لعلمك

لعلمك

إقرأ لي

دخلوا بكليك شمال :D

Blog Archive

الأحد، مارس 29، 2009

postheadericon هتتكلم .. هتتشرح !

(( بص ياعم الحاج انت زي والدي .. وانت راجل طيب وأكيد المرحوم كان طيب وغالي عليك ..

انا علشان بحبك بس هقولك كده ، رغم ان دي مسؤلية عليا ولو حد عرف هيبهدلني بس انا بحبك ..

آي والله بحبك لله في لله كده وانت صعبان عليا .. أنا هكتب للمرحوم ع خروج وخده من سكاااااااات كأنه عايش

علشان ما يتبهدلش .. دا هيتشرررررررح .. اكرام الميت دفنه والبقاء لله ))

- بس ابني دخل هنا عنده نزلة معوية .. وكان بدأ يتحسن قبل ما الدكتور التاني يجي يحط له الدوا الغريب دا في المحلول

يعني الدكتور دا قتل ابني .. اسكت ازااااااي ؟؟

(( آآآآه شكلك هتتعبنا معاك وتتعب نفسك يا عم الحاج !

انت مش مؤمن ولا ايه ؟؟ ابنك كده كده كان هيموت .. عمره كده نعملك ايه يعني ؟؟

وافرض ان الدكتور السبب .. لو ابنك اتشرح وثبت ان الدكتور السيب .. ابنك هيرجع تاني ؟؟ هه هيرجع تاني ؟؟

يااااااااااا حاااااااااااج .. اكرام الميت دفنه يا حاج .. ولا ايه ما تقولى حاجة يا حاجة ؟؟ ترضي ابنك يتشرح ويقعد يتعذب

وبيقولك الميت بيحس بكل حاجة .. ترضي لابنك البهدلة يا حاجة ؟؟ ))

- لألألألألألألألألألأ .. لأ والنبي يا حاج .. اسمع كلامه يا خويا

هو عمره كده هنعمل ايه ؟؟

اسمع كلامي ياحاج ما تحرقش قلبي زيادة .. انا قلبي والع نار ع ضنايا

آااااااااااااااااااااااه يا حبيبي يابني .. كان مستخبيلك دا كله فين يا بني يا ضنايا

[ STOP ]

المشهد دا بيتكرر عشرات المرات في مستشفيات مصر ..

كل ما حد يموت ، ولو حتى كان السبب اهمال طبي او دوا غلط

يقولوا لأهل اللي مات (( هتتكلم .. الجثة هتتشرح ))

وبس .. الاهل بيسكتوا كانهم اتخرسوا ساعتها

لو لاحظنا الدكتور اللي في المشهد اللي فوق لعب ع 3 اوتار

أول وتر : حنية الأب وانه مش عايز يبهدل ابنه ولا يهينه

تاني وتر : الدين .. اكرام الميت دفنه و الايمان بالقضاء والقدر والايمان بان الاعمار بيد الله

تالت وتر (( ودا اكتر واحد مضمون )) : حنية الأم وعاطفتها اللي هترفض البهدلة لأبنها وهتقدر تضغط ع الأب

حى لو اللي مات راجل كبير ومالوش اب وام بييلعب ع وتر ابنه وبنته اخوه ومراته كده يعني

وكتييييييييييييييير أوي دكاترة بتفلت من العقاب بالحركة دي

مثلاً طفل دخل المستشفى يتعالج م ( لا مؤاخدة يعني ) الاسهال طلع ميت !!

طفل دخل يتخلع له ضرس أو سنة مات من التخدير !!

وكتير وكتير .. وكله بيعدي لأن كله خايف م التشريح

نفسي الناس تقتنع بــ 3 حاجات وهي هتبطل تتنازل عن حقها

1 / ان ربنا قال فيما معناه ( ولكم في القصاص حياة يا أولي الألباب )

2 / انه لا يضر الشاه سلخها بعد ذبحها

3 / انه ممكن انت نفسك تموت بإيد نفس الدكتور لو فضل في مكانه من غير ما يتعاقب

آخر حاجة .. ودي بردو ممكن تكون من ضمن الاسباب اللي بتخلي اهل الفقيد يتخلوا عن حقهم

وهي الكووووووووووووسة و احبال المحاكم ودول مش محتاجين تفسير
الجمعة، مارس 27، 2009

postheadericon الجوع حلو







الجوع حلو ..
علشان بيخلي طعم الأكل أحلى ..
بس لو جوعنا كتير ..
ممكن يتقتل جوانا الاحساس بلذة الأكل
والناس دي جاعت كتير أوي


الأربعاء، مارس 25، 2009

postheadericon انا نجحت يا نااااااااااااااااااااس


حدث بالفعل :)
الأحد، مارس 22، 2009

postheadericon قعدة عرب بين " أنا المحترمة " و " أنا النص كم " ((1))




كل يوم والتاني أنا المحترمة وأنا النص كم يبدوا خناقة مع بعضهم لا دي عاجباها دي ولا دي عاجباها دي ، وطول الليل بقى كل واحدة منهم تنط لي تشتكي لي
" الحقى نفسك وربيها كويس ، دي هتوديكي في داهية ، دي هتكره كل الناس فيكي ، انتي ما بقيتيش سارة بتاعة زمان مابقيتيش طيبة ولا صافية زي زمان .. لازم ترجعى كويسة تاني "

دي طبعا ً أنا المحترمة ..
وأول ما ابدأ افكر في كلامها الاقي أنا النص كم جيالي
" طول ما انتي ماشية وراها هتفضلي كده ، هبلة ومسكوها طبلة والكل بيستعبطك ، يابت فوقي لنفسك واخلصي منها .. اديني الأوكي بس وأنا اموتها ونخلص منها بقى دي خنقتني طول ما انتي عاملة فيها علي ابن الناس الكويسين كده مش هتسلكي في الدنيا دي "
ويادوب ابدأ أفكر في كلام أنا النص كم أصحى من النوووم ، أو انام هع هع هع المهم بقى أنا تعبت أوي من شغل الضراير دا وزهقت من الزن ع الودان اللي على طول دا وأخلص بقى روحت لميت أنا المحترمة وأنا النص كم وقولت لهم " بصوا بقى أنا مش فاضية للعب العيال دا ، احنا لازم نتفق ونعمل هدنة كده وياسلاااااااااااااااام لو عملنا معاهدة سلام وارتاح من وجع الدماغ دا خالص "

.. وبعد محاولات مستميتة قدرت أقعدهم مع بعض أخيراً

ولسة بنقول يا هاااادي يارب ابدأي يا ست " أنا المحترمة "
راحت " أنا النص كم " طلعت فيا : واشمعنى هي بقى ان شاء الله اللي تبدأ ؟! "

قولتلها علشان هي الكبيرة
قالتلي ومين بقى قال انها الكبيرة ، احنا هنستهبل من أولها ولا ايه ؟؟
قولتلها طب استنى نحسبها .. هي جوايا من يوم ما ربنا خلقني ، كل الناس كده وكل الناس كمان عارفة كده ، ان البني آدن بيتولد محترم وبعدين بقى انتي جيتي مش فاكرة امتى بس أكيد يعني من أول ما بدأت اتحرك واقدر اعمل البلاوي اللي كنتي - ولا زلتِ - بتوسوسي لي بيها طبعاً أفحمتها حصرياً ولأول مرة ههههههه وبدأنا قعدة العرب اللي اتفقنا فيها ان كل واحدة منهم هتقول حاجة مش عاجباها في التانية والتانية ترد وأنا احكم ما بينهم في الآخر .
وبدأت " انا المحترمة " وقالت :
بصراحة انا مش بيعجبني فيها انها دايماً بتظن بسرعة السوء في الناس وما بتعذرهمش ولا بتفكر انهم
نيتهم حلوة الا بعد لما افوقك انا واقولك انه احتمال يكون الناس مظلومة وانهم ليهم عذرهم و .......
قبل ما تكمل كانت " انا النص كم " هبت فيها وقالت : لأ يا حبيبتى اللي انتى بتعمليه دا الهبل بعينه مش تفويق ، انتي اللي بتوديها وتودينا معاها في داهية و دايماً في الآخر بتنصدم في الناس وتقول ياريتنى صدقت انهم فعلاً نيتهم وحشة وياريتني ما اديتهمش أمان .. مش فاكرة كام واحدة كانت فاكراها صاحبتها وطلعت أي كلام ؟؟ ولا نسيتى كام مرة كانت بتقعد تندب وتعيط وتقرفنا علشان اكتشفت انها مخدوعة في بني آدمين ما يستاهلوش ؟؟ ولو نسيتي دي ودي ما اظنش تقدري تنسي انها كل ما تصدق كلام حد تكتشف ان الكلام دا فشنك وواخد ماركة مسجلة في الخداع ؟؟
بصراحة انا احترت اقول ايه .. الاتنين معاهم حق ، يااااااااما وثقت في ناس ماكانوش قد الثقة ، وياما بصدق وعود ما بتتحققش ولا أصلاً اللي وعدوا بيها بيفكروا ينفذوها .. وكتيييييييييير أوي بعيط بعد ما بكتشف قد ايه كنت عبيطة وهبلة بس بردو ما انكرش اني كتيييير أوي ضميري بيأنبني اني اسأت الظن في ناس ما تستحقش مني كده خالص طب بعدين وايه العمل في الحكاية دي ؟؟؟؟؟
سكتت كتييييييير وقعدت افكر فجأة لقيت ماية غرقتني دي طبعاً كانت " أنا النص كم " بصيت لها وانا هموت واموتها

قالتلي
يلا يا اختى انا مش فاضية لك اخلصى واحكمي بيننا انتى نمتي ولا ايه ؟؟
لطشتها قلمين وقولتلها هاحكم ع كل حاجة في الآخر
اتفضلي يا ست " نص كم " قولي اللي عندك ايه اول حاجة مضايقاكى في " أنا المحترمة "

-
هي كلها على بعضها أصلاً مش عاجباني عايش في الدور أوي وبتفكرني بسميرة أحمد هيهيهيهي
أنا المحترمة بصت لها وهي هتعيط وبصت لي زي ما تكون بتقول لي خدي لي حقي

فقولت لـ " أنا النص كم " ماقولنا لمي نفسك ، لو هتتكلمي يبقى تتكلمي عدل قولي حاجة واحدة مش عاجباكي

-
أبسط حاجة ، ودي اسألي كل اصحابها عليها انها ممكن أوي تعمل حاجة علشان تساعد او تسعد حد وتيجي عليا وعليكي وعلى نفسها وياريته بيتمر

- انا المحترمة : وانتي ايه اللي مزعلك .. ياستير يارب انتى وحشة اوي كده ليه
فيها ايه لما اسعد الناس وفيها ايه لما اريحهم ايه يعني لما اتعب شوية ؟؟
وبعدين يعني ايه ياريته بيتمر دي ؟؟ حتى لو ما اخدتش منهم مقابل كفاية عليا اني حسيت اني بسعدهم
وكفاية الثواب عند ربنا

-
أنا النص كم : ايه ايه ايه ؟؟ يعني ايه ايه اللي مزعلني كلنا في مركب واحدة حضرتك ولما بنغرق بنغرق كلنا سوا ولما بتحصل حاجة وحشة بسبب كده بتحصل لنا كلنا ولا ايه ؟؟ ماتردي يا حضرة الاستاذة .. فين حكمك ؟؟
انا بصراحة كلام الاتنين حساه صح .. ومش عارفة اعمل ايه انا المحترمة معاها حق واللي بتخليني اعمله بيسعدني وانا النص كم كمان عندها حق .. لأن كتير الناس بتتوقع مني افضل اجي ع نفسي واساعدهم وانا ببقى تعبانة او مش قادرة او نفسيتي مش متظبطة وما بيعذروش دا غير كلام اصحابي اللي حذروني اكتر من مرة من كده ومافيش فايدة مالقتش رد فقولت كالعادة

"
انا قولت الحكم في آخر الجلسة اخلصوا .. هاتوا اللي بعده "

الدور كان على
انا المحترمة فقالت : اللي ما بيعجبنيش فيها بردو انها ع أقل حاجة تتنرفز وتتعصب وزرابينها تطلع

لسة أنا النص كم هتهب فيها لحقتها وقولتلها
لأ الحق يتقال .. دي عندي دي .. أنا السبب هي دي طبيعتي هي دي أنا .. أنا النص كم مالهاش ذنب
طبعاً انا النص كم قعدت تطلع لها في لسانها وتعمل فلفل شطة فزغدتها علشان تقعد

وقولتها :
بطلي هبل وقولي ايه مضايقك تاني في أنا المحترمة

-
أنا النص كم : عيبها انها خايبة ومخيباكي معاها آل ايه ما اقدرش احرج حد واقوله مثلاً اني عارفة انه كداب او عارفة انه وحش او انه عمل حاجة ضايقتني وتقعد بقى تخليكي تكتمي في نفسك وتهري وتنكتي فيها وما تقوليش حاجة آل ايه بتراعي شعورهم وهم مافيش مرة واحدة راعوكي فيها طب الناس اللي بتبقى ذوق معاكى نقول ماشي لكن الناس المدب اللي بتجرح فيكي عمال على بطال وكلامهم زي الطوب ليه تراعيهم ؟؟ ما تحسسهم مرة باللي بيعملوه وقد ايه بيوجع
قبل ما
انا المحترمة ترد قولتلها

بصراحة في دي انا النص كم معاها حق
ونفسي تبطلي الخصلة دي وتبطلي تنيمي فيا علشان ما اخدش بتاري ولا ابعبع واقول اللي في نفسي
- انا المحترمة : يعني دا ذنبي يعني اني عايزة اخليكي ذوق واخلي الناس تحبك ؟! بقى دي جزاتي ؟!!

قولتلها
آه بقى جزاتك مش عايزة ابقى ذوق يا ستى عايزة اخد حقي وافضفض علشان ما يجيليش الضغط ولا السكر الذوق هينفعني لما اتشل م الغيظ ؟؟


((
طبعاً انا النص كم كانت مظاطاة أوي وانا المحترمة كانت مقهورة ))

يلا قولى ايه تاني مضايقك من انا النص كم


قعدت تفكر فأنا نمت منها وقولت نكمل الجلسة في يوم تانى



الجمعة، مارس 20، 2009

postheadericon اممممممممم اشتغل ايه لما اكبر ؟؟

" اممممممممم اشتغل ايه لما اكبر ؟؟! "

السؤال دا فضل محيرني يمكن لحد إعدادي ، حظي الحلو اني فكرت فيه على رواقة
ولوحدي .. مافيش حد من اهلي خلاني ادخل في طريق معين سواء بالإجبار أو بالإيحاء ..
فقراري كان طالع من جوايا ، ودا طبعاً كان لأني اخر العنقود .. وكان بابا وماما مشغولين في انهم يقنعوا
اخويا يطلع مهندس واختي تطلع دكتورة هههههههههه

طول فترة الطفولة كنت انا بقى بجرب .. كل كام اسبوع بجرب شغلانة
جربت اكون دكتورة وكنت شارية شنطة الاسعافات الاولية اللعبة بتاعة العيال دي
وكنت بصراحة ما بحبش الكشف قد ما بحب اكتب روشتات .. اصلي ما كنتش بلاقى حد اكشف عليه كلن الروشتات سهلة ههههههههههه

وفترة تانية كن مغرمة باني اكون سكرتيرة .. افضل اكتب حاجات عجيبة في ورق
وألم تليفونات البيت كلها واحطها جنبي واقعد ارد عليها بقى وانا منهمكة في الشغل

وجاتلي فترة كنت بحب أوي اشتغل صراف بنك وأقعد اصرف في ورق النتيجة بكل استمتاع

و بعد كده لما دخلت المدرسة كنت مغرمة بأني اشتغل مدرسة .. كنت بقلد الأبلة بتاعتي اللي بكرهها أوووووي
وكان عندي سبورة صغيرة وبجيب طباشير واقعد اشرح للمخدات واللي تتغابى او الاقيها مش مسرحة شعرها كويس
بنزل فيها ضرب لحد ما تحرم هههههههههه وكنت بلبس المخدات توك هههههههه

( الغريب بقى اني لما كبرت ودخلت ادبي ع عكس رغبة بابا ، قالي خلاص ادخلى تربية واشتغلي مدرسة
رفضت وكنت بدعي ربنا ليل نهار ما ادخلش تربية ، ويوم الرغبات حطيت حقوق وماحطيتش ولا واحدة تربية
لأن المجموع كان يجيبها فخفت اتدبس فيها وساعتها كنت ممكن يجرالي حااااجة )

وشوية كمان لما بدأت اقرا لأدهم صبري في رابعة ابتدائي كنت هموووووووت واشتغل ظابط ، وكالعادة جبت العدة بتاعة الظباط ..
كلابشات ومسدس و الحاجات دي وبعدين لما لبست نضارة بين رابعة وخامسة ابتدائي احلامي انهاااااارت واملي اتحطم .. لأني كنت عارفة
ان اللي يلبس نضارة ما ينفعش يدخل الجيش
( طبعاُ على اساس ان البنات اصلا بتدخل جيش او ان الظباط بيطلعوا من الجيش مش
من كلية الشرطة ههههههههه )

وفي اعدادي الامل اتجدد بقى .. بردو لقيت الحل في أدهم صبري ، قررت اشتغل زي ( قدري ) مزورة في المخابرات
وفعلاً بدأت ادرب نفسي بقى ( اشمعنى ادهم اتدرب من وهو طفل .. ماحدش احسن من حد هههههههههه ) وكنت بزور بطايق حلو أوي
كنت طول الاجازة اجيب فرخ ورق مقوى وامسك بطاقة اختي واقعد اقلدها بالظبط .. واعمل ختم وبصمة وكل حاجة

وفي الحقيقة الموضوع دا نفعني بس في شهادة امتحانات الشهر اللي كان بابا بيشوفها في الشهور المشرقة بس
أي عك انا اللي بمضي عليه ههههههههههه ونفعتني في ثانوي بردو ايام ما كنت بظبط ورقة الغياب للعيال في الفصل ههههههه

بعد شوية كنت بتعذب بجد .. كان نفسي ابقى كل دول .. دكتورة ومزورة وسكرتيرة وكل حاجة .. واحترت اشتغل ايه
فيهم .. وفي الاخر اهتديت للحل .. قررت اني اكون ممثلة علشان لما امثل هينفع اكون كل دول .. مرة دكتورة ومرة ظابطة ومرة سكرتيرة
وكل اللي في نفسي هههههههههه وبصراحة مش فاكرة ايه المعجزة اللي خليتني اطلع الفكرة دي من دماغي هههههههههه

اه صحيح نسيت أقولكم اني في فترة كنت قررت اكون " راقصة بالية " او " راقصة استعراضية " كنت بمووووووووت في الحركات الهبلة
بتاعة البالية و كنت بجيب طرحة طووووووويلة اطير بيها والف حوالين نفسي فتطير وتعجبني أوي هههههههههه
حتى بابا كان مسميني " اوبرا عايدة " بسبب الموضوع دا هههههههههه
(( كنت ناوية اجيب لأهلي العار شكلي كده ههههههههههه ))

وفي فترة من الفترات كنت بحب اووووووووي اعمل مذيعة .. كنت بجيب ايد الهون الخشب واعملها مايك هههههههههه وطبيعي انا المذيعة
والضيف والمخرج وكل حاجة في نفس الوقت .. طبعاً نحن نختلف عن الآخرين هههههههههههه

وفي فترة مستوايا المهني خد خط تاني خاااااااالص ..

كنت معجبة أوووووووووي ببياعة الطعمية والفول .. فضلت اروح اشتري منها سنييييين
واقف ساكتة اتفرج عليها وانسى اقولها انا عايزة ايه ..
بس قاعدة اتفرج عليها وهي بتعمل الطعمية وبتلف القرطاس
وبعد سنييييييييييين من الفرجة عليها .. ما اتعلمتش غير لف القرطاس هههههههههه

أما بقى السبب اللي خلاني استقر في بلاط صاحبة الجلالة فهو " فيلم بطل من ورق " بتاع قشوووووووووووع .. لما كانت
آثار الحكيم طالعة فيه صحفية وكانت بتتبهدل وتطلع عينها واتخطفت وكانت هتتقتل وكده
لقيت الشغلانة فيها كل حاجة بتمناها .. اثارة وبهدلة واختلاط بالناس وتجديد ومافيش روتين

فوقعت في غرامها الي يومنا هذا ..




الاثنين، مارس 16، 2009

postheadericon بعض التمرد يفيد أحياناً

كم من الثورات أحتاج يا الهي كي أنتزع حبه

من خلايايّ ؟؟!

الأحد، مارس 15، 2009

postheadericon فلة بأربع ورقات


زماااااااااااااان واحنا صغيرين كانوا بيقولوا لنا ان الفلة اللي ليها 4 ورقات بتجيب الحظ الحلو

وكانت عندنا شجرة فل في شارعنا ، كانت هوايتنا اننا ندور على فلة بأربع ورقات

ليل نهااااااااااار طول ما احنا فاضيين او لما نزهق من اللعب ننزل ندور ع الفلة أم اربع ورقات

و ندووووووووووووخ ندور عليها ونلاقى واحدة نفتكرها بأربع ورقات

ولما نقطفها نلاقيها بخمس ورقات نزعل أوي

ويوم ما كنت بيأس خاااااااااااااااالص امسك فلة من اللي بخمس ورقات واقطع ورقة منها في محاولة لأني اقنع نفسي بانها كده فلة بأربع ورقات

بس كنت برميها وانا مش مقتنعة ، لأني عارفة اللي فيها

دلوقتي بقى قعدت اتخيل .. لو حد تاني جه بعدي وشاف الفلة ام اربع ورقات ..

قعدت اتخيل فرحته بقى قد ايه بانه عمل المعجزة ونجح في انه يلاقى الفلة ام اربع ورقات

وتخيلت بقى انى لو قابلت الشخص دا وشوفتها في ايده وشوفت فرحته بيه كنت هغير قد ايه

" يا بخته لقى اللي طول عمري بدور عليه "

رغم ان انا اللي خليتها بأربع ورقات

ورغم انها مزيفة


ورغم انها كانت في ايدي وانا اللي رميتها !!

كتيييييييييير أوي في حياتنا بحس ان احنا بندور على فلة بأربع ورقات

بندوخ نفسنا علشان حاجة خيالية او وهمية

لأن تقريباً مافيش فلة بأربع ورقات

حتى لو موجودة مش هتجيب الحظ

ولو مش موجودة يعني مش هي اللي هتخلينا نبقى منحوسين

بس احنا كده بنتربس مخنا ع حاجة معينة ونقول بس لو ماجاتش بقى يبقى انا فاشل

لو ما عرفتش اوصل لها مش هبقى سعيد أبداً في حياتي

لو ...... و لو ......... ولو ......


اوعى تتربس دماغك على حاجة واحدة وتحصر فيها سعادتك وآمالك وطموحاتك

خاصة لو كانت الحاجة دي وهمية أو نادرة أوي

خلي سعادتك في حلم ممكن

أو حتى حلم صعب


بس بلاش تخلي سعادتك متعلقة بــ " وهم " لأنك ساعتها بجد .. هتضيع

وخلي بالك .. انت تقدر بإيدك تعمل سعادتك

تقدر تعمل فلتك ام اربع ورقات

فيااااااااااااريت بعد ما تعملها ما تحتقرش اللي انت عملته

لأ افرح بيه .. افتخر بيه

اقتنع واقنع بيه

ساعتها بجد هتكون مبسوط

و ساعتها الفرحة هتديك قوة تصبرك ع الوصول للي بتحلم بيه


بس بردو خلي بالك .. ما تضحكش على نفسك وتخدع نفسك بحاجة زيفتها

وتقف بعدها محلك سر وانت مقتنع انك وصلت لمنتهى احلامك


الخميس، مارس 12، 2009

postheadericon هي لو لونها بمبي ماكنتش هتحبها ؟؟

زمااااااااااااان من أيام ابتدائي وهم بيعلمونا في المدرسة

ان اول ماحد يقولك بتحب مصر ليه ؟

تقول علشان سماها صافية ونيلها طعمه حلو وارضها مليانة خير

والجو فيها ربيع طول السنة وعلشان فيها الأهرامات

والفراعنة مدفونين فيها

ودا طبعاً قمة التخلف .. ودا السبب في العدد الرهيب من الشباب اللي دلوقتي بيدعي انه ما بيحبش مصر

أيوة بيدعي لأنه بيحبها بس مش عارف لأنه فاكر انه لما يحبها هيحبها لأن سماها صافية وجوها حلو ونيلها طعمه حلو !!

طب لو فرضاً صحينا الصبح لقيت السما لونها بمبي وماية النيل كلها كخ ووحشة هتكرهها ؟؟

ولو كرهتها هو دا اصلاً يبقى حب ؟؟

لأ طبعاً اللي بيربط أي بني آدم بحب بلده حاجة أكبر من كده بجد

حاجة زي الحبل السري .. بس مش بينقطع

حاجة غصب عنك تخليك تحن للمكان اللي اتولدت فيه

مهما كان .. حتى لو ما كنتش شوفته

حاجة تخلي الحنين جواك يبكيك .. حنين للمكان اللي اتولدت فيه .. للهوا دا .. للسما دي .. مهما كانت بعيوبها ومميزاتها

وانا بقول الكلام دا - اقسم بالله - وانا مجربة

ياااااااااااااااااااريت بقى يبطلوا عبط ويبطلوا يبوظوا في دمغة العيال

ويطلعوا جيل محترم فاهم انه بيحب بلده حتى لو كانت عبارة عن خرابة

مش يحبها وهي حلوة ولو بقت وحشة يدور ع بلد حلوة وبنت ناس ويروح يحبها

الجيل اللي هيطلع متربي على فكرة ان بلده بلده لأنها بلده مش لأن نيلها فحلقي هو اللي هيقدر بجد يصلحها

لأنه بيحبها حب عذري مش حب مبني على المطامع والمصالح وبس

لاااااااااااااااااازم يغيروا المفهوم دا لأن بالاسلوب دا ماحدش هيحب مصر لأن في 100 ألف بلد دلوقتي السما بيصفوها

والتكييف بيظبط جوها ويقدروا ياخدوا ماية النيل - النضيفة - لحد عندهم

______________________

حاجة مالهاش علاقة بالبوست

زي أي عيلة رجعت في كلامي وما قدرتش ما انزلش بوستات لحد ما اظبط المدونة

بس ع الأقل رديت ع تعليقات آخر كام بوست

يعني مش عيلة أوي يعني D:







الثلاثاء، مارس 10، 2009

postheadericon مغلق للشخلعة :)


أنا جييييييييييييييييت

رجعت من السفر وغيرت جو الحمد لله

علشان كده قولت اغير جو المدونة كمان

وجبت لها هدوم جديدة

بشخلعها يعني بمعني اصح ههههههههههه

طبعاً المدونة مش مقفولة ولا حاجة بس بصراحة قولت اقول مغلق علشان تتخضوا وتدخلوا ههههههههههه

ان شاء الله مش هحط بوست جديد غير لما اظبط المدونة ع الآخر

ولما ارد ع التعليقات اللى ع البوستات اللى قبل كده اللى ماكنتش بلحق ارد عليها او اللى كنت بنسى او اكسل

او نفسويتي تبقى موش قد كده فما اردش فانا علشان كده كتبت البوست دا علشان ما ارجعش في كلامي

قولولي رأيكم في مدونتى بعد ما اتشخلعت

انا بجد الاستايل القديم صعبان عليا اوى بس انا وعدت المدونة اني هجيبلها لبس جديد لها لبس جديد

فطبعاً ما يرضيكمش اطلع عيلة قدامها

يلا مستنية رأيكم

صحيح بالمناسبة التعليقات من فوق مش من تحت زي الاستايل القديم :)

الجمعة، مارس 06، 2009

postheadericon اعمل ايه ؟


.. هرسم صورتك

وأهزر معاها :)

أعمل ايه ؟؟ ما انت بجد وحشتني

:(
















______________________

الصورة جبتها من هنا

ع فكرة أنا مسافرة
الثلاثاء، مارس 03، 2009

postheadericon آآآآه يا مرارتي


من كام يوم كنت قاعدة بتفرج ع 90 دقيقة

بالظبط بالظبط يوم ما جابوا التقرير بتاع مدرسة الفيوم اللي ما نجحش منها غير 4

(( شكلهم كده ابن الناظر وابن المدير وابن اخت الفراش والرابع نجحوه تمويه ما علييييييييينا ))

اكتر حاجة فقعتني في التقرير

1/ ناظر أو مدير المدرسة - هم ما حددوش هو مين فيهم - المهم الراجل
شكله وأسلوبه في الكلام يطفش بلد بحالها مش طلبة اعدادي بس .. أولاً بيتكلم بشخيط كده
وتبريقة وبأسلوب
" ما بين البايع والشاري يفتح الله "
بيقول " العيال ما بيجوش وبيروحوا مصانع الطوب .. العيل بيكسب عشرين جنيه في اليوم في المصنع هيروح المدرسة ليه ؟؟!! "

اسلوب مستفز بجد وحاسة انه هو اللي قايل للعيال كده أصلاً
تاني حاجة تحرق الدم لما جابوا طالب بيقول انه مش عارف ميعاد الامتحان اصلاً
هو أصلاً مش عارف انه عنده امتحانات .. طيب وأهله ما سألوهوش ازاي عن ميعاد امتحانه ؟؟
طيب سيبك من اهله .. هو مش حاسس انه المفروض يمتحن ؟؟

طب ما سمعش طشاش كده في التلافزيون ولا الراديون ان في امتحانات شغالة ؟؟

طب هو عارف هو في سنة كام ؟؟ بالمرة بقى

اللي يشلك بقى المذيعة تقوله طب وازاي هم ما وزعوش عليك الجدول في المدرسة ؟؟

محسساني انها ما دخلتش مدارس في مصر .. انا بقالي 13 سنة باين بتعلم عمرهم ما وزعوا علينا جدول

يمكن انا مدرستي كانت معفنة .. أي كابتن ولا كابتنة معديين هنا والنبي يبقوا يقولولي هم كان في مدارسهم بيوزعوا عليهم جداول ؟؟

ع فكرة هو مش يمكن هو اكيد :d


سيبك من اللي عدا خلينا في النقطة اللي جاية دي .. المدرس لما جابوه

المدرس بيقول .. انه بيجي ومافيش طلبة (( كان لابس جلابية وكوفية )) المهم بيقول انا باااااااااااجي والله لو في تلميذين اتنين بس هشرحلهم
فاكرة انا نفس الحلفان دا لما كنت ف المدرسة وكنا بنصدق ونروح ونبقى 8 ويهزأنا ويقولنا ايه اللى جابكوا وما يعبرناش

دا غير بقى اللقطات اللى جابوها للعيال .. مافيش وااااااااااااحد لابس زي المدرسة

وشكلهم اطفال شوارع اصلاً

وطبعاً كل شيء انكشفن وبان لما القناة راحت تصور تاني يوم وضربوا المصورين وبهدلوهم


سيبكوا من دا

هحكي لكم حاجة ع هامش المؤتمر الدولي الثاني لتطوير التعليم

ركزواااااااااااااا في الاسم

المفروض اننا (( انا ومجموعة من زمايلى في قسم الاعدام )) بننظم المؤتمر دا

تحت اشراف دكتور من كلية طب الأسنان

المهم أولاً : الدكتور مش بيحترم مواعيده نهااااااااائي الميعاد يبقى 12 يجي لنا واحدة او اتنين

ثانياً : بيعاملنا وحش جداً وبيستخف بينا جداً فلما دعبسنا وسألنا عرفنا انه بيعاملنا كده علشان كلية آداب

وفي نظره ان الكليات النظرية دي كلها مالهاش لازمة

وان اللي في كلية الاداب كلهم ( سوري يعني ) بقر

وان احنا مش فارقة اصلاً عندنا حضور من غياب علشان كده يجيبنا كل يوم اجتماع من اول النهار لآخره وما يقولش لينا اي حاجة

خلوا بالكم ان دي أفكار حد مسئول عن مؤتمر (دولي ) لـ ( تطوير التعليم ) المهـــم


تالت حاجة : دور المجموعة اللي أنا فيها ايه ؟؟

تنظيم الاتصال بين الصحفيين والمؤتمر

بنقول له يا دكتور طب في صور للي هيجوا ولا هنعرفهم ازاي

فاتكلم بقرف كده وقال هتلاقوهم قدام باب الاوضة بتاعة المؤتمر الصحفي زي الــ ............ ( وشه كان بيقول الكلاب ) بس لما برقناله

لأن كلنا قسم صحافة قال زي النمل !!!


دورنا ايه بقى ؟؟

دورنا آل ايه ما نخليش الصحفيين يكتبوا غير اللى هو عايزه يتكتب ولحد دلوقتي مش عارفة هنعملها ازاي دي اصلاً ؟؟


و ع فكرة نحن نعيش ازهى عصور الحرية احم احم

المهم بقى ع هامش المؤتمر بردو

هم عندهم خبر بميعاد المؤتمر من اكتر من شهر

والنهاردة بس دهنوا الارصفة بتاعة المجمع والنهاردة بس دهنوا حيطان قاعة المؤتمرات من جديد والنهاردة بس

بدأو يحضروا في الملصقات

وبكرة الصبح لسة هيدونوا الأي ديهات


آخر حاجة بقى فاقعة مرارتي .. بعد ما حولت من تسعين دقيقة يوميها شوفت حتة من يوميات ستار اكاديمي 6

ويااااااااااااااريتني ما شوفت

هو سؤال واحد هسأله

هي كان ناقصة مسخرة علشان يضيفوا لهم حصة سباحة ؟؟؟؟؟؟؟!!

يا خوفي لحسن يضيفوا لهم حصة تانية كده ع السنة الجاية


:-S

بالنسبة لتعليقات البوست اللى فات والله انا اسفة انا لازمن ولابد وحتما اقوم علشان احضر شوية حاجات علشان بكرة

ان شاء الله قريب ارد

بالمناسبة لو حد هيعلق ياريت ماحدش يدخل يقول لي سلامة مرارتك ويطلع علشان ما يفقعهاش اكتر ماهي مفقوعة :D



المتابعون

اعتبرها بيتك ♥

وِش القفص

خليك ورايا

دليفري..