لعلمك

لعلمك

إقرأ لي

دخلوا بكليك شمال :D

Blog Archive

الجمعة، مايو 01، 2009

postheadericon مواصفات فتى أحلامي .. احم احم

اشمعنى يعني الولاد تنجعص وتقعد تتشرط وتتأمر وتقول مواصفات فتى أحلامها ؟؟

واشمعنى يعني البنات بقت ترضى بالأمر الواقع وتوافق ع اللي قدامها لو الناس والدنيا شايفين انه مناسب ولقطة ؟؟

كسراً للقاعدة دي هقول مواصفات فتى أحلامي

مش هكتفي بأني اوشوش بيها واحدة صاحبتي في قعدة بنات

ولا اني احلم بيه وانا نايمة واصحى من النوم اقول ايه الهبل دا ؟؟

وبغض النظر عن ان رفعت اسماعيل هو فتى احلامي بس للأسف قررت اسيبه لماجي تشبع بيه بقى وخليها تنفعه


خدوا عندكوا الصفات دي مع الاخذ في الاعتبار ان في حاجات اساسية لازم تكون فيه زي انه يكون عارف ربنا وبيصلي ويكون حد محترم وعنده اخلاق

أولاً يكون اسمراني : بحب الناس السمرا جداً ، مش عارفة ليه بس بحس في سمرة الرجل حاجة كده مميزة و تخليني أحس انه راجل بجد راجل من اللي بيشقوا ويتعبوا مش فرفور يعني من الآخر وبتاع

ثانياً يكون دمه خفيف : علشان بتخنق جداً من الراجل النكدي اللي هو كل كلمة بحساب وكل كلامه جد

ثالثاُ يكون فيه شوية طفولة : يعني فيه حتة معيلة كده صغننة ، يعني لسة عنده استعداد نتسابق سباق عجل ولا ننفخ بلالين كتير ونقعدنطيرها من البلكونة ولا نركب مرجيحة كده يعني

ثالثاً يكون بيعرف يوقف الناس عند حدها : خاصة البنات يعني يعرف يبقى ناشف مع البنات وفي نفس الوقت يعرف يهزر معاهم ويعرف يبقى ناشف مع أي حد في الدنيا ( إلا أنا طبعاً ) علشان دا هيحسسني بالتميز وبإني انا ليا مكانة غير


رابعاً : يكون طويل عريض كده بس مش عضلات وافلام من دي علشان يحسسني بالأمان ، يعني أبقى ماشية معاه كده والناس تخاف تعاكسني علشان هو معايا

خامساً يكون رومانسي بس مش بدرجة تخنق : يعني يخلط الرومانسية بالهزار ويكون ليه فلتات كده رومانسية يعني يوم يعمل لي مفجأة يوم ياخدني برة يعشيني ( بس برة مش في بيت ابويا يعني ههههههههههههههه ) يوم الاقيه يتصل بيا فجأة يقول لي كلمتين حلوين


سادساً يكون قوي الملاحظة : يعني لما البس حاجة جديدة يلاحظ اعمل نيولوك يلاحظ مش يخليني اضطر ألفت نظره لأني عملت حاجة جديدة ولا يستناني لما اخد رأيه لأني مش هعملها

سابعاً : يكون فيه حتة جنون تتفهم جنوني

ثامناً : يكون من النوع اللي بيسمع اللي قدامه ، يعني يسمعني بإهتمام وينقاشني ف كلامي لأني ممكن اسود عيشته لو ما حستش انه بيسمعني

تااسعاً يكون حد صاحب اهتمامات معينة علشان احس اني بشاركه في عالم خاص بيه مش حد كل اهتماماته الأكل والنوم والفرجة ع التليفزيون

عاشراً : ما ينساش عيد ميلادي لأنه لو عملها مش هنساها له نوهااااااااااااااااائي

حداشر : يكون شخصية ليها مركز ، يعني من النوع اللي يقدر يكون له مركز في أي مكان يروحه ما يبقاش حد نكرة كده لأني بحب التميز .. احب اوي انه يكون مميز وسط اصحابه مميز في شغله مميز في عيلته وفي عيلتي

اتناشر : يكون مستواه متوسط لأني مش بحب ابقى عايشة في نغنغة تخلي الدنيا مالهاش طعم ولا في فقر يخلي الحب يهرب من الشباك

تلاتشر : يكون حد متفاهم ، يعني نتشاور في حياتنا في أي قرار مش من النوع اللي هو اعملي كذا من غير ليه لأن الحاجة الوحيدة اللي هعملها من غير ليه لو اكتشفت انه كده اني هنسحب تماماً من حياته

اربعتاشر : انه ما يخبيش عني أي حاجة لأني لو اكتشفت حاجة هو ماقالهاش مهما كانت بسيطة هحس ان وراها مصيبة أو سر وساعاتها هيشوف أيام ما يعلم بيها الا ربنا
عزازيل مسيطر ع مبني الإذاعة والتليفزيون في دماغي من الآخر يعني

خمستاشر : يحسسني انه شايفني مميزة ، في أي حاجة لو حسيته بيستهتر بيا او بيقلل من شأني هيشوف مني بردو أيام سودة لأني موتي وسمي ان يكون في حد مش حاسس بقيمتي

ستاشر يكون من النوع اللي بيحب يقول شكراً ولو سمحت وممكن اطلب طلب مش من النوع اللي شايف ان خدمتي ليه حق مكتسب ومش لازم يشكرني عليها

سبعتاشر : يعمل لي قيمة قدام الناس يعني لو قال ليا او عني نص كلمة وحشة قدام الناس وقعته اسود من قرن الخروب

تمنتاشر : يكون هادي لأني نرفوزة أوي


تسعتاشر : ما يكونش بيشرب سجاير لأني بكره المدخنين اوي وبتقرف منهم بصراحة

يلا كفاية كده ولو افتكرت حاجة تانية هقولها



بالمناسبة .. تفتكروا ليه بطوط ما اتجوزش زيزي ؟؟

اعرفوا وقولولي هنا

30 بوينتس أوف فيو:

kafrawy يقول...

احم احم احم كفايه

كلام عنى بقى .........

تاخدى سيجارة يا لاسعه

سمو الأميرة سارة يقول...

ههههههههههههههههههههههههه

اه صحيح الخالق الناطق كفراوي ههههههههههههههه

هاتها اشيلها لحد ما اخلص الشيشة اللي في ايدي

امشىىىىىىىىى

غير معرف يقول...

هههههههههههههههههههههه

المواصفات دى عندى يا هانم

وفوقيه بطاطس محمرة كمان

بس ........... ؟!!!



انتى عاوزاه بالكاتشب ولا بالمايونيز !!!

عرفة فاروق السيوطى يقول...

سمو الاميرة


انا كل حاجة قولتيهاعدا السجاير

والنبى ما تستثنى حكاية السجاير دى


بليز بليز

وأوعدك آجى أخطبك بكرة

اتشرف طبعا بس انتى اللى مش هترضى

قولتى ايه

سمو الأميرة سارة يقول...

غير معرف

هههههههههههههههههههههههههه بطاااااااااااااااااطس احم .. شكلك مش غريب عليا ههههههههههههه

امممممممم لا كاتشب ولا مايونيز مدام في بطاطس انا بعرف اعمل معاها صلصلة جامدة جامدة واهو يبقى بطاطسنا في اوطتنا هههههههه

سمو الأميرة سارة يقول...

عرفة ههههههههههههه ربنا يكرمك ياعرفة ع ذوقك

خلص جيشك الأول يا خويا وبعدين فكر في العروسة ههههههههههه

ahmed tiger يقول...

يمكن
1- المخرج عايز كدة
2-او عم دهب مش عايز يجبلو شقة يتجوز فيها او حتي ايجار جديد
3-او هي محتارة بينه وبين محظوظ :D

وبعدين هو لاقي يصرف علي نفسة و سوسو ولولو وتوتو لما يصرف كمان علي زيزي
كدة احسن :)

بالنسة لمواصفات فتي احلامك مش شايفة انها خيالية شوية...هو في حد عنده كل المواصفات دي ؟؟؟؟ماقصدش احبطك انا واقعي شويه بس :)
شكرااااااااا

تأثير الفراشة يقول...

ربنا يوفقك يا بنوتة و تلاقيه :))
و أهم خطوة فعلا انك تكونى عارفة انت عايزة إيه
تقبلى مرورى يا جميلة

Khaled Selim يقول...

على فكرة حاسس ان فيه مواصفات عكس بعضها ..
وبعدين انتي كده عايزة كريم عبد العزيز :S
بس ببصراحة أحييكي على (أولا-ثالثا-تاسعا-اتناشر)
ولا أعاتبك على ستاشر .. لان المفروض الرسميات تتلغي بينكم :S
أخيرا ربنا يوفقك وتلاقي العشرين صفة ..
اما بالنسبة لي عايزها أمورة و هادية و عندها اساس اسلامي .. بس كده :D

SuperNova يقول...

that is alot to want in one guy. but who said you cant dream :)

ps: please consider adding the follower tool to your blog.

غير معرف يقول...

الخالق الناطق أنا

سمو الأميرة سارة يقول...

احمد تايجر ههههههههههه اسباب منطقية فعلاً والله الله يكون في عون زيزي هههههههه

بالنسبة للمواصفات دي في مستوى الطالب المتوسط يا احمد ههههههههههههه

سمو الأميرة سارة يقول...

تأثير الفراشة : ياااااااااااااارب بس بيني وبينك لو كان تفصيل كده ومافيهوش غلطة هحس اني زهقانة الحياة في المدينة الفاضلة لا تخلو من الملل

سمو الأميرة سارة يقول...

خالد سليم .. ممكن يكون فيه مواصفات عكس بعضها لأن اهم سماتي التناقض أما بالنسبة للترقيم فاحمد ربنا اني ما رقمتش باسلوبي بتاع نمبر وان تو ثري ههههههههههه

سمو الأميرة سارة يقول...

سوبر نوفا لو بطلنا نحلم ونلسع نموت ولا ايه ؟؟

بالنسبة للفولو مش عارفة احطه بيقول لي انه تجريبي ومش مفعله ليا :(

سمو الأميرة سارة يقول...

غير معرف ولو اني ماعرفكش بس صح هههههههههههههه

عبد من عباد الله يقول...

مممممممممممم

على فكره فيه عده زي دي كوري
عامله بتاع 750 بس لسه ما اخترعتش هههههههههههه

لأ بجد بقى لو انتي كده انا اضمنلك انك حتلاقي حد كده لكن كلنا عايزين اجمل مواصفات و للأسف احنا مفيناش المواصفات دي .... و لكن برده من حقنا نحلم تبعاً للمقوله القائله " لو بطلنا نحلم نموت "
ربنا يرزقك يا بنتي باللي فيه الخير و ابن الحلال

ليكوريكا يقول...

لا لا ...

ده في ظل الازمه الماليه العالميه هيبقى غالي أوي ...

بس وماله الاحلام ببلاش ...

وليس على "لاسعه" حرج .


بقالي كتير اوي مجتش هنا ...

ورجعت لقيتك زي منتي .

:)

عندما تكون ميمى وحاجات كتير مع بعضها كده يقول...

يجوا يشفوا صحابى وماما انى غلبانه وطالبه عشر موصفات بس لو ماما شافت الى كتابه هتقول عليكى مفتريه هههههههههههههههههههههههههههههههه انا بهزر طبعا ياجميل بس ربنا يسعدك وتلاقى كل الى انتى عاوزاه ياقمر
انا برضه ياساره عاوزاه مجنووون بس عاقل لو لاقيتى من الصنف ده اتنين خدى واحد واحجزى واحد هههههههههههههههههههههههههه

mohamed ghalia يقول...

هههههههههههههههههه
لا بسيطة خالص
حضرتك تروحى لأى ترزى وهو هيفصلهولك
هههههههههههههههه
مش برده بتتكلمى على بدلة!!!!!!!!!!!!

no4denmark يقول...

سيبك انتى .. مفيش احسن من الزبده الفلاحى :D

Khaled Selim يقول...

لأ انا ما اقصدش الترقيم ..
انا اقصد فعلا الافطار اللي في النقط اللي قلت لك عليها فوق دي ..
بس سؤال اخوي بحت :D
هي البنات بتحب اللي ينفخ في الأنا بتاعتها ؟؟؟ :D:D:D

mido يقول...

ايه رأيك فى أدهم صبرى

طلبك عنده

:D

غير معرف يقول...

لو لقيتى اللقطة ده ابقى قوليلى علشان افتكر انى كان نفسى فى حد كده و ابدا افكر ادور من تانى

shiko يقول...

ايه ده...الطلبات ديه تعجيزيه على فكره

بس ليه البنات بيقولو طلبات كتير وبيوافقو على اى حد يتقدم حتى لو مفيهوش نص الطلبات ديه

usrnt.com يقول...

هههههههههههههههههههههههه

لا بجد تمام
بس الى هايموتنى من الضحك

حداشر,اتناشر,تلاتاشر,اربعتاشر,
ههههههههههههههههههههههههههههههه

اية الغه دى غريبه عليا شوية
انا بحب اكتب مواضيع تهيس
بس مجاش فى بالى للدرجة دى

عموما كامك ومواضيعك جميله
ونفسى اقراها كلها
بس انا كمان بهتم بموقعى الجديد
فاتح جديد بقى
ولازم كل يوم ارش قدام الموقع
واكنس وكدا
اوعدك ليا رجعا تانى

تسلمى ع المواضيع الى بجد مفيدة مهما كاتب مهيسة

غير معرف يقول...

لولقتيه ابقى قولى علشان يفضل عندى امل انت جميله

من أنا؟؟؟ يقول...

انا كنت بفكر اروح الصين قريب عشان اجيب من هناك زوجة صينية... سمعت ان هناك نازل عليهم عروض كويسة.. ممكن اخليهم يعملولك واحد ومش هيبقي غالي... ويا ستي مصاريف الشحن علينا

بس بجد اول مرة أدخل علي مدونتك دي... والصراحة اللاسعاية دي ف الجون وعجبتني مووووووووووووووز

استمري يا لاسعة :))))

كيــــــــــــارا يقول...

عملتها في من سيملك قلبي عليه تخطي حواجزي

واخدت شوية انتقادات فظييييييعه

بس سيبك كل طلباتك دي معقوله اوي اووووي

وبجد هتكون اساس لبيت سعيد ياذن الله

Mai Hamad يقول...

كل الصفات الي قلتيها يا سارة عجبانس ويحيها جداا وبتمناها بس اهم حاجة والحاجة اللي بدور عليها بين كلماتك من اول ما بدات اقرا الموضوع هيا الدخان

لاني بجد الدخان ده من المواصفات الرئيسية اللي مش هقبل تكون في نصي التاني :))

موضوع متميز ويا بخت الي هيكون نصك التاني بيكي :))

المتابعون

اعتبرها بيتك ♥

وِش القفص

خليك ورايا

دليفري..