لعلمك

لعلمك

إقرأ لي

دخلوا بكليك شمال :D

Blog Archive

الأحد، يونيو 07، 2009

postheadericon أستاذ نجيب

استاذ نجيب كان استاذي من أول ما بدأت ادرس " حساب " و " رسم " وكنت بحبه جداً
علشان كان طيب وملامح وشه حنونة اوي مش زي المدرسة اللي كانت بتديني عربي ودين
يمكن حبي لأستاذ نجيب السبب في اني طول عمري شاطرة في الرياضة والرسم
كان بيحبني أوي وكنا كلنا في الفصل بنحبه
كان بيت مامته في الطريق للمدرسة وكان دايماً بيفوت عليها بعد ما يروح من المدرسة
واحنا نمشي مخصوص من الطريق دا رغم انه بعيد علشان نشوفه مع مامته
كنت بحس احساس غريب لما بشوفه معاها
نفس احساسي لما ماما تيجي لي المدرسة ، لأن انا في دماغي المدرسة عالم والبيت عالم تاني فلما حد من العالمين يدخل في العالم التاني
بحس باستغراب كده
المهم بقى  .. استاذ نجيب كان أول حد اشوفه فخور بيا .. كان بيمسك كراسة الرسم بتاعتي ويبص لها باعجاب كده ويفرج الفصل كله
عليها
لما خلصت ابتدائي وانتقلت لمدرسة تانية كنت مفتقداه جداً
خاصة وان ربنا ابتلاني بمدرسين رياضيات يسدوا النفس :(
ولا مدرسة الرسم .. كانت مصيبة لوحدها .. المرة الوحيدة اللي ابتسمت لي فيها كانت عايزة تسألني عن البرفان اللي بستعمله علشان عاجبها
ولما قولت لها انه مش برفان وانه مزيل عرق وبتاع اخويا كمان كشرت تاني
... في تالتة إعدادي كانت اروع مفجأة في حياتي اني لقيته بيراقب عليا .. اتصدمت انه عجز اوي كده
أي نعم هو من الأول اصلع بس مش كده ، زعلت أوي علشانه بس حسيت أمان
لأنه حد يعرفني وأعرفه ، ودايماً لجان الاعدادية بتكون مراقبين مش من المدرسة فكنت بحس بغربة
وكان فرحان بيا أوي علشان مش بغش ولا بغشش - ايام ما كان عندي مبادئ :(( - وكان بيدعي لي بصوت عالي فاتطمن أوي
من يوم ما خلصت اعدادي لحد ما دخلت الكلية عمري ما مشيت في طريق مدرسة الابتدائي ويوم ما مشيت فيه بالصدفة اتصدمت
مامة استاذ نجيب ماتت والبيت اتهد
حسيت كأن الشارع فاااااااااااااااااضي أوي ووحش من غير البيت دا
وحسيت كأن ليا أهل هنا ومشيوا فجأة
السنة دي عرفت ان استاذ نجيب مات !!
الصدمة خليتني مش قادرة اعيط  .. بس مش قادرة انسى صورته وهو واقف جنبي وانا برسم
ولا صورته وهو قاعد مع مامته .. ولا لما كان بيديلي في اللجنة بتاعة الاعدادية
ربنا يرحمه :(

16 بوينتس أوف فيو:

كيــــــــــــارا يقول...

ربنا يرحمه ياااااااااارب

غير معرف يقول...

ربنا يرحمه يارب
والله وانا باقرأ القصة بكيت علشان افتكرت استاذي في ابتدائي
كان نسخة من استاذك في طيبته وحنيته

غير معرف يقول...

الله يرحمه الاستاذ نجيب شمس كان راجل على خلق ونحسبه طيبا وهو على فكرة قريبي جدا ياسارة

مامة مازن يقول...

ربنا يرحمك يا استاذ نجيب ويرحم كل من يخلص فى عمله ويكون كانسان قدوة حسنة

YOYO يقول...

ربنا يرحمه مين فينا مش ليه استاذ او حتى مدرسه ليها احلى ذكريات فى راسنا وفيه بردوه ناس تانيه تخليكى تكرهى الايام دى هههههههه

YOYO يقول...

ربنا يرحموه مين فينا مش عندوه استاذ او مدرسه ليها احلى ذكريات فى راسنا وبردوه فى ناس تانيه الواحد كره ايامهم وكره اليوم الى دخل فيه المدرسه وشافهم

Lamiaa يقول...

امم .. الاسلوب ده مش غريب عليا , مع انها أول مره اعدي من هنا.

رحم الله استاذك
نماذج كتلك كادت تتلاشي من حياتنا

ياسمين حميد يقول...

الله يرحمه ويرحمنا جميعاًَ

سمو الأميرة سارة يقول...

يارب اللهم امين .. نورتيني يا كيارا

سمو الأميرة سارة يقول...

غير معرف 1 .. ربنا يرحمهم جميعاً يارب المدرسين في الفترة دي بالذات ممكن يحددوا مستقبل الطفل

سمو الأميرة سارة يقول...

غير معرف 2 : انا مش عارفة انت مين ومش عارفة استاذ نجيب اسمه كده فعلاً ولا لأ .. لو فعلا ً هو الدنيا تبقى صغيرة اوي ارجوك ابعت لي تاني قول لي انت متأكد انك تعرف انه هو ؟؟

سمو الأميرة سارة يقول...

مامة مازن .. يارب اللهم امين .. اهو دا بجد العمل الصالح اللي بيقعد للإنسان حتى بعد ما يموت

سمو الأميرة سارة يقول...

يويو اااااااااااااه يا يويو ليا مدرسين بموت فيهم ومدرسين عايزة اموتهم هههههههه

سمو الأميرة سارة يقول...

لمياء .. امممممممممممم غريبة .. يمكن قريتي لحد شبهيي ؟؟ رغم ان دا يشرفني انك تحسي ان اسلوبي مألوف ليكي لكن بردو يزعلني :(

سمو الأميرة سارة يقول...

اللهم اميييييييين يا ياسمين

Hamada يقول...

السلام عليكم
اولا احب ان ابدى اعجابى الشديد بأسلوبك البسيط والمؤثر فى نفس الوقت

فقد اثر فى جدا ما طرحتيه عن استاذنا نجيب رحمة الله عليه وعلى كل من عامل الطفوله بحب وعطف وزرع فيهم ولم يهدم على الرغم من استغرابى الشديد من شخصيته المركبة تركيبا جميلا فالجمع بين الفن والهندسه اقصد الحساب امر صعب يمكن يكون رحمة الله عليه زملكاوى
ولو ان مدرس العربى ايضا له بصمه غير مرئية فى حياتك دليل الاسلوب الكتابى البديع
شكرا لك وتحياتى

المتابعون

اعتبرها بيتك ♥

وِش القفص

خليك ورايا

دليفري..