لعلمك

لعلمك

إقرأ لي

دخلوا بكليك شمال :D

Blog Archive

الخميس، سبتمبر 03، 2009

postheadericon أنا إنفيزابل .. إذن اعتبرني مش موجود

كام مرة كنت كاتب على الماسنجر انك مشغول ويدخل حد يستخف دمه ويقولك
" ماشي يا عم المشغول .. ازيك بقى وعامل ايه
وشوفت مش عارف مين حصل له مش عارف ليه
وديييييييييينج انت ما بتردش ليه ؟؟
ترد عليه يقولك تااااااااااني كذا حصل وفلان عمل واسمها ايه بقى قالت حتة نكتة و................ رغي متواصل وما يفكرش لحظة انك كاتب مشغول "
ولو قولت عندي شغل يقولك اللي اداك يدينا ياعم و........... يكمل نفس الحوار
اوك انت صاحبي وانا بحبك وبحب اتكلم معاك والدنيا فللي ، بس انا دلوقتي مشغول
انا مش حاطة الاستيتس دي مثلاً حباً في شكلها !!
ولو دخلت اونلاين لكل البشر اللي ع الماسنجر ودخلوا كلهم كلموك ما بتبقاش ملاحق على حد فيهم
فتعالى بقى قول لحد منهم انا اسف معايا ناس .. يالهوووووووووووووي يعني هم الناس دول احسن مني ؟؟
يعني هو انا مش قد المقام ؟؟
وناس تانية بتزعل لو دخلت الماسنجر اونلاين وما دخلتش تسلم عليهم
وناس وناس وناس ..... وعلشان كده
الحل الوحيد انك تكون
Invisable
أنا بكون انفيزابل للاسباب دي :
1 - ماليش نفس اكلم حد لأي سبب خاص بيا
2 - مشغولة وبخلص شغل مش هينفع اكون بكلم حد وانا بعمله
3 - بكلم حد واحد في موضوع مهم ، او بكلم واحدة عزيزة عليا ومش بحب اكلم حد معاها
4 - قاعدة اقرا ع الجهاز ومش هعرف اركز في القراية والكلام
5 - عندي ناس كتير اونلاين ولو فتحت مش هعرف اكلم حد منهم من كتر الناس
وغيرها وغيرها من الاسباب
لكن تفتكروا اتعتقت ؟؟
لأ الناس بتستخدم البادي تشيك وتروح داخلة تقولك انت موجود
انا عارف انك موجود
اتكلم بقى
وناس تزعل وتقول لي لما مش بتكلمينا ضيفتينا ليه ؟؟
وناس ما بتتكلمش من اساسه وتروح حذفاني على طول
ياااااااااااااااااااااااريت يا جماعة لما حد يشوفني انفيزابل يعتبرني مش موجودة
إلا اذا طبعاً روحت انا اكلمهم :)
وانا والله لو شوفتكم موجودين وانفيزابل ولا بيزي مش هكلمكم
اكيد كلامي دا لا ينطبق على ناس معينة
هي عارفاني كويس وعارفة اني مهما كان حالي بكلمها لأنها ناس قريبة مني وعارفة تقريباً كل حاجة عني
فلو متضايقة من مشكلة هي بتبقى حاسة انا متضايقة من ايه
وحتى لو ما قولتلهاش بتحس بيا فبالتالى الكلام معاها مش هيكون معاناة فوق تعبي

8 بوينتس أوف فيو:

إنـســـانـة يقول...

بصراحة عقدتينى بالبوست ده ... طب تصدقى انى ممكن اقعد اليوم كله من أوله لآخره فاتحة الماسنجر واليوم يخلص واقفل الكمبيوتر وانا محدش فكر يقولى سلام عليكم حتى

حالة مأسوية بعيد عنك
:(((((

أبو كريم يقول...

ساره أخيرا ظهرتى على الساحه

يا سيتى الى ما يحترمش خصوصياتنا اديله دليت

وكبرى دماغك

سلام

Punny_Punny يقول...

الأول كل سنة و أنت طيبة
أنا أول مرة أعلق عندك لكن أنا متابعاكي من زمان.
أما موضوع الماسنجر ده فعلا عندك حق بس أنا عن نفسي لما بكون مشغولة بقول للي يكلمني أنا مشغولة و لو زعل يتفلق.

Tarkieb يقول...

احسن حاجة تقفليه وتريحي دماغك.....

زهرة الحب يقول...

السلام عليكم كل سنه وانتى طيبه


هو كلامك صح وبجد فى ناس خنيقه كتير وبتعمل نفس الكلام اللى انتى قولتيه ده


رمضان كريم

Tamer Diab يقول...

م الآخر كده الموضوع ده محتاج حاجة واحدة بس
الي يزعل يشرب م البحر طالما انا مخنوق او مش فاضي او مش طايق او مش اي بطيخ انا حر بقي
وفي حل تاني متفتحيش ماسنجر وانتي مخنوقة اصلا عشان ممكن يقابلك نوع م الي بيشرب م البحر ويرجع يتكلم علي طول بعدها
يبقي الحل متدخليش وانتي مخنوقة اساسا
يا اما تعملي ماسنجر في شخصيات معينة هي الي ممكن تطيقيها وانتي مخنوقة ويبقي ده بتاع الخنقة.
كل سنة وانتي طيبة

بسنت صلاح الدين يقول...

السلام عليكم ،ازيك يا قمر ،مدونتك جميله اوى و دمها خفيف ، و البوست هايل فعلا والله عندك حق الناس مش بتراعى ابدا ان الواحد بيقعد على الكمبيوتر لأغراض تانيه غير الرغى ،وبيبقى حابب يركز
كل سنه وانتى طيبه،و اشوفك بكره ان شاء الله

أبــــو ضـــيــاء يقول...

عشا كده انا مش بضيف عندي غير العزاز عليا , اللي هيحترموني في اي لحظة ويحترموا وقتي

المتابعون

اعتبرها بيتك ♥

وِش القفص

خليك ورايا

دليفري..