في سؤالين محيرني:
هي فعلاً معرفة الناس كنوز ؟؟
طيب .. لو الكلام دا صحيح
ليه قالوا :
البعد عن الناس غيمة ؟؟
لما قعدت فكرت لقيت ان الاتنين صح
معرفة الناس كنوز فعلاً .. بس مش أي ناس
الانسان الصادق الصالح .. الخدوم اللي يبقى سند ليك في وقت الشدة دا كنز
والانسان اللي بيفيدك بعلمه او خبرته في الدنيا دا كنز
والانسان اللي يفتح لك صدره وترمي همومك بين ايديه ويواسيك وينصحك دا كنز
أما بقى الانسان المنافق ، الغشاش .. الحسود ، الحقود واللي ما بيكتمش السر فدا مصيبة
والبعد عنه غنيمة بجد
والانسان اللي قلبه اسود اللي بيملى قلوب اللي حواليه سواد زيه
الانسان المتشائم اللي يحسسك ان مافيش امل في اي حاجة
والانسان اللي يعمل حبيبك وصاحبك لحد ما يلاقي فرصة ويطعنك في ضهرك
دا مصيبة .. والبعد عنه غنيمة فعلاً
وبيني وبينكم .. حتى معرفة الناس اللي زي دي بتفيد بردو
زي ما بيقولوا كده
" بضددها تتمايز الأشياء "
وكل غلطة بنتعلم منها اكيد
فاضل بقى سؤال أخير محيرني :
ياترى هو احنا لازم نعمق علاقتنا اوي بالناس ونلغي الحدود بيننا ولا لأ ؟؟
في حد قال لي طول ما علاقتك بالناس سطحية هتبقي انسانة سطحية
ومش هتفهمي الدنيا ..
بس انا مرتاحة كده ، مرتاحة اوي بإني عاملة حدود بين الناس
علشان كل ما كانوا ابعد كل ما كان الضرر من ضربتهم او طعنتهم اقل ..
وبحس كمان اني كل ما كنت بتكلم اقل وبتفرج على الناس وبراقبهم اكتر
كل ما اتعلمت اكتر واستفدت من الدنيا وكمان اخطائي تبقى اقل
كمان لاحظت اوي ان الاختلاط بالناس اوي .. بيخليني اعيش في حياتهم اكتر ما بعيش في حياتي
وبيخليني ما عنديش وقت اشتغل ولا افكر بروقان
بصراحة بقى وبجد
انا حاسة اني مقتنعة بان معرفة الناس كنوز ، والبعد عنهم " بمسافة كافية " غنيمة
إيه يا سمو الأميره
ردحذفتدونتين فى يوم واحد غلط كده هتتحسدى
هى معرفه الرجال كنوز وده المثل
ووصف الرجال لان كلمة رجل بمنظورها الشعبى ليس المذكر ولكن من يحمل صفات الرجوله كالشهامه والاقدام والصدق وغيرها فهى كنز لانه معين على الحق رافض للباطل
كما قال الله فى كتابه (يسبح له في الغدو والاّصال*رجال لا تلهيهم تجارة ولا بيع عن ذكر الله)
وصفهم الله بالرجال
انتى قصدك الإختلاط بالناس كل الناس ده طبعا قمة الغلط عشان مش اى حد يبقى اهل لثقتنا لان الناس على خمسه أوجه
الأب والأم ( دول مفيش زيهم)
العائله (خصوصا الاخ الأكبر)
الصديق ( لو كان بجد صديق وصادق)
العالم ( المدرس او الشيخ حد فاهم)
العوام ( دول بقى الى بتتكلمى عنهم)
فيهم الحلو والوحش بس نصيحه الحاجز الى بتتكلمى عليه ده لازم يبقى موجود ولفتره طويله عشان تعرفى راسك من رجليكى
وكفايه كده انا خلاص هيست سلام
مشكورة يا سارة-سان على التدوينة دي، وهو أنا بصراحة موافق على وجهتين النظر وبقدر أوفق بينهم في أغلب الحالات..لكن أفضل البعد عن الناس كتير :D
ردحذفلكن فعلاً فيه أشخاص الواحد يندم بشدة لو معرفهمش لأنهم في الحالة دي بيبقوا فعلاً كنوز أخلاق وجدعنة وشهامة..وفي أشخاص برضه الواحد يندم إنه عرفها أساساً الله لا يوريكِ >.<
وبالتوفيق إن شاء الله ورمضان كريم
محمد الوكيل
يا سمو الأميره الأميل غلط
ردحذفياريت تبعتيلى اميل على
bahaa_bahaa2002@hotmail.com
عشان اعرف اعمل فورورد للاتاش
شفت عنوان البوست فى مدونة..جذبنى وقلت لازم اقراه
ردحذفانا معاكي 100%..انتى طلعتى بحكمة كبيرة مع نهاية كلماتك
فى ناس تفتكريها حمل وديع وما بيكون هاد سوى قناع لذئب مفترس !
هى هاى الناس يللي لازم نبعد عنها!
بس بيبقى السؤال كيف نعرف الناس المنيحة من الناس الوحشة!!؟
سمو الاميرة
مدونة راقية باحساس عالي
الف عافية لعيونك
تقبلي مروري
احترامــيّ..
والله يا سارة أحيان كتير بيبقى البعد عنهم غنيمة
ردحذفده على الأقل بالنسبة لي
وانا شايف ان الكلمة اللي انتيقلتيها في الآخر مهمة جدا
معرفة الناس كنوز ، والبعد عنهم " بمسافة كافية " غنيمة
ده حقيقي جدا
لازم يبقى في مسافة بيننا وبين الناس ومنشلش المسافة دي الا بعد لما نتأكد تماما انهم هيقدروا ده