لعلمك

لعلمك

إقرأ لي

دخلوا بكليك شمال :D

Blog Archive

الأربعاء، مايو 06، 2009

postheadericon هو احنا ليه بالغباء دا ؟؟

من شوية كنت بتفرج على تسعين دقيقة وشوف الخبر بتاعة الخنازير اللي مرمية في الشارع

الحكاية ومافيها ان في منطقة أبو رواش في محافظة 6 أكتوبر الناس شافو عربية نقل شايلة خنازير عايشة على ميتة

وقعدت ترميها في الشارع بطول الطريق

والناس بيقولوا ان الخنازير عيانة ...

بجد بجد حسيت اننا شعب غبي .. أكيد أكيد الخنازير دي اصحابها كانوا مخبينها زي ماكانوا بيخبوا الفراخ

أيام أنفلوانزا الطيور .. ولما وقع المحظور احتاسوا بيها

قاموا يخلصوا منها ازاي ؟؟

يبلوا بيها الناس

قمة العشوائية والفوضى والتخلف والله العظيم

وأساسي الشرطة لما جات ما بقتش عارفة تتعامل ازاي مع الخنازير دي

خايفين يتعدوا طبعاً ومعاهم حق ما هو اصل العيب مش عليهم

العيب على اللي لما عرفوا ان في حاجة زي دي محتملة كانوا المفروض يقولوا لهم يتصرفوا ازاي

والخنازير لحد وقت اذاعة البرنامج مرمية في الشارع رغم ان الكلام دا حاصل من الفجر !!

تخيلوا كام بني آدم زمانه اتعدى ولسة هيتعدي لو فعلاً الخنازير دي مصابة !!

وتخيلوا الأذى النفسي أساساً منظر الخنازير وهي مرمية في الشارع والدم نازل منها بجد منظر مقزز


حسبي الله ونعم الوكيل فعلاً في الكائن اللي عمل كده لأنه ما يستحقش يتقال عليه انسان

______________

حاجة تانية بخصوص المصيبة دي .. بما انها خلاص قريب جداً شكلهم هيعلنوا عن اصابة بشرية بالفيرس في مصر

الميكروباصات اللي بتتملي خمسة وعشرين راكب
(*) دي

دي مصيبة بجد تخيلوا معايا كده انا مثلاً واحدة بتركب 3 مواصلات وانا رايحة الكلية

تخيلوا مثلاً ركبت ميكروباص من السنطة لطنطا واتعديت انا وكل اللي راكبين

وراح كل واحد فينا في حتة .. مالناش دعوة بالباقيين خلينا فيا كمثال

انا نزلت ركبت من الجلاء للاستاد وعديت خمسة وعشرين تانين دا غير السواق

ونزلت ركبت هندسة وعديت خمسة وعشرين تاني

بردو غير السواق

والسواق بتاع الاستاد عدى خمسة وعشرين جداد في الناس اللي ركبوا بعدنا

وهكذا دواااليك

بسم الله ماشاء الله يعني مصر كلها هتفطس في خلال اربعة وعشرين ساعة

وبجد مش عارفة ايه الحل ؟!!!!!!!


____________________

( * ) مش خمسة وعشرين بالظبط لكن انا بدي مثال يعني على تكدس المواصلات لأنهم بيركبونا خمسات وستة احيانا ً

9 بوينتس أوف فيو:

SuperNova يقول...

i have no comment about the swine flu and about the microbuses, that is very correct point of view, but can we do? for me, i dont have that kind of view because i walk to my college which is the same college you go to, i think.
faculty of art, isnt it?

مـجـنـووون يقول...

والله حاجه تحرق الدم

بس لو بصيتي للموضوع من منظور تاني هتلاقي أن الناس دي مظلومة

العيب مش فيهم العيب في الي فوقيهم


تقبلي مروري
مجنووون

mohamed يقول...

العيب فينا احنا مش اللي فوق بس
وكل واحد بقى يقول يلا نفسي وبسسس
ولا همه عدوى ولا يتحرق حتى

بجد اخلاقنا اتغيرت اوي .. يا مصريين
للأســــــف

heba يقول...

المشكله اكبر من تصرف فرد ...وهيه دي الكارثه مفهوم العشوائيه ف التفكير والتصرفات هو السائد وبالتالي هيه دي نتائجه (مصر) يا ساره......محتاجين شئ يجمعنا ويكون هدف بناءا عليه يتغير اسلوب التفكير وبالتالي السلوكيات.... بس امتي؟؟؟؟

مامة مازن يقول...

يادى المصيبة ده خراب مستعجل
ربنا يستر والله مرعوبة موت خوفى الاكتر على ولادى والاطفال كلهم دول يا حبايبى مش هيستحملو كده خالص
يارب ارحمنا

dodoo يقول...

يعنى ممكن بإستهتار واااااحد يموت شعب بأكمله

وماأكثر المستهترين فى المحروسه

ارحمنا ياااااااااارب

عبد من عباد الله يقول...

هههههههههههههه فعلاً احنا شعب جاهل ( بلاش غبي لحسن دي صعبه شويه )

لان اساساً الفيروس الجديد ده ملهوش علاقه بالخنزير و لذلك راجع لان التسميه غير دقيقه اساساً ...

الفيروس ده جديد عباره عن اختلاط بين انفلونزا الخنازير و انفلونزا الطيور و الانفلونزا البشريه و ظهر عند البشر و بينتقل من بشر لأخر لكن اترباطه الاساسي مش بالخنزير ولا حاجه ( علشان كده ده السبب اللي دول الاجنبيه بتقول على القرار بتاع ذبح الخنازير في مصر ملهوش لازمه ) و لكن طبعاً كل دوله بقى ادرى بشئونها ...

اما انفلونزا الخنازير دي بقى الحقيقيه هى انفلونزا عاديه جداً زي اي مرض ممكن تتصاب بيه من الخنزير و ليه علاج و عادي جدا جداً يختلف تماماً عن الفيروس الجديد ده

عرفة فاروق السيوطى يقول...

السلام عليكم

اقولك انا ليه احنا بالغباء ده

لأن من فترة طويلة قام السادة الحكام بنشر فيرس الغباء فى جينات الشعب المصرى ليبقى هو دائما الشعب المصرى بغباءة ويبقون هم دوما الحكام بغباءهم أيضا

تحيتى

الكلمة نور يقول...

خمسة وعشرين؟
كدا ممكن طنطنا تخلص فى ليلة واحدة

المتابعون

اعتبرها بيتك ♥

وِش القفص

خليك ورايا

دليفري..