لعلمك

لعلمك

إقرأ لي

دخلوا بكليك شمال :D

Blog Archive

الاثنين، أبريل 13، 2009

postheadericon مابين مش عارفة ايه ومش عارفة ايه .. والله مالاقية عنوان

كان في فكرة في دماغي من فترة كبيرة وكبرت اوي واستفحلت امبارح والا اعملها


وهي (( جروب للمطالبة بإلغاء صفحات اخبار الحوادث من الجرائد )) ومن اسبابي اللي بطالب بالغاء الصفحات دي


كان اننا نقلل من العنف في المجتمع شوية ومن الخوف اللي الناس بقت عايشة فيه بسبب تهويل الجرايد للاخبار دي


والمبالغة فيها


اوم ايه ؟؟ بالليل وانا بتفرج ع العاشرة مساءاً انصدم


بنائب مجلس شعب قدم طلب للجنة الاقتراحات والشكاوى في مجلس الشعب بيطالب بان تنفيذ حكم الاعدام في المجرم اللي ارتكب جريمة اغتصاب تكون علنا ع التليفزيون !!


انا مش معترضة ع انهم يستاهلوا الحرق اصلا مش الاعدام بس


بس ازاي نشوفهم ع التليفزون ؟؟ اذا كان صدام حسين اللي الناس بتعتبره مجرم حرب وأباد قرى كاملة ويستاهل ويستاهل - من وجهة نظرهم - اتألموا لما شافوا مشهد اعدامه


انا نفسي حسيت كاني أنا اللي بتشنق ؟؟


المصيبة كمان ان حضرة النائب بيقول ان دا تطبيقاً للشريعة الاسلامية اللي بتقول ان حد الزاني الرجم وان لازم (( يشهد عذابهما فئة من الناس )) .. يقولوا له طب ماهو فعلاً بيشهد اعدامه طائفه من الناس

المفتي و عشماوى ومأمور والناس دي


يقول أبداً علشان نردع الناس


ياعم تردع الناس مين .. انت كده هتسرعهم مااااااااافيش فايدة


طيب ياعم والعيال يقولك العيال بيناموا من 8 العشا ؟؟


8 العشا عايش في انهي عصر دا ؟؟؟



أنا هلخص رأيي في الموضوع كله وفي كلام النائب في كام نقطة

1 / الشريعة الاسلامية - اللي هو واخدها حجة وبيتحجج بيها كل شوية - متسامحة اكتر من كده بمليوووووووون ألف مرة وربنا أمر ان طائفة من الناس تشهد عذابهم مش كل الناس وإلا كان ربنا أمر وقال بوضوح يشهد عذابهم كل الناس والشريعة الاسلامية بتنهي عن التشفي في الانسان أيا كان وبتنهي عن التمثيل بجثث الموتى حتى لو كانوا من الاعداء

في واحد اتصل امبارح وقال جملة حلوة أوي قال (( ان عقوبة الجلد تطهر الزاني من الذنب )) يعني بالقياس الشخص اللى اتعدم واتجازى دا يعتبر انه بقى مطهر من الاثم فبالتالي ما ينقعش نشمت فيه ونشوفه متدلدل من حبل المشنقة

2 / مع الوقت الناس هتبقى تبلدت خلاص ومش فارق معاها لو شافت مليون واحد بيتعدم مش هيتهز لها شعرة وبالعكس دا ممكن يسهل الموضوع للناس

3 / غالباً اللي بيرتكب جريمة الاغتصاب بيرتكبها وهو شبه مغيب اما بسبب الشهوة والشيطان اللي بيركبه واما بسبب المخدرات وطبعاً في الحالتين مش هيفتكر اللي شافهم اتعدموا


4 / غالباً اكائنات اللي بتغتصب البنات دي بتكون متصعلكة في الشارع ليل نهار او في وكر مخدرات ولا بدروم هيشوفوا فين وامتى المحكوم عليهم والحكم بيتنفذ ؟؟

5 / واحد من الضيوف كان بيقول للنائب ان اغلب الدول المتحضرة دلوقتي عايزة تلغي عقوبة الاعدام نيجي احنا كمان غير اننا بنعدم نطالب بالاعدام علنا ؟!! قال له يعني نعمل زي الغرب بقى وناخد منهم السماح بالحرية الجنسية وزواج المثليين و..... و ......

مش عارفة ازاي دا يبقى فكر نائب في مجلس الشعب ؟!! ليه معتقد اننا مدام هننقل حاجة من الغرب يبقى ننقل كل حاجة
ليه ما ناخدش الحلو ونسيب الوحش ؟؟ ليه كل حاجة ناخدها (( شروة واحدة ))

دا مش معناه موافقتي على الغاء الاعدام لأن في ناس فعلاً تستحق الاعدام لكن اعتراضي هنا على فكرة اننا لما ناخد من الغرب نلغي عقلنا ويا ناخد كله يا ما ناخدش وبنقعد نقول كده وفي الآخر بنتنيل ناخد الوحش بس


6 / نفس الضيف بيقول له دي حاجة وحشية بيقول له يعني هو الاغتصاب اللي مش بشع ووحشي !!

طب هو احنا بنتعامل بأي عقل دا اللي يقول ان الغلط يتعالج بغلط ؟؟

7 / الراجل بيتكلم كأن هو دا الحل الوحيد والمثالي والرادع واللي مش عارف ايه لمشكلة الاغتصاب ونسى أو تناسى انه المفروض يعالج باقى البلاوي اللي اتسببت في ان المشكلة دي تزيد

العقوبة عمرها ماكانت بتوصل لاعدام من سنييييييييييييييييين وماكنتش الظاهرة متزايدة زي دلوقتي ودلوقتي رغم ان العقوبة وصلت للاعدام الا ان الجرايم دي بتزيد يبقى المفروض يعرف ان مش العقاب لوحده هو الحل



6 بوينتس أوف فيو:

kafrawy يقول...

اومال ايه الحل سيادتك ؟

مامة مازن يقول...

السلام عليكم ورحمة الله وبركاته
شكرا لفتحك باب المناقشة فى الموضوع ده انا بصراحه معنديش الجراة الكافية والقلب الحديد اللى عندك
بصى يا ستى ياريت فعلا يتحكم بالاعدام عليه ويتنفذ فى ميدان عام بلاش يا ستى التليفزيون علشان الاعتبارات اللى قولتيها الاطفال وضعاف القلوب مثلا
لانه مثلا هيكون بالنهار وهيتنقل مباشر واللا حاجة ماشى
لكن لاتنازل عن الاعدام يا بنتى لو فى فعلا اعدام لكل حالة مكنش الموضوع بقى كده
ثم انا معتقدش انه ياخد عقوبة الزانى لانه مش برضى الطرف التانى.
شوفى الموضوع له ابعاد كتير دينية واجتماعية ونفسية
واكيد هتوصلك تعليقات كتير كلنا هنستفيد وهتلفت نظرنا لحاجة كمان.


وبعدين معلش سامحينى انا بحب اسلوبك فعلا بس عيدى نظر تانى فى رايك للشهيد المغدور بيه صدام حسين معلش متزعليش بس انا عايزاكى تبصى للامور بعين تانيه واقرى ما بين السطور

زهرة الجنة يقول...

طيب بذمتك لما يلغوا صفحة الحوادث
اقرأ انا ايه بقي؟؟
هههههه اصل هما صفحتين اللي بقرأهم الوفيا لان الصفحة الوحيدة اللي فيها مصداقية
والحوادث عشان الواحد يتعلم من اخطاء الغير هههههه

نتكلم جد بقي شوية
بالنسبة
لاعلان الاعدام علي التليفزيون شيء صعب جدا وبرضه مش هيردع اللي بيعمل كده
لان الناس فعلا هتبدأ تأخد علي المنظر ده وبالتالي هيصبح شيء عادي جدا

وبالنسبة لموضوع الغرب فاحنا فعلا اتعودنا ناخد كل شيء شروة واحد علي حد تعبيرك
مش ناخد الصح ونسيب الغلط
يظهر اننا مش بنحب النقاوة
هههه

وهو فعلا العقاب دلوقتي مش الحل الجذري
بس برضه ياتري ايه هو الحل

حياة يقول...

انتى كبنت ما هو الردع الذى يجعل المغتصب يفكر قبل ان يفعل فعلته ويدمر حياة بنت لها الحق فى الحياة فى امان والاستمتاع بها
واليك ها الرابط لنفس الموضوع
http://globalvoicesonline.org/2009/04/13/egypt-should-rapists-be-hanged-on-tv/

تحياتى

Sayed Selim يقول...

Sorry Sara I disagree with you totally, the luck was not with you this time, I agree with the senator as if the criminals saw the punishment they will think thousands time before admit, and about you if you are sensitive and i am sure of that do not watch the executing, and another point Sadam Hussien may Allah rest his soul was a fighter against the invasion and was not a criminal you have to read more about him in the Sunni point of view not of Sheaa or west who are full of hatred against us.
I give you a link to realize that the media you see is not the truth http://hanein.info
I am sorry about English written as my keyboard has no Arabic these days.

شبــ اون لاين ـــاب يقول...

والله انتى عندك حق فى اللى بتقوليه

عالم دماغها فاضيه

يعنى ايه يعدموا ف التلفيزيون علنا

ده كده نص البلد حيبقى عندها حالات اكتئاب

و النص التانى حيبقى صرع و خضه

لا فيها ردع و لا بتاع

و فيه نساء و اطفال حرام عليكم يشوفوا المناظر دى


ناس غريبه فعلا

----------------------
كان معكى من امام الكيبورد
واحد مخه لاسع شويه
شبــ اون لاين ــاب
الاسكندريه
----------------------

المتابعون

اعتبرها بيتك ♥

وِش القفص

خليك ورايا

دليفري..