2009-05-30

مش على بعضي

" مش على بعضي "



دا الوصف الدقيق لحالتي

ماعرفش مالي بجد

حاسة اني فرحانة وزعلانة في نفس اللحظة

حاسة اني مش مستطعمة الدنيا

بكل حاجة فيها

لا كلمة حلوة ولا لحظة حلوة ولا اكل بحبه

باكل وبشرب لأن الناس بيعملوا كده

واحيانا لأني بحس اني هقع من طولي فبكتشف اني لازم اكل

مخنوقة اوي مش عارفة من ايه

هو في الحقيقة انا تقريباً عارفة بس مش عارفة اشمعنى دلوقتي مخنوقة اوي كده

بقفل موبايلي لأني مش عايزة حد يكلمني وارجع في نفس اللحظة افتحه وابص له وانا متضايقة لأن " ماحدش " اتصل .. ولما يتصل اي حد ما ببقاش عايزة ارد .. رغم اني وحشني اتكلم مع أي حد

اشغل اغنية بحبها وفجأة اتخنق منها ومش قادرة اكملها واجيب غيرها ويادوب دقيقة واتخنق منها

حاسة اني مستعجلة اوي ماعرفش على ايه وفي نفس الوقت مكسلة حتى افتح عيني واصحى من النوم

اكتشفت مؤخراً اني بنام مش لأني محتاجة انام لأ انا بنام لأني محتاجة " ما اكونش صاحية " ولما بنام بقيت اخرف كتير اوي في الاحلام

حاسة اني محبوسة وعايزة اهرب من ايه مش عارفة !! والله اول امبارح كنت عاملة زي النمر المحبوس عمالة امشي في اوضتي واقف وامشي لحد ما دوخت فقعدت فما طقتش فوقفت تاني

كل ما امسك الكتاب اتخنق اوي واحس اني عايزة اعيط رغم اني انا اللي اخترت الكلية دي وبحبها

وحشتني حاجات كتير اوي وناس كتير اوي واول حد وحشني هو " أنا "

خسرت ناس وحاجات كتير وكسبت بردو حاجات وناس اكتر بس حاسة اني زمان من غير الحاجات اللي كسبتها والناس اللي كسبتها كنت احسن

كنت بريئة شوية اكتر وكنت صافية وطفلة اكتر

يمكن انا كده كده كنت هبقى كده علشان كبرت شوية عن زمان

بس مش عارفة

لما بضحك او حد بيقولي خبر حلو اليومين دول بضحك ضحكة مقطومة وبفرح فرحة مقطومة كأني فجأة بفتكر ان في حمل تقييييييييييييييل اوي عليا

المفروض ان مافيش حالياً حمل بس بكرة في حمل ومش عارفة ليه شايلاة من النهاردة

مش عارفة مالي

...............



انا بجد خايفة

2009-05-28

أبيض وأسود

أحزنها بشدة انهم لم يخترعوا التصوير الملون إلا بعد أن فقد شعرها لونه الذهبي الخلاب

ورحل الورد عن خديها للأبد

وأصبحت هي نفسها .. أبيض وأسود
 
- من مذكرات ممثلة منتحرة -

2009-05-27

الناس بتدور على ايه ؟؟



في آداة كده اسمها


webmaster tools

منها بجيب الناس بتدور على ايه على جوجل




فجوجل يحدفهم على مدونتي وبقى عندي هوااااااااااية اني اتابع الحكاية دي




ولاحظت اني بقابل حاجات تفطس من الضحك




مثلاً واحد كاتب كده

" الاقي فين بنت لذيذة اتعرف عليها "




وحاجات من هذا القبيل اللي بتحسسني انه بيكلم حد بيفهم فبيسأله ويدردش معاه




مش حاجة الكترونية بتدور على اللي هو بيكتبه بنظام معين لأ هو بيسأل ومستني




يلاقي اجابة وبستغرب اساسا ان جوجل بيحدفهم عندي دول ناس في ناس تانية بتدور




على حاجات غريبة اوي وناس بتدور على حاجات مش محترمة وبردو بستغرب جداً ان جوجل بيحدفهم




عندي صورت لكم اغرب الحاجات اللي لقيت الناس مدورين عليها




اتفرجوا كده








اضغط ع الصورة هتكبر لو مكسل هقولك




الأخت بتدور على " عاوزة اعرف افرق بين زوجين " !!! تخيلوا ؟!














هههههههههههههههههههههههههههههههه دي بقى فطستني م الضحك في حد أفشل مني بااااااااناس






ودي بقى مصيبة هههههههههههههههههههه واضح انها هتقتل جوزها قريب فعايزة تعرف تمثل تزعل عليه










دا بجد صعب عليا الله يكون في عونه




ولسة ولسة في كتيييييييييييييير بس انا زهقت من رفع الصور بصراحة D:


2009-05-24

عزيزة وتلاكيك يونس

انا مش مصدقة .. فعلاً مش مصدقة

بقى كده يا منير تعرف تضحك عليا انا كمااااااااان ؟؟

يرضيكوا كده يا جماعة ؟! بقى انا اللي بسمع منير من صغري ينضحك عليا

واصدق اغنية يونس و مسكنته

بس ظهر الحق وزهق الباطل ولما فكرت شوية عرفت انها تلاكيك ويونس مش غلبان ولا نيلة بالعكس

دا هو بيرفض عزيزة بالزوق .. طب اقنعكوا

أول ما قالتله انها بتحبه قال لها

"جى من البلاد البعيدة
لا زاد ولا ميه
وغربتى صحبتى بتحوم حواليا
وانتى تقوليلى بحبك
يعني م الاخر بيقولها اتنيلي دا وقت حب ؟؟
وبعدين قال يقنعها لحسن كيدهن عظيم
فقال لها انا غلبااااااااااااااااااان وجاي من سفر وما حيلتيش اللضى هتجوزك ازاي ؟؟
فقالت له اكيد مايهمنيش .. خدوهم فقرا يغنيكم الله
 راح قال لها

" تحبى ايه فيا وده حب ايه
ده اللى من غير اى حرية "


دا انا حتى مش حر نفسي .. تحبيني ازاي ومافيش حرية

وقعد يندب بقى ويقول

" يونس فى بلاد الشوق
اه ياولد الهلالى
بتونسنى دموع العين وانا سايب اهالى
اه ياولد الهلالى لعليا ولابيا "

وعاش للبنية ياعيني في دور المظلوم المسكين اللي سايب اهله وقلبه متشحتف عليهم

وبعدين حب يجر ناعم علشان وركين الخروف اللي بتسرب هم له

" ياعزيزة يابنت السلطان لو يتغير الزمان
وقابلتينى فى اى مكان كنت اعشق من غير ماتقولى
يووونس انا يونس "



وهو عارف كويس ان الزمان مش هيتغير ولا المكان وتلاقيه كمان بيقول في نفسه الحمد لله يارب ما يتغير


وبعدين رجع بقى يقولها الكلمتين بتوع اي شاب

انتي الف مين يتمناكي وانا لو ليا جواز مش هتجوز غيرك
لكن انا حالي مايل ومش عايز اميل بختك معايا

" كنت هقول اهو ده المحبوب
ويدوب قلبى قبل ما ادوب
اه ياولد الهلالى لعليا ولابيا
انا يونس ونسيت مين يونس
والدنيا مالت عليا "

وبردو مافيش فايدة البت ماسكة فيه بايديها وسنانها

ماهو ماحدش لاقي دلوقتي ياحسرة

راح قال يعمل ايه ف اللزقة الامريكاني دي فقال لها

" قلبى ضايع مين يلاقيه لى
باينى نسيته حدا اهلى
ينفع احبك من غير قلبى
ماتردوا عليها وعليا
اه ياولد الهلالى لعليا ولابيا "


وأخيراً .. يبدو انه ضحك ع عزيزة زي ما ضحك عليا وكنت مصدقاه

فغنى تحت الياسمينة بقى بس دي فيها كلام تاني

2009-05-18

يارب

ياااااااااااااااارب .. يارب انا مؤمنة بيك يارب
وثقتي في كرمك مالهاش حد .. يارب من قلبي بدعيك ساعدنا
يارب سامحني على ضعفي واني بعصيك كتير بس والله يارب بحبك
يارب استجيب لدعوتي وساعدنا
يارب محتاجاك اوووووي يارب

2009-05-10

ياما ناس ماكانوش .. وبقوا !!

ياما نااااااس ماكانوش .. وبقوا ..



ياما ناس ماكنوش حاجة .. وبقوا كل حاجة بـــ السرقة ..


وياما ناس كانوا نكرة .. وبقوا أعلام بــ النفاق ..



وياما ناس ماكانوش .. وبقوا بــ عملية تجميل ..




وناس ماكنوش مجر
مين .. وبقوا بــ الفقر والغلب ..



وناس ماكنوش خايفين .. وبقوا بــ الذل والمهانة والظلم ..

بس بردو ...


في ناس ماكنوش ... وبقوا بــ التعب والشغل

وناس ماكانوش ... وبقوا بــ الإرادة

وناس ماكانوش .... وبقوا بــ الثقة في ربنا

وناس ما كانوش .... وبقوا بــ الثورة


*********

ياترى انت .. " كنت ولا هتكون ؟؟ "

ولا " لا كنت ولا ناوي تكون ؟؟ "

والسؤال الأهم ..


عارف هتكون ازاي ؟؟

2009-05-06

هو احنا ليه بالغباء دا ؟؟

من شوية كنت بتفرج على تسعين دقيقة وشوف الخبر بتاعة الخنازير اللي مرمية في الشارع

الحكاية ومافيها ان في منطقة أبو رواش في محافظة 6 أكتوبر الناس شافو عربية نقل شايلة خنازير عايشة على ميتة

وقعدت ترميها في الشارع بطول الطريق

والناس بيقولوا ان الخنازير عيانة ...

بجد بجد حسيت اننا شعب غبي .. أكيد أكيد الخنازير دي اصحابها كانوا مخبينها زي ماكانوا بيخبوا الفراخ

أيام أنفلوانزا الطيور .. ولما وقع المحظور احتاسوا بيها

قاموا يخلصوا منها ازاي ؟؟

يبلوا بيها الناس

قمة العشوائية والفوضى والتخلف والله العظيم

وأساسي الشرطة لما جات ما بقتش عارفة تتعامل ازاي مع الخنازير دي

خايفين يتعدوا طبعاً ومعاهم حق ما هو اصل العيب مش عليهم

العيب على اللي لما عرفوا ان في حاجة زي دي محتملة كانوا المفروض يقولوا لهم يتصرفوا ازاي

والخنازير لحد وقت اذاعة البرنامج مرمية في الشارع رغم ان الكلام دا حاصل من الفجر !!

تخيلوا كام بني آدم زمانه اتعدى ولسة هيتعدي لو فعلاً الخنازير دي مصابة !!

وتخيلوا الأذى النفسي أساساً منظر الخنازير وهي مرمية في الشارع والدم نازل منها بجد منظر مقزز


حسبي الله ونعم الوكيل فعلاً في الكائن اللي عمل كده لأنه ما يستحقش يتقال عليه انسان

______________

حاجة تانية بخصوص المصيبة دي .. بما انها خلاص قريب جداً شكلهم هيعلنوا عن اصابة بشرية بالفيرس في مصر

الميكروباصات اللي بتتملي خمسة وعشرين راكب
(*) دي

دي مصيبة بجد تخيلوا معايا كده انا مثلاً واحدة بتركب 3 مواصلات وانا رايحة الكلية

تخيلوا مثلاً ركبت ميكروباص من السنطة لطنطا واتعديت انا وكل اللي راكبين

وراح كل واحد فينا في حتة .. مالناش دعوة بالباقيين خلينا فيا كمثال

انا نزلت ركبت من الجلاء للاستاد وعديت خمسة وعشرين تانين دا غير السواق

ونزلت ركبت هندسة وعديت خمسة وعشرين تاني

بردو غير السواق

والسواق بتاع الاستاد عدى خمسة وعشرين جداد في الناس اللي ركبوا بعدنا

وهكذا دواااليك

بسم الله ماشاء الله يعني مصر كلها هتفطس في خلال اربعة وعشرين ساعة

وبجد مش عارفة ايه الحل ؟!!!!!!!


____________________

( * ) مش خمسة وعشرين بالظبط لكن انا بدي مثال يعني على تكدس المواصلات لأنهم بيركبونا خمسات وستة احيانا ً

2009-05-04

أسطورتنا

(1 ) أسطورتنا أننا غرباء

غرباء في المدينة لأننا لم نستقر بها ، وغرباء في الريف لأننا لسنا من أهله ،

وغرباء في البلدة لأننا لا من شرقها ولا من غربها

نحن دائماً بين .. بين

وكنت دائماً أكثرهم غربة .. غريبة لأني أرفض البقاء هنا .. ولا يمكنني أن أكون هناك !!

( 2 ) أسطورتنا .. العزلة

" سارة إني أخاف بيتكم .. إنه كبير جداً وأكثره مًظلِم .. وساكن كالقبور .. كأنكم دائماً في حداد على شخصٍ ما !! "


" سارة لماذا لا يزوركم أحد ؟!! "

" سارة لماذا لا تزوريني في بيتي ؟!! "

" سارة هذه آخر مرة أزورك فيها لأنك لا تزوريني أبداً "


( 3 ) اسطورتنا .. أننا نحن

في المدرسة كان المدرس دائماً يعرف كل شيء عن زميلاتي من اسمهم الأخير ..

أما أنا فيعرف من اسمي الأخير فقط .. أني غريبة

" انتي مش من هنا .. صح ؟! "

ولكن مع مرور الوقت يعرفني لأني أنا .. بإسمي الأول أو الاوسط او الأخير .. لا يهم .. لكنه يعرفني

في طفولتي كان هذا يحزنني بشدة لكنه الآن علمني معنى أن أكون " أنا "


****

أسطورتك هي اسطورتك لأنها ليست كما تتمنى
لأنك تتمنى ما رأيته وأعجبك
بينما أسطورتك .. أسطورة لأنها لم تحدث من قبل

*******

أسطورتك هي أسطورتك لأن أحداً لم يحياها من قبل

2009-05-02

شركات المحمول .. الراعي الرسمي للعشاق !!



بالنسبة لي كلمة " عرض " في اعلان لشركة محمول تعني أملاً جديداً في تغيير صورتي المؤسفة لدى اصدقائي
بعد أن اطلقوا علي " سارة كلمني وشكراً " ، ويا حبذا لو لم يعلم أحد بالعرض
ستتغير الصورة 180 درجة وبسرعة البرق
لذلك أنتعش وأتأهب و أسرع لمعرفة العرض الجديد
لكن الفترة الأخيرة شهدت مآساة حقيقية من عروض شركات المحمول
كل الشركات تقدم عروضاً لا تصلح الا لإثنين من الحبيبة
من بعد الثانية عشرة بعد منتصف الليل ، حيث الكل نيام والأمن مستتب !
حتى أني لاحظت مؤخراً انه كلما ارتبط إثنان من معارفي اجد فوراً أحد الطرفين غير رقم هاتفه ليصبح مع حبيبه في نفس الشركة ، كذلك اصبح البعض يلجأ لتغيير رقم هاتفه كوسيلة من وسائل اعلان حبه أو محاولة توصيل مشاعره للطرف الآخر .. لأنه بالطبع أصعب حب هو هذا الحب الذي يحب شخص موبينيل شخص فودافون لأن هذا يكلفهم 40 قرش للدقيقة الواحدة !!

ونظراً لكرمي المعهود والمشهود والمفروغ منه فكرت في حلين لا ثالث لهما لهذه المآساة ..
إما أن يطالب أمثالي ممن لا يتلقون هدايا في عيد الحب وبالطبع لا يستقبلون مكالمات غرامية بعد منتصف الليل - ولا قبله أصلاً - بحملة قومية تراعي فيها شركات المحمول مشاعر أمثالنا من العزاب العزال أحياناً .. وإما تقوم بإلغاء هذا العرض العنصري .. أو تجعله من بعد الثانية عشرة ظهراً وحتى الثانية عشرة ليلاً

وإما أن يطالب أمثالي أيضاُ في حملة قومية شعبية وطنية أصيلة .. بأن يرزقنا الله بمن نفني عليهم رصيدنا و أتخطب بقى !