لعلمك

لعلمك

إقرأ لي

دخلوا بكليك شمال :D

Blog Archive

الجمعة، ديسمبر 18، 2009

postheadericon ليه هو اللى ياخد الورك؟؟؟

البوست دا عبارة عن رسالة جاتلي من واحدة صاحبتي ع الفيس اسمها حسناء ، الموضوع فضفضة بحتة لكن لقيته مقال حلو اووووي 
اسيبكم مع كلام حسناء بقى :

__________________________________


ليه الراجل دايما هو اللى ياخد الورك؟"ده فى الفرخه طبعا"هههههههه
ليه الراجل دايما هو اللى بيقعد فى أول الترابيزه؟
ليه الراجل دايما راجع من الشغل تعبان وعاوز ياكل وينام؟
"لكن أنتى ترجعى من الشغل تروقى البيت وتطبخى وتذاكرى للولاد"
ليه الراجل لما ينام البيت يبقى هوووووووس؟
"لكن انتى لونايمه ده اذا عرفتى ممكن يشغل التليفزيون ف ودنك"
ليه الراجل يوم الأجازه بيبقى قاعد زى الباشا طول النهار وأنتى مزروعه فى المطبخ...وبعدين تحطى الأكل وهو برده قاعد...وتشيلى الأكل وبرده قاعد فشر الكاتب المصرى الفرعونى القديم مبيتحركش من مكانه....وتغسلى المواعين وبررررررررررررده قاعد لأوتعمليله الشاى كمان وأنتى بتغسلى المواعين وكمان يقعد يزعق عشان الولد بيزن ومش عارف يسمع التليفزيون"سمعت الرعد فى ودانك يا بعيد"وأخرتها يخرج هو مع أصحابه لأنه مبقاش يحب الخروج معاكى عشان الولد بيقعد يزن طول الطريق
كل التساؤلات دى ممكن تكون عند أى ست مصريه
لكن الجديد بقى عندى انا.....بصى يا ستى هيه مشكله واحده صاحبتى
المشكله بدأت من أول يوم جواز
المشكله الأولى "النور" أطفى النور... ده هيه اللى بتقول طبعا _هو:ليه فيه أيه مش عاوزانى أشوفه؟_ويصمم أن النور يفضل قايد
ماعلينا...............أيييييييييييييه
يدخل المطبخ_أيه اللى أنتى بتغسلى بيه ده ؟لأ أنتى تجيبى النوع الفلانى بعد كده!!!!!!!!على فكره ده فارمان مش أقتراح"طب أنت مال أهلك هو أنتى اللى بتتنيل تغسل؟" ماعليييييييينا
ده حتى نوع البامبرز بتاع الولد....صبرنى يا رب لحد الأخر
لأ لأ لأ مش قادره أكمل ..هقول أيه ولا أيه؟ متحكم ف كل حاجه .....كل حاجه
وعلى فكره كل حاجه عنده ليها مبرر وكله بالأقناع...ده طبعا اللى هيه بتبينه عشان متتدخلش فى جدال ملهوش أول من أخر...هيه اللى خسرانه فيه من النهايه
ندخل فى الصميم بقى ....الداهيه بقى لما حوشت مبلغ من عديات العيد والنقوط والكلام ده فققرت أنها تجيب بيه حاجه مفيده للبيت...قالت تجيب دولاب لأوضه الأطفال
كان رد الفعل أنه أعترض بشده...ولا يمكن أبدا"حلو أوى لحد كده...راجل وحاسس بقوامته وأن دى مسؤليته هو".....مش وحش
تيجى هيه تفكر فى حاجه تانيه...فقالت تجيب خاتم دهب
بدا متذمرا بعض الشئ...ولكن راحوا فعلا وأشتروه...وياريتهم ما أشتروه ...فضل يأنب فيها ف الرايحه والجايه
هو: مش كانت الفلوس ف أيدك دلوقتى بدل ماتصرفيها ف كلام فارغ "أنت مالك؟ فلوسها!!!مش قلت أنك مش عاوزها تجيب بيها حاجه فى البيت؟ أنت مالك بقى؟"ا
المرحله التانيه: تيجى تطلب منه مصروف البيت
هو:مش انتى معاكى؟ أصرفى من معاكى دلوقتى
"طيب ما علينا مش مشكله يمكن مزنوق"
المشكله كبرت أكتر وأكتر وبقت مدوره كده ولا مؤاخذه قد البطيخه
وده لما بباها توفى ....وكان عندهم بيت وفيه محلات مأجرينها....فأخواتها لأنهم ناس محترمين فكانوا بيقسموا الأيجار ويدوها نصيبها
الأمور فضلت مستقره لحد كام شهر لحد ما جمعت مبلغ وققرت أنها تحيب بيه دولاب الأطفال اللى بقالها سنه عماله تزن عليه
ولقت برده نفس رد الفعل....وياريت الراجل يعنى مزنوق وممعهوش فلوس فعلا...لأ ده الراجل مروق نفسه فسح وخروج وسفر ولسه جايب كمبيوتر جديد داخله ف بتاع 3 الاف جنيه....طب ما تشوف البيت محتح أيه الأول....لأ أزاى لازم يذلها الأول...على فكره هو بيفكر كده أن مراته مينفعش تطلب حاجه وتيجى علطول....لازم يحسسها أنها دايما محتجاله...ده مبدأ عنده
ده حتى مره كانوا خارجين وكانت هيه عاوزه تجيب عبايه جديده...قالها لأ مانتى عندك.....وسبحان الله فى نفس الخروجه جابلها شنطه وغاليه كمان....يعنى هو عند والسلام...خالف تعرف
هو بيفكر كده الراجل فعلا مش بخيل ولا حاجه
نرجع تانى لصميم المشكله:تيجى تطلب المصروف يقولها أصرفى من معاكى دلوقتى
يوم ف التانى..أسبوع....شهر لحد الفلوس ما خلصت
جت يومها تطلب المصروف....قالها مانتى معاكى...قالتله لأ الفلوس خلصت....قام وزعق وثار ...أزاى؟ خلصتى الفلوس كلها ف شهر؟ " البجاحه ليها ناسها"ما أنت بقالك شهر عمال تتعلف من غير ماتصرف ولا مليم
المهم مرضاش يديها فلوس وبلاها أكل أنهارده...وده طبعا لما واجهته بالحقيقه المره أنه بقاله شهر مادهاش مصروف...وواضح أن الكلمه وقعها كان صعب عليه...كأنه ماكنش واخد باله
هو ده بقى اللى هو عاوزه مراته تصرف الفلوس ف البيت ف أكل وشرب ف المدارى يعنى ....لكن تجيب معلقه ف البيت ويبقى أسمها هيه اللى جايباها من فلوسها لأ أزاى ......أزدواجيه فى التفكير ...هيه دى بقى القوامه اللى أنت فالق دماغنا بيها؟
المهم الحكايه كبرت وراحت تشتكى لأبوه.....أبوه قاله أزاى وعيب وميصحش وبتاع وكلام فض مجالس يعنى
البيه كرامته وجعته...قالها أتفضلى الفلوس أهيه وفلوسك دى مش هقربلها ومتصرفيش منها مليم ف البيت بعد انهارده
حلو أوى ......عز الطلب
الكبيره بقى:يجى عيد ميلاد أبن أخوها وعاوزه تجيبله هديه وأخوها ده مغرقها هى وأبنها هدايا

يقولها :أنا مليش دعوه دول أهلك وأتصرفى ف فلوسك براحتك معاهم...... ماهم أهلها دول اللى مغرقين أبنك هدايا دا أنت تقريبا مبتجبش هدوم للولد من كتر اللى بيجيبوهوله
ماعلينا يا ريتها جت على قد كده
يدخل الشتاء مع العيد وعايزين نجيب لبس جديد للولد

يقولها أيه بقى :أنا هجيب للولد ولنفسى بس أنتى فلوسك معاكى أتصرفى فيه زى مانتى عاوزه
"طب ما نقسم مصروف البيت كمان وتدفع هيه تمن أكلها وشربها ونومتها بالمره"
أنا خلاص تعبت من الكتابه وضغطى على كمان ومش قادره أكمل
قوليلى بقى أيه رأيك؟
هما الرجاله كلهم كده؟أيه الغطرسه دى؟
طيب فين القوامه اللى بيتكلم عنها؟
ولو مبقاش فيه قوامه...يبقى ليه الراجل له كل المميزات اللى قولناها فى الأول؟
أيه اللى بيميزه عنى؟
ليه هو ياخد حمامه ويطلع باشا وأنا أدخل أنشف الحمام وراه؟
ليه هو يرجع من الشغل ياكل وينام وأنا أرجع أروق وأطبخ؟
ليه هو يسهر ويتأخر وزنوبه الجاريه تفضل مستنياه لحد مايرجع عشان تحضرله العشا؟
ليه هو اللى ياخد الورك؟؟؟؟؟؟؟

7 بوينتس أوف فيو:

فؤاد العبيدي يقول...

السلام عليكم وبعد :- موضوع جميل ومضحك لانو في رجالة من النوع ده يحبو يكونو حاشرين نفسهم في الصغيرة والكبيرة ومبكي بنفس الوقت لانو في ستات تجبر الرجالة تعمل كده بمعنى هي عايزة تفرض سيطرتها على البيت وعلى الراجل نفسو بس ممكن اقلك بالمختصر دي الحرب الازلية بين الراجل والست على السيطرة وفرض الراي في البيت ومش كل الستات زي بعض ولا كل الرجالة واكيد في ناس اتخلقو شاذين عن القاعده وهمة دول الي تلااقيهم معتدلين ومتفاهمين والسلام

غير معرف يقول...

Dah asasan msh ragel, beyhawel yekhabby amrado el nafseya wara ghatrasto, w azon enno lw kan saree7 3an nafso w dakhlo kan sayosbe7 akthar ehteraman, hatta lw heya rafadet te3esh ma3ah 3alashan fa2ro

Ragel

مامة مازن يقول...

ازيك يا ست البنات
شوفى يا عسل كانك بتحكى قصة حياة واحدة من قرايبى بالظبط والله العظيم دى تبقى كارثة ان فى اتنين من النوع ده وتبقى مصيبة ويالهوى لو كانوا اكتر من كده
دول عذاب للست اللى متجوزاه العند عندهم ماشى فى الدم كرات بيضا وحمرا وعند
هو تقريبا نفس السيناريو
هى صحبتك تعرف ق ريبتى واللا ايه ههههههههههههههههه
عارفة لما تقعدى مع واحدة وتحكيلك البلاوى دى تقولى
الحمد لله الذى عفيتنا مما ابتليت به غيرنا
اه والله كانه مرض بالظبط

احمس يقول...

اولا يعني انا مش بحب الورك وعايش برضو يعني

ثانيا (الكلام مش ليكي يا سارة )
انا اعتقد يعني ان الرجالة مش كلهم بالشكل ده
ويمكن يكون النوع ده قليل جدا
فيه ناس كتير حلوين مع بعض وبيساعدو بعض في حاجات كتير
(بس انا مش واحد منهم هههههه)
وبعدين لو بتيجي من الشغل تعبانة
ماتشتغليش
طالما البيه قادر يصرف ومروق نفسه كده
ودور المرأة معروف في المجتمع
انتي لو عايزة تكبري الدور ده وتاخدي مساحة اكبر
اعتقد لازم تتعبي اكتر
ومش تفضلي بقي تحسسينا بالذنب وان احنا مفتريين عليكي
شكرا ليكي

شكرا يا سارة ع الموضوع
واتمني تكون دماغك غير كده شويه
هههههههههههه

احمس

muhammd fattouh يقول...

لو بصيتى فى ايدك هتلاقى ان صوبعك مش زى بعضها و برضو الرجاله مش زى بعضها ولا الستات زى بعضها و ده فى رئيى الشخصى كان طمعان من الاول و بيمثل لكن لا احساس ولا دم ولا اى حاجه خالص كده ماينفعش غير كده الجواز ده موده و عشره و اتنين بينشئو مجتمع( يعنى اتنين بيتوحدو فى شخص ابن او بنت و بيتكثرو)مش اتنين كل واحد فيهم عايش مع التانى و ورا دهرو سكينه ده رئيى
ما علينا
محمد فتوح

Ahmad.Zaki يقول...

بسم الله الرحمن الرحيم
العلاقة ين الزوجين لا بد ان يسودها الحب والاحترام ثم بعد ذلك يكون التفاهم فى الأمور الحياتية متفاواتا لأن لكل واحد وجهة نظره و ياستى ما تخديش الورك انا مامح لك فى الفرخة كلها لكن اذا اختلفت الآراء يكون الرأى الأخير للرجل و هو مطلوب منه انه يعمل ما يراه صوابا و يرضى الغلبانة بكلمتين
بدل ما تتقهر وربنا يصبركن

غير معرف يقول...

والله انت فعلا لاسعة

المتابعون

اعتبرها بيتك ♥

وِش القفص

خليك ورايا

دليفري..