2009-11-29

احميهم بكلامك !! إيه الحلاوة دي ؟




احميهم بكلامك !! إيه الحلاوة دي ؟

لما شوفت الاعلان دا حسيت ان فعلاً هو دا اللي بيحصل وهو دا اللي احنا عايزينه

مش عايزين نتكلف حاجة .. لا مجهود ولا وقت ولا فلوس ولا أي حاجة

احنا كل اللي علينا نتكلم والدنيا بقى تبقى تتظبط

عايزين الدنيا تمشي بحاجتين .. الكلام والنيات

ليه احمي ولادي بإني اعمل  خطوات الوقاية السليمة  مدام ممكن احميهم بالرغي ؟؟

ليه اتعب واشتغل علشان احقق كل احلامي مدام ممكن استنى قدام الزيرو تسعمية واعمل كل الحاجات دي ؟؟

ليه اكون ايجابي واكون مسلم على حق وارفع من شأن المسلمين


وبكدة ابقى بدافع عن الاسلام وعن الرسول الكريم


مدام ممكن انزل كول تون لأغنية ربنا يا ربنا واكون بكده ساعدت على نصرة النبي زي ما الاعلان بيقول ؟؟

وليه افكر في الطرق اللي احافظ بيها على جوزي واملى عينه وعقله وقلبه


مدام ممكن اشتري كاميه وهو هيترزع جنبي على الكنبة وما يسبنيش خالص ؟؟

ايييييييييه دا ؟؟ ايه اللي احنا فيه دا ؟

ايه السلبية والتواكل دول ؟؟


ليه عايزين كل حاجة تيجي بالطريق السهل اللي من غير تعب ؟

ليه عايزين كل حاجة في الدنيا تتقدم لنا على طبق من دهب

هتقولوا لي دي اعلانات وشغل دعاية .. لأ دي الحقيقة

هم عارفين اننا بنحب الرحرحة علشان كده بيشتغلوا على النقطة دي في كل اعلاناتهم

هم عارفين اننا عايزين بس البرستيج والمنظر فبيقدموا لنا كل اللي يساعد على اننا " نظهر " ايجابين ومتعاطفين و و و



كل حاجة عندنا في مصر بقت بالكلام ..

المسؤولين بيحسوا انهم عملوا اللي عليهم لما يتكلموا ويقولوا انهم قالوا لفلان وفلان يشتغلوا

والبني آدم مننا بيبقى راضي عن نفسه طول ماهو بيقول كلام صح

او بمعنى أدق الكلام اللي الناس عايزة تسمعه

بيقينا بنقول  " إننا عارفين ربنا " وبنقول " اننا ما بنحبش الظلم " وبنقول " اننا احسن شعب في الدنيا "

وبنقول ونقول ونقول .. وما بنعملش أي حاجة


هناك 10 تعليقات:

  1. يا سارة-سان موضوع احميهم بكلامك مش وحش برضه للدرجة دي.. دي زي ما تقولي مساهمة من الشركة في مقاومة انفلونزا الخنازير وكده، وهي (مساهمة) وأكيد هي مش كل حاجة نقدر نعملها إحنا.. ودي مبادرة كويسة منهم بس في نفس الوقت منعتمدش احنا على كده ولازم نبذل مجهود في مقاومة المرض ده

    ولو فعلاً الناس عملت زي ما بتقولي في البوست يبقا الخطأ ساعتها واقع عليهم هما مش على شركة فودافون ^^" ودا رأي العبد لله على أي حال :)

    وأشكرك بجد يا سارة-سان على التدوينة دي والله، وهو موضوع مهم وكويس إنك اتكلمتِ عنه هنا :)

    محمد الوكيل

    ردحذف
  2. انا فعلاً يا محمد مش معترضة على اللي الشركة عملته
    انا بس كل اعتراضي على الفكرة دي فكرة احميهم بكلامك ومش قصدي بيها فودافون بس كل الدنيا اعلاناتها بقت كده
    علشان احنا بقينا كده
    نووووووورتني يا محمد

    ردحذف
  3. طيب تمام معاكِ حق برضه سارة-سان ^^
    بالمناسبة هو أنا بقيت لمبة نيون فجأة؟! :P
    الله يكرمك يا سارة-سان المدونة منورة بتدويناتك ^^

    ردحذف
  4. الاحلى بقى البطل دايما محمي
    الجملة اللي شعار لاحدى المنتجات
    اعتقد في كل التاريخ اللي فات و اللي جي مفيش بطل محمي
    لان البطل ميبقاش بطل لو السبل قدامه ممهدة و الحياة بمبي

    تحياتي

    ردحذف
  5. الحقيقة إن بحوث التسويق بيبقى هدفها فعلا فهم نفسية المجتمع لمخاطبة رغباتة و تلبيتها ، حتى لو بالوهم ، و علشان كده الإعلانات مرآة حقيقية لنا ، و للأسف من سيء إلى أسوأ .

    تحياتي لك على رسائلك الذهبية المزروعة وسط الكلام - على فكرة مش لاسعة على الإطلاق :)

    ردحذف
  6. احنا فعلا بقينا في اوقات كتير بتوع كلام
    وياريت بنتكلم صح دايما
    حتي الكلام مش 100 % برضو
    عارفه انتي المثل اللي بيقول كدب مساوي احسن من صدق منعكش
    اهو احنا بقا كمان مش عارفين نكدب كدب مساوي
    انا يمكن خرجت عن الموضوع شويه بس بجد انا مستفز جدا
    عشان لما تلاقي حد مسؤول بيحاول يقنعك بكلام ما يصدقهوش طفل صغير والنفروض انت تكون مقتنع بقي
    حاجة تخنق
    شكرا يا سارة ع البوست
    هايل كالعادة

    احمس

    ردحذف
  7. عاشقة الحب فعلاً البطل ما يبقاش بطل لو الدنيا بمبي معاه

    ردحذف
  8. أحمد كمال شكراً ليك يا احمد منورني جداً

    ردحذف
  9. احمس تعرف اني كان نفسي اكتب بوست عن المثل دا .. كل حياتنا ماشية بالنظام دا فعلاً
    منورني جداً وكنت مفتقدة تعليقاتك جداً فينك من زمان ؟

    ردحذف
  10. احمس تصدق اني كنت عايزة اعمل بوست عن المثل دا ، فعلاً كل حاياتنا ماشية بالنظام وبيني وبينك حتى احنا ع اهالينا بنعمل كده :D
    منورني يا احمس كنت فيييييييين بقالك زمن ؟

    ردحذف

Say something...