لعلمك

لعلمك

إقرأ لي

دخلوا بكليك شمال :D

Blog Archive

الثلاثاء، أغسطس 11، 2009

postheadericon شارعنا دخلته رقاصة ؟!!!




شارعنا حبيبي انضف شارع في مدينتنا المصونة

انضف شارع ، واهدى شارع ، واوسع شارع

وكل سكان الشارع نفس الطباع .. ما بنحبش الدوشة
ما بنحبش قلة الأدب .. ما بنحبش الزحمة

يوم ما حد بيتجوز في الشارع بنبقى مستحملين الزيطة على فص عيننا

ونقول معلش جيراننا بقى وكده

ومن حقهم يفرحوا

لكن اللي حصل امبارح دا لا يطااااااااااااااق

اقولكم ايه اللي حصل ..

اول امبارح على المغرب كده لقينا عربية داخلة الشارع وشايلة خشب وقماش

بتاع الصوان بتاع الفرح او العزا

فكلنا استغربنا قولنا مين دا اللي هيتجوز في شارعنا وما عزمش حد او مين اللي مات واحنا ما نعرفش كده ؟؟


المهم استنينا وقولنا يا خبر بفلوس بكرة يبقى ببلاش

وجه بكرة ابو بلاش وياريته ما جاااااااااااااااااش


وبدأوا ينصبوا الصوان ، ومن غير استئذان علقوا فروع نور في كل بلكونات الشارع


اكتشفنا ان دا فرح ، بتاع ناس مش من شارعنا ولا من منطقتنا اساساً

هم استنضفوا الشارع .. راحم جم عملوا الفرح فيه من غير لا احم ولا دستور

مش دي المشكلة .. المشكلة ان العيلة دي معروفة ان افراحها بتقعد للفجر

و على عينك يا تااااااااجر .. شوفنا البيرة وهي داخلة من ضمن استعدادت الفرح

والفرح اشتغل .. واشتغل بقى معاه .. ضرب نار ، بانجو ، بيرة ، رقاصة

لأ والأنيل بقى اييييييييه ؟؟

البهوات معازيم الفرح .. قلبوا كل حتة ارض فاضية في شارعنا لــ " مراحيض عامة "

احنا مثلاً .. بيتنا في اول الشارع ، جنب بيتنا في ارض بتاعتنا كانت جنينه بعدين قولنا هنبنيها

فشلنا الزرع وشيلنا السور بتاع الجنينة تمهيداً لاننا نبنيها ، هم دخلوا فيها وقلبوها .............

مش احنا بس ، دا كل حد في الشارع جنبه جنينة او ارض لسة بتتبني حصل عنده كده

وعلى الساعة واحدة بالليل كانت السحابة البيضا وصلت للسما ومغطية الشارع كله

دا غير الميكروفونات اللي جابت لنا صمم

والفرح استمر لحد بعد صلاة الفجر ، ختموها بخناقة كبيرة .. كرسي فـ الكلوب

فـ الفرح خلص .. يعني لو ما كانوش اتخانقوا ما كانش الفرح خلص

طبعاً طول ما الفرح شغال في ناس اشكال والوان داخلة وخارجة م الشارع

وناس تسند في اي جنب وتقف تحشش

وكل اللي في الشارع مرعوب من اللي ممكن يحصل لو حد من دول اتهجم على بيته

كمان بعد ما خلصوا الفرح ما هانش عليهم ينضفوا الشارع لأ ...

راميين بواقي الأكل في الشارع والقطط والكلاب جات تاكل منها

قمة البلطجة بجد .. حسبي الله ونعم الوكيل


17 بوينتس أوف فيو:

احمد ماهر يقول...

ههههههههههههههههه
الله يكون فى عونكم بس المفروض كنتم تبلغوا البوليس لأنهم لو جيرانكم اهو تستحملوهم والحكاية تعدى .... انما دول ناس بارده ومتطفلة .... ده بالاضافة انهم سابوا الشارع خربان بعد ما مشوا ... يلا عدت وخلاص بس لو حاجة زى دى حصلت المفروض تبلغوا البوليس لأن المره دى جات سليمة وعملوا___فى الشارع ممكن المره الجايه يعملوه فى البيوت بتاعه الشارع وبما انكم فى اول الشارع فهيبقى فرصتك بالفوز اكبر.
وشكرا.....


..... احمد ماهر

سمو الأميرة سارة يقول...

يا احمد ما هم البوليس كان بيحشش معاهم :@


هم ناس كبارات ف البلد بقى ونظام الشاي ابو ياسمين اللي لافف على كل موظف وكده

حسبي الله والله

بلاش تبشر بقى بالنسبة للــ ____________ لحسن يتطور ويبقى ****** في البيت او في الشارع :((

أبو كريم يقول...

شارعكوا دخلته رقاصه... عقبال النور يا وله..ههههههههههههههههه وربنا انا سخسخت من الضحك وكمان رولكوا الجنينه الى فى الشارع الى هتبنوها يعنى مش ناقصكوا الا انكوا ترموا البزره وتعملوا زى الى بيبعولنا فاكهه مرويه بميه مجارى...فعلا شر البليه ما يضحك

حسبى الله ونعم الوكيل

يعنى فرح مفيهوش حاجه حلال

محمد سعيد يقول...

تصدقي أول مرة أعرف أن الأفراح الشعبية بيبقى فيها بيرة وحشيش بجد!

أنا كنت فاكر فيلم [الفرح] لما وصفها كان بيبالغ أو بيزيط يعني كعادة السينما..

لكن اللي حصل جنبكم دا زي الفيلم بالظبط..

يعني الحكاية بجد مش تأليف!

الصراحة حاجة تقرف وتحزن..

ربنا يرحمنا!
حسبنا الله ونعم الوكيل!

مامة مازن يقول...

ههههههههههههههههههه
اولا كده مريم فطست على روحها من الضحك وهى قاعدة جمبى على منظر اتلر قاصة الامورة اللى انتى حطاه ده هههههههههههههههههههههههههههه
ثانياكنتوا بلغوا البوليس بس انتى بتقولى البوليس كان معاهم مش قصدك يعنى امين واللاحاجة واللا الموضوع كان فى رتب وبتاع لا بتهزرى
يا خراشى دى بتبقى افراح زبالة مهو بيعملوها فى الافلام وبسأل اخويا هو فى كده قالى اه فيه قولتله ايه ده انت بتهول وبتكبر الحكاية قالى والله بيحصل
طيب عيشنا وسمعنا واديكى شوفتى وشميتى_______ هههههههههههههههههه
يادى القرف ىمعلش بس ابقوا اقفلوا بوابة البيت بقى لاحسن واحد يقول اما ادخل استر نفسى جووه والا حاجة هههههههههههههههههههههههههههه

شباك موارب/منار يقول...

فعلا حسبي الله ونعم الوكيل
دي قله ادب
انا بكره اوي نظام الافراح الزباله ده
معليشي ياحبيبتي
بتحصل في احسن العائلات

bos bos يقول...

هههههههههههههههههه

ايه ده يا خبر هو أحنا بقينا عايشين فين

ربنا يسترها

سمو الأميرة سارة يقول...

ابو كريم ههههههههههههههههه المرة دي النور والرقاصة دخلوا مع بعض ههههههههههههههههه

بالنسبة للجنينة صحيح سمدوها سماد طبيعي لا كيماوي ولا غيره ههههههههههههههههههه

يعععععععععععععععععع

سمو الأميرة سارة يقول...

محمد سعيد ، انا سامعة من زمان عن الافراح دي واللي بيحصل فيها ، لكن اول مرة يبقى قريب مني اوي كده

سمو الأميرة سارة يقول...

مامة مازن هههههههههههههههه دي اكتر رقاصة محترمة لقيتها معلش معلش هههههههههههه

يامامة مازن ، البوليس كله شارب من ايديهم شاي بالياسمين من بتاع مرجان احمد مرجان ..

على رأيك تبقى مصيبة لو قال يستر نفسه هههههههههههههههههههههههه

سمو الأميرة سارة يقول...

منار ، دي قلة ادب وبلطجة وقلة ذوق وكل حاجة :((

سمو الأميرة سارة يقول...

بوسبوس احنا عايشين في مصر :(( للأسف

د/ أحمد لاشين يقول...

سمو الاميرة
أشفقت عليهم فعلا
ياريتهم حد فهمهم
أكيد فيهم ناس كويسين بس طلعوا في بيئة صعبة
ومحدش خد بيدهم
أكيد فيهم حد ممكن ربنا يهديه لو احنا ساعدناهم
الدنيا مش وحشة كده
بس الناس الحلوة سابت الشيطان يضحك علي الناس الاضعف
كل واحد لازم ينور شمعة
هنقضي علي كل الظلام
أكيد كان فيه تصرف أفضل ممكن أصحاب البيوت كانوا يعملوه
حتي لو مش يوم الفرح لكن فيه تصرف للتصحيح بعد الفرح او قبله
ممكن نفكر فيه مع انفسنا وهنعرف وقتها اننا مسؤلين عنهم
آسف علي الاطالة

kafrawy يقول...

مسسسسسسسسا يا بتوع الفرح

نور مصطفي يقول...

انا اول حاجة جت ف بالي لما قريت العنوان
, قلت يمكن رقاصة جت سكنت في الشارع عندكم
بس دة طلع انيل
هو تعليقي علي الحكاية دي كلمة قالها احمد ادم في فيلم الرجل الابيض المتوسط
D:
دي بللللللللللللطجة

Darsh يقول...

سارة

أجيبي عن الاسئلة الآتية باللغة الكزخستانية...

س1. هل البيرة ... نعم البيرة هي اسم آخر لعصير القصب ؟؟

س2. و ركزي معايا .. هل ضرب النار .. كان بمسمدس صوت ام مسدس مياة؟؟

س3. هل البانجو المذكور اعلاه .. هو نفس المذكور في اغنية البانجو مش بتاعي و الله بريء يا بيه؟؟ و التي اخبرني سواق التك تك انها المانجو بس بالصعيدي ؟؟

س4. الرقاصة التي حضرت الفرح ... ماذا تكون هذه الرقاصة .. هل هي مدرسة رسم ؟؟ أم ماذا تعني هذه المهنة ؟؟

س5. و ده اهم سؤال ... ركزي معايا ... الكرسي اللي انضرب في الكلوب ... ما هو مصير الكلوب ؟؟؟ انكسر ام لازال سليما ؟؟؟






























هههههههههههههههه

استني لسه فيه س6.

س6. هو العريس و العروسة اتجوزوا في الآخر و لا انفصلوا ؟

SuperNova يقول...

that is so cool

المتابعون

اعتبرها بيتك ♥

وِش القفص

خليك ورايا

دليفري..