2009-03-15

فلة بأربع ورقات


زماااااااااااااان واحنا صغيرين كانوا بيقولوا لنا ان الفلة اللي ليها 4 ورقات بتجيب الحظ الحلو

وكانت عندنا شجرة فل في شارعنا ، كانت هوايتنا اننا ندور على فلة بأربع ورقات

ليل نهااااااااااار طول ما احنا فاضيين او لما نزهق من اللعب ننزل ندور ع الفلة أم اربع ورقات

و ندووووووووووووخ ندور عليها ونلاقى واحدة نفتكرها بأربع ورقات

ولما نقطفها نلاقيها بخمس ورقات نزعل أوي

ويوم ما كنت بيأس خاااااااااااااااالص امسك فلة من اللي بخمس ورقات واقطع ورقة منها في محاولة لأني اقنع نفسي بانها كده فلة بأربع ورقات

بس كنت برميها وانا مش مقتنعة ، لأني عارفة اللي فيها

دلوقتي بقى قعدت اتخيل .. لو حد تاني جه بعدي وشاف الفلة ام اربع ورقات ..

قعدت اتخيل فرحته بقى قد ايه بانه عمل المعجزة ونجح في انه يلاقى الفلة ام اربع ورقات

وتخيلت بقى انى لو قابلت الشخص دا وشوفتها في ايده وشوفت فرحته بيه كنت هغير قد ايه

" يا بخته لقى اللي طول عمري بدور عليه "

رغم ان انا اللي خليتها بأربع ورقات

ورغم انها مزيفة


ورغم انها كانت في ايدي وانا اللي رميتها !!

كتيييييييييير أوي في حياتنا بحس ان احنا بندور على فلة بأربع ورقات

بندوخ نفسنا علشان حاجة خيالية او وهمية

لأن تقريباً مافيش فلة بأربع ورقات

حتى لو موجودة مش هتجيب الحظ

ولو مش موجودة يعني مش هي اللي هتخلينا نبقى منحوسين

بس احنا كده بنتربس مخنا ع حاجة معينة ونقول بس لو ماجاتش بقى يبقى انا فاشل

لو ما عرفتش اوصل لها مش هبقى سعيد أبداً في حياتي

لو ...... و لو ......... ولو ......


اوعى تتربس دماغك على حاجة واحدة وتحصر فيها سعادتك وآمالك وطموحاتك

خاصة لو كانت الحاجة دي وهمية أو نادرة أوي

خلي سعادتك في حلم ممكن

أو حتى حلم صعب


بس بلاش تخلي سعادتك متعلقة بــ " وهم " لأنك ساعتها بجد .. هتضيع

وخلي بالك .. انت تقدر بإيدك تعمل سعادتك

تقدر تعمل فلتك ام اربع ورقات

فيااااااااااااريت بعد ما تعملها ما تحتقرش اللي انت عملته

لأ افرح بيه .. افتخر بيه

اقتنع واقنع بيه

ساعتها بجد هتكون مبسوط

و ساعتها الفرحة هتديك قوة تصبرك ع الوصول للي بتحلم بيه


بس بردو خلي بالك .. ما تضحكش على نفسك وتخدع نفسك بحاجة زيفتها

وتقف بعدها محلك سر وانت مقتنع انك وصلت لمنتهى احلامك


هناك 6 تعليقات:

  1. عندك حق فعلا يا ساره
    مش عيب لو الانسان حلمه اكبر منه ميت مره . حتى لو حقق جزء صغير منه يبقى برضوه اسمه نجاح .
    بس العيب من اللى يحط الوهم هدفه له ويضيع وقته فى الوصول للهدف ده ده مش يبقى حلم ده يبقى كابوس .

    بوست جميل اوى يا ساره بجد

    ردحذف
  2. برافو عليك يا محمود جبت التعبير اللي كنت عايزة أقوله هيتحول من حلم لكابوس يفكرنا بالفشل كل ما نفتكره وبدل ما يحمسنا نطلع قدام هيجيب لنا احباط ويخلينا ورا ... نورتني يا محمود

    ردحذف
  3. كلامك شيك أوي يا ساره
    بس اهم حاجه في حلمك انك تدور عليه صح
    مش تضور على وسيله وهميه لتبرر الغايه

    ردحذف
  4. غير معرف امممممممممم مش بعرف اتكلم مع حد من غير ما اعرف ع الاقل هو بنت ولا ولد بس عامة منورني بالنسبة بقى لتعليقك فمش عارفة انا فهمتك صح ولا لأ

    هل انت تقصد انك مهم تدور على حلم صح .. حلم نبيل يعني بدل ما تقعد تدور على حاجة توهم الناس ان حلمك نبيل ؟؟

    ياريت ترد عليا تاني

    ردحذف
  5. بصى مشس هقولك الى انتى كتباه ده جه جوووووووووووووووووووووووووووووون

    زى ما بيقولوه بس هقولك حاجه انا طول عمرى متعوده انى احلم حلم كبيررر اوى علشان لما احقق جزء منه يبقى كبير برضه بس لما كبرت عرفت ان مش اى حاجه ينفع احلم بيها ولازم اعرف انا بحلم بايه وهعمل ايه علشان احقق حلمى ده ةبجد اى حاجه حققناها حتى لو جزء من الحلم لازم نبقى فرحانين اننا حققناها

    ردحذف
  6. عزيزتى سارة

    لولا الاحلام والاوهام ماتحقق للبشر ما تحقق .. فمن كان يحلم بالطيران تحقق حلمه ومن كان يحلم بالوصول الى القمر تحقق حلمه .. وغيره من الاحلام فهى لا تعد

    ولعل الاصرار على النجاح قد يجعل احد علماء الهندسة الوراثية فى انتاج فلة بأربع ورقات وهذا سهل للغاية ولكن ليس لتحقيق الامنيات فالامنيات لا تتحقق الا بالجهد والعرق والاصرار

    خالص تحياتى

    ردحذف

Say something...