لعلمك

لعلمك

إقرأ لي

دخلوا بكليك شمال :D

Blog Archive

الثلاثاء، أبريل 28، 2009

postheadericon شــهـد

شهد بنوتة عندها سنتين ونص تقريباً اتعرفت عليها النهاردة

بنوتة زي السكر مش بتبطل حركة وتنطيط

بقينا اصحاب بسرعة لأن فينا صفات كتير شبه بعض

انا وهي بنحب القطط أووووووي وهي كمان عندها قطة اسمها " لالا " وهي كمان زيي بتحب المرجيحة أوي

وزي ما تكون عايزة الزمن يفضل كده يمرجحها بين ورا وقدام بس من غير ما تقعد ورا ولا تقعد قدام

دردشنا كتير أوي ولعبنا كتير أوي واسمى كان طالع من لسانها زي العسل

واتفقنا اني هروح معاها البيت في يوم

وهشوف لالا والعب معاها

وبعد ما نخلص هتيجي هي عندي تتمرجح ع المرجيحة الكبيرة

واتفقنا انها ما تحاولش تشيل الفراشة اللي في ايديها

اللي ليها جناح ابيض وجناح اصفر

بس هي قالت لي بس دي فراشة وحشة علشان لما بتني ايدي كده بتشكني

قولتلها علشان لما بتتني ايدك بتبقى هتموتيها فهي بتنبهك

بس ياترى لما اشوف شهد تاني هتقدر تشوفني ؟؟

وياترى شهد هتقدر تشوف ولاد لالا اللي بتحلم بيهم

هتقدر بعد كده تشوف أخوها عمار وتكبر زيه كده ؟؟


شهد مريضة بالسرطان في شبكية العين

من وهي عندها 9 شهور

مامتها بتقول لو جلسة الكيماوي والليزر ماجابوش نتيجة هيستأصلوا عنيها

بجد انا مش متخيلة شهد من غير عنين

مش متخيلاها مش هتقدر تشوف الدنيا بعيونها الواسعة الحلوة

ولا متخيلاها بتعيط علشان لالا وحشتها ومش قادرة تشوفها رغم انها لامساها

أكيد في حل ان شاء الله

نظرة عيون شهد بتقول في أمل

ضحكتها الصافية رغم الألم بتقول في أمل

شوفت كتير زي شهد وأصعب

محمد في سنة أولى بس مش بيروح المدرسة علشان هو بيروح للدكتور

بس واثق ف ربنا وقال لي انه بيحب ربنا قد البحر الكبييييييييييييييير أوي

و كان واثق أوي انه هيروح المدرسة السنة الجاية

محمد كان عايز يطلع عسكري

بس اتفقنا انه هيطلع مهندس علشان هو شطور وبيعرف كل حاجة بتشتغل ازاي مهما كان اول مرة يشوفها


لكن واحنا ماشيين غير رأيه وقرر يبقى ظابط مش عسكري

وحكى لي عن بدلة الجيش بتاعته اللي هيلبسها لما يكبر

أكيييييييييييييييييييد ان شاء الله هيخف ويكبر

ثقته في ربنا بتقول في أمل


أما منة فهي لسة سنة ونص .. لسة بترضع

مامتها لما قولت لها بكرة تكبر وتبقى عروسة بس اعزميني ع فرحها

ضحكت بمرارة وقالت لي وهي اللي عندها مرض زي دا هتكبر ولا ليها جواز ؟؟

بس فرحت أوي واقتنعت بكلامي لما حكيت لها عن ناس كانت عيانة وفضلت عيانة سنين وخفت في الآخر وبقت زي الفل

حسيتها عايزة تطير ف السما وعنيها لمعت من تاني


نصي كان مصدق كلامي ونصي كان مكدبه بس شكلي قدرت أبان قدامهم واثقة في كلامي

وأنا واثقة في ربنا وبس

واثقة انه زي ما سيدنا محمد قال ان الدعاء ممكن يغير القضاء

واثقة ان طول ما احنا عايشين لازم نكون عندنا أمل

دعواتكم لكل حد زي شهد وزي محمد ومنة وعمار وسعد وأمير وجمال وهدية ومنى و.................. كل الأطفال اللي الألم حارمهم من طفولتهم لكنهم بيقاوحوا وبيحاولوا يعيشوا الحياة غصب عن عين المرض

دعواتكم ان ربنا يرحمنا ويحمينا من المرض دا

واحمدوا ربنا اننا الحمد لله سلام معافين

رجاء اخير لو حد قدر يكمل كلامي لحد هنا

بلاش وانت رايح تزورهم تبص بشفقة

بلاش قلبك يحس بالشفقة علشان هم اطفال عندهم ردار وكمان مبتلين يعني الردار اقوى

روح وانت واثق في ربنا

روح وانت عندك أمل

يمكن تنقل لهم عدوى الأمل


اسمع من هنا

جزء من دردشتي مع محمد


ودا كمان جزء مع محمد

ودا جزء من دردشتي مع شهد

13 بوينتس أوف فيو:

dodoo يقول...

يااااااااه ياساره لو كل الناس تاخد موعظه من الحاجات دى

للأسف كل واحد بيبص للاعلى منه ومش بيبص ابدا للاقل منه

لو بصينا للاقل مننا هنعرف قد ايه ربنا مدينا نعم كتير

وهنعرف نشكر ربنا عليها

وانت جبتى اهم حاجه ياساره

الثقه فى ربنا

الثقه ان مهما حصل ومهما كانت المعوقات كتيره وان الكل بيقول لااااااااااء مفيش أمل

بتلاقى ربنا بيتحدى بقدرته الجميع ويثبت للناس ان مهما حصل فيه امل

رحمة ربنا ياساره وسعت كلل شىء

يبقى مش هتسع مرض محمد وشهد وغيرهم وغيرهم

على فكره ياساره الاطفال دول بيعلموا الناس كلهااااااا درس لن ينسى

درس الامل والثقه فى ربنا مهما وجهتنا من صعاب

:::::::::::::::::::::::::

معلش يارساروره طولت عليكى بس بجد الموضوع مسنى اوووووووى

ربنا يشفيهم يارب ويشفى جميع المسلمين وجميع المرضى

وطبعاً فى الاخر عايزه اقول

" الحمد لله الذى عافانا مما ابتلى به كثير من عباده "

Shimaa Esmail يقول...

بداية أحيك على ما لمسته بقلبك البرئ من إنسانية وحب للآخرين ورغبتك في رسم البسمة والفرحة وغرس الأمل في نفس طفل برئ أصابه هذا المرض وأم تتجرع الأيام حزنا وألما على مرض ابنها وابنتها.
أحيك أختي الغالية على هذه الإنسانية بل والأهم من ذلك توجيه الدعوة لكل زائر لهذه المدونة ومرتاد لها بزيارة أطفالنا المرضى وتضميد جراحهم وهم يحتاجون إلي مد يد العون والمساعدة لهم من جانبنا نحن الأصحاء بشتى الطرق من زيارة و تقديم المساعدات المالية فهناك من المرضى وأهاليهم من يعجز عن دفع تكاليف العلاج و أضعف الإيمان أن ندعو لهم بظهر الغيب في صلاتنا ونقرأ لهم القرآن الكريم ليشملهم الله برحمته الواسعة وأذكرك وأذكر نفسى بأن معدلات الشفاء عالية وذلك عن تجربة لأحد أقاربي وقد. بعد أن فقدنا الأمل في شفائهم نظرا لضراوة المرض والعلاج الكيميائي ولكن والله ما خيب الله لنا دعاء وشفاهم الله تماما وبعد المثابرة والصبر والدعاء شفاها الله وعافاها من هذا المرض فهو مرض قابل للعلاج وهذا ابتلاء شديد ولكن رحمة ربي وسعت كل شيء فهو رحيم وقادر على الشفاء .إنها دعوة ولتتبناها هذه المدونة دعوة للخير دعوة للحب ورسم البسمة والأمل على شفاه مرضانا أطفال السرطان

أسال الله العلي العظيم أن يشفيهم ويعافيهم ويشملهم بعفوه ورحمته ومغفرته ويخفف عنهم الآلام
ويأخذ بأيديهم ويحرسهم بعينيه التى لا تنام . و يكفيكيهم بركنه الذي لا يرام و يحفظهم بعزه الذي لا يُضام. يا كاشف الهم . يا مُفرج الكرب يا مُجيب دعوة المُضطرين .اللهم ألبسهم ثوب الصحة والعافية عاجلا غير أجلا يا أرحم الراحمين..

اللهم اشفهم اللهم اشفهم اللهم اشفهم..اللهم آمين يارب العالمين.
ونراهم بالقريب في تمام الصحة والعافية

عبدالرحمن يقول...

اللهم شافهم وعافهم

وارفع عنهم يارب

تقبلوا مروري

لمدونتكم الرائعة

heba يقول...

وجعتي قلبي ...ربنا يشفيهم ويحمينا من هذا الابتلاء..عندك حق اللي قادر يتجاوب معهم بمساحه من الامل وليس الشفقة.
اشكرك علي هذه اللفته التي جعلتنا ندعو لهم بالشفاء.

mohamed ghalia يقول...

ربنا يشفيهم ويحفظهم من كل سوء

شبــ اون لاين ـــاب يقول...

ان شاء الله ربنا حيشيل عنها الهم و المرض


بس بجد يمكن لو كنتى كتبتى الخبر على طول مكنتش اتأثرت


زى ما انتى كتباه دلوقتى ربنا حيشفيها ان شاء الله

-------------------------
كان معكم من امام الكيبورد
واحد مخه لاسع شويه
شبــــ اون لاين ـــاب
الاسكندريه
--------------------------

TAREK ELMAHALLAWY يقول...

لو تلاحظي وتدققي النظر هتلاقينا كلنا لاسعين

فكرة من الزمن ده يقول...

العكس القلب اللي كبر قبل الاوان بيتمتع بصحة جدديدة ولا يشيخ بسرعة وده من خوارق القواعد
تحياتي يابنوتة

عاشقة الأحزان يقول...

السلام عليكم
ربنا يشفيهم ويرفع عنهم البلاء اللهم أمين يارب العالمين
تقبلى مرورى
تحياتى إيناس

sara ezat يقول...

ساره بجد كلامك مؤثر جدا جدا.احنا يمكن مفيش قدامنا حاجه الا اننا ندعيلهم لانهم بجد بيتالمو جدا وانا شفت ده بعينى. وكمان يا ريت نروح نزورهم لان يمكن نقدر نرسم ابتسامه فى قلب حد منهم ونحاول نزرع فيهم الثقه فى الله اللى انشاء الله هيشفيهم.

super nova يقول...

i hate children, but children with cancer aren't included :) all my prayers to them

beautiful mind يقول...

ربنا يشفيهم وكل الاطفال اللي زيهم
وشكرا ليكي علي هذه المساحه من الاحساس
خليتي فعلا مشاعر معينه تتحرك جوانا
يارب اشفي كل مريض

متالقه دائما يا بنوته

أع ـقل مـ ج ـنـونــة يقول...

ربنا يشفيهم بجد
:((

المتابعون

اعتبرها بيتك ♥

وِش القفص

خليك ورايا

دليفري..