2009-06-15

لما هو مش عايزها حاول ياخدها ليه ؟؟

لما هو مش عايزها حاول ياخدها ليه ؟؟
 
سؤال دايماً بيحيرني بخصوص الولاد اللي بتلعب بالبنات
لما هو مش عايز البنت دي فعلاً ليه بيحاول يمتلكها ؟؟
ليه بينقي دايماً البنت الرقيقة والحساسة واللي عندها أخلاق ويصمم انه يكسر قلبها ؟؟
معقول بجد لما بيشوف منها الحب والحنان والاخلاص قلبه مش بيرق ؟؟
معقول ما بيحلمش معاها بالبيت الجميل اللي ماليه الحب ؟؟
بيقولوا من القلب للقلب رسول ودا مش صح
لو فعلاً كده كان رسول قلبه قال لها انه كذاب .. الرسل ما بتكدبش
او كان رسول قلبها وصل له قد ايه هي اتعلقت بيه
بجد زعلانة عشانها وعايزة اقولها
" بونبونايتي الحلوة .. اللي يقدر يضيعك رغم انه عرف قد ايه انتي روعة يبقى ما يستحقكيش
شوفتك قوية ومش مكسورة رغم اللي حصل ، بس خايفة تكون جراحك نزيفها داخلي
عيطي بس مش كتير
خلي الدموع تطهير جروح
وافتحي صفحة جديدة .. بحبك اوي وفي مليوووووووووووون حد بيحبك زيي
ومتأكدة انه في يوم من الأيام هيندم على ضياعك
بعد ما يعرف طعم " العلقم " اللي أكييييد هيبقى طعم قاسي أوي خاصة بعد حلاوة البونبوني "
 
_______ ملحوظة ________________________________________________
 
مش معنى انك ما تفهمش قصدي من البوست ان ليك الحق تتريأ عليه
لو سمحت لو مافيش كلمة مفيدة اقرأ وارحل

2009-06-10

المدونة على الراديون يا ولاااااااااااااااااااد

إن شاء الله يوم السبت 13/6/2009
حلقة برنامج  " أنت تسأل والكمبيوتر يجيب " عن مدونتي
اسمعوا البرنامج
على إذاعة البرنامج العام
 104.7 fm
الساعة 9.10 صباحاً
أو ممكن تسمعوها من الموقع دا
والمتوسطة 819 كيلوهرتز
أو من على النايل سات في الراديو البرنامج رقم واحد
او من الموقع دا
تحت الساعة

2009-06-07

أستاذ نجيب

استاذ نجيب كان استاذي من أول ما بدأت ادرس " حساب " و " رسم " وكنت بحبه جداً
علشان كان طيب وملامح وشه حنونة اوي مش زي المدرسة اللي كانت بتديني عربي ودين
يمكن حبي لأستاذ نجيب السبب في اني طول عمري شاطرة في الرياضة والرسم
كان بيحبني أوي وكنا كلنا في الفصل بنحبه
كان بيت مامته في الطريق للمدرسة وكان دايماً بيفوت عليها بعد ما يروح من المدرسة
واحنا نمشي مخصوص من الطريق دا رغم انه بعيد علشان نشوفه مع مامته
كنت بحس احساس غريب لما بشوفه معاها
نفس احساسي لما ماما تيجي لي المدرسة ، لأن انا في دماغي المدرسة عالم والبيت عالم تاني فلما حد من العالمين يدخل في العالم التاني
بحس باستغراب كده
المهم بقى  .. استاذ نجيب كان أول حد اشوفه فخور بيا .. كان بيمسك كراسة الرسم بتاعتي ويبص لها باعجاب كده ويفرج الفصل كله
عليها
لما خلصت ابتدائي وانتقلت لمدرسة تانية كنت مفتقداه جداً
خاصة وان ربنا ابتلاني بمدرسين رياضيات يسدوا النفس :(
ولا مدرسة الرسم .. كانت مصيبة لوحدها .. المرة الوحيدة اللي ابتسمت لي فيها كانت عايزة تسألني عن البرفان اللي بستعمله علشان عاجبها
ولما قولت لها انه مش برفان وانه مزيل عرق وبتاع اخويا كمان كشرت تاني
... في تالتة إعدادي كانت اروع مفجأة في حياتي اني لقيته بيراقب عليا .. اتصدمت انه عجز اوي كده
أي نعم هو من الأول اصلع بس مش كده ، زعلت أوي علشانه بس حسيت أمان
لأنه حد يعرفني وأعرفه ، ودايماً لجان الاعدادية بتكون مراقبين مش من المدرسة فكنت بحس بغربة
وكان فرحان بيا أوي علشان مش بغش ولا بغشش - ايام ما كان عندي مبادئ :(( - وكان بيدعي لي بصوت عالي فاتطمن أوي
من يوم ما خلصت اعدادي لحد ما دخلت الكلية عمري ما مشيت في طريق مدرسة الابتدائي ويوم ما مشيت فيه بالصدفة اتصدمت
مامة استاذ نجيب ماتت والبيت اتهد
حسيت كأن الشارع فاااااااااااااااااضي أوي ووحش من غير البيت دا
وحسيت كأن ليا أهل هنا ومشيوا فجأة
السنة دي عرفت ان استاذ نجيب مات !!
الصدمة خليتني مش قادرة اعيط  .. بس مش قادرة انسى صورته وهو واقف جنبي وانا برسم
ولا صورته وهو قاعد مع مامته .. ولا لما كان بيديلي في اللجنة بتاعة الاعدادية
ربنا يرحمه :(

2009-06-06

يا أحلامي .. هو انتي ليه بعيده كده ؟!



هو انتي ليه بعيده كده ومستحيله بالشكل ده
فرحه حياتي ومرها ايامي بيكي عشتها
انتي الحقيقه في دنيا زيف وانتي اللي دبت في حبها
بقدر علي الناس كلها وببقي قدامك ضعيف وبتعندي وانا ادوووب ندا

قلبي علي كفي افتحيه هتلاقي صورتك ساكنه فيه
حتي وانا في قلبي المرار
مبشوفش غيرك ليل نهار
ياورده مغسوله بندي

صافيه ورقيقه وطيبة وبعيدة وانتي قريبة
يامحيرة كل القلوب بكتب غرامك ع الدروب
وارسم ملامحك ع المدي

هو انتي ليه بعيده كده

بصحي علي صورتك وانام والاقكي ينساني الكلام
ارسم امل يبقي سراب واحلم بفرح الاقاه عذاب

عاشق انا وقلبي عنيد ومصيري هوصل لك اكيد والاقكي ياقمري البرئ
لو حتي راح يخلص طريق والقي طريق غيره ابتدا
والقي طريق غيره ابتدا
والقي طريق غيره ابتدا

____________________ أغنية فيلم هي فوضى ________



2009-06-03

ع فكرة

على فكرة
لما نقول " الشجرة المثمرة دايماً الناس تحدفها بالطوب " كمثال على مهاجمة الناس للانسان الناجح
قمة السذاجة .. مافيش أي وجه شبه
الناس بتحدف الشجرة المثمرة بالطوب علشان تاخد ثمرها مش أكتر
لكن لما بيحدفوا البني آدم بالباطل وبالدبش
بيكونوا عايزين يوقعوه
حتى لو ما اخدوش ثمرة .. مش مهم
الناس لما بتحدف الشجرة ما بتبقاش حاقدة عليها
ببساطة لأنهم مش شجرة