لعلمك

لعلمك

إقرأ لي

دخلوا بكليك شمال :D

Blog Archive

السبت، ديسمبر 05، 2009

postheadericon ساعات بحس ...





ساعات بحس إن بكرة هيبقى حلو أووووووي


وساعات بحس اني عمري ماهفرح الفرحة اللي بتمناها :(


ساعات بحس إني محظوظة أوي في حياتي 


وساعات بحس إني مش عايشة أصلاً


ساعات بحس إني خايفة أوي من الناس 


وساعات بحس إني نفسي اترمي في حضنهم واتدفي بيهم


ساعات بخاف مني أوي ، وساعات بخاف عليا 


ساعات بكون كلي أمل وتفاؤل ومرح ومافيش قوة في الدنيا تقدر تهزمني


وساعات بحس إني أضعف من إني افتح عيني ، وإني حتى لو قادرة افتحهم مش عايزة


وكتيييييييييييييير بحس إني شيلت هموم كتيرة بدري


بحس اني بجري ورا سراب وإن كل تعبي دا ولا يسوى حاجة


كتير بحس إني عمري ما هنجح في شغلي ، ولا هقدر أفيد الدنيا بحاجة


ولا هقدر  أسيب بصمة في الدنيا


وكتير بحس إني عمري ما هبقى زوجة ولا أم ، عمري ما هبقى عروسة 


زي ما عمري حسيت اني طفلة و عمري ماحسيت اني شابة


أنا عارفة إني أنا اللي بشيل نفسي الهم


وعارفة إن دماغي دي مودياني في داهية


وإن أخرتي هتكون يا إما سكتة قلبية يا إما جلطة فـ المخ يا إما حادثة تحصل لي  من كتر استعجالي


بس هي دي دماغي ماينفعش أغيرها .. أو بمعنى أصح فات الأوان على تغييرها


لأني ما اتعودتش اقعد ساكتة واقول 


" اللي يحصل يحصل بقى "

6 بوينتس أوف فيو:

مصطفى محمود يقول...

ده قدرك يا سارة
بس اوعي تيجي في نص الطريق وتقولي تعبت

صباحك زي الفل
:)

محمد الوكيل يقول...

خليها على الله.. لا تفكري في المفقود حتى لا تفقدي الموجود.. بجد خلي المستقبل على الله وحده وركزي في تحسين حاضرك، وانسي ما مضى ^^

شكراً سارة-سان ^^

محمد أبوسنة يقول...

حلوة الفضفضة دي
والأحلى أنك صريحة مع نفسك
يعني في حاجات من ألي قولتيها
بحسها زيك كدا
لدرجة ممكن أقوم من النوم و عايز
أرقص و أغني من غير سبب كدا
و ساعات بكون مخنوق من غير سبب بردو

ربنا يحفظك من كل ألي قولتي علية في
الأخر من جلطة و غيرة
:)

وميض ابتسامة يقول...

عارفى ياسارة حتى اعقل العقلاء والمستقرين نفسيا بيفكروا نفس تفكيرك لان ياعزيزتى ربنا خلق الدنيا كموج البحر لاتستقر ابدا على حال ......
وعشان كدة انا بقولك بلاش الزووم القاسى على حاجة معينة فى حياتك وخليك دائما متوقعة الاحسن والافضل قبل الاسوء لان لكلا الاثنين وجود فى موكب الحياةفالتنظرى الى الجانب المشرق منها واتمنى ان لا ترى الجانب الآخر.. مجرد امنية

غير معرف يقول...

كتير بحس بكدا بس لما بفتكر خروج سيدنا موسي من مصر و بداية رحلته لما وصفها سيدنا عبد الله بن عباس _رضي الله عنهما_قال: سار من مصر إلى مدين لم يأكل إلا البقل وورق الشجر ، وكان حافياً فسقطت نعلاً قدميه من الحفاء وجلس في الظل - وهو صفوة الله من خلقه - وإن بطنه للاصق بظهره من الجوع ، وإن خضرة البقل لترى من داخل جوفه . وإنه لمحتاج إلى شق تمرة
و قصة سيدنا موسي مع ملك الموت لما قاله ملك الموتإن (=-الله يخيرك يأمرك بأن تضع يدك على جلد ثور، ولك بكل شعرة تغطيها يدك سنة تعيشها، فقال: ثم ماذا؟ قال: ثم الموت، فقال: فالآن -=)كل ما بتخيل اني بلمح الابتسامة الساخره دي علي وش سيدنا موسي و هو بينطق الكلام دا وفي ذهنه بتطوف قصته كلها من الغربة وتحديات لفرعون ومعجزات و حادثة غرق و لقاءه بالخضر و عبادة العجل والتيه و الرجفة و تصدع الجبل و و و بتهون عليا حاجات كتير و بقول

قُلْ لَا أَمْلِكُ لِنَفْسِي نَفْعًا وَلَا ضَرًّا إِلَّا مَا شَاءَ اللَّهُ وَلَوْ كُنتُ أَعْلَمُ الْغَيْبَ لَاسْتَكْثَرْتُ مِنْ الْخَيْرِ وَمَا مَسَّنِي السُّوءُ ..

muhammd fattouh يقول...

فى فلم اتفرجت عليه عجبنى فيه جمله كانت بتقول( اعظم خوف فى حيتنا بيكون من نفسنا بنخاف اننا نلمع زى النجوم فى السما انا مين علشان اخفى لمعان قدره الخالق فى شخصيتى و تكوينى انا الى بخفى لمعتى اعظم خوف فى حياتى من نفسى مش من فشلى )
و برضو ما علينا
محمد فتوح

المتابعون

اعتبرها بيتك ♥

وِش القفص

خليك ورايا

دليفري..