لعلمك

لعلمك

إقرأ لي

دخلوا بكليك شمال :D

Blog Archive

الاثنين، يوليو 20، 2009

postheadericon تخاريف آخر الليل





هو عدم الاهتمام بالسياسة تفاهة ؟؟ مش عارفة .. ساعات بحس نفسي اني انسانة دماغها فاضية

لأني مش مهتمة قد كده بالسياسة ..

بس أنا حاسة ان الاهتمام بالناس مهم بردو ..

إزاي بنعيش ؟؟ وايه الغلط في اللي بنعمله كل يوم ؟؟

ايه الغلط جوانا احنا .. في حياتنا

حاسة اننا المفروض نصلح نفسنا وبعدين نطلب من غيرنا انه يصلح

أو على الأقل الاصلاح في الناحيتين يبقى متوازي وماشي في وقت واحد

يمكن انا صح .. أو غلط .. مش عارفة









اكتشفت مؤخراً ان الناس بتقيس غلاوتها عندك بالفلوس اللي بتتكلفها علشانهم
مش مؤخراً اوي الكلام دا حصل ، بس ما كنتش فاهماه
امبارح قررت افهمه .. اللي حصل ان من سنة كنت ببعت لاصحابي رسايل ع الموبايل
كانوا فرحانين اوي ومظأططين .. لكن اول ما اكتشفوا اني ببعتها من موقع رسايل مجانية فرحتهم ضاعت !!
كنت بحسب ان الفكرة في الرسالة اني فاكراهم واني عايزة اقول لهم حاجة حلوة
بس اتضح ان الفكرة في الرسالة هي انك كلفت نفسك 30 قرش !!!




قررت أزرع ريحان .. رغم إني عمري ما كنت بحب الزراعة بس حسيت اني محتاجة ازرع
فجأة كده حسيتها حاجة ممتعة أوي انك يكون عندك حاجة تهتم بيها
تشربها ماية وتاخد بالك عليها وتطلعها البلكونة تتشمس
حاجة تكبر قدامك .. ويتحول سواد البذور للون أخضر
على أمل اني لما ازرع حاجة الاكتئاب يبعد عني شوية
وعلى أمل اني اتعلم اصبر .. بس شكلي مستحيل اتعلم الصبر
كل خمس دقايق بروح ابص على قصرية الزرع ، وانا اساساً لسة يادوبك حاطاها امبارح في الماية والتراب وكده




وحشتني اوووووووووووي منة وشهد بقالي كتير ما شفتهمش ونفسي اتطمن عليهم
وحشوووووووووني كلهم هناك ونفسي أروح العب معاهم أوووووووووي



اليومين دول حاسة اووووووووي اني مفتقدة قططي
وحشووووووووووووووني بجد وهم كمان وحشني اني العب معاهم
واحكي لهم واشتكي لهم



اليومين دول بردو بحلم احلام مرعبة وغريبة ... مش رعب دموي لأ رعب معنوي
لما بصحى من النوم واترجم معناها في دماغي ... قلقانة اوي .. ربنا يستر



رصيدي دلوقتي 23 قرش .. بغض النظر عن العشرين دول ..
امووووووووت واعرف الــ 3 قروش دول جم ازااااااااااي ؟؟؟


زي كل سنة الاجازة ضاعت وانا مرزوعة في البيت ..
وضاعت فرصتي في التدريب للسنة التالتة .. حاسة بشوية ضياع .. يلا خييييييييييييير

8 بوينتس أوف فيو:

غير معرف يقول...

اولا موضوع الفلوس ده انا كمان اكتشفتو بس من قديم شوية - فقستها يعنى

اما موضوع الزرع نفس اللى حصل مع بابايا من اسبوعين - عمل زيك كده بالظبط

كل كلامك سكر يا سارة و بتلمسى حاجات حلوة اوى جوانا و هى دى السياسة -على فكرة انا خريجة سياسه-

محمد سعيد يقول...

لا ولا تفاهة ولا حاجة، دي اهتمامات كل واحد حر فيها، فيه ناس بيحبوا الكورة مثلا، وفيه ناس بيحبوا العلم والمذاكرة، وفي ناس بيحبوا الصياعة :] كل واحد حر.

--

حكاية الفلوس دي يمكن سببها أن بلادنا يعني بتعاني مشاكل اقتصادية فأغلى حاجة هي الفلوس، أما وقتك أو اهتمامك فدا رخيص لأن أغلبنا فاضيين، ورايقيين، ومش مشكلة كبيرة أنك تبعت رسالة لحد تقوله كل سنة وأنت طيب.

--
بس انا عندي سؤال اجازة أيه اللي ضاعت، دي مبقالهاش شهر يا سارة!
فاضل شهرين إلا شوية! لسه قدامك فترة تعملي فيها اللي عايزاه، ولا أيه؟!
--
أما الأحلام فسيبك منها يا بنتي..
هو حد في الزمن دا بيحلم أحلام حلوة؟!
--
حاجة آخيرة خدي بالك من الريحان بيموت بسرعة، انا جبته من فترة وعملت زيك وبقيت قاعد جنبه في البلكونة، في الآخر بعبقريتي قلت الشمس حامية عليه، قمت مخبيه منها شوية، الرحان بقى شوربة.
لازم شمس، وكمان فيه بتاع كدا بيحطوه على الطينة عشان يكبر بسرعة ويعيش في التلوث اللي جو بلدنا فيه دا، انا ماليش خبرة أوي يعني بس أسألي هتعرفي. :]

أبو كريم يقول...

كلامك عفوى بطريقه حلوه وتحسى انه طفله صغيره بتكتشف لسه ان ميكى ماوس ودوونالد دك شخصيات وهميه وده اجمل مافى المدونه..تقبلى مرورى

Somaya Kamal El Din يقول...

بالنسبة لموضوع الفلوس موجود والناس دماغها على قدها لسة

وبالنسبة للسياسية انا بجد نفسى اتعلمها واعرف عنها وعن سياسات العالم

SuperNova يقول...

You touched my heart with those words

mohamed ghalia يقول...

مممممممممممممممممم
لا ياستى عدم الإهتمام بالسياسة بالريح الأعصاب وميحرقش الدم
إنتى كده فى نعمة والله
كل حاجة بتقدر بالفلوس
زمن بتاع فلوس
يلا بقى حسستينى إنى الدنيا اسود فى بحلقى
ههههههههههههههه

احمد ماهر يقول...

الف شكر على التوبيك

بالنسبة لحكاية السياسة فانا كمان مليش فى السياسة وعايش عادى جدا...

وبالنسبة لحكاية الفلوس فرغم ان فعلا فى ناس كل همها الفلوس والمناظر لكن برده فى ناس كتييييييير اوى بتحب بجد (بتحب لله) من غير مصلحة هتطلع بيها منك.
وشكرا




...... احمد ماهر

نور مصطفي يقول...

هو المفترض ان الواحد يهتم بالسياسة , علشان علي الاقل يكون عارف ايه اللى بيحصل حواليه , لكن مش كلنا للاسف بنهتم بالسياسة زي مش كلنا بنهتم بالقراءة و الشعر و الادب و الرياضة و حاجات كتير برضو مش كلنا بنهتم بيها

اما بالنسبة للفلوس فهي حاجة طبيعية من قديم الازل , ناس كتير ببندفع وراء المصلحة بس زي ما بيقولو صوابعك مش زي بعضها


الزرع بقي احنا مرة واحدة كدة جبنا شوية زرع في البلكونة و كان شغال تمام
بس جه علي وقت ماحدش اهتم بيه و مات :(

خلي بالك من القطط لان فيها امراض وحشة :]

انا ايام الامتحانات حلمت بتعبان


علي فكرة انا ساعات بيبقي معايا
9 قروش و المصدر هو اني كنت مشغل زمان نظام الو بالثانية D:

المتابعون

اعتبرها بيتك ♥

وِش القفص

خليك ورايا

دليفري..