لعلمك

لعلمك

إقرأ لي

دخلوا بكليك شمال :D

Blog Archive

الأربعاء، يوليو 29، 2009

postheadericon كيف تتخلصين من البطيخة لو طلعت قرعة ؟؟




كلنا عارفين ان الجواز زي البطيخة .. يا قرعة .. ياقرعة ، ايووووووون ماهو ماتحسبوش يا بنات إن الجواز راحة المهم بقى الموضوع دا للبنات بس يعني الشباب ياريت يروحوا يشموا هوا كده بعيد عن المنطقة نرجع بقى للبنات
.. نعمل ايه لو البطيخة طلعت قرعة ؟؟

قدامك 3 حلول .. لأ علينا بأربعة .. نقولك هما مـ الآخر كده خمسة ..

يا إما تعيشوا مع بعض تقرفوا في بعض وتخلفوا عيال ويتربوا بقى على الخناق والمشاكل ووجع القلب

يا إما تخلعيه وتخلصي بس يا مين يعيش بقى

يا إما تقتليه وترتاحي بقى خمسة وعشرين سنة بالقليل في الزنزانة

يا إما تتقي الله فيه وفي حياتكم وتعامليه بالحسنى وتدعي ربنا يهديه

يا إما لو كل دا ما جابش نتيجة ..

اسمعي كلامنا وخدي النصايح الذهبية دي اللي هتخليه يطلقك في خلال اسبوع


نصيحة نمبر وان :الراجل ما يحش الست الكئيبة وعشان كده .. هتبقى ولا أمينة رزق في زمانها ، تصبحيه بخناقة وتمسيه بخناقة وكل ما تتكلمي معاه تجيبي له سيرة كل حاجة تغم من يوم ما اتولدتي .. ولا نقولك ، من يوم ما الهكسوس دخلوا مصر وكل ما يبقى فرحان فكريه بحاجة تضايقه


نصيحة نمبر تو : الراجل ما يحبش الرغي وعشان كده هتتحولي لراديو من غير ايريال ، دوشة ووش طول النهار ورغي في اللي ينفع واللي ما ينفعش واوعي تدي له فرصة يتكلم خااااااالص وكل ما تخلصي الكلام عيديه من الأول .


نصيحة نمبر ثري : اوعي تنسي تكوني مثال للمرأة العاملة في جمع القمامة .. يعني شعر منعكش هدوم متوسخة ريحة تسد النفس كل ما تشوفيه اهرشي في شعرك زي الجربانين والغي من قاموسك كلمات زي غسيل وش ، ودش وشامبو وكده انسي انسي


نصيحة نمبر فور : الراجل ما يحبش الست اللي بتقول ألفاظ خارجة علشان كده ماتخليش في بؤك غير كل ما هو تيييييييييييييت من أول يا ولاد ... شحيبر .. لحد .. يا ولاد الــ ... شعب


نصيحة نمبر مش فاكرة : اوعي تنسي تاكلي بطريقة مقرفة .. كأنك محرومة وما شوفتيش الأكل قبل كده ، وتعمدي تخرجي من الباثروم ع السفرة على طول ولازم يشوف انك عملتي كده وطبعاً من غير ما تغسلي ايدك ، دا أكيد بالإضافة لإنك لازم تفتكري كل موقف مقرف حصل لك في حياتك وتحكيه ع الأكل .. حاجة كده لزوم السسبنس


نصيجة نمبر بعد كده : الراجل ما يحبش الست اللي تقعد تجيب سيرة الناس بحاجة وحشة وعلشان كده ما تشوفيش وشه إلا وتحكي له على حاجة وحشة في فلانة وحاجة منيلة في علانة وما تنسيش تفبركي فضيحة هو متأكد انها ما حصلتش علشان يحتقرك زيادة وزيادة .. ولو كان ما بيكلمكيش - ودا احتمال قوي بعد كل العمايل دي - تعمدي تتكلمي في التليفون قدامه مع واحدة صاحبتك وتقولي المطلوب قدامه


نصيحة نمبر ... ولا بلاش..


أحنا بقى نكتفي بهذا القدر من المكالمات .. قصدي النصايح

وصدقينا بعد كل دا الراجل هيعمل حاجة من4


إما : هيضربك باللي يطوله وساعتها بقى ممكن تعملي له محضر في القسم وتوديه في داهية


يا إما هينتحر وساعتها تبقي خلصتي منه

يا إما هيطلقك ويكسر وراكي قلة

يا إما .. هيتحملك ويعاملك كويس ويدعي ربنا يهديكي و ساعتها بقى يبقى خسارة فيكي


17 بوينتس أوف فيو:

الكلمة نور يقول...

طب ما كان اسهل تقولى ارميها فى الزبالة

فكرة من الزمن ده يقول...

اول
ت
ع
ل
ي
ق

فكرة من الزمن ده يقول...

انت كمان بتخللي التعليقات زي تندر؟
يكون في حلمك
انا اول تعليق وبس

فكرة من الزمن ده يقول...

اروح اقرا بقى

فكرة من الزمن ده يقول...

هههههههههه
والله انتي كارثة
الستات ناقصة نكد وعكننة واشياء اخرى لما تتحفيهم بنصايح تودي في داهية

الجميل في البوست هو المعلومة المعكوسة بتبقى اوضح واخف
تحياتي

مي يقول...

ههههههههه
ازيك ياقمر بس بجد نصايح ذهبية هههههههههموتينى من الضحك والله
بس هو مش هيستحمل من نمبر وان بس برضه احتياطى قطيعة محدش بياكلها"البطيخة" بالساهل
جميلة اوى تحياتى ليكى

أحمد فارس يقول...

يا سلام عليك يا بنوتتنا وعلى دماغك
تسلمي عالتدوينه الجامده دي
بجد انتي جيبتي الفولة في الموضوع بأسلوب ساخر رائع جداً
سلمتي لنا ودايماً متابع تدويناتك
اللي ربنا ما يحرمنا منها

wafaa يقول...

ممكن ترجعيها للى اخدتها منه احسن
ولو مرضيش ياخدها تفضحيه ف الشارع هياخدها يااما هيبطل يبيع وكده تبقى انقذتى بنات كتير ويكفيكى شرف النضال فى سبيل الحرية

مامة مازن يقول...

عكس عكاس هههههههههههههههههههههه
صح
وصلتيها بطريقة شيقة وممتعة
شطورة

مهيج الجماهير يقول...

فعلاً ان كيدهن عظيم
بس بأمانة بوست لذيذ
و اسلوبك بيعجبنى جداً و الله
نحياتى

أبو كريم يقول...

وهل يوجد على وجه الأرض رجل يستطيع تحمل كل هذا بدون رد فعل أقله أن يفعل كما فعل فاروق جويده:
أسقطت حبك من سنين حياتي
وصلبته شبحا على الطرقات
وجمعت أيام الفضائل كلها
فوجدت بُعدي أجمل الحسنات
قد كنتِ في ليل الضلال خطيئة
لا الصوم يغفرها ولا صلواتي


الدنيا متاع وخير متاع الدنيا الزوجه الصالحه

mony يقول...

نصيحه نمبر ....
الطريق لقلب الراجل معدته
مش قلبه اللى بينبض
اقصد قلبه من البيت
اقرفيه باكل مقرف زيه
اول زياره
تحياتى

لاسع افندى يقول...

اول زياره للمدونه ...بس بجد دمها خفيف ...ونصايحك ممتازه فى تطفيش اى راجل برافو..حمامة سلام

تحياتى

The Confused يقول...

هههههههههههههههههههههه
حلوه يا ولاد شحيبر دي

بوست جاااااااااااااااامد

وعلى فكره يا حماتي برضو لو عملت ايه باللزي هفضل حاططها ف عيني برضو :p

المفتكس يقول...

إقتباس: نصيحة نمبر مش فاكرة : اوعي تنسي تاكلي بطريقة مقرفة .. كأنك محرومة وما شوفتيش الأكل قبل كده ، وتعمدي تخرجي من الباثروم ع السفرة على طول ولازم يشوف انك عملتي كده وطبعاً من غير ما تغسلي ايدك ، دا أكيد بالإضافة لإنك لازم تفتكري كل موقف مقرف حصل لك في حياتك وتحكيه ع الأكل .. حاجة كده لزوم السسبنس

............................

يععععععع .... نصيحة مقرفة قوي

koky يقول...

ههههههههههههههههههه موضوع بجد سكررررررررررررر من بنوته زي السكر بس ياساروره انا عايزه اعمل له شير ع الفيس ومش عارفه ازاي زرار شير بيجيب الالمدونه نفسها انا عايزه الموضوع ده بس اعمل ايه يارورو؟؟؟؟؟

koky يقول...

ههههههههههههههههههه موضوع بجد سكررررررررررررر من بنوته زي السكر بس ياساروره انا عايزه اعمل له شير ع الفيس ومش عارفه ازاي زرار شير بيجيب الالمدونه نفسها انا عايزه الموضوع ده بس اعمل ايه يارورو؟؟؟؟؟

المتابعون

اعتبرها بيتك ♥

وِش القفص

خليك ورايا

دليفري..