يا أوكرانيا
أنا قلتها كلمة في بوست عمااااار يا اوكرانيا
فكرتيني بحصص المدرسة لما كانوا يلاقوا 10 عيال المدرس يقول يا تنزلوا الحوش او تروحوا يا اما نعمل امتحان شفوي

وطبعا كله بيختار الأمتحان الشفوي :)
أنتي عارفة منتي اكيد كنتي في مارس زيينا كده وبتحبوا الأمتحانات وكده

والذ حاجة المؤتمر الدولي ده
الي رئيسة المفروض يبقي رئيس قاعدة صلح في أخميم ده آخره
100/100 عماااااار يا فيوم

عابـــ سبيل ــر يقول...

سلامة مرارتكـ ... ههع هع هع

بسيطة اوي يا سارة

انتي ممكن تقليلهم الـ د / فلان الفلاني بيقولنا اننا نقلكوا انه عاوزكوا تكتبوا ... كذا كذا كذا

و طوبعاً ما هيصدقوا

ليلتكـ جميلة

:D

مــحــمـود نــشــــأت يقول...

اولا يا ساره انتى اللى غلطانه
حد برضوه يتفرج على 90 دقيقه .
وبعدين لو الحكايه على ان المدرسه لو فيها اتنين بس المدرس هيشرح برضوه احنا كلنا متاكدين من كده .
فين ايام ما كنا بنبقى 10 فى المدرسه كلها ويضمونا فى فصل واحد طوب اليوم وطبعا كانوا بيكافؤنا علشان احنا شاطرين وجينا فكانوا بيدلونا اليوم كله العاب :d

وحكايه الجدول ده بصراحه انا كنت باخده على طول ايام ابتدائى .. سيبك ان عمى شغال فى المدرسه والكلام ده كله بس كان بيوصلنى على طول .

المهم بجد بقى موضوع المؤتمر ده.. والله انا فرحت لما عرفت انكوا مشتركين فى تنظيم اى حاجه والسلام .
انا بقالى سنتين فى جامعه طنطا دى اموت واشوف اتحاد طلبه ولا البتاع اللى بسمع عنها دى اللى اسمها اسره .

وكفايه كده علشان انا طولت اوى .


تحياتى

wafaa يقول...

ولا عمر جه ف بالى ان فى حد بيوزع جداول فى مدارس اكيد المذيعة دى ما دخلتش مدارس
اصل لا ده سؤال ولا تعقيب واحدة متعلمة يعنى

سمو الأميرة سارة يقول...

محمد غاليا : صحيح والله على رأيك اصل احنا بلد طنش تعيش تاكل قراقيش

سمو الأميرة سارة يقول...

حياة : اسمك جامد يا حياة على فكرة .. تصدقي معاكي حق بجد يا حياة .. بحس ان الناس في مصر بتستخسر تعمل حاجة حلوة لكن برة بيعملوا اكيد دا لأن اللى بيعمل حلو زي اللى بيعمل وحش لا دا بيتعاقب ولا دا بيتكافئ ولا ايه ؟

سمو الأميرة سارة يقول...

عاشقة وغلبانة ههههههههههههههههههه ماشى ياقمراية مش هزعل بس قوليلى مدرسة ايه النضيفة دي لحسن تكوني كنتي مع المذيعة ف المدرسة

سمو الأميرة سارة يقول...

تامر : انا كل كومنت ليك بقعد اضحك باليوم واليومين عليه ههههههههههه

بالمناسبة ع فكرة الدكتور دا اخد جايزة علشان المؤتمر علشان نظم المؤتمر شوفت اوكرانيا حلوة ازااااااي ههههههههههه

سمو الأميرة سارة يقول...

عااااااااااااااااابر منووووووووووووووور ياباشا عاااااااااش من شاف لك كومنت يابني فينك ؟

بالنسبة للحل الشديد الجامد دا ما تقلقش قومت بالواجب والله كل ماحد يلومنا ع حاجة نقوله الدكتور محمود ما قالناش نعمل ايه اه والله ودا فعلا اللى حصل مش بنتبلى عليه

سمو الأميرة سارة يقول...

محمود نشأت : اصل بابا بيحب تسعين دقيقة وكان عنده شغل فاتفرجت عليه علشان احكيه ليه هههههههههههههه ع اساس انه فيلم عربي بس والله كده فعلا اتفرجت عليه وع العاشرة مساءا علشان احكيهم لبابا علشان مش فاضي

بالنسبة للمدرسة يا سلاااااااااااااام عليك فكرتني بحصة الالعاب يا سلاااااااام احلى ايام لما كنا ناخد حصة العلوم في الحوش ونلعب شبكة الصياد هههههههههههه


الجدول بقى يا عم محمود فهعمل نفسي مش شامة ريحة الكوسة اللى كانت بتطبخ ليك في الابتدائي ياعم ويابخت من كان اللى شغال ف المدرسة عمه هههههههه

بالنسبة للمؤتمر انا كمان قعدت سنتين ماعرفش اى حاجة بس ربنا فتحها عليا في سنة تالتة بقى وشاركت وشاركت في اسرة كمان وبنعمل حملات وكده اصل جالنا دكاترة ودكتورات شباب وشابات ففي دماء جديدة مش مصدية ف الكلية

سمو الأميرة سارة يقول...

وفاء : والله جووووووووون .. بس كده :)

المتابعون

اعتبرها بيتك ♥

وِش القفص

خليك ورايا

دليفري..