لعلمك

لعلمك

إقرأ لي

دخلوا بكليك شمال :D

Blog Archive

12/28/2009

postheadericon فيس بوك وحركات ;)





أول ما الفيس بوك دا بدأ يتشهر الاعلام صور للناس انه عبارة عن موقع موبوء ومشبوه

ومافيش بنت بتدخله الا وتحصل لها بلاوي الدنيا والأخرة والناس اللي ع الفيس بوك بيغرغروا بيها هههههههه

والله لدرجة ان واحدة صاحبتي بتقول لي في يوم انا نفسي ادخل نت والله ياسارة بس خايفة لحسن الفيس بوك دا ياخد صوري 

اقولها يابنتي هو انتي هتحطيها عليه ليه ؟ تقول لي مش هحطها عليه هو اللي هياخدها

طب هياخدها ازاي ؟ حتى بفرض انك متخيلة انه زي الهاكر انتي صورك ع الجهاز ؟

قالت لي لأ اومال هياخدها ازااااااااااااي ؟؟

قالت لي ف التليفزيون بيقولوا ...........


وبعد اضراب   6 ابريل اتحول من موقع مشبوه لموقع مشبوه من ناحية تانية

الاعلام صور للناس ان اي حد بيدخل ع الفيس بوك هيتقبض عليه

وكل يوم لوك لوك ف موضوع اسراء وكده لدرجة ان بابا حذرني كذا مرة 



ودا كله طبعاً ناتج عن ان اللي بيتكلموا دول مش فاهمين اي حاجة في اي حاجة

ومن هواة التعميم والتهويل


اه الفيس بوك عليه حاجات مش محترمة بس مش اجباري يعني اللي بيدور عليها بيلاقيها
زيه زي النت

اه عليه شات وصحوبية ورغي بس في ناس تانية عارفة تستفيد منه صح

وايوة الشباب بعضهم بيحاول يحور ع البنات بس زيه زي الموبايلات والشات والخ الخ الخ


انا بشوفه قريب اوي من الحياة ، انت لما بتختار اصحابك بتحدد صورة لنفسك

والناس بتحكم عليك من خلال اصحابك

وانت بتصرفاتك بتخلي الناس تحترمك او بتخليها تبص لك بصة مش تمام

ع رأي ام تي ام 

"امشي علي مهلك خد طريقك اسلك وانت تسلك "

أم هند بقى جايبة لكم شوية حركات م الفيس بوك


صفحات وانشطة وشوية حاجات كده يمكن تهمكم


أول حاجة :: صفحة الجنوبي .. حبيبي الأسمراني أمل دنقل


ادخلها من هنا هتلاقي قصائد ليه ومقالات عنه وكل يوم بيت من اشعاره .. حياة دنقلية يعني :)


وتاني حاجة :: صفحة محمود درويش .. الشاعر الفلسطيني الرائع الراحل 


من هنا .. بردو نفس الوضع قصائد ومقالات ودواوين وكله


و معانا كمان صفحة مجلة بحلقة .. مش هتلحق تبربش عنيك ;)


من هنا .. اخر اخبار المجلة ومواضيعها واستفتاءتها وسلاطتها وكله كله :)


وخد في ايدك بقى وانت معدي من الناحية دي صفحة حبة ثقافة التابعة لمجلة بحلقة


والصفحة دي بقى جديدة طازة .. كل يوم نصيحة طبية علشان صحتك تبقى مية مية 

ندخل بقى ع الجروبات ..


دا جروب اطبخي يا جارية اطلب الاسعاف يا سيدي .. ساحة للفاشلين في ميدان المطبخ 


علشان نتبادل خبراتنا الخايبة وماحدش ينكسف من نفسه :)


وفي جروب الكاتب الساخر العظيم محمد عفيفي عليه مجموعة محترمة اوي من كتبه ومناقشات لكتبه ومقالاته وكده


وفي جروب شخلع مدونتك لهواة شخلعة وتشييك وتعديل شكل مدونتهم  .. ياريت اللي عنده خبرة ف الموضوع دا ينضم لنا ويفيدنا 


وجروب أنشودة البساطة الرائع جداً " يحيي حقي " كتبه ومقالاته بردو



والجروب الأهم والأفيد " السرطان لا يعني الموت " محاولة لمحاربة السرطان بالتفاؤل والأمل ومحاولة لمعرفة عدونا علشان ما نخافش منه زيادة عن اللزوم




حاجة أخيرة .. الجروبات دي والصفحات دي انا اللي بديرها .. وطبعاً الوقت ما بيسمحليش ادي كل الحاجات دي حقها


بقصر في حاجات وبشتغل تمام في حاجات ... علشان كده اتمنى ان اللي يلاقي في نفسه القدرة على المشاركة بجدية 


وتحمل مسؤولية صفحة من دول او جروب يبعتلي علشان يكون اوفيسر او ادمين على اللي يقدر عليه


دا طبعاً بعد التأكد من جديته 


وطلبي دا عام لكل حاجة ماعدا صفحة مجلة بحلقة وصفحة حبة ثقافة وصفحة أمل دنقل


الباقي يااااااااااااريت لو حد يقدر يكون مسؤول عنهم يقول لي 

















7 بوينتس أوف فيو:

ahmos يقول...

ازيك يا سارة

بصي هو بالنسبة للفيس بوك انا ما عرفتوش من اوله يعني انا فضلت فترة اسمع عنه بس مكنتش فاهم ايه الموضوع يعني
لحد ما قفشت واحد صاحبي وسألته عن الفيس بوك ده ولزمته ايه ومن ساعتها للاسف مش بقوم من عليه
هو حلو ومفيد في حاجات كتير
بس بيضيع الوقت بطريقة رهيبة
هو عموما النت كله بيضيع الوقت
بس المهم انك تستفيد بالوقت اللي انت بتقعده ع النت ده
اما بالنسبة للصفحات والجروبات اللي انتي جايباها فكلها بجد حاجات حلوة وانا بالفعل مشارك في بعضها
واتمنالك التوفيق
شكرااااااا

احمس

فركشاوي ..ناوي يقول...

نظره واعيه و صحيحه ..
البوست دا ...لاسع بجد.

محمد الوكيل يقول...

كلام جميل جداً يا سارة-سان.. مشكلة الكثير من الناس إنها مش قادرة تفهم إن كل شئ ينفع يبقا سلاح ذو حدين، فيه الناس اللي بتخاف تستعمل الحاجة لحسن تأذيها (يعني لو إنت واخد حذرك إزاي الحاجة دي هتأذيك؟!) وناس بتستعمل الحاجة بسفاهة وفيما لا يفيد وينسوا إنها أساساً وُجدت للفائدة العامة مش للسفاهة العامة! ^^" ده حتى التوغل في الدين بدون دراية وفهم صحيح خطأ كبير والنبي صلى الله عليه وسلم نهى عنه..

وأرجو إن كل الناس تنتبه للنقطة دي، وشكراً يا سارة-سان على الموضوع ده :)

محمد الوكيل

muhammd fattouh يقول...

موضوع لزيز و اتمنا ان انتى تبقى منبر فى جروب ( تيجو نحب مصر بجد)

ثرثارة يقول...

ههههههههههه

والله ياستي مش عارفه ليه فيه ناس بيعتبروا النت حاجه مرعبه

هو الجهل بعينه

ربنا يخليك حبيبتي الصغنططة

ويعينك يارب

bos bos بسمه عبدالباسط يقول...

هو على الفيس بوك وبس

ده فيه ناس فاكرين النت كله
رجس من عمل الشيطان

وجرثومة علينا القضاء عليها

والواحد بيسمع كلام وحاجات تموت من الضحك بس هنقول إيه

dalia el- abassy يقول...

اول مرة اشارك بتعليق و ان شاء الله متكونش اخر مرة انا عجبني كتير اوي من الجروبات و الصفحات اللي انتي بتجيبيهالنا ربنا يكرمك يا سمو الاميرة سارة و يوفقك
موضوع الفيس بوك و النت كلو كلنا عارفين اد ايه في حاجات مش كويسة بس في المقابل في حاجات كتير اوي ممكن نستفيد منها في حياتنا كلها ... ميتقالش غير جملة واحدة ان الانسان مخير يختار هو عايز يمشي فين و زي ما هيبقا عايز هيمشي فدة بيكون اختيارنا احنا و كدة كدة الناس بتعد تقول كلام ملهوش اساس من الصحة .. اهو كلام و السلام يعني الفيس بوك ايوة بنعد احيانا نضيع وقت في كويزات هبلة و كدة بس دة ترفيه في حاجات فعلا بتفيدنا كتير دة الجانب الايجابي غير طبعن ان في ناس بيكون همها الاول الشات و الكلام الفارغ دة بس يلا ربنا يهدينا جميعا
و اخيرا بتمنالك التوفيق يا سارة .. الامتحانات خلاص قربت ربنا معانا جميعا

خليك ورايا

حاجات ربنا حبب فيها خلقه

سيطها..