2009-04-29

قبل الآوان



ياقلبي يا اللي كبرت قبل الآوان ..

يا هل ترى هتموت ..

بردو قبل الآوان ؟؟

- يمكن

- لا أكيد .. القلب من نزفه مات من زمااااااااااااااااااان

2009-04-28

شــهـد

شهد بنوتة عندها سنتين ونص تقريباً اتعرفت عليها النهاردة

بنوتة زي السكر مش بتبطل حركة وتنطيط

بقينا اصحاب بسرعة لأن فينا صفات كتير شبه بعض

انا وهي بنحب القطط أووووووي وهي كمان عندها قطة اسمها " لالا " وهي كمان زيي بتحب المرجيحة أوي

وزي ما تكون عايزة الزمن يفضل كده يمرجحها بين ورا وقدام بس من غير ما تقعد ورا ولا تقعد قدام

دردشنا كتير أوي ولعبنا كتير أوي واسمى كان طالع من لسانها زي العسل

واتفقنا اني هروح معاها البيت في يوم

وهشوف لالا والعب معاها

وبعد ما نخلص هتيجي هي عندي تتمرجح ع المرجيحة الكبيرة

واتفقنا انها ما تحاولش تشيل الفراشة اللي في ايديها

اللي ليها جناح ابيض وجناح اصفر

بس هي قالت لي بس دي فراشة وحشة علشان لما بتني ايدي كده بتشكني

قولتلها علشان لما بتتني ايدك بتبقى هتموتيها فهي بتنبهك

بس ياترى لما اشوف شهد تاني هتقدر تشوفني ؟؟

وياترى شهد هتقدر تشوف ولاد لالا اللي بتحلم بيهم

هتقدر بعد كده تشوف أخوها عمار وتكبر زيه كده ؟؟


شهد مريضة بالسرطان في شبكية العين

من وهي عندها 9 شهور

مامتها بتقول لو جلسة الكيماوي والليزر ماجابوش نتيجة هيستأصلوا عنيها

بجد انا مش متخيلة شهد من غير عنين

مش متخيلاها مش هتقدر تشوف الدنيا بعيونها الواسعة الحلوة

ولا متخيلاها بتعيط علشان لالا وحشتها ومش قادرة تشوفها رغم انها لامساها

أكيد في حل ان شاء الله

نظرة عيون شهد بتقول في أمل

ضحكتها الصافية رغم الألم بتقول في أمل

شوفت كتير زي شهد وأصعب

محمد في سنة أولى بس مش بيروح المدرسة علشان هو بيروح للدكتور

بس واثق ف ربنا وقال لي انه بيحب ربنا قد البحر الكبييييييييييييييير أوي

و كان واثق أوي انه هيروح المدرسة السنة الجاية

محمد كان عايز يطلع عسكري

بس اتفقنا انه هيطلع مهندس علشان هو شطور وبيعرف كل حاجة بتشتغل ازاي مهما كان اول مرة يشوفها


لكن واحنا ماشيين غير رأيه وقرر يبقى ظابط مش عسكري

وحكى لي عن بدلة الجيش بتاعته اللي هيلبسها لما يكبر

أكيييييييييييييييييييد ان شاء الله هيخف ويكبر

ثقته في ربنا بتقول في أمل


أما منة فهي لسة سنة ونص .. لسة بترضع

مامتها لما قولت لها بكرة تكبر وتبقى عروسة بس اعزميني ع فرحها

ضحكت بمرارة وقالت لي وهي اللي عندها مرض زي دا هتكبر ولا ليها جواز ؟؟

بس فرحت أوي واقتنعت بكلامي لما حكيت لها عن ناس كانت عيانة وفضلت عيانة سنين وخفت في الآخر وبقت زي الفل

حسيتها عايزة تطير ف السما وعنيها لمعت من تاني


نصي كان مصدق كلامي ونصي كان مكدبه بس شكلي قدرت أبان قدامهم واثقة في كلامي

وأنا واثقة في ربنا وبس

واثقة انه زي ما سيدنا محمد قال ان الدعاء ممكن يغير القضاء

واثقة ان طول ما احنا عايشين لازم نكون عندنا أمل

دعواتكم لكل حد زي شهد وزي محمد ومنة وعمار وسعد وأمير وجمال وهدية ومنى و.................. كل الأطفال اللي الألم حارمهم من طفولتهم لكنهم بيقاوحوا وبيحاولوا يعيشوا الحياة غصب عن عين المرض

دعواتكم ان ربنا يرحمنا ويحمينا من المرض دا

واحمدوا ربنا اننا الحمد لله سلام معافين

رجاء اخير لو حد قدر يكمل كلامي لحد هنا

بلاش وانت رايح تزورهم تبص بشفقة

بلاش قلبك يحس بالشفقة علشان هم اطفال عندهم ردار وكمان مبتلين يعني الردار اقوى

روح وانت واثق في ربنا

روح وانت عندك أمل

يمكن تنقل لهم عدوى الأمل


اسمع من هنا

جزء من دردشتي مع محمد


ودا كمان جزء مع محمد

ودا جزء من دردشتي مع شهد

2009-04-13

ايه الرخامة دي ؟؟




خبر رخم أوي بصراحة «الأوقاف» تواصل حملتها ضد «النقاب» وتنظم حملة توعية غدًا للموظفات المنتقبات

محسسني ان النقاب دا حاجة مؤذية ولا حاجة ؟؟

انا مش منتقبة ومش بفكر حالياً اني البس نقاب لكن بتضايق بصراحة

دي حرية شخصية انتوا مالكم ؟؟ مضايقنكم في ايه ؟؟ مش المفروض ان البلد فيها حرية ما تسيبوهم يعملوا اللي هم عايزينه

هم خلاص يعني وعوا الناس بكل حاجة وجات ع النقاب ؟؟ وهو اصلا النقاب حاجة غلط وتستاهل (( حملة )) من الأوقاف عليه ؟!!


مابين مش عارفة ايه ومش عارفة ايه .. والله مالاقية عنوان

كان في فكرة في دماغي من فترة كبيرة وكبرت اوي واستفحلت امبارح والا اعملها


وهي (( جروب للمطالبة بإلغاء صفحات اخبار الحوادث من الجرائد )) ومن اسبابي اللي بطالب بالغاء الصفحات دي


كان اننا نقلل من العنف في المجتمع شوية ومن الخوف اللي الناس بقت عايشة فيه بسبب تهويل الجرايد للاخبار دي


والمبالغة فيها


اوم ايه ؟؟ بالليل وانا بتفرج ع العاشرة مساءاً انصدم


بنائب مجلس شعب قدم طلب للجنة الاقتراحات والشكاوى في مجلس الشعب بيطالب بان تنفيذ حكم الاعدام في المجرم اللي ارتكب جريمة اغتصاب تكون علنا ع التليفزيون !!


انا مش معترضة ع انهم يستاهلوا الحرق اصلا مش الاعدام بس


بس ازاي نشوفهم ع التليفزون ؟؟ اذا كان صدام حسين اللي الناس بتعتبره مجرم حرب وأباد قرى كاملة ويستاهل ويستاهل - من وجهة نظرهم - اتألموا لما شافوا مشهد اعدامه


انا نفسي حسيت كاني أنا اللي بتشنق ؟؟


المصيبة كمان ان حضرة النائب بيقول ان دا تطبيقاً للشريعة الاسلامية اللي بتقول ان حد الزاني الرجم وان لازم (( يشهد عذابهما فئة من الناس )) .. يقولوا له طب ماهو فعلاً بيشهد اعدامه طائفه من الناس

المفتي و عشماوى ومأمور والناس دي


يقول أبداً علشان نردع الناس


ياعم تردع الناس مين .. انت كده هتسرعهم مااااااااافيش فايدة


طيب ياعم والعيال يقولك العيال بيناموا من 8 العشا ؟؟


8 العشا عايش في انهي عصر دا ؟؟؟



أنا هلخص رأيي في الموضوع كله وفي كلام النائب في كام نقطة

1 / الشريعة الاسلامية - اللي هو واخدها حجة وبيتحجج بيها كل شوية - متسامحة اكتر من كده بمليوووووووون ألف مرة وربنا أمر ان طائفة من الناس تشهد عذابهم مش كل الناس وإلا كان ربنا أمر وقال بوضوح يشهد عذابهم كل الناس والشريعة الاسلامية بتنهي عن التشفي في الانسان أيا كان وبتنهي عن التمثيل بجثث الموتى حتى لو كانوا من الاعداء

في واحد اتصل امبارح وقال جملة حلوة أوي قال (( ان عقوبة الجلد تطهر الزاني من الذنب )) يعني بالقياس الشخص اللى اتعدم واتجازى دا يعتبر انه بقى مطهر من الاثم فبالتالي ما ينقعش نشمت فيه ونشوفه متدلدل من حبل المشنقة

2 / مع الوقت الناس هتبقى تبلدت خلاص ومش فارق معاها لو شافت مليون واحد بيتعدم مش هيتهز لها شعرة وبالعكس دا ممكن يسهل الموضوع للناس

3 / غالباً اللي بيرتكب جريمة الاغتصاب بيرتكبها وهو شبه مغيب اما بسبب الشهوة والشيطان اللي بيركبه واما بسبب المخدرات وطبعاً في الحالتين مش هيفتكر اللي شافهم اتعدموا


4 / غالباً اكائنات اللي بتغتصب البنات دي بتكون متصعلكة في الشارع ليل نهار او في وكر مخدرات ولا بدروم هيشوفوا فين وامتى المحكوم عليهم والحكم بيتنفذ ؟؟

5 / واحد من الضيوف كان بيقول للنائب ان اغلب الدول المتحضرة دلوقتي عايزة تلغي عقوبة الاعدام نيجي احنا كمان غير اننا بنعدم نطالب بالاعدام علنا ؟!! قال له يعني نعمل زي الغرب بقى وناخد منهم السماح بالحرية الجنسية وزواج المثليين و..... و ......

مش عارفة ازاي دا يبقى فكر نائب في مجلس الشعب ؟!! ليه معتقد اننا مدام هننقل حاجة من الغرب يبقى ننقل كل حاجة
ليه ما ناخدش الحلو ونسيب الوحش ؟؟ ليه كل حاجة ناخدها (( شروة واحدة ))

دا مش معناه موافقتي على الغاء الاعدام لأن في ناس فعلاً تستحق الاعدام لكن اعتراضي هنا على فكرة اننا لما ناخد من الغرب نلغي عقلنا ويا ناخد كله يا ما ناخدش وبنقعد نقول كده وفي الآخر بنتنيل ناخد الوحش بس


6 / نفس الضيف بيقول له دي حاجة وحشية بيقول له يعني هو الاغتصاب اللي مش بشع ووحشي !!

طب هو احنا بنتعامل بأي عقل دا اللي يقول ان الغلط يتعالج بغلط ؟؟

7 / الراجل بيتكلم كأن هو دا الحل الوحيد والمثالي والرادع واللي مش عارف ايه لمشكلة الاغتصاب ونسى أو تناسى انه المفروض يعالج باقى البلاوي اللي اتسببت في ان المشكلة دي تزيد

العقوبة عمرها ماكانت بتوصل لاعدام من سنييييييييييييييييين وماكنتش الظاهرة متزايدة زي دلوقتي ودلوقتي رغم ان العقوبة وصلت للاعدام الا ان الجرايم دي بتزيد يبقى المفروض يعرف ان مش العقاب لوحده هو الحل



2009-04-07

وقطفت الرمش




دلوقتي بالظبط بالظبط

يوم 7 ابريل

الساعة عشرة الا ربع

انا بلعب ف الوقت الضايع بين الـ 19 سنة والعشرين سنة

حاسة اني بكبر والسنين بتتسحب من بين ايديا

بس إلى حد ما راضية عن ايقاع حياتي

قطفت رمش واتمنيت امنيات كتيرة

مش عارفة هتتحقق ولا لأ

وأصلاً لو اتحققت هبقى مبسوطة ولا لأ

بس الأمنية اللي بجد نفسي تتحقق

إني نفسي بكرة اشوف كل الناس اللي بحبهم وفي نفس الوقت بيحبوني من قلبهم

مش ناس بحبهم ع فاشوش وهم ما يستاهلوش


ونفسي اشوف بناتي الأربعة

ونفسي بكرة ما تحصلش حاجة تزعلني أبداً


ونفسي مافيش ولا بالونة تفرقع في وشي وانا بنفخها

والمصاصة تطلع من غير لبان علشان بيبقى مجلد

والفيشار يطلع مملح ومقرمش في نفس الوقت

وايه كماااااااااااان

آه نفسي ................................................

ونفسي كمان .....................................................................


قولوا آمين

:)

2009-04-06

يوميات صحفية تحت التمرين


الصحافة قالوا عنها مهنة البحث عن المتاعب

عملت نفسي شجيعة وقلت نحن لها

قلت هى محتاجة ايه يعنى ؟

شوية نشاط وشوية خفة حركة

وشوية برود وتباتة

(( ايوة اكيد امال هنزن على دماغ الزبون ازاى لحد ما يقر ))

المهم لأنى عاشقة ترابها

قررت اقتحم المجال دا

بجد لقيته صعب بدرجة رهيبة

بس لذيذ بطريقة لا يمكن تخيلها

والصحافة اجمل مافيها انها بتتعامل مع الناس

فكل يوم .. وممكن كل لحظة بتلاقي نفسك جوا حكاية جديدة

حكاية تفرح وحكاية تزعل وحكاية تجيب الضغط

هحكي كل شوية كده عن حكاياتي وانا صحفية تحت التمرين


وهبدأ من الصفر ..

((( ازاى الاقى جريدة اتدرب فيها )))

دا كان اول هدف ..

انا وصاحبتى عندنا امل كبير شوية

رحنا بكل ثقة وبكل فكاكة

على مكتب الاهرام

ودخلنا دخلة جامدة

بصراحة شفنا ناس قلنا لو دول صحفيين

يبقى الشغلانة مش جايبة همها

المهم قابلونا بحفاوووووووووة ((((( احم احم لازم نقول كده عشان منظرنا يعنى )))))

وادونا ميعاد مع مدير المكتب

قالولنا بصوا انتوا ماتجوش تانى انتوا اريحلكم اتصلوا بيه


نتصل امتى ؟

بعد الساعة 4.5


روحنا البيت وكلنا امل فى الحياة

واحلام

وكل واحدة سجلت التاريخ فى اوراقها

وعشنا فى الدور


وفى الاخر عرفنا سر 4.5


بكل بساطة 4.5 المكتب بيقفل

والتليفون يرن يرن

يرن يرن

يرن يرن

يرن يرن


(((( حاضر هانجز اهو بلاش ضرب )))

يرن يرن

يرن يرن

ومااااااافيش اى امل




وكانت اول صابونة ناخدها فى حياتنا

واحنا لسة ياعينى شباب زي الووووووووورد

بعد كده اخدنا على الغلاسة والتباتة


وكل مانقابل جريدة

ندخل نرخم

ونسألهم على تدريب


لحد فى يوم من ايام الاسبوع

وشهر من شهور السنة

لقينا تدريب


الناس قابلونا بجد كويس

وشفت لأول مرة فى حياتى


(((( رئيس مجلس الاداااااااااااااااااااااااااااارة ))))



كفاية كده النهاردة

بكرة نحكى تانى

لحسن تزهقو ا من الرغى
بعد ما قابلنا الناس الجدعان دول قررنا نشتغل بقى

بعد كام اجتماع نظرى دخلنا فى الجد

وهانشتغل بجد

ماكناش مصدقين نفسنا ؟

وااااااااااااااااااو هنشتغل صحفين ؟

هنقابل ناس ؟

هنقول اللى فى نفسنا ؟

كان بجد اسعد ايام حياااااااااتى

جزء من الشغل اللى هنعمله هو زيارة دار ايتام

بمناسبة يوم اليتيم

رحنا زرنا دار فى يوم اجازة

عشان نقابل الاطفال

كان تانى يوم بعد يوم عيد اليتيم

رحنا الدار من طريق غلط

فبدل ما ندخل من الباب الامامى


رحنا من باب الجنينة

المهم واحنا بنرن الجرس

سامعين الاطفال بيشتغلوا فوق

بينضفوا الدار

وزعيق وكده

بس لما جات الدادة تفتح الباب وعرفت احنا جايين من اى جريدة



كل الاصوات هسسسسسسسسسسسسس


وقالتلنا قابلوا مديرة الدار

الست قابلتنا وحش جدا

وبصدة نفس

ومش عايزة تتكلم

لما كنا هنعيط خلااااااص

وبعدين قلنلها طب عايزين نقابل اطفال


الست وشها جاب الوان وقالتلنا لأ اصلهم نايمين

مرهقين يا حبايبى من الحفلة امبارح

طبعا احنا عارفين اللى فيها

قلنالها مش معقولة يناموا طول النهار هنستناهم يصحوا

قالتلنا طب تعالوا يوم تانى

قلنالها لأ مش هاينفع عشان احنا مش من هنا

زي ما تكون الكلمة جاتلها طوق نجاة

قالتلنا طب روحوا وتعالوا كمان ساعتين تلاتة


هى قالتها على اساس اننا مش هنقعد فى الشارع فهنزهق ونروح


بس ميييييييييييييييييييييييييين

اتمشينا فى عز الظهر والشمس ورجعنالها تانى


كانت هتقتلنا

بس قابلنا الاطفال اخيراااااااااااااااااااااااا



دا بقى هاحكيلكوا عليه بعدين

بس دلوقتى هاقولكم سر المعاملة

السر فى ان الجريدة اللى احنا فيها كشفت الحاجة قبل كده كذا مرة

فقلبها شايل ومعبى ومش طااااااااااااايقة تشوف حد منها



واحنا جداد


واحنا مانعرفش

واحنا روحنا فى داهية



ههههههههههههههه

كفاية كده النهاردة لو كملت اليوميات هبقى احكي عن التحقيق بتاع " المهنة بدل حائط "

وعن اما روحت السيد البدوي



2009-04-04

ايه احساسك لو حد قالك يا سحلوس ؟

اول ما دخلت ع الفيس بوك كنت مغرمة بحاجة اسمها الكويزات

فدخلت احل كويز في مرة وبعدين طلعت النتيجة

" انت سحلوس كبير "

طبعاً احمريت واخضريت وقولت اما ولاد شحيبر صحيح

بقى ادخل واعمل الكويز واضيع من وقتي الضايع خمس دقايق وفي الاخر اتشتم

انا احتج ومش عارف ايه وكتبت ع الوول بتاع الكويز يعني ايه سحلوس يا ناس ؟؟ علشان الواحد يعرف نفسه يعني

راح واحد شامي ماعرفوش ربنا يكرمه تبرع وقالي الحقيقة

وطلعت سحلوس يعني حد طيب وكويس

ساعتها افتكرت كمية الشتايم اللي بسمعها وماعرفش معناها بس بتحمق اووووووووووى


يعني مثلا ابقى راكبة الميكروباص والسواق يبدع بقى وطبعاً انتوا عارفين السواقين بيبدعوا يقولوا ايه

فانا احمررررررررر لأني سمعت الشتايم دي

واتكسف اوووووووووي لمجرد انها اتقالت قدامي .. مش اتقالت لي

وانا ماعرفش معناها اساساً بس عارفة ان دي كلمة عيب من الدرجة الأولى يعني

وأصلا مش بجروء اسأل عن معناها

بس مؤخراً عرفت ان معنى كلمة من اللي بعتبرها من فظاااااااائع الشتايم معناها مش وحش خالص

بالعكس .. موجودة في القاموس كمان

فاستغربت وقولت دا يبقى غباء مننا ولا ايه

لما نزعل من حاجة ما نعرفش معناها

والمصيبة انها ممكن ف الاخر تطلع حاجة حلوة مش شتيمة !!

ومن هذا المزنأ احب اقولكم اني قررت اني مش هزعل من أي شتيمة ما اعرفش معناها

احم .. مش أوي يعني .. انا هحاول ما ازعلش او هحاول اعرف معناها حاجة م الاتنين هههههههههههه

و احب اقولكم في الآخر انكم كلكم سحاليس وزي العسل

وربنا يستر بقى وما يكونش الواد الشامي اشتغلني

وسحلوس دي تطلع ف الاخر شتيمة ههههههههههه