2009-09-25

نفسي في حاجات

 
نفسي أركب عجلة



نفسي أركب عجلة بالليل وأمشي في طريق مالوش نهاية

واكون بسمع منير وفيروز وأشم هوا نضيف

وأحاول شوية انسى الهم

وما اكونش قلقانة ولا ورايا مواعيد


  

نفسي الدنيا تمطر



نفسي اوي الدنيا تمطر وأمشي ادوس في الماية زي البنوتة دي

لا يهمني هدومي تتوسخ ولا نظرة الناس ليا

نفسي أحس المطرة بتغسل كل الدنيا

بحب أوووووي الناس لحظة المطرة

الكل بيبقى بيجري وسايب الناس في حالها وبيبص لنفسه بس

الكل محتاج يحس بأمان ..

محتاج يستخبي في حد أو حاجة

مش أنا لوحدي


            

نفسي في قطة




نفسي في قطة شقية كده وصغننة شوية

اشوفها وهي بتكبر يوم عن التاني

اخد بالي من أكلها وشربها ونومها 

وتضحكني كل شوية بحركة بريئة تعملها

لما تلاقيني ساكتة تقعد تلاعبني

ولما تلاقيني بعيط تيجي تتمسح فيا بحنية وتبص في عنيا بحزن

فاحضنها واضحك زي زمان 

نفسي في قطة تقعد تعمل كل شوية حاجة جديدة واحكي عنها حكايات للصبح

نفسي بجد في حاجة تخليني اشتاق لرجوعي للبيت 
 
 
 
                  

نفسي في بيت 





نفسي في بيت صغير أوي .. مافيهوش اوض كتير

يكون بتاعي لوحدي .. انا اللي عملته 

وكل ما يبقى معايا فلوس اجيب فيه حاجة صغيرة جديدة 

وانا اللي ارتب كل حاجة فيه 

ويكون في مكان بعيد عن الناس .. بس مش اوي

اشوفهم من بعيد ، واحس بيهم حواليا

لكن في نفس الوقت انا عايشة في هدوء 

والبيت دا يبقى حقيقي الحاجة الحلوة اللي بتصبرني على الدنيا

كل ما حاجة تضايقني برة .. اتصبر بإني لما هرجع البيت هرتاح

يكون في كتب كتير و يكون فيه قطة واحدة

وبلكونة صغيرة فيها ريحان 

و اقعد كل يوم ساعة الفجر فيه اقرا .. اقرا قرآن الأول وبعدين اروح اعمل كوباية نسكافيه

واقرا في كتاب بحبه 

ومن وقت للتاني اعزم واحدة من اصحابي اللي بحبهم أوي 

ونقعد طول اليوم سوا نعمل اكل وناكل ونتفرج على التليفزيون 

ونقعد نرغي مع بعض ونضحك 

صحيح لما تمشي تروح هحس اني وحيدة أوي

بس هتيجي القطة تلاعبني وتسليني وتفكرني اني مش لوحدي

 
 


هناك 19 تعليقًا:

  1. وانا كمان نفسى فى حاجات :(

    ردحذف
  2. نفسى ابقى مذيع كبير فى يوم من الايام

    نفسى ابقى مليونير ومعايا فلوس اشترى بيها اى حاجة انا عاوزها


    نفسى اساعد كل الناس انها تحقق احلامها

    نفسى ونفسى ونفسى .....

    ردحذف
  3. انا نفسي في بيت ضخم جدا بس يكون اوضة واحدة. و السرير يكون قريب قوي للارض لدرجة ان الناس تفتكره مرتبة. طبعا لازم هيكو فيه كنبة كبيرة قدام تليفزيون مش لازم يكون كبير قوي و نقعد انا و اصحابي واحنا عندنا خمسين سنة نلعب بلايستاشن زي العيال االصغيرة

    ردحذف
  4. نفسي كمان في مكتبة عملاقة ، تاخد من اليت الضخم جدار او اتنين . مش لازم اكون قريت كل الكتب اللي فيها، كفاية ان انا ابقى عارف ان لما يهفني الغرام على كتاب جديد ، مش هحتاج ادور كتير

    ردحذف


  5. وانا كمان ياساره نفسى فـ عجلة


    ياااااااارب ياساره يحققلك كل اللى نفسك فيه

    ردحذف


  6. وانا كمان ياساره نفسى فـ عجلة


    ياااااااارب ياساره يحققلك كل اللى نفسك فيه

    ردحذف
  7. يا رب تتحققلك امنيات احلى واحلى من كده

    ردحذف
  8. وايه كان نفسك فيه .......؟


    ها

    قولى

    بتحلمى بعجله دة بدل السياره ولا دة البديل البيولوجى علشان تلوث الهواء و كدة

    ههههههههههههههههههههههههه

    ردحذف
  9. ياااااااااه ياساروره

    فيه حاجات كتير من اللى نفسك فيها نفسى فيها

    بس تعرفى كلها بتنم انك نفسك تبقى لوحدك وانك زهقتى من الناس ونقدهم لبعض

    مش عارفه ليه حسيت بحزن فى البوست مع ان كله احلام

    :::::::::::::::::::

    وحششششششششششششششششششششششششششششتينى اووووووووووى

    ردحذف
  10. عمر المليجي .. يارب تعرف تلاقيها يا عمرو ، صدقني فرصتك كولد ف الحاجات دي اكتر مني كبنت

    ردحذف
  11. احمد ماهر يااااااااااااارب اللهم امييييييييييييين يارب تبقى مذيع كبير ، وتبقى مليونير لو دا فيه الخير ليك :)
    نورتني يا احمد

    ردحذف
  12. احمد ( سوبر نوفا ) منوووووووووووووووووووووووووورني بالعربي على فكرة :)

    تصدق فكرة البيت اللي نفسك فيه دا جامد اوووووووووي

    ردحذف
  13. سارورة حبيبتي ياااااااااااااااااارب انتي كمان وقبلي ، تحققي كل اللي بتتمنيه
    لو ربنا رزقني بعجلة هديكي بيها لفة يا ستي :)

    ردحذف
  14. ابو ضياء ياااااااااااااااااااااااااااااااااااااااااارب اللهم اميييييييييييين وانت كمان يارب

    ردحذف
  15. كفراااااوي ايوووووووون بديل بيولوجي هههههههههههههههههههه

    ردحذف
  16. دودو وحشتيييييييييييييييييييييييييييييني يا بسكوتتي واخيراً هشوفك ان شاء الله

    احساسك ما بيخيبش يا دودو

    بس ما تقلقيش ... بحاول اتعود

    ردحذف
  17. سمو الأميرة

    كل سنة وانتى طيبة ( معلش جت متأخرة بس كريم ومامته فى الأجازة خدونى من الدنيا كلها)

    ربنا يحققلك حلمك ويرزقك ببيت صغير يحميكى من المطره ووتعيشلك جواه قطه ولما المطر تخف تركبى العجله وتلفى فى شوارع نضيفه


    حلوه الأحلام البسيطه دى


    بالنسبالى بقى كل الى عايزه ان ربنا يكرمنى فى ابنى ويححق كل الى ماعرفتش احققه ويبقى احسن منى

    ياله بقى رجعت تانى للتدوين

    سلام

    ردحذف
  18. ة ... سارة
    انا دخلت مدونتك الجميلة استمتعت معاكى باللى نفسى فيه ... حلمت وياكى وطفت انا فيه .. والقمر والنجوم نوروا كل اللى فيه ... نفسى فيه
    تسمحى لى اشرب كوباية شاى واستمتع وانا بانقع رجلية زى العيال
    حامسك ورقة وقلم واكتب .. اسطر .. ما انا علىقد الحال .. الحروف منى بتتمخطر وتطلع موال
    حا اقابلك فى اسعد حال

    ردحذف
  19. مدونة كتير حلوة

    ياريت تشاركي في منتدايا

    www.bawasle.net/forum

    ردحذف

Say something...