2009-03-29

هتتكلم .. هتتشرح !

(( بص ياعم الحاج انت زي والدي .. وانت راجل طيب وأكيد المرحوم كان طيب وغالي عليك ..

انا علشان بحبك بس هقولك كده ، رغم ان دي مسؤلية عليا ولو حد عرف هيبهدلني بس انا بحبك ..

آي والله بحبك لله في لله كده وانت صعبان عليا .. أنا هكتب للمرحوم ع خروج وخده من سكاااااااات كأنه عايش

علشان ما يتبهدلش .. دا هيتشرررررررح .. اكرام الميت دفنه والبقاء لله ))

- بس ابني دخل هنا عنده نزلة معوية .. وكان بدأ يتحسن قبل ما الدكتور التاني يجي يحط له الدوا الغريب دا في المحلول

يعني الدكتور دا قتل ابني .. اسكت ازااااااي ؟؟

(( آآآآه شكلك هتتعبنا معاك وتتعب نفسك يا عم الحاج !

انت مش مؤمن ولا ايه ؟؟ ابنك كده كده كان هيموت .. عمره كده نعملك ايه يعني ؟؟

وافرض ان الدكتور السبب .. لو ابنك اتشرح وثبت ان الدكتور السيب .. ابنك هيرجع تاني ؟؟ هه هيرجع تاني ؟؟

يااااااااااا حاااااااااااج .. اكرام الميت دفنه يا حاج .. ولا ايه ما تقولى حاجة يا حاجة ؟؟ ترضي ابنك يتشرح ويقعد يتعذب

وبيقولك الميت بيحس بكل حاجة .. ترضي لابنك البهدلة يا حاجة ؟؟ ))

- لألألألألألألألألألأ .. لأ والنبي يا حاج .. اسمع كلامه يا خويا

هو عمره كده هنعمل ايه ؟؟

اسمع كلامي ياحاج ما تحرقش قلبي زيادة .. انا قلبي والع نار ع ضنايا

آااااااااااااااااااااااه يا حبيبي يابني .. كان مستخبيلك دا كله فين يا بني يا ضنايا

[ STOP ]

المشهد دا بيتكرر عشرات المرات في مستشفيات مصر ..

كل ما حد يموت ، ولو حتى كان السبب اهمال طبي او دوا غلط

يقولوا لأهل اللي مات (( هتتكلم .. الجثة هتتشرح ))

وبس .. الاهل بيسكتوا كانهم اتخرسوا ساعتها

لو لاحظنا الدكتور اللي في المشهد اللي فوق لعب ع 3 اوتار

أول وتر : حنية الأب وانه مش عايز يبهدل ابنه ولا يهينه

تاني وتر : الدين .. اكرام الميت دفنه و الايمان بالقضاء والقدر والايمان بان الاعمار بيد الله

تالت وتر (( ودا اكتر واحد مضمون )) : حنية الأم وعاطفتها اللي هترفض البهدلة لأبنها وهتقدر تضغط ع الأب

حى لو اللي مات راجل كبير ومالوش اب وام بييلعب ع وتر ابنه وبنته اخوه ومراته كده يعني

وكتييييييييييييييير أوي دكاترة بتفلت من العقاب بالحركة دي

مثلاً طفل دخل المستشفى يتعالج م ( لا مؤاخدة يعني ) الاسهال طلع ميت !!

طفل دخل يتخلع له ضرس أو سنة مات من التخدير !!

وكتير وكتير .. وكله بيعدي لأن كله خايف م التشريح

نفسي الناس تقتنع بــ 3 حاجات وهي هتبطل تتنازل عن حقها

1 / ان ربنا قال فيما معناه ( ولكم في القصاص حياة يا أولي الألباب )

2 / انه لا يضر الشاه سلخها بعد ذبحها

3 / انه ممكن انت نفسك تموت بإيد نفس الدكتور لو فضل في مكانه من غير ما يتعاقب

آخر حاجة .. ودي بردو ممكن تكون من ضمن الاسباب اللي بتخلي اهل الفقيد يتخلوا عن حقهم

وهي الكووووووووووووسة و احبال المحاكم ودول مش محتاجين تفسير

هناك 14 تعليقًا:

  1. عندك حق الكوسه وحبال المحاكم مش محتاجين أى تفسيررررررررررررررررررررر

    ردحذف
  2. فى مره فى فيلم بنت قالت كلمه حلوه اوي قالت انا موافقه امي تتشرح واجرها عند ربنا علشان اوصل للحقيقه واثبت ادانه المستشفى فى عمليات السرقه وفى انهم قتلوها بس خلاص

    ردحذف
  3. والله معاكى حق
    اهى كوسة بقى
    حسبى الله ونعم الوكيل

    ردحذف
  4. جزاك الله خير
    ياريت كل الننناس تفهم الكلام ده الدنيا هاتتغير اكيد
    لو كلنا ما اتنازناش عن حقوقنا المهمل حايعرف انه مش هايهرب من العقاب فمش هايستهتر ويجرب في الناس
    تحياتي

    ردحذف
  5. كلاكيت للمرة المليون
    حد بيتكلم عن اهمال المستشفيات من غير ما يكلف نفسه ويبحث فى الموضوع بدل ما يقرا ويردد كلام الجرايد وخلاص
    اكيد فيه اهمال فى المستشفيات زي ما فيه اهمال فى اى حته فى البلد دى مش هانكر
    لكن
    لما يكون فيه دكتور واحد مسئول عن 100 عيان
    لما يكون التمريض فى مستوى تعليمى يخليه مايعرفش الفرق بين المضاد الحيوى والمسكن
    لما يكون قلة عدد التمريض بتخلى بعض العمال هما اللى يدوا المرضى العلاج
    لما تكون امكانيات المستشفى محدودة ومفيهاش معامل ولا تحاليل تساعد الدكتور على اكتشاف المرض وتشخيصه وعلاجه
    لما يكون الدكتور بيطحن 24 ساعه مقابل 8 جنيه ومطالب انه طوال ال 24 ساعه دى يكون مركز ف كل دقيقه منهم علشان دى ارواح ناس
    بعد كل دا نرجع ونتهمه بالإهمال برضه؟؟؟
    ياريت نفهم ونسأل ونبحث فى اى موضوع قبل ما نردد اى كلام وخلاص

    ردحذف
  6. عن الكوسه و القرع و البتنجان

    احدثكم ............

    ردحذف
  7. محمد غاليا : الكوسة تتكلم عن نفسها هههههههه

    ردحذف
  8. آبي : صح الكلام دا في فيلم الغرفة 707 انا كمان علقت معايا الجملة دي اوووووووووووووووي وعجبتني اوي

    ردحذف
  9. بسمة أنور : وكمان تساهل مننا يا بسمة واستسهال

    ردحذف
  10. فكرة من الزمن دا : مظبوط هو دا .. اللي عارف انه هيتعاقب مش هيتهاون ولا هيستهتر وهيفكر الف مرة قبل ما يغلط .. وكمان الناس لازم تعرف انه حتى لو ماتوا حقهم هيجي مش هيروحوا فطيس

    ردحذف
  11. بلو ويف (( دكتور عمرو )) معاك حق يا دكتور اكيد في اسباب تانية وانا نفسى شوفت الامكانيات اللى في المستشفيات العامة والمعاملة اللي الطلبة بتوع طب بيتعاملوا بيها وعاذرة ومقدرة لكن انا موضوعي مش عن اهمال الدكاترة انا موضوعي عن تفريط الناس دي في حق اللي مات واكيد بردو رغم اي ظروف الدكتور كمان غلطان .. واي مهنة فيها كده .. زي ما في دكاترة مهملين في صحفيين حرامية ومنافقين ونصابين و ...... و......... و .........

    ردحذف
  12. حاجة كمان يا دكتور عمرو مش المريض الغلبان اللي مش لاقى ياكل هو اللي بيقبض الدكتور 8 جنيه مقابل الاربعة وعشرين ساعة .. فدا مش عذر ابداً

    ردحذف
  13. كفراوي باشا .. الميكروفون معاك هههههههه

    ردحذف
  14. مقبلش سحلوس حتى لو كانت حاجة حلوة
    قال سحلوس قال

    ردحذف

Say something...