في ناس كتير بتحاول تعيش صح .. بتحاول تعيش حياة ايجابية وبتحاول تتجنب الأخطاء اللي شايفاها في المجتمع
فيكون رد الناس عليهم - بدل التشجيع - هو .. ايه ياعم دا البني آدم دا عايش في الدور أوي .. دا خنيق
احياناً بتتقال من وراهم ، واحياناً بتتقال في وشهم
رغم انه هو بيعمل الصح ..
يعني مثلاً ما يرضاش يرمي حاجة في الشارع ولو حد من اصحابه حاول يرمي بيقول له ما ينفعش ترمي حاجة في الشارع
وكده ما يصحش واحتفظ باللي عايز ترميه لحد ما تروح البيت او تروح مكان فيه باسكت وارمي فيه اللي انت عايزه
أو مثلاً لما حد يدخن في الميكروباص يقول له بعد اذنك ما تدخنش في مكان مقفول وضيق كده علشان ما تضرناش
أو مثلاً يكون بيحب القراءة ولما يكون في مواصلات مثلاً يقرأ حاجة بدل ما هو بيضيع وقت
وغيرها وغيرها من المواقف ..
دا بيكون انسان فعلاً حابب يكون ايجابي ، ومش بيخاف من الناس ومن رد فعلهم على تصرفه اللي هو صحيح لكن للأسف عكس الشائع في المجتمع
فبالتالي بيكون تصرفه غريب وأحياناً مثار سخرية من الناس ..
في ناس قوية وبتتحمل نظرات وتعليقات الناس لحد ما الناس تقتنع أو تتعود على سلوكهم دا أو تزهأ من التريأة فتسكت عنهم
وفي ناس ما بتبقاش بالقوة دي وبتضعف وتستلم وتقول " يعني هي جات عليا أنا " " هو انا يعني اللي هصلح الكون " ودا غالباً بيكون انسان مش واثق في نفسه أوي
أو انسان مش مقتنع أوي باللي هو بيعمله
وكمان في ناس بقى عايشة الدور فعلاً .. يعني بتحب تعيش دور الايجابي ، والانسان الصح .. وبيعمل كل الحاجات اللي اتكلمنا عنها فوق دي من باب حب الظهور وبس
مش عن اقتناع بإن دا الصح أو بأهمية انهم يكونوا ايجابيين
ازاي بقى تعرف البني آدم العايش في الدور ؟؟
تعرفه لما تشوف تصرفاته في مكان ماحدش يعرفه فيه .. هتلاقيه عادي بيرمي أي حاجة على الأرض وهتلاقيه بيسكت عادي على السجاير ومش بعيد يكون هو نفسه بيدخن
وتلاقيه ما يفتحش كتاب ويقعد يقرا الا لما يلاحظ ان في حد واخد باله منه ...
الانسان العايش في الدور مش بيعيش بجد لأ دا بيمثل انه عايش
ياترى بقى انت مين ؟؟
انت عايش صح ؟ ولا عايش الدور ؟؟ ولا عايش وخلاص ؟؟
صحيح هي كلها عيشة .. بس الفرق كبير
- نُشر في مجلة شخبطة بتاريخ 5 نوفمبر 2005 -
أنا كنت قرأت التدوينة دي في العدد الأأول من مجلة شخبطة، وبجد والله بدون مجاملة كانت من أحسن المواضيع في المجلة، والتدوينة بتتناول أصلاً موضوع مهم وجانب سيئ عند المصريين واللي هو السلبية، وناس كتير تناولت الموضوع ده لكن الموضوع ده أسلوبه حلو أوي فعلاً :)
ردحذفشكراً سارة-سان على التدوينة! ^^
محمد الوكيل
ربنا يكرمك يا محمد يارب :)
ردحذفعارف كمان ياريتها تيجي على قد السلبية لأ دول كمان عايزين يقتلوا الحاجات الصح اللي في الناس
ودي حاجة مؤسفة جداً
بجانب انك وحشانى جدا وانى مضايقة انك مش بتدخلى عندى بس انا مش الناس الى بيتقال عليهم عايشة الدور وبالذات فى موضوع القراية هى هتعمل علينا مثقفة بسمعها كتيررر جداااا
ردحذفاوحش حاجة ان الواحد يعيش حياة مش بتاعته
ردحذفاو اللى عايش في دور دا بيعيش دور حد غيرة علشان كده لما بيقعد لوحده بيحن لنفسة
انا بقى مش بحب اعيش حياة مش بتاعتى
اوحش حاجة ان الواحد يعيش حياة مش بتاعته
ردحذفاو اللى عايش في دور دا بيعيش دور حد غيرة علشان كده لما بيقعد لوحده بيحن لنفسة
انا بقى مش بحب اعيش حياة مش بتاعتى
اعتقد ان احنا نقضي حياتنا
ردحذففي محاولات
للعيش صح :)
ممممممممممممممممم
ردحذفغالبا كدا
انا عايش فى بيتنا:))
تدوينه رائعه فعلا