لعلمك

لعلمك

إقرأ لي

دخلوا بكليك شمال :D

Blog Archive

السبت، فبراير 28، 2009

postheadericon اطبخي يا جارية .. اطلب الاسعاف يا سيدي


البوست دا 3 × 1 عرض خااااااااااااص ههههههههه وممكن يبقى اكتر من كده كمان الله اعلم انا قررت ابعبع

(1) اطبخي يا جارية .. اطلب الاسعاف يا سيدي

طبعاً الكل عارف اني اشطر من ابلة نظيرة في الطبخ والمطبخ

وطبعاً الكل عارف اني بتواضع وبخبي مواهبي علشان الحسد هههههههههههه بس في قعدة صفا بيني وبين لؤلؤتي

اعترفنا بمواهبنا الفذة العبقرية

اتفرجوا اتفرجوا بس اوعوا حد يحسد ولا يقر

ههههههههههههههههه

شوفتي يا لؤلؤتي
بنوتة لاسعة: المحشي
لؤلؤتي: خير
لؤلؤتي: ماله
بنوتة لاسعة: عملت محشىىىىىىىىىىىىىى
لؤلؤتي: الله
لؤلؤتي: حلو
لؤلؤتي: ؟؟
بنوتة لاسعة: احم
لؤلؤتي: اكيد حلو
بنوتة لاسعة: شبه المحشي
لؤلؤتي: انا ازاي بسأل
بنوتة لاسعة:(ايموشن مكسوف ) هههههههههه
لؤلؤتي: هههههههههههههههه
بنوتة لاسعة: وعملت صينية بطاطس ورز
لؤلؤتي: ماشاء الله
بنوتة لاسعة: تقدري تسألي
بنوتة لاسعة: قطط الشوار عن طعمهم
بنوتة لاسعة: هههههههههههههههههههه
لؤلؤتي: شطوووووووووووووورة
بنوتة لاسعة: الشوارع *
بنوتة لاسعة: شطورة ايه راحوا فففي الزبالة
بنوتة لاسعة: واكلنا برة هههههههههههههههههههههههههه
لؤلؤتي: ههههههههههههههههههههههههههههههههههههههههههههههههه
لؤلؤتي: للدرجة دي
لؤلؤتي: لية يا بنتي كدا
بنوتة لاسعة: ماعرفش ليه
بنوتة لاسعة: مالهمش طععععم البطاطس ولا الرز
بنوتة لاسعة: اول يوم السلطة تسترت عليا
بنوتة لاسعة: تاني يوم كل شيء انكشفن وبااااااااااان
لؤلؤتي: هههههههههههههههههههههه
لؤلؤتي: كدا يا سوسو
لؤلؤتي: لا زم تبقي ست بيت شاطرة
بنوتة لاسعة: لع
بنوتة لاسعة: يا ست بيت
بنوتة لاسعة: يا شاطرة
هههههههههههههههههه
لؤلؤتي: على فكرة اللي بتنصحك دي مش اشطر منك يعني
لؤلؤتي: اقولك انا عملت ايه
بنوتة لاسعة: ههههههههههه
بنوتة لاسعة: اشجيييييييييييني
لؤلؤتي: هههههههههههههههههههههههه
لؤلؤتي: انا يوم ماما قالتلنا اعملو بسلة ورز ولحمة
لؤلؤتي: المهن انا قلت اعمل البسلة واخلي دعاء تعمل الرز
لؤلؤتي: لاني بطلعة معجن
بنوتة لاسعة: اه
لؤلؤتي: المهن برضه
لؤلؤتي: انا جيت اعمل البسلة في امان الله
لؤلؤتي: وبعد ما استوت وبقت زي القمر
بنوتة لاسعة: هههههههههههههههههههههههههه
بنوتة لاسعة: زي القمر
لؤلؤتي: راحت سبتها على النار
لؤلؤتي: اتحرقت
لؤلؤتي: ههههههههههههههههه
بنوتة لاسعة: يالهوووووووووووووووووووووووووووى
لؤلؤتي: اه والله
بنوتة لاسعة: بس الحق يتقال
بنوتة لاسعة: هي كانننت قمر
لؤلؤتي: بس اتسترت على الجريمة
بنوتة لاسعة: عملتي ايه
لؤلؤتي: نقلتها في حلة تانية
بنوتة لاسعة: هههههههههههههههههه
لؤلؤتي: ومبانش قوي انها اتحرقت
بنوتة لاسعة: ههههههههههههههههههههههههههههههههههههه
لؤلؤتي: هههههههههههههههههههههههههههه
لؤلؤتي: على فكرة
لؤلؤتي: بعدها بيوم
بنوتة لاسعة: اه
لؤلؤتي: قلت لدعاء بما اني حرفت البسلة امبارح
لؤلؤتي: اجرب حظي في الرز
لؤلؤتي: والله يا سارة
بنوتة لاسعة: ههههههههههههههههههههههههه
لؤلؤتي: هو اتحرق لوحده
بنوتة لاسعة: هههههههههههههههههههههههههههههههههههههههههههههههههههههههههههههههههههههههه
لؤلؤتي: نسيته على النار وهي عالية
لؤلؤتي: لقيت الحلة والرز بقو شبه بعض
لؤلؤتي: هههههههههههههههههههههه
بنوتة لاسعة: ماهى الحاجة بتتحرق علشان لوحدها
بنوتة لاسعة: ههههههههههههههههههههههههههههه
بنوتة لاسعة: لؤلؤتي
بنوتة لاسعة: انا هسيف الحوار
بنوتة لاسعة: دا والنبي
بنوتة لاسعة: وانزله
بنوتة لاسعة: ههههههههههههههههههههههههههههههههههههههه
لؤلؤتي: ههههههههههههههههههههه
لؤلؤتي: ماشي
لؤلؤتي is typing a message.
لؤلؤتي: ثواني تلوفون واكملك
بنوتة لاسعة: اوك
اكملك
بنوتة لاسعة: اوكيشن
لؤلؤتي : المهم بعد ما الرز والحلة باظو
بنوتة لاسعة: هههههههههه
بنوتة لاسعة: الاتنين
لؤلؤتي : طلعت رز تاني وحلة جديدة
لؤلؤتي : عشان اعمل رز تاني
بنوتة لاسعة: ههههههههههههههههههههه
لؤلؤتي : وياريتني ما عملته
بنوتة لاسعة: ماتقوليش
لؤلؤتي : الرز طلع معجن اخر حاجة
لؤلؤتي : هههههههههههههههههههههههههههه
بنوتة لاسعة: حصلوا اللى قبلهم
بنوتة لاسعة: طااااااااااااااااااااااا
بنوتة لاسعة: الحمد لله ع قد العجين
لؤلؤتي : ههههههههههههههههههههههه
بنوتة لاسعة: ههههههههههههههههههههه
لؤلؤتي : والله ماعرف في ايه مع الرز
لؤلؤتي : هههههههههههههههههه
لؤلؤتي : اليوم اللي بعده
لؤلؤتي : عملت رز
بنوتة لاسعة: انتى مصرررررررة بقى
لؤلؤتي : طلع معجن برضو ومن غير ملح
لؤلؤتي : كان عااااااااااااادب
بنوتة لاسعة: هههههههههههههههههههههه
لؤلؤتي : ههههههههههههههههههههه
بنوتة لاسعة: نفس مشكلة ر زي
لؤلؤتي : كنت بعزب اهل البيت
بنوتة لاسعة: بردو كان عايز ملح
بنوتة لاسعة: هههههههههههههههههه علشان
بنوتة لاسعة: يحرموا يقولوا اطبخي
لؤلؤتي : ههههههههههههههههههههههه
لؤلؤتي : ربنا يستر


(( أكيد طبعاً مفهوم ربنا يستر على مين )) احم احم


(2 ) ما اشربش الشاي .. أشرب جوافة أنا

من كام سنة كده كان اصحاب اختي عندنا

وكانوا هيخرجوا سوا واختى بتلبس بقى ومش فاضي وانا هقدم لهم حاجة

وحيث ان الجو كان حر ولا مش فاكرة ايه ظروفه والله ام هند هم ماكنوش هيشربوا شاي

فرسي المزاد على انهم هيشربوا جوافة

وجنت ع نفسها براكش

اختى وهي بتلبس شرحت لي الخطوات

هتقطعي الجوافة

وتحطيها في الخلاط وتحطي سكر ولبن وكده وبعدين تصفيها

وانا سمعت كلامها بالظببببببببببط

قطعت الجوافة وكان لونها ابيض

بعدين حطيتها في الخلاط وحطيت اللبن اللى هو بردو لونه ابيض

وحطيت السكر ولسة الخليط ابيض

وعصرتها ولسة بيضا

وصفيتها و حطيتها في الكوبيات وقدمتها ووالله كانت بيضا


دخلت بعد شوية لقيت العيال بيبصوا للكوبايات برعب

فقولتلهم مابتشربوش ليه يا جماعة

فضحكوا ضحكة صفرا كده وحاضر هنشرب

وما شربوش

واول لما اختى دخلت قالولها هو ايه دا

قالتلهم جوافة

قالولها اومال هي لونها بنفسجي ليييييييييييييه ؟؟؟؟؟؟؟؟؟

ولسة لحد دلوقتي بسأل نفسي السؤال دا ليه لونها بقى بنفسجي ؟؟

اكيد فكرتها نفس فكرة اللبان السحري
هههههههههههه


(3) فكرة عمل الفيشار

أيام ثانوي وآاااااااه من آيام ثانوي أيام سهر الليالي ..

مش شرط مذاكرة يعني ف الكتب ممكن تذاكر في مجلد ماجد عاااااااااااادي

هههههههههههههه

أيام ثانوي كنت بسهر لوحدي طبعاً اذاكر

ولأن الفضا وحش والشيطان شاطر فكنت كتييييييييييير أوي يوزني شيطاني ادخل المطبخ

وطبعاً بعد الكلام اللي فات دا كله مش محتاجين تعرفوا

ان دخولي المطبخ دا حاجة سهلة

المهم .. زهقت من كتر عمايل القهوة باللبن والنسكافيه والشاي

حسيت اني عايزة اوسع في النشاط

فقولت اعمل فيشار

وحيث اننا ما عندناش البتاعة اللى بتقلي الفيشار دي

فانا ابدعت

اول مرة عملت فيشار كنت هموووووووووووووت واعرف فكرة عمله ايه يعني عايزة

اشوف الفيشاراية وهي بتفتح كده زي الورد

وفعلاً حطيت الفيشار ف الطاسة وولعت عليه

واستناه يفتح مافتحش

افتح ابني خلينا اخلص ما فتحش

قولت شكله بياخد وقت اخليه ع راحته احسن

غطيته ودخلت اعمل نفسي بذاكر وطلعت

لقيته بردو مافتحش

قولت لأ بقى شيلت الغطى

ومش عايزة اقول شوفت ايييييييييه

مش عارفة ازاااااااااااااااااااي ماحدش يقول لي اني المفروض احط زييييييييييييت ؟؟؟؟؟؟؟

عامة ماما تاني يوم لما شافت مخلفات الحرب قالتلى

وتاني يوم بردو بالليل دخلت اعمل فيشار حطيت زيت وولعت عليه وقعدت استناه

يفتح وفتح وياااااااااااااااااااريته ما فتح .. حررررررررررب قامت في وشي

وصوووووووووووويت وتنطيط وهووووووووب اذ فجأة القيت أرضية المطبخ كلها مزرعة فيشاااااااار

مش عارفة بردو ا مين وازااااااااااي وليه ما قاليش اني المفروض اغطي الفيشار ؟؟؟؟؟؟؟؟

بعد كده بقى بقيت خبرة بعد كام حريقة حلة

وبعد حريقة فيشار نفسه

بقيت استااااااااذة والله في الفيشار وبعرف احط له ملح كمان وااااااخر تظبيط واهو كله في سبيل العلم
:)


(4 ) ابحث عن الملـــــــــــــــح
ول عمري في سؤال بيلح عليا

ليه الملح ما بيتحطش في التلاجة ؟؟؟؟؟؟؟؟؟

من يوم ما كبرت وبقيت اشيل الأكل في البيت وانا هموت واعرف اجابة السؤال دا

كل يوم لما اجي اشيل الفطار ولا العشا ولا الغدا احط الملح في التلاجة

ممكن انسى احط اي حاجة تانية في التلاجة

لكن كله الا الملح لحد ما حفظوا في البيت لما يغلبوا تدوير ع الملاحة

يسالوا مين شال الأكل ؟؟

سارة

آه يبقى الملح في التلاجة كده ع طول

وبعد ما كنت بحسبني خفيت من الخصلة دي

في الاجازة بتاعة نص السنة اللى فاتت ع طول دي

لما كنت قاعدة مع اخويا

عملت ملح بفلفل اسود وحطيتناه

واحنا بناكل وشيلت الأكل

تاني يوم ادووووووووووووور ع الملح ابو فلفل ما لقيتهوش

قولت مش مهم عملت ملح بكمون


واكلنا منه تاني يوم ادوووووووور ع الملح ابو كمون

ما فيييييييييييش فايدة لحد ما زهقت بقى ما ينفعش كده

طبعاً لقيتهم بعد اسبوع مش هقول فين بقى ;)
الجمعة، فبراير 27، 2009

postheadericon كوباية



مش دايماً لما يكون نص الكوباية فاضي النص التاني يكون مليان

ممكن يكون نص الكوباية فاضي والنص التاني مكسور



الخميس، فبراير 26، 2009

postheadericon عايزة شط


ياااااااااااااارب .. عايزة شط

الأربعاء، فبراير 25، 2009

postheadericon عن " وحوحة " القلوب أتحدث

كنت بدعبس في كتاب فيه مقالات للكتاب الاكثر من رائع ( يحي حقي ) شوفت مقال جه ع الجرح بجد

وقولت عبقرية فعلاً ان يحي حقي يكون كاتب مقال من مش اقل من عشرين سنة وينطبق ع حالنا دلوقتي

كان بيتكلم عن ابواب " انا عندي مشكلة " " اريد حلا" والافلام الهندي اللي بتحصل فيها وعن البرامج اللى كده في الراديو والتلفزيون .. وكان محمووووووووووووق اوي يا عيني ودمه محروق ويقول الكلام دا المفروض يترمي في الزبالة مش يتنشر .. دي حاجات مالهاش لازمة
.. دا ايامهم  يعني قبل ما اسامة منير يطلع يعني كان زمان يحي حقى مات بالشلل الرعاش لو عايش عصرنا المزدهر دا  وقال ع اللى بيبعتوا الحاجات دي والبرامج دي .. " صفحات وبرامج وحوحة القلوب "

انا بصراحة عجبني التعبير ا ووووووووووووى ومش راضي يطلع من دماغي

خاصة انا الفترة دي بعاني من فترات استماع مكثفة للراديو فروحي طلعانة من برامج وحوحات القلوب دي

ولا باب انا عندي مشكلة اللي في الجمهورية - مش عارفة اسمه باالظبط بس اقصد اللى مختص بكده يعني - مسخرررررررررررررة

وشلل بقى تحس ان احنا عايشين في بيت ......... كبير في البلد دي

في كام نقطة بتشلني في البرامج دي

نمبر وان : اني واثقة ومتأكدة ان مافيش حاجة اسمها حد يحل لحد مشكلة من خلال كلمتين عرفهم عن المشكلة

اذا كنت انت يا اخي معكوك في المشكلة من ساعة ما بدأت ومش عارف تتنيل تحلها عم فراكيكو بقى هو اللي هيحلها ؟؟

وهيحلها وانت حاكي من طرف واحد ؟ طب بزمتك انت هتبقى مرتاح للحل دا يعني ؟؟

طب سيبك من دا كله هل يعني انت ماتعرفش اي حد في الدنيا من قرايبك ولا اصحابك ولا اي حد بيفهم خالص في الدنيا ؟

يالهوى دا انت لو كده تبقى دي في حد ذاتها مشكلة


نسيبنا من دي وندخل ع اللي بعده

نمبر تو .. فذلكة حضرة المذيع وهو بيرد ع الاسئلة .. شلل بجد .. تلاقي حضرته تقمص دور الحكيم ايسوب

وركب اجنحة الملايكة بقى وعم المتسامح الغفور اللي مش عارف ايه

واكنه عمره ما غلط ولا في مذيعة ع الشلل الأوسط بتحسسني انها بتنيم عيل صغير او عايزة تضحك ع عيل بمصاصة بدل الشيبسي


وغير كده بجد ماعرفش ازاي مش بيحس ان اللي باعت الرسالة دا بيشتغله ومفبرك الحكاية

الناس بتبعت حكايات خيال علمي بجد

ماحدش ينقعني مثلاً ان في واحدة ف واحد اعتدى عليها ( اعتدى عليها اوى يعني مش ضرب ولا كده ) و ليها نفس

تسمع الراديو وتبعت لهم تقول لهم اعمل ايه ؟؟

وكل الدنيا اصلا عارفة ان المذيعة هتقولها

( انتي ضحية انتي مالكيش ذنب لازم تقولي لبابا وماما )


النقطة اللي بعد كده بقى هي ان الناس بقت تحب تتفضح يا اما بقت شايفة ان دى مش فضايح

بجد حاجة بقت تحسسك بقرف من المجتمع دا

الكل بيخون وعااااااااااادى

والكل بيغلط مع الكل وعااااااااااادي

دا انا مرة سمعت واحد في اسامة منير

بيقول آل ايه يا خويا بقاله سبع سنين بيحب في واحدة متجوزة وهي بتحبه

وآل ايه اكتر حاجة عجباه فيها انها على خلق ودين ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

طيب بلاش هم الاتنين متخلفين عقلباً الاستاذ بيقول

ان اهلها واهله عارفين وعزمها عنده في بيتهم وعزمته في بيت اهلها ؟؟؟؟؟؟؟؟؟؟؟؟

آخر حاجة بقى فييييييييييييييييييين ميثاق الشرف الاعلامي ؟؟

فيييين القوانين بتاعة الاعلام والاهداف والحاجات بتاعته اللى فالقيننا بيها 3 سنين في الكلية ؟؟

انا فاكرة انى درست انه ممنوع في برامج الاجتماعيات ان المذيع ينصح المستمع بالطلاق علشان المجتمع ما يتدمرش

اومال القرف دا بيعمل ايه في المجتمع ؟؟؟؟؟؟

حاجة تحرق الدم

نسيبنا من وحوحة القلوب بقى واحكيلكم عن كمان حاجة تحرق الدم

امبارح وانا هائمة ع رجلي ف الكلية شوفت يافطة بتقول ان في فيلم تسجيلى عن محمود درويش هيعرضه نادي الأدب ف الكلية

انا كان هاين عليا ارقع زغروطة في وسط الكلية لأسباب كتيرة

اولها اني اول مرة اعرف ان في نادي ادب في الكلية

تانيها اني بمووووووووووووت في محمود درويش

واحنا معديين ع اليافطة واحدة لما شافتني انشكحت اوي قالتلى هوا قريبك ؟؟ كنت هلطم تاني هههههههههههه

المهم روحت النهاردة مخصوص علشان احضر بصراحة محمود درويش ينفات له بلاد

روحت متأخر لأن كل شوية واحدة تقابلني ترغي معايا شوية

فحظى الاغبر اني قعدت ورا


بس قولت مش مشكلة

وفرحت اوى كل دوووووووووووووووووووول بيحبوا محمود درويش ؟ هو يستاهل بصراحة

المهم

حصلت مشكلة في الصوت فالطلبة قاعدة تتكلم

بنت قدامي بقى استفزتني اوى فخبطت عليها اكلمها علشان تحس ع دمها

بقولها بابتسامة عريضة وكل ذوق

انتى بتحبي محمود درويش بقى علشان كده جاية صح

تمهيداً لأنها تقولى اه فاقولها واحنا كمان فخلينا نسمع بقى

لقيتها بتقول لى مين محمود درويش انا ماعرفوش انا عايزة عبد الباسط حمودة هأ ها ها ها

وقعدوا يضحكوا هي وصاحبتها

فبعدين قولتلها وانا بحاول ابتسم اومال قاعدة لحد دلوقتي ليه علشان تحضرى لحد مش بتحبيه

قالتلي : ميعاد الاتوبيس !!!

سكتت وضاعت فرحتى واملي وعٌمري وكل العيلة :(






السبت، فبراير 21، 2009

postheadericon ناثر البخور .. وناثر السحر أيضاً

ناثر البخور للكاتب - والمدون أيضاً - طارق عميرة احدى الدرر التي ظفرت بها في معرض الكتاب .. قرأتها عدة مرات وليس مرة واحدة لكثرة ما فيها

من احساس يداعب المشاعر

ويدفعها الى الامتزاج بالسطور .. لن أطيل التقديم لها فهي لا تحتاج


سوف أكتب رأيي المتواضع

عن كل قصة ، وسأحاول بشدة

ألا احرق محتواها كي لا أفقد

من لم يقرأها بعد متعة

استكشافها بنفسه

( ما فوق الحب )

امتزجت دموعي بابتساماتي ، ثم بكيت طويلاً في النهاية
عبرت عن اسوأ كوابيس واروع احلامي في نفس الوقت يا طارق ، اختيار موفق بشدة أن تجعلها الأخيرة في المجموعة فلا أظن انه هناك من يمكنه مواصلة القراءة بعدها من كثرة دموعه

( الأرجوحة )

داعبت الطفلة التي تأبى الاعتراف بمرور السنين في داخلي خاصة وأنا أدمن أنا أقضي ليالي الصيف على أرجوحتي في ظلامٍ دامس ووحدة تامة إلا من قطتي .

( أيهما يصلح ؟)

رسالة اتمنى لو يفهمها كل رجل ، تميزها يأتي من كونها من إبداع رجل .

( هل يبكي الرجال ؟ )


شعرت بين السطور أنها تحبه أضعاف أضعاف ما يتخيله .. حتى أنها تخشى عليه أن يذرف دمعة واحدة ، هو يحبها بالتأكيد .. ولكنه القدر !!


( ماذا يفعل ؟ )


أعجبتني جداً جداً ، ولا أخفيك سراً هي أول قصة قرأتها في المجموعة ، وان كنت أرفض ما يفعلانه ، تتميز عندى بذكرى باسمة أظنك تعرفها يا طارق

( شجرة الحب )

استمحيك عذراً سأنحي العربية الفصحى إلى جانب ، لأني متغاظة منك اوى اوى اوى اوووووووووووى

كان نفسي بقى النهاية اوضح من كده

انا خمنت اللى حصل بس بردو يعني كنت قول اي حاجة تأكد أي حاجة


( ولتذهب الرؤية )

بالرغم من توقعي لنهايتها الا انني عشت معه كل لحظة عاشها .. التوتر ، الترقب ، الأمل ، الخوف من ضياع الأمل

لحظة نزع العصابة من على عينه ، بل وكأنني عشت اليومين الفاصلين بين حال وحال

ودهشته وهو يتأمل المدينة كدهشة الطفل القروي الذي يرى مدينة ملاهي لأول مرة في حياته .

( نشوة ألم )

تفاعلت معها لدرجة البكاء .. للمرة الثانية أقول اني قرأت في سطورك احد أسوأ كوابيسي

( ناثر البخور )

الأسم وحده اسطورة ، قبل قراءتها لم أكن أتخيل قصتها ، مسست قضية دائماً ما شغلني
حين أضبط نفسي متلبسة بالحكم على الناس بمظاهرهم و اصدار حكم ظالم فيما يخص ماضيهم وحالهم الآن . ولكنني كنت أتمنى أن تنتهي عند جملة
(( ومن يومها لم أره قط )) وتتريك حكمة القصة وهدفك منها لذكاء القارئ

( خطأ واحد )

في رأيي تمثل قمة واقعية الخيال

( جنون الأيام )

أكاد اكون عشتها وتكررت معي آخر مرة قريباً جداً حين لم أدرك أن اليوم كان الخميس الا في الثانية من صباح الجمعة عندما فتحت المذياع !

( بلدة جديدة )

مآساة أن تحاول الهروب من نفسك !

للحديث بقية مع عبارات آسرتني في المجموعة ومع بعض النقاط التي أتمنى أن تفكر بها - يا طارق -

وسأبدأ بالنقاط التي أتمنى أن تفكر بها ، قد أكون صائبة وقد أكون مخطئة هو في النهاية رأيي الشخصي

1/ في بعض القصص لم أحب الوصف الطويل لأنه يشعرني أني تائهة بين السطور.

( مثل قصة ناثر البخور )

2 / في بعض القصص تطيل شرح نقطة ما مما يشعرني انك خرجت عن القصة الأساسية .

( مثل قصة ولتذهب الرؤية حين كان الراوي يحكي عن البائع الذي استغل ان عم شوقي كفيف ... الخ )

3/ في قصة شجرة الحب ، لا اشعر انه من المنطقي في عرفنا ان تجلس فتاة مع شاب تحت شجرة كل ليلة دون حتى أن يتساءل عنها أهلها
أو يشعر بها أحد الواشون ، كما أن وجود الأشجار والمناطق الخالية يتفق مع كونهم في ريف أكثر من مدينة


وأخيراً بعض العبارات والفقرات التي أعجبتني بشدة

" الأبنية الفاخرة تطل من كل مكان بطوابق يفوق عددها عدد الطوابق التي يمكن أن يسقط من فوقها في أسوأ كوابيسه "

( خطأ واحد )

" التفرد ليس أن تفعل ما لا يجروء الآخرون على فعله ، بل أن لا تفعل ما يفعله الآخرون "

( ولتذهب الرؤية )

" الناس يفترضون في كل أحمق أنه ولد مجنوناً .. رغم أنك لو بحثت
عن كل مجنون مثلاً لوجدت له قصة لا تتحملها أنت .. ولم يتحملها هو ! "

( ناثر البخور )

" ليس زوجي وحده هو الذي يستطيع الخيانة ! "

( ماذا يفعل )

" هناك ورقة ظلت مخبأة في ثنايا هذه الأرجوحة ، كان زوجها مازال مراهقاً يحلم بأن تبادله الحب فقط
ولم تخرج هذه الورقة من موضعها إلا بعد زواجهما بعد سبعة أعوام "

" هذه الأرجوحة كانت سجني الأول والثاني أيضاً حين صعدت إليها وحدي للمرة الأولى
بدأت في التأرجح ولم أسطع التوقف ، كنت أبكي هلعاً حتى أتت أمي لتخلصني .. وحين اكتشفت كذلك أن لهذه الأرجوحة
حداً لا تعلو عنه وإلا اصطدمت بالسقف ، لماذا لا تدور بحرية ؟! "

( الأرجوحة )

"
- أين أنا ؟-
لحظات وسأعرف مكانك..
تدور حول نفسها بضعة دورات , تحاول أن تخمن مكانه , هل هو وراء شجرة التوت العملاقة ؟ , هل يجلس على أحد الكراسي العريضة بالحديقة ؟ هل هو جالس على الحشائش على الأرضية ويداعبها كالعادة ؟ كيف ستعرف مكانه , قررت أن تسير بأى اتجاه , فإذا ما كانت ستصطدم بشيء فسيسارع نحوها لينزع الرباط عن عينيها أو ليمنعها من الاصطدام عندها ستعرف مكانه !
تكاد تصطدم بأحد الكراسي بالفعل , يسارع نحوها ويمنعها من الارتطام به , تمسك به , فيفهم اللعبة , ويضحكان سويًا "

"
هذا من أجلى ؟
يبتسم فى حنان , لا يعرف كيف يجيب , هو استغل موهبته لإسعادها , هذا كل شيء , ايقول أنه من اجلها ؟, سيشعر أنه يبتذل نفسه , ايقول انه ليس من أجلها ؟ اذن فقد رسمهم من أجل متولى
- نعم "

( ما فوق الحب )

"
ازددْنَا نُضجًا يومًا بعدَ يومْ , وازدادَت هي براءة ! , وقد كانت برَاءتها الزَائِده هيَ نقطة ضعْفِي ,وكانت تَعُوقُني في الوقْتِ ذاته من أنْ أعرضَ عليهَا أيًّا مِن مشَاكِلي , لم تَكنْ لتفهمَهَا , ولو فهِمَت فلمْ تكُن لتُدرِك ,تبدُو لهَا كل مشكلةٍ بَسِيطَة مَهمَا كَانَت معقَّدة , يبدو لها كل شخص بريء مهما كَانَت ذنُوبه , هذا وغدٌ لكنََّه لطيف , هذا نذلٌ لكنه حَنُون , هذا قاتلٌ لكنَّه كانَ مضطرًا , لو تولَّت القَضَاءَ يومًا فلنْ تُعاقِب أي مُجرِم.
هذِه هيَ , ولنْ تتغيّر , حافظتُ أنا على براءتِها كما هيَ , لم أحاول تدنيسَها يومًا , ربَّما كنت كاذبًا مع الجَمِيع ولكنني كنت صادقًا معَها , ربَّمَا كنت وغدًا معَ الجميع , لكنَّني كنت قديسًا معها , ربما كُنت صهيونيًا مع الجَميعْ , لكنني كنت طفلاً معَهَا .
كانت تمثِّلُ لي خيرَ دافعٍ في الحقيقَة , منذ أن بدأت ادركُ قسوةَ الواقِع وأنا أُحاوِل أن أصنع لي ولَهَا شيئًا , أن أكون افضل مما أرادت وتكُون كما أردْت , أن اصنع جنَّةً صغيرةً تحتوينَا معًا , وكنت اسعى لهذَا وبداخلي حافزٌ واحدْ , هيَ ! , هي حافزي لأكون أنجحْ إنسانٍ في الوجُود , كما أنَّهَا الآن أكبر حافز لجعلي أبأس انسانٍ على وجه البسيطة "

"
أبأس إنسان ؟ كلا .. البؤسَاءُ كَثيرُون , هناك من لا يجدْ من يبَادلهُ الحبْ , أأنا أم هوَ؟ أنا قطعًا ..هو لم يذقْ الحلوَى فسيكفيه أي طعامٌ آخر , أنا ذقت , وعليََّ ان أتعذَّب وأنا اعلم أننى لن أتذَّوقها مرةً أخرى , ولكنّنا بؤساء , هناك من تُتوفى حبيبته , أأنا أم هوَ؟ أنا قطعًا , على الأقل هو لن يراها مرةً أخرى ليتذكر , أمَّا انا فربًّمَا اراها , حينها ستتجلَّى ذكرياتُ سنواتٍ أربع "

( نشوة ألم )

____________

حقاً استمتعت روحي بالتحليق في سماء ناثر البخور .. تطهرت روحي بالبكاء على ومع ابطال القصص

وبين دفتيه أيضاً كان البلسم والابتسام .

وبقي أن أنوه إلى أن الغلاف الرائع من تصميم الفنان المدون أيضاً حاتم عرفة

جامع الفراشات .. وهو غلاف معبر لدرجة رااااائعة خاصة في النظرة المرتسمة في عيون

ناثر البخور .. او ربما هو عم شوقي ..

الخميس، فبراير 19، 2009

postheadericon هيكل في الميزان ( من خلال كتاب الصحافة والثورة )





محمد حسنين هيكل موهبة صحفية لا غبار عليها ، و هناك من اعتبره ظاهرة لن تتكرر فى الصحافة المصرية ...

لا يختلف اثنان على ذكائه ولا اسلوبه المتميز فى الصحافة ...

لكن من الخطأ ايضاً ان يعتبره البعض ملاكاً او اسطورة لن ولم تتكرر ..


بعيداً عن موقفى الشخصى منه ومشاعرى تجاهه ، احببت ان اضع هيكل فى ميزان الصحفيين من خلال كتاب

( الصحافة والثورة ) ..


ان اراه بعيون زملاؤه الذين تعاملوا معه ..


الذين احبوه والذين كرهوه ..


املاً فى الوصول الى رؤية اكثر موضوعية واكثر وضوحاً ودقة ...


علماً بأن كل ما يلى سيكون رأي كل شخص اذكر اسمه ،


ذكر على لسانه فى كتاب الصحافة والثورة للكاتب رشاد كامل ...


وعلماً بأني بدأت البحث منذ عامين ولازلت أواصل البحث عن هيكل


ماله وما عليه .. لا أدري ما السبب لكنني أجد نفسي مدفوعة وبشدة للبحث


في محاولة للوصول لحقيقة حيرتني طويلاً ..


نعود لما قيل في كتاب ( الصحافة والثورة )



ـــــــــــــــــــــــــ عنه يقول موسى صبرى ـــــــــــــــــــــــــ


" سبب اختلافى مع هيكل هو أنه كان يحجب الاخبار والمعلومات عن الصحف الاخرى لكى تنفرد بها الاهرام وحدها "





  • وعن قول هيكل فى كتابه (( بين الصحافة والسياسة )) عن موضوع الافراج عن مصطفى امين ، بأن السادات قال له : ولماذا لا اجامل الامريكان فيه ؟ و .......... من الافضل الافراج عن مصطفى امين ضمن هذه الصفقة حتى لا يتجاسر يوماً ويفتح فمه .



- قال موسى صبرى : ما قاله هيكل فى كتابه كذب ، وماحدث بالظبط انه فى اوائل حكم السادات ، انتهزت فرصة زيارتى له فى استراحة القناطر وتحدثت معه فى مسألة الافراج عن مصطفى امين وقال لى يومها بالحرف الواحد : " مصطفى امين له وضع سياسى " وبعد فترة اخبرته عن حالة مصطفى امين الصحية فقال لى بالنسبة للحالات الانسانية فانا لا اتردد تجاهاها ولا مانع ان بنقل الى المستشفى ، ونقل بالفعل الى مستشفى السجن وهذا لم يكن ما نريده لكن عندما تدهورت حالته الصحية امر السادات بنقله الى مستشفى القصر العينى .. بعد ذلك استغللنا - انا ومجموعة كبيرة من رؤساء التحرير والمحررين - فرصة فرحة السادات بزفاف ابنته ودعوته لنا لحضور الفرح وفاتحناه فى الموضوع بعد انصراف ضيوف الحفل .. واستعطفناه وطلبنا منه الافراج عن مصطفى امين وبالفعل استجاب السادات لالحاحنا والحاح السيدة جيهان واصدر على الفور قرار الافراج عنه ..



موسى صبرى : فى بداية التحاق هيكل باخبار اليوم اوفدوه الى سوريا لتغطية مؤتمر ( بلودان ) والذى حضره عدد من الزعماء العرب ، واخذ هيكل يرسل بتحقيقاته من هناك على انها احاديث اجريت معه ، وفيما بعد اتضح انها قيلت فى الجلسة الافتتاحية ولم يخص احداً هيكل بها .. وبعد عودته اصر مصطفى امين على فصله فتوسط كامل الشناوى وقال بطريقته الساخرة فى تخفيف المصائب " هيكل شاب .. ومعذور ، بيدخل مكتبك يلاقى عندك رئيس الوزراء ، يروح لعلى يلاقى عنده مكرم عبيد باشا ، يجي عندى يلاقى النقراشى باشا ، فهو نفسه يبقى حاجة كبيرة .. معلهش بقى !! ..



ولم يصفح مصطفى امين الا بعد تدخل على امين شخصياً وهو الذى عينه نائب رئيس تحرير اخر ساعة بعدها بسنوات ثم رئيساً للتحرير .. وكتب افتتاحية آخر ساعة عن هيكل .


واذكر فى مرة كان على امين خارج مصر اجتمع كل محررى اخر ساعة بمصطفى امين وكان هيكل وقتها نائب رئيس تحرير وقال المحرورن اما هيكل واما نحن وهذه استقالاتنا جاهرة قال لهم مصطفى انتوا تستنوا وهيكل
يمشى ، وبعد ايام عاد على امين وعرف ماجرى فى غيابه فجمع كل
محررى اخر ساعة وقال لهم كلكم تمشوا من اخر ساعة وهيكل يبقى

موجود .. هذا هو الفرق بين على امين ومصطفى امين وكان جزاء الاثنين
هو مافعله هيكل بهما فى كتابه (( بين الصحافة والسياسة )) ومن قبله ما
فعله بالسادات فى كتاب " خريف الغضب " .. كان هذا جزاء من احسن الى

هيكل ذات يوم ..


ـــــــــــــــــــــــــ احمد حمروش ـــــــــــــــــــــــــ



فى عهد عبد الناصر كان هيكل الصحفى الاوحد وكان هذا نتيجة موهبة
شخصية ، ونتيجة ان هيكل صنع لحياته كصحفى " تخطيط كويس " ولأنه
صحفى دءوب ومهتم ان يطور الصحافة ويتضح هذا فى الاهرام ..
عبد الناصر : هيكل هو الوحيد الذى فهمنى وفهم ما يدور فى عقلى قبل ان
اترجم فكرى الى كلمات " انه ببساطة يجلس فى رأسى " .



ـــــــــــــــــــــــــ د. محسن عبد الخالق ـــــــــــــــــــــــــ



ان هيكل لم يكن الا رجلاً محترماً وغير مسف او مهاتر وكان امينا على ما
يقوله عبد الناصر ، بل انه من اكثر الناس فهماً لفكره ، وكان يعرف
حدوده ولم يتجاوز ابداً ادب الحوار مع عبد الناصر كزعيم وكصديق وما
يقال انه كان الصحفى الاوحد والاول وانه حجب الشمس عن الاخرين فهو
كلام غير صحيح ولا اجد لهذه الاتهامات من سند الا كونها مهاترات
ومنافسات فعبد الناصر نفسه هو الذى اختار هيكل ومكان مقتنعاً تماماً به
..
ــــــــــــــــــــ د. محسن عبد الخالق
ـــــــــــــــــــــ


هو محاور بارع فى كتاباته ، شيك ، يستخدم الكلمة والجملة والعبارة
بدهاء عميق ، كتاباته وجبة تشبع ولكن تترك القارئ بعدها للتساؤل من
اقصى يمين الكلمة الى اقصى يسارها .. فارس من فرسان الصحافة فى
مصر وفى قرنها العشرين كله ..
ــــــــــــــــــ
د. يوسف ادريس ـــــــــــــــــــــــــ


هيكل سريع الحركة ، سريع الفهم ، سريع الاجابة ومن الثانية الاولى تجد نفسك
منجذباً الى ملامحه الدائمة التغير والانفعال المشحونة بكم وافر من الاطلاع
وحب الاستطلاع .. واعجبنى انه اذا اردت ان تتكلم يلمحك فيقطع عليك
التهيؤ و ترتيب الافكار وأية مقدمات قد تفكر فيها ويكول لك SHOUT اى
تكلم ..
= هيكل سياسى حتى النخاع ، بس سياسي بظرف يعنى .. لأن فى ناس
اذا اخرجتهم من السياسة يحصل لهم جنان وفزع اما هيكل أبداً .. يعنى
ممكن تقول له رأياً سياسياً او غير سياسى مخالفاً لرأيه 180 درجة وهو
يشجعك على هذا وميزة هيكل انه باستمرار يملك منطق متكامل ..


ــــــــــــــــــــــ حلمى سلام ـــــــــــــــــــــــــ


لا أحد يختلف حول ذكاء هيكل الوقاد .
- ان هيكل على ذكائه وعلى قدراته التى لا يصح ان يختلف عليها اثنان ،
يعتنق مبدأ لا يقبل الفصال ولعله مستعد لأن يقاتل حتى الموت دفاعاً عنه
.. هذا المبدأ هو ان القمة لا يمكن ان تتسع الا له وحده ..



ـــــــــــــــــــــــــ صلاح حافظ ـــــــــــــــــــــــــ


(( عن واقعة نقله هو وعدد من الصحفيين الى مؤسسات
اخرى غير صحفية بطريقة مهينة )) ، انه ذهب ومعه سعد كامل الى
شعرواى جمعة وقال له الاخير : فتحوا عينكم كويس لأن هذا الرجل - هيكل - لن يتورع ان يضع لكم
قطعة مخدرات فى ادراج مكاتبكم ..



ــــــــــــــــــــــــــ صلاح حافظ ـــــــــــــــــــــــــ


من اسباب عزوف عبد الناصر عن الادلاء باحاديث للصحافة المصرية - ولا اريد ان يكون هذا اتهاماً - هو اصرار هيكل على ان يكون الصحفى الاوحد الذى ينفرد بالحديث مع عبد الناصر ويناقشه ، فلو ان عبد الناصر مثلا ادلى بحديث ل " زيد " من الصحفيين لكان هذا اعلاناً ان " زيد " لا يقل اهمية عند عبد الناصر من " السيد هيكل " ولا تنسى ان هيكل كان رصيده الاساسى انه المحاور الاساسى لعبد الناصر وان مقاله الاسبوعى " بصراحة " انما هو افكار عبد الناصر ، او هكذا اعتقد الناس واعتقد ان هيكل قد لعب دوراً فى ان يجعل عبد الناصر لا يتحدث الى الصحافة المحلية ، وان كنت غير واثق من هذا الاتهام ..


ـــــــــــــــــــــــــ مواقف لم يعجبنى فيها هيكل ـــــــــــــــــــــــــ


- بعد وفاة عبد الناصر كتب يهاجمه هجوماً شديداً رغم كل الولاء الذى كان يظهره له فى حياته .


- بعد وفاة السادات كتب كتابه خريف الغضب ليهاجم فيه السادات هجوماً شرساً ، والكل اجمع على انه سقطة فى حيادية هيكل فى سرد التاريخ .


= اذا كان هيكل واثقاً من صدق كلمته ، كان يجب ان يقولها قبل وفاة اصحابها ، على الاقل احتراماً لكلمته واحتراماً لنفسه فى عيون الناس ... والا يظهر كشخص جبان يخشى من ذكر الحقائق .. ويتحمل تبعات قول الحق مهما كانت ..


-=-=-=-=-=-


الأربعاء، فبراير 18، 2009

postheadericon هي نمكي دي كلمة عيب ؟؟

أول مرة سمعت فيها الكلمة دي مش فاكرة كانت فين بالظبط لكن فاكرة كويس أوي أن الطريقة اللي كانوا
بيقولولها بيه حسستني انها كلمة عيب ، أو ع الاقل شتيمة
بعدين في ليلة من ذات الليالي سمعت ممثل باين في الراديو بيقول على نفسه نمكي ..
قولت يالهوى دا صريح أوي بيشتم نفسه على الملأ كده ؟!!

بعدين اتغاظت بقى لأن دي كانت تاني مرة اسمعها فقولت لأ بقى لو ما عرفتش معناها هطق من الغيظ
فقولت اسأل ماما .. روحت اسأل ماما وأنا في وسط هدومي بقى وانا متوقعة ماما هتهزأني علشان بنطق
الألفاظ دي .. واستعديت بقى للدفاع عن نفسي واني والله يا ماما اول مرة انطقها وكده
فلاقيت ماما بتضحك لما قولتلها " احم .. ماما هي نمكي دي كلمة عيب ؟؟ " انا استغربت ان ماما بتضحك واني
لسة ما اتهزأتش لحد دلوقتي فقالتلي بقى ان معناها حد " بيحبكها أوي في الشغل ولازم يعمله على سنجة عشرة "

ساعتها اتحرق دمي .. بقى اللى بيشتغل كويس وضميره صاحي الناس تتكلم عنه كأنه عامل جريمة
والكل يتهرب من الشغل معاه ؟!!

بدل ما كل واحد يتمنى يبقى زيه ويشتغل بضمير ويتعلم منه ؟؟

لأ والانيل من كده انه هو نفسه معتبر ان دا عيب فيه وبيتمنى يتخلص منه
او ع الاقل حاجة بيتكسف منها ؟!!

يعني حتى لو في حد طالع عنده ضمير نعمة كده من عند ربنا مع اول تعامل مع بني آدمين بيبصوا البصة دي للي عنده ضمير
هيبطل على طول مش شرط يكون مقتنع بس ع الاقل هيقول يعنى انا بتعب نفسى وبشتغل بضمير
وبحرق في دمي واعصابي وفي الاخر ابقى كائن مكروه والناس تتهرب مني !!طب وعلى ايه ما انا اريح واستريح وخلاص بقى

وفي الآخر نرجع نقول " ياااااااااااه الدنيا دي بقت وحشة أوي مابقاش في حد عنده ضمير يا أخي !! "
السبت، فبراير 14، 2009

postheadericon العيد القومي لمملكتي



15 فبراير هو العيد القومي لمملكتي اللي بكلمكم منها دلوقتي

مدونتي دي اللي مع مرور الوقت ما بقتش مجرد مدونة .. لأ دي بقت حتة مني

بقت بيتى وملاذي و حاجة من احلى الحاجات في حياتي

كفاية عليا بس الناس الحلوة اللي عرفوني وعرفتهم عن طريق المدونة دي

قد ايه عرفت ناس بجد كويسين ... عرفت ناس عايزة تعلمني كل حاجة اتعلموها من الدنيا دي

اي حاجة لو بسيطة وعايزة اعرفها مش بيستخسروا حاجة

فاكرة قد ايه منمن ماي هوبس طلعت عينيها يا عيني وهي بتعلمني ازاي اعمل الماوس ليها شكل حلو

واحط اغنية علشان عيد ميلاد اخويا

وفاكرة كام مرة غلبت الاستاذ العزيز جداً ( صحفي مشاغب ) وهو بيعلمنى ازاي ابقى صحفية شاطرة

وكام مرة تعبت الناس معايا وقلقتهم عليا وانا نفسيتي وحشة

وعمرهم ما سابوني وقالولي لو ما كناش احنا نستحملك في زهقك مين يستحملك

وفاكرة يوم ما كان عندي شوية مشاكل وخليت حد عزيز عليا يدخل المدونة
ويقول للناس يدعولي وقد ايه ربنا ساعتها فك كربتي بسهولة ماكنتش اتخيلها

فاكرة
يوم نجاحي لما فرحت بفرحة الناس اللي هنيتني وفرحت بيا


مملكتي اللى شافت كل افراحي زي ما شافت زعلي وتعبي وزهقي ..

شافت يوم ما كنت هلمس السما من الفرحة علشان عرفت اني من ضمن اللي اعمالهم اتقبلت في كتاب مدونات مصرية للجيب

يومها لما قعدت اطنطط في بيتنا وقلبي كان هيقف من الفرحة وعملت
دعوة لكل الدنيا علشان يشاركوني فرحتي

وما انساش أبداً لما كنت بكتب في المدونة والشاشة بايظة وبعد شهووووور اكتشفت اني كنت بكتب بالوان بشششششعة وكنت فاكرة لون مدونتي بيج مش اخضر
وقولت للناس دا علشان ماحدش يشك اني عندي عمى الوان ههههههههههههههه

حاجات كتيييييييييير أوي عشتها هنا على المدونة دي

اللي بحبها بيكم .. بكل حد دخلها وقال ان كلامي صح او كلامي عجبه او حتى عارضني

بس كفاية اني لقيت حد بيسمعني

بيسمعني بمزاجه مش مجاملة ولا تقضية واجب

بجد بحبها اووووووووووووي وبدعي ربنا يقدرني واخليها احسن واحسن وتفضل دايماً بيتي وملاذي

و يحميها من كل هااااكر ياااااااااارب قولوا اميييييييين

يلا بقى انا مستنية التورتة والهدايا

وكل اللي يدخل ياخد حتة جاتو من دول

مواضيع بعتز بيها بجد وشايفاها احلى من الجاتو اللي نصه كريمة ونصه شيكولاتة اللي بموت فيه



دا البيان التأسيسي للمدونة ههههههههه

لأ بجد دا موضوع لو ما لسعتش ماحدش هيحس بيك وفيه نظرية اللسعان



ودا موضوع لكل بنت عايزة تعرف تتعامل مع الصنف اللي مالوش أمان ا(( الرجالة ))




و دا اول موضوع اخرج فيه عن الاطار اللاسع للمدونة






ودا موضوع كنت كاتباه عن دكتور احمد خالد توفيق


اسمه كلمات لن يقرأها هو .. الموضوع دا كنت بقول فيه ان مستحيل دكتور احمد يدخل مدونة


غلبانة زي دي وسبحان الله .. من كام اسبوع قابلت دكتور احمد وظفرت بانى اتكلم معاه


ووعدني انه هيزور المدونة اللى كنت بحسب انه مستحيل يسمع عنها حتى في يوم من الأيام




ودا موضوع بعتز بيه جداً ومن اكتر المواضيع اللي كتبتها من قلبي بجد


هذه عراقنا وهذه عراقهم واللي يعرفني كويس يعرف ليه الموضوع دا بالذات اكيد من قلبي




ودا بوست يفطس من الضحك فيه العدد اليتيم من مجلة عملتها وانا في رابعة ابتدائي كان اسمها مجلة الاصدقاء



ودا موضوع انا مدمنة قرايته رغم اني مش بحب اقرا اللي كتبته اكتر من مرة


بس دا بالذات حاجة تانية


العاشقان




ودا موضوع بحبه اووووووي لأنه طلع زي ما كنت عايزاه يطلع


زي ما كان جوايا بالظبط وعبرت فيه عن اكتر من حاجة






عام مضى وبقيتِ غالية .. موضوع بحسه اوي كل ما اقراه وحبيت اوي اني كتبته





ودا موضوع عيد ميلادي .. بجد كان من اجمل أيام عيد ميلادي .. لأول مرة بحتفل بعيد ميلادي في ارض الواقع


مع اصحابي في الكلية .. اصحابي اللي بعد كده بقوا اكتر من اخوات ليا


بس دا كان موضوع بستغرب فيه من ان المقروضة - اللي هي انا - هتكمل 19 سنة


:(( عجزت للأسف وبقيت كركوبة



علشان خاطري قلب كويس ... اعتقد انه يستحق القراية




لماذا يخدعها الرجال ؟!! حبيته لأن اكتر من بنت قالتلي انه عبر عنها أوووووو ي




من اسوأ ما ابتلي به الشرفاء .. موضوع السعد بالنسبة لي .. اسعدني الحظ واتنشر في كتاب مشروع وطن


واتكلمت عنه مجلة المحيط وحسيته انه علم مع الناس او عمل حاجة جواهم حتى لو ما اتفقوش معاه



أن تكون غلطة حبوب .. مآساة كل اواخر العناقيد ، الموضوع شخصي الى حد ما هههههههههه


انتحار شخصية .. من اكتر المواضيع اللى حسيت اني اديتها حقها الى حد كبير




وين هنادي يا امااااااااايا .. طبعته واديته لصاحب هنادي ، وما تتخيلوش فرحت قد ايه لما


حسيته عجبه وحسيت انه فرحان بيه و طلب عنوان المدونة علشان يدخل يقراه على النت


ومن هذا المزنأ احب اقول لأبو اشرقت - صاحب هنادي - بجد هنادي وحشنييييي جدااااااً ووحشني اووى راحة البال اللي بحسها هناك




صدام الذي احبه .. موضوع كنت متوقعة اني هلاقي عليا هجوم رهيب بعده لكن فرحت بجد


لما لقيت ناس بتشاركني في حبه


وأخيراً علشان مستعجلة موضوع شطرنج اللي حسيت اني بدأت افهم الدنيا واعبر عنها صح فيه



فاضل حاجة اخيرة عايزة اضيفها


عارفة اني طولت اوي بس اخر حاجة استحملوني دا هو يوم كل سنة


لو حد قرأ موضوع لو ما لسعتش ماحدش هيحس بيك اللي كتبته من سنة


ياريت تقرا لو ما لسعتش ماحدش هيحس بيك اللي كتبته من أيام


لأني حسيت اني شوية كبرت


وفكرت شوية في اللسعان ولقيته عايز كلام كتير لكن انا اكتفيت بالكلام ده



" لو ما لسعتش ما حدش هيحس بيك "


مش مصدقني ؟!! طب أقولك على حاجة .. لما بتولع عود كبريت وبتنساه في ايدك بتحس بيه امتى ؟؟
طبعاً أول لما يوصل لصوابعك ويلسعك .. طول ما هو عمال يتحرق من غير فايدة وبعيد عنك مش حاسس بيه
رغم انه بيكون منور لكن كتير أوي ممكن ما تكونش شايف النور لأنك
" ملهي " في حاجة تانية عامية عينك ومنسياك .

في حاجات كتير أوي في الدنيا دي لو ما لسعتناش مانحسش بيها .. ما نحسش ليها بفايدة ولا طعم ..
الشوربة لو ما كانتش تلسعك وانت بتشربها تحس انها " باردة " وانها مالهاش لازمة وانك اتأخرت كتير على شربها .. الشطة لو ما كنتش تلهلب لسانك تقول عليها شطة مغشوشة .. المكوة لو ما كانتش تلسع إيدك لو لمستها تقول عليها باظت .. البشر كمان من ضمن الحاجات اللي لو ما لسعتش ما نحسش بيها .. لو ما كنتش تسيب أثر في المكان اللي تقعد فيه ماحدش هيفتكر انك كنت موجود أصلاً .. بالظبط زي الفرق بين عود كبريت ونقطة ماية وقعوا على ورقة .. نقطة الماية بعد دقايق بتنشف والكل بينسى انها كانت هنا .. لكن عود الكبريت لو وقع على الورقة بيسيب مكانه أثر .. لو جه حد بعد خمسيين سنة هيلاقى أثر على الورق ويعرف ان في نار عدت عليها .

خليك زي النار .. السع اللي حواليك لسعة خفيفة .. لسعة دفا .. تحسسهم انك موجود ، انك حواليهم ، ولو غبت يحسوا ان في فرق .. ان في حاجة مهمة أوي ناقصاهم .. النار بتدي أمان وبتدي في نفس الوقت خوف ..
النار محتاجة حد بجد يفهمها .. لو فهمها واتعامل معاها صح ، عرف حدوده معاها هيعرف ياخد منها الأمان .. لكن اللي مش هيقدر يفهمها .. اللي هيفتكرها لعبة هيتحرق بيها .

النار ثواب وعقاب في نفس اللحظة .. ممكن تدفي وممكن تحرق .. ممكن تكوي جرح وتداويه وممكن تكوي الجلد وتشوهه .. ممكن تنور الطريق وممكن تسده وتقطعه ..


خلي أفعالك ، تصرفاتك ، كلماتك .. كل حاجة تصدر عنك زي النار .. ليها أثر ، ليها فايدة ، ليها مذاق مختلف .. حتى لو وجعت الناس في البداية لكن بعد كده ان طال الوقت ولا قصر هيكتشفوا انهم كانوا محتاجين النار دي .. كانوا محتاجين اللسعة دي علشان يفوقوا أو علشان يتداوا أو علشان يتعلموا ..

عارف ازاي تبقى لاسع زي النار ؟؟
أقولك يا سيدي .. عمرك شوفت نار" كده وكده " ؟؟ ولا نار " تقليد" ؟؟ طبعاً لأ .. النار كلها حقيقية ..
و" الحق" زي النار .. مميز ومختلف .. ساعات بيوجع وساعات بيحرق وساعات يدفي ويفيد ويداوي ..

علشان تكون لاسع .. لازم تكون " حقيقي " لازم تكون مع الحق .. وعلشان تكون لك قيمة في الدنيا دي وبصمة وفايدة ... لازم تكون لاسع .

كلامي مش شرط يكون صح .. ومش شرط تقتنع بيه .. لكن أنا حساه
" حقيقي " .. علشان كده اقتنعت بيه وبقوله للناس .. علشان لو صح الناس تعرفه .. ولو غلط الناس تعرفني انه غلط ..


سارة درويش

الأحد، فبراير 08، 2009

postheadericon ايوة انا عملت محشي

تخيلوا اني عملت محشي ؟!!  اه وربنا.. انا اخري في المطبخ كان بطاطس محمرة، بيض مقلي، ويوم ما اتشطرت اوى عملت عصير برتقال في ساعة ونص :D

بس من اول لما الاجازة بدأت سافرت اقعد مع اخويا فطبعاً في خلال اسبوع طلعت بنتيجة مهمة جداً ان اخويا اشطر مني في المطبخ بمرااااااااااااااااااحل
وكان ضغطه خلاص على وشك يعلى و بجد بجد كان بيعاني مني وفي يوم قالى انه نفسه في المحشي :"وطبعاً انتى مش بتعرفي تعمليه " 
فأتا اتحمقت أووووي وقلت ازاي الراجل مظبطني فسح وخروجات وصابر عليا ومستحملني كل الوقت دا ياعيني وما اعملوش المحشى اللى نفسه فيه
رحت قمت من النوم وقررت قراري الحاسم القاطع الخطير الفظييع انى اعمل محشي
وقعدت افتكر مراسم عمل المحشي في البيت كده واتوكلت على الله ورحت السوق نزلت السوق واول بياعة قابلتني قلتلها انا عايزة كرنب طبعاً هي قرت العبط في كل ملامحي راحت حدفتني لواحدة تانية عندها كرنب انا انصدمت من احجام الكرنب المهوووووووولة اللى شوفتها 
فرحت بكل عبط اقولها عايزة واحدة صغيرة فبصت لي كده واديتني واحداية كبيرة مش صغيرة ولا نيلة قلتلها لأ اصغر اصغر اصل احنا اتنين بس 
راحت الست انشكحت اوى وقالت عبط زي كده مافييييييييش واديتني كرنباية مدية على خس كده :D وبكام يا حاجة اتنين جنيه ونص 
انا اذبهليييييييت يااااااااااااه كرنباية وباتنين جنيه ونص بس ؟؟!! زأططات  وانا ماشية الست راحت قالتلى ربنا يكتركم ياختى 
المهم اشتريت باقى الحاجات ورحت البيت وبدأت المعركة عايزة اقولكطم كان منظرى ولا اللى بتحارب
بفتح الكرنباية لقيت 3/4 ورقها بايظ قلت مش مهم مش مهم دي رخييييييييصة وبعدين جيت اسلقها اكتشفت حقيقة مرة انها لافة على بعضيها اوي ومش هتطلع الا بعملية جراحية صعبة أدت الى كسر الكرنب وطبعا بعد ما اتسلق اتبقى فتافيت كرنب !! 
بعد ما قطعته قلت اعمل الخلطة بقى جيت اعمل الخلطة عملتها تمام بس نسيت اي بهارات واي ملح واي حاجة بتتحط عليها 
لأنى عملتها شبه المنظر النهائي اللي بشوف ماما تحط عليه الرز بعدين استغربت انها مش مطلعة اي ريحة فافتكرت بقى انى المفروض احط عليها أي حاجة تعمل اي منظر فحطيت ملح ولسة مافيش ريحة حطيت شطة ولسة مافيش ريحة فافتكرت البهاااااارات فتحت دولاب التوابل وادعبس ع البهارات مش عارفة اوصل لها ادعبس مش عارفة كل البارطمانات شبه البهارات فقررت استعين بصديق ندهت لجارتنا وقريبتنا قلتلها والنبي تعالى شوفى انهى في دول بهارات :(
فدخلت ودعبست ودعبست ودعبست واخيرااااااااااااااااا قالتلى ولا واحدة من دول بهارات تعالي خدى من عندى 
المهم ربنا سترها وصلنا بقى للمرحلة الحاسمة الصعبة وهي انى الف الكرنب !!!  انا اخري محشي بتنجان بقعد احشيه مع ماما كده لكن العملية هنا صعبة ومحتاجة هندسيات وفنيات وحاجات من كده بعدين فلي الاخر قلت زي ما تيجي بقى و طلعت حاجة شبيهة بالمحشي حطيته بقى يستوي وحطيت له شوربة وافلام من دي وشوية وريحة شياط قوية جبارة جات لقيت بنت جيراننا اللي هي في نفس الوقت قريبتنا بس مش بتاعة البهارات بقى المرة دى كانت الصغننة بتقولى سارة في حاجة عندك بتتحرق ساعتها بس اكتشفت ان فضيحتي بقت بجلاجل في العمارة كلها دخلت جري وعملت عملية معملية فاسدة وانقذت المحشى من الحريق الحمد لله والله في الاخر طلع طعمه شبهه المحشي
 المشكلة بقى اللي تفطس من الضحك اني لما سيحت لنفسي في العيلة اني بعمل محشي حصلت حركة اتصالات مريبة والكل عايز يتطمن وتخيلوا سارة بتعمل محشي ولأ بجد وبابا يقولي شيليل صوباعين  وماما اتصلت تتطمن اخويا لسة في كامل وعيه ولا لسة 
ويويو جات زارتني يوميها وشافت المحشي والله فرجت نص قرايبنا عليه ما نفعش ادوقهم لأن الكرنباية ما كفتش اساسا :D
رحت بقى بكل فخر احكي لمرات خالي فانصدمت لما عرفت حق الكرنباية وقالتلى انهم بيجيبوا كرنباية ضخمة تأكل العيلة مرتين بتلاتة جنيه ونص
ولما حكيت لجارتنا اللى هي قريبتنا عن تمن الفراخ انصدمت
بس بردو 
بردو
بردو
دا كله ما ينسينيش فرحتي بالنصر الرهيب المهيب العظيم  
ع فكرة لسة في خمس صوابع من المحشى التذكاري دا بفكر احطهم في مزاد علني :D



ع فكرة انا لسة مسافرة ولسة مافيش نت فسامحونى بالنسبة للتعليقات

المتابعون

اعتبرها بيتك ♥

وِش القفص

خليك ورايا

دليفري..