لعلمك

لعلمك

إقرأ لي

دخلوا بكليك شمال :D

Blog Archive

الجمعة، مارس 20، 2009

postheadericon اممممممممم اشتغل ايه لما اكبر ؟؟

" اممممممممم اشتغل ايه لما اكبر ؟؟! "

السؤال دا فضل محيرني يمكن لحد إعدادي ، حظي الحلو اني فكرت فيه على رواقة
ولوحدي .. مافيش حد من اهلي خلاني ادخل في طريق معين سواء بالإجبار أو بالإيحاء ..
فقراري كان طالع من جوايا ، ودا طبعاً كان لأني اخر العنقود .. وكان بابا وماما مشغولين في انهم يقنعوا
اخويا يطلع مهندس واختي تطلع دكتورة هههههههههه

طول فترة الطفولة كنت انا بقى بجرب .. كل كام اسبوع بجرب شغلانة
جربت اكون دكتورة وكنت شارية شنطة الاسعافات الاولية اللعبة بتاعة العيال دي
وكنت بصراحة ما بحبش الكشف قد ما بحب اكتب روشتات .. اصلي ما كنتش بلاقى حد اكشف عليه كلن الروشتات سهلة ههههههههههه

وفترة تانية كن مغرمة باني اكون سكرتيرة .. افضل اكتب حاجات عجيبة في ورق
وألم تليفونات البيت كلها واحطها جنبي واقعد ارد عليها بقى وانا منهمكة في الشغل

وجاتلي فترة كنت بحب أوي اشتغل صراف بنك وأقعد اصرف في ورق النتيجة بكل استمتاع

و بعد كده لما دخلت المدرسة كنت مغرمة بأني اشتغل مدرسة .. كنت بقلد الأبلة بتاعتي اللي بكرهها أوووووي
وكان عندي سبورة صغيرة وبجيب طباشير واقعد اشرح للمخدات واللي تتغابى او الاقيها مش مسرحة شعرها كويس
بنزل فيها ضرب لحد ما تحرم هههههههههه وكنت بلبس المخدات توك هههههههه

( الغريب بقى اني لما كبرت ودخلت ادبي ع عكس رغبة بابا ، قالي خلاص ادخلى تربية واشتغلي مدرسة
رفضت وكنت بدعي ربنا ليل نهار ما ادخلش تربية ، ويوم الرغبات حطيت حقوق وماحطيتش ولا واحدة تربية
لأن المجموع كان يجيبها فخفت اتدبس فيها وساعتها كنت ممكن يجرالي حااااجة )

وشوية كمان لما بدأت اقرا لأدهم صبري في رابعة ابتدائي كنت هموووووووت واشتغل ظابط ، وكالعادة جبت العدة بتاعة الظباط ..
كلابشات ومسدس و الحاجات دي وبعدين لما لبست نضارة بين رابعة وخامسة ابتدائي احلامي انهاااااارت واملي اتحطم .. لأني كنت عارفة
ان اللي يلبس نضارة ما ينفعش يدخل الجيش
( طبعاُ على اساس ان البنات اصلا بتدخل جيش او ان الظباط بيطلعوا من الجيش مش
من كلية الشرطة ههههههههه )

وفي اعدادي الامل اتجدد بقى .. بردو لقيت الحل في أدهم صبري ، قررت اشتغل زي ( قدري ) مزورة في المخابرات
وفعلاً بدأت ادرب نفسي بقى ( اشمعنى ادهم اتدرب من وهو طفل .. ماحدش احسن من حد هههههههههه ) وكنت بزور بطايق حلو أوي
كنت طول الاجازة اجيب فرخ ورق مقوى وامسك بطاقة اختي واقعد اقلدها بالظبط .. واعمل ختم وبصمة وكل حاجة

وفي الحقيقة الموضوع دا نفعني بس في شهادة امتحانات الشهر اللي كان بابا بيشوفها في الشهور المشرقة بس
أي عك انا اللي بمضي عليه ههههههههههه ونفعتني في ثانوي بردو ايام ما كنت بظبط ورقة الغياب للعيال في الفصل ههههههه

بعد شوية كنت بتعذب بجد .. كان نفسي ابقى كل دول .. دكتورة ومزورة وسكرتيرة وكل حاجة .. واحترت اشتغل ايه
فيهم .. وفي الاخر اهتديت للحل .. قررت اني اكون ممثلة علشان لما امثل هينفع اكون كل دول .. مرة دكتورة ومرة ظابطة ومرة سكرتيرة
وكل اللي في نفسي هههههههههه وبصراحة مش فاكرة ايه المعجزة اللي خليتني اطلع الفكرة دي من دماغي هههههههههه

اه صحيح نسيت أقولكم اني في فترة كنت قررت اكون " راقصة بالية " او " راقصة استعراضية " كنت بمووووووووت في الحركات الهبلة
بتاعة البالية و كنت بجيب طرحة طووووووويلة اطير بيها والف حوالين نفسي فتطير وتعجبني أوي هههههههههه
حتى بابا كان مسميني " اوبرا عايدة " بسبب الموضوع دا هههههههههه
(( كنت ناوية اجيب لأهلي العار شكلي كده ههههههههههه ))

وفي فترة من الفترات كنت بحب اووووووووي اعمل مذيعة .. كنت بجيب ايد الهون الخشب واعملها مايك هههههههههه وطبيعي انا المذيعة
والضيف والمخرج وكل حاجة في نفس الوقت .. طبعاً نحن نختلف عن الآخرين هههههههههههه

وفي فترة مستوايا المهني خد خط تاني خاااااااالص ..

كنت معجبة أوووووووووي ببياعة الطعمية والفول .. فضلت اروح اشتري منها سنييييين
واقف ساكتة اتفرج عليها وانسى اقولها انا عايزة ايه ..
بس قاعدة اتفرج عليها وهي بتعمل الطعمية وبتلف القرطاس
وبعد سنييييييييييين من الفرجة عليها .. ما اتعلمتش غير لف القرطاس هههههههههه

أما بقى السبب اللي خلاني استقر في بلاط صاحبة الجلالة فهو " فيلم بطل من ورق " بتاع قشوووووووووووع .. لما كانت
آثار الحكيم طالعة فيه صحفية وكانت بتتبهدل وتطلع عينها واتخطفت وكانت هتتقتل وكده
لقيت الشغلانة فيها كل حاجة بتمناها .. اثارة وبهدلة واختلاط بالناس وتجديد ومافيش روتين

فوقعت في غرامها الي يومنا هذا ..




23 بوينتس أوف فيو:

wafaa يقول...

ههههههههههههههههههههه
ده من حسن حظنا يا افندم

blue-wave يقول...

هههههههههههههههههههههههههه
صباح اللسعان:))
بجد خفة دمك رهيبه:))
بس كله الا حكاية مزورة زى قدرى دى:))
بس بجد بقى
كلنا فى مرحلة الطفوله بيكون جوانا احلام لحاجات كتيرة اوى
وفى النهايه مش بناخد غير اللى ربنا كاتبه
والمهم انك تحب اللى بتعمله وتثق فى نفسك وتحاول دايما تكون احسن فى مجالك
تحياتى سمو الأميرة المتمردة الاسعه:))

عندما تكون ميمى وحاجات كتير مع بعضها كده يقول...

من هذا لموقع اعترف واقر ان الى خلانى ادخل كليه حاسبات كنت سلسله ادهم صبرى
كان فى مهندس اسمه شريف مهندس كمبيوتر وعبقرى وبتاع وكان عاجبنى جدا الشخصيه فدخلت كليه حاسبات بس حبيتها اوى اوى بس اصلا كان نفسى اطلع مهندسه ديكور ههههههههه

مــحــمـود نــشــــأت يقول...

والله يا ساره انتى تتحسدى
كويس جدا انك قدرتى تحققى اهم خطوه من هدفك وهى معجزه دخولك الكليه اللى انتى عاوزاها .

ربنا يوفقك فيها ان شاء الله

صانعة الأحلام يقول...

تصدقص انا بردة لفيت على كل الشغلانات دي
منها بردة الصحافة
بس انا كنت بقى معجبة بشخصية العالم اللي الناس بتقول عليه مجنون وهو عبقري وهما اللي اغبيا

فاستقريت في هندسة

اخوها يقول...

بس علي فكره بابا كان عايزني اطلع دكتورررررررر بس انا كمان خيبت امله وطلعت مهندس وكمبيوتر كمان مش مدني وبعدين انتي ما اتكلمتيش عن ضحياكي من المخدات وماجبتيش سيره العصايه اللي كنتي بتعذبيهم بيها (اشمعني دي نسيتيها يعني ) انا الله ستير حليم

أحمد منتصر يقول...

يا سارة اشتغلي أي حاجة فيها كلام إنتي بربنط :)

نهى يقول...

والله عندك حق دايما الواحد بيتمنى حاجه وميعرفش ان ربنا دايما شايله الشغلانه اللى تناسبه واللى تناسب قدراته اما انا فوقعت فى غرام صاحبة الجلاله بعد ما لقتنى فى بلاطها لانى عمرى ما تخيلت انى اكون صحفيه وحتى لما كانت تساورنى الافكار بحبها كنت اقول بس ازاى وانا علمى وكعادة البيت المصرى مريض بوباء كليات القمه والطب والهندسه لكن لفت الايام ولقتنى فى بلاطها ولقتنى بعشقها وبجد بقدرها وربنا يوفقنى وتقبلنى نقطه فى حروفها

أحمد يقول...

ياه هو الباليه
واوبرا عايده بقت بتجيب العار
أنها نهاية الحضارة فعلا

سمو الأميرة سارة يقول...

وفاء .. ربنا يكرمك ياااااارب دا من ذوقك

سمو الأميرة سارة يقول...

بلو ويف : ربنا يكرمك يااااااااااارب دا من ذوقك بس

معاك حق بالنسبة لأحلامنا وكتير اوي لو ربنا حقق لنا اللي بنتمناه ممكن نندم خاصة واحنا لسة صغيرين ونظرتنا للدنيا محدودة وخبرتنا كمان

سمو الأميرة سارة يقول...

ميمي والحاجات الكتير : ههههههههههههههههههههههه مش انا لوحدي بقى بس كان فين شريف دا يا ميمي انا ما اخدتش بالي منه خالص في السلسة اصلى بطلت من العدد مية حاجة وخمسين اقرا ادهم صبري

سمو الأميرة سارة يقول...

محمود نشأت : انا ماكنتش عاوزة الكلية دي والله يا محمود كنت عايزة اعلام ومجموعى ما جابش فدخلت بديلتها .. فبلاش تيأس ولو تاهت منك خطوة حاول تلقى طريقك في الخطوة اللي انت فيها .. الطرق كلها بتؤدي الى روما بس انت دعبس كويس

سمو الأميرة سارة يقول...

صانعة الاحلام : شكل الجيل كله كده يا كوكو ولا ايه هههههههههههههه

اكلمك كلمتين جد يا كوكو بقى

مش معقول هو اي نعم عبقري بس بردو غبي في انه ما قدرش يقنع الناس بيه ولانه ما قدمش حاجة تفيد الناس عمره ما كان هيقدم حاجة تمس الناس وهيقولوا عليه مجنون :)

سمو الأميرة سارة يقول...

أخوياااااااااااااا : منوووور يا مودي منوووووووووور اوي بالمخدات كمان الصراحة ههههههههههههههههه خلاص بقى هقول ايه بعد اللي قولته قفل ع الموضوع قفل الناس هتاخد عني فكرة صح ههههههههه

سمو الأميرة سارة يقول...

منتصر : اهو نقكوا دا اللي جايبنا لورا ههههههههه

سمو الأميرة سارة يقول...

نهي : مدام بتحبيها يبقى اكيد ان شاء الله هتوصلي فيها وهتوصلي لفوق اوي ان شاء الله .. منورة يازميلة البلاط :)

سمو الأميرة سارة يقول...

اسم النبي حارسه احمد : اه بقى هي دي دماغي
متخلفة متخلفة انا عايزاها متخلفة
ماهو ما تحاولش تقنعني ان الحضارة هتنتهى لو الكام بنت بتوع الباليه بطلوا رقص
دلوقتي عرفت بجد معني يجوا في الهايفة ويتصدروا

واعتقد انت عارف كويس اوي انا ليه برد عليك بالاسلوب دا وان كنت بجد مش عارفة انزل لمستواك

عندما تكون ميمى وحاجات كتير مع بعضها كده يقول...

اصلا كانت حلقات ميه وستين واصلا هو مات فى وسط لحلقات دى انا كنت ناويه اخد بتاره ههههههههههههههههههههههه

سمو الأميرة سارة يقول...

ميمي ههههههههههههههههه تصدقي انا بطلت اقرا علشان قالولي في مرة دا ادهم مات خلاص قولت لأ مش هقراها ما بطيقش عارفة انا كنت بمسك سلسلة المكتب رقم 19 واشطب ع اسم البطل واكتب فوقيها ادهم واقعد اقراها هههههههههههه

kafrawy يقول...

انا كان نفسى اطلع ظابط امن دوله


ههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه

البحث عن أنا شىء جنونى يقول...

هههههههههههههههههههههههه

دمك زى العسل

وطبعا احنا مش بناخد غير اللى ربنا كاتبه

بس بجد ماشاء الله عليكى اخدنى اوى الحوار الجامد ده :)


دمتى بكل عطاء مع كامل احترامى

وميض ابتسامة يقول...

بصراحة الحوار بينك وبين نفسك اكثر من رائع وفيه جانب فلسفى ساخر غير عادى
وانا شايف ان هذا النوع من الكتابة مفيد الى حد ما .. وممكن يلاقى اقبال لو تنوعت فيه الاحداث المثارة .. واعتقد انك تملكين القدرة على توظيفها فى هذا الاطار الظريف

تمنياتى لك بدوام التفوق

المتابعون

اعتبرها بيتك ♥

وِش القفص

خليك ورايا

دليفري..