2009-07-24

2009-07-20

تخاريف آخر الليل





هو عدم الاهتمام بالسياسة تفاهة ؟؟ مش عارفة .. ساعات بحس نفسي اني انسانة دماغها فاضية

لأني مش مهتمة قد كده بالسياسة ..

بس أنا حاسة ان الاهتمام بالناس مهم بردو ..

إزاي بنعيش ؟؟ وايه الغلط في اللي بنعمله كل يوم ؟؟

ايه الغلط جوانا احنا .. في حياتنا

حاسة اننا المفروض نصلح نفسنا وبعدين نطلب من غيرنا انه يصلح

أو على الأقل الاصلاح في الناحيتين يبقى متوازي وماشي في وقت واحد

يمكن انا صح .. أو غلط .. مش عارفة









اكتشفت مؤخراً ان الناس بتقيس غلاوتها عندك بالفلوس اللي بتتكلفها علشانهم
مش مؤخراً اوي الكلام دا حصل ، بس ما كنتش فاهماه
امبارح قررت افهمه .. اللي حصل ان من سنة كنت ببعت لاصحابي رسايل ع الموبايل
كانوا فرحانين اوي ومظأططين .. لكن اول ما اكتشفوا اني ببعتها من موقع رسايل مجانية فرحتهم ضاعت !!
كنت بحسب ان الفكرة في الرسالة اني فاكراهم واني عايزة اقول لهم حاجة حلوة
بس اتضح ان الفكرة في الرسالة هي انك كلفت نفسك 30 قرش !!!




قررت أزرع ريحان .. رغم إني عمري ما كنت بحب الزراعة بس حسيت اني محتاجة ازرع
فجأة كده حسيتها حاجة ممتعة أوي انك يكون عندك حاجة تهتم بيها
تشربها ماية وتاخد بالك عليها وتطلعها البلكونة تتشمس
حاجة تكبر قدامك .. ويتحول سواد البذور للون أخضر
على أمل اني لما ازرع حاجة الاكتئاب يبعد عني شوية
وعلى أمل اني اتعلم اصبر .. بس شكلي مستحيل اتعلم الصبر
كل خمس دقايق بروح ابص على قصرية الزرع ، وانا اساساً لسة يادوبك حاطاها امبارح في الماية والتراب وكده




وحشتني اوووووووووووي منة وشهد بقالي كتير ما شفتهمش ونفسي اتطمن عليهم
وحشوووووووووني كلهم هناك ونفسي أروح العب معاهم أوووووووووي



اليومين دول حاسة اووووووووي اني مفتقدة قططي
وحشووووووووووووووني بجد وهم كمان وحشني اني العب معاهم
واحكي لهم واشتكي لهم



اليومين دول بردو بحلم احلام مرعبة وغريبة ... مش رعب دموي لأ رعب معنوي
لما بصحى من النوم واترجم معناها في دماغي ... قلقانة اوي .. ربنا يستر



رصيدي دلوقتي 23 قرش .. بغض النظر عن العشرين دول ..
امووووووووت واعرف الــ 3 قروش دول جم ازااااااااااي ؟؟؟


زي كل سنة الاجازة ضاعت وانا مرزوعة في البيت ..
وضاعت فرصتي في التدريب للسنة التالتة .. حاسة بشوية ضياع .. يلا خييييييييييييير

2009-07-19

أخـــوهــــا


أخوها من صغره وهو بيتحملها .. راجل بجد وشايلها جوة عنيه
أخوها لما كانوا يتخانقوا زي أي اخوات كان بيتحمل كلام كتييييييييييير أوي منها
هي نفسها مش عارفة قالته إزاي ..
وكان ينام وهو زعلان منها و لما يصحى من النوم ينسى انه كان مخاصمها وتلاقيه جاي يكلمها ويهزر معاها تاني
أخوها طول عمره حنين عليها ، لما كانوا يضربوا بعض وهم صغيرين كان يعيط علشانها مش عشانه
أخوها كان دايماً ضهرها وسندها .. في المدرسة ، في الشارع ، في البيت .. في الدنيا بحالها
أخوها كان دايماً فخور بيها ، ما كانش بيقولها كده بس هي عرفت بعدين
كان نفسه اوي تجيب مجموع حلو أوووووووي في الثانوية علشان يعمل لها فرررررررح وزيطة وزمبليطة
وكان نفسه أوي تدخل أحسن كلية في مصر علشان عارف 
" إن دماغها حلوة "
أخوها كان دايماً يستفزها علشان تذاكر أكتر وتبقى احسن واحسن
ودلوقتي بيشجعها تكون احسن وتكون زي ما هي عايزة
بيخاف عليها اكتر ما بتخاف هي على نفسها
ودايماً نفسه يشوفها احسن واحدة في الدنيا
دايماً يخليها واثقة في نفسها لأقصى حد
أخوها .... طول عمره بجد .. أخــــــــوهـــــا






محمد انا بجد بحبك اووووووووووي ، يمكن عمري ما قولتلك كده قدامك

وعمري ما حسستك قد ايه انا فخورة بيك وقد ايه بتوحشني والبيت وحش من غيرك

حاجات كتيرة حلوة عملتها لي من ورايا

ولسة بتعمل .. وعايز تعمل ..

دايماً شايل هم الدنيا من فوق كتافي ودايماً مقوي قلبي ومخليني ادوس في الدنيا

أول مرة من زمااااااااان اوي لما دخلت مدونتي وعجبتك كان دا حافز ليا اني اشتغل فيها

ولما عملت كومنت زأطاطت وفررررررررررحت اووي

ولما بتعمل كومنت وتكتب أخوها ببقى لامسة السما

محمد بحبك اوووووووووووي ربنا يحميك ياااااااااااااااارب

ونفسي افرحك اووووووووي ومش عارفة ازاي

ونفسي اشرفك اوووووووي ... وان شاء الله هعملها

2009-07-14

ايه اللي حصل في الجلسة الأدبية ؟؟

ليلة الاثنين ما كنتش عارفة انام ، وطول النهار مش على بعضي

لأني من النوع الخجول بالذات قدام الناس اللي ما عرفهاش

بس لما روحت جراند كافيه ، حسيت ان القعدة كده ( فريندلي ) اوي وجميلة

مش منصة بقى وحوارات وحسيت ان كل الموجودين طيبين كده وماحدش ناوي على شر ههههههههه

كان كتيييييييير من الناس اللي بحبهم معايا فكنت متطمنة اوي

وبدأت الجلسة باكتر حاجة انا فاشلة فيها

( عرفي نفسك يا سارة )

احم .. زماااااااااااان كنت اول ما حد يطلب مني اعرف نفسي

كنت بقول اسمي السباعي ههههههههههههه لكن دلوقتي ما ينفعش

فبقابل مشكلة اني اعرف نفسي ، اولاً لأني المفروض اقول اني صحفية وانا لحد دلوقتي بتكسف اقول كده

لأني بعتبر نفسي لسة كتير على ما ينفع اعرف نفسي كصحفية

ونفس الوضع كمذيعة

وكمدونة ما اعتقدش ان حد بيتكتب له في البطاقة المهنة مدون

م الآخر انا مش بعرف اعرف نفسي ، فطارق عميرة ربنا يكرمه قام بالمهمة دي

بعد كده كان المفروض اقرأ قصة من قصصي ، فطبعاً علشان صوتي مستحيييييييييييييل يسمعه حد خاصة كمان وانا بقرأ قصة

وكمان لأني بتكسف اقرا كتاباتي قدام حد فتفضل أحمد عبد ربه بالمهمة دي

بعدين كملها المدون الجميل محمد ( بجد محمد قرأها باحساس عاااااااااااااااالي جداً ، لو انا هقراها مش هقراها كده )

وقراها تاني المدون اللي بلدياتي أسامة ناصف

و اتناقشنا في القصة كتيييييييير جداً

وبعدين بدأ طارق يطرح اسئلة عن التدوين ومدوناتي وايه اللي اضافه التدوين ليا كانسانة وكصحفية

وبدأ الحضور بسألوا اسئلة مختلفة

و بعدين ناقشنا القصة التانية بتاعتي

وقبل ما نخلص خالص نورنا حد بجد كان مفجأة .. العميد .. الميت .. محمد عادل ، هو أكيد مش جاي عشاني لأنه ما يعرفنيش بس كانت فرصة سعيدة جداً انه نورنا

وفي الآخر كل واحد قال رأيه في الجلسة وفي الحضور وفيا ... قالوا كلام حلو بجد اتمنى يكون دا رأيهم فيا فعلاً :)

طارق عميرة بيقول ان الصالون نجح بتفوق

واحمد منتصر بيقول انه نجح نجاح ساحق

وانا بقول الحمد لله :)

مستنية لسة ردود الأفعال و ان شاء الله اول ما يوصلني اسامي الحضور كاملة هشكرهم نفر نفر

اللي اعرف اساميهم من الحضور

هم : ( البنات اولاً )

د / بسنت << استاذتي اللي بحبها جداً ، الانسانة اللي بجد بتديني دفعة كبيرة جداً اني اكمل

واستمر .. و هي استاذ مساعد في كلية الآداب

روضة >> حبيبة قلبي وملاكي ، والانسانة اللي بتمنى بجد اكون زيها

دعاء راضي >> رفيقة الطريق الجميلة جداً ، بنوتة آخر مجدعة وطيبة

منى اختي >> اختي وحبيبتي اللي ما سابتنيش اكون لوحدي في اليوم دا

علياء احمد >> ان شاء الله تبقى اجدع صيدلانية في الدنيا ، بنوتة بجد زي العسل

وفرحت جداً اني شوفتها بعد ما عرفتها ع النت من حوالي 3 سنين او اربعة

جهاد نجيب >> المدونة الجميلة وصديقتي بردو من الناس اللي انتقلت صداقتنا من صداقة منتدى لصداقة حقيقية

ضحى حلمي << المدونة الجميلة ، صغيرة السن كبيرة الدماغ جداً اللي بجد اول مرة في حياتي كنت اشوفها

بس حسيتني اعرفها قبل كده

وكان معاها بنوتة تانية جميلة اوي ولاء اللي فرحتني اوي بانها بتقرا لي


نروح بقى للشباب اللي نوروني

شريف شقارية >> المحرر في بحلقة والسيناريست والمدون والمهندس وحاجات كتييييييييييير

اوي بحسده انه قادر عليهم كلهم ههههههههه واحياناً شاعر كمان يعني مش عاتق :)

نورني والله ولف ياعيني الكرة الارضية علشان يجي امبارح


طارق عميرة << طبعاً صاحب الصالون والفكرة وبجد تسلم دماغه

احمد منتصر << اللي دوخته معايا طباعة ورق ودوخة :)

و كان منور جداً والحمد لله تفضل وتكرم وقال ع قصصي حلوة هههههههههه

أسامة ناصف << المدون الجميل صاحب مدونة شمو نشادر وبلدياتي بلدياتي ، دماغ بجد جامدة جداً

محمد حمدي << الصحفي والمدون النشيط اوي ،

واللي دايماً عارف اني كسولة وقعني في سؤالين بسبب كسلي دا هههههههههههه

أحمد عبد ربه << من منكوبي قسم إعدام :) وحد نشيط جداً وليه نشاط حزبي وثقافي جميل جد

اً عبد الله العباسي << المدون بردو صغير السن كبير الدماغ جداً وتفكيره حلو .. حد هادي جداً وراسي

احمد رحيم << المدون سوبر نوفا بجد انسان دماغه حلوة وشخصية جميلة ،

صريح جداً وبيحب يسمع اوي وبعدين يتكلم


محمد ميرة
: اللي نورنا وبيتابع المدونة من خلال الفيس بوك ، ناقد شاطر جداً ما شاء الله عليه :)


وباقي الناس والله انا فاكراهم جداً بس للأسف ما عرفتش القط الاسامي

ان شاء الله اول ما توصلني الاسامي هشكرهم شكر خاص

حقيقي استمتعت وما كنتش عايزة اروح بس الأوقات الحلوة بتعدي في ثواني :)


آخر حاجة بقى ، عبد الله العباسي كتب رأيه طااااااازة في الصالون الأدبي الطنطاوي امبارح

اقراه من هنا




2009-07-09

الدعوة عامة يا ولاد بلدنا يوم الاتنين

تم تحديث البوست وعرفنا المكاااااااااااان



يوم الاثنين 13/7/2009

إن شاء الله في جلسة أدبية في طنطا

امة الله اللي هي حضرتنا هي الضيفة وهنتكلم عن مدونتي دي بنوتة لاسعة

اتمنى تشرفوني كلكم نفر نفر

الميعاد الساعة 5.30 مساءاً وهتستمر لحد الساعة 8 مساءاً إن شاء الله

المكان جراند كافيه طنطا - شارع البحر

الايفنت هنا اهووووو

الجلسة تحت اشراف طارق عميرة :)





2009-07-04

ينفع تعيش مقسوم ؟؟




ياترى تقدر تعيش مقسوم ؟؟


تعيش نصين .... نص منهم متفائل و شايف ان بكرة احلى

ونص تاني شايف ان بكرة اوحش من النهاردة ؟؟

نصين صحيح ليهم نفس الأحلام لكن .. في نص منهم شايفها مستحيلة

والتاني شايفها ممكنة

ممكن يكون النص المتفائل ساذج


ممكن يكون لسة ماعرفش الدنيا صح

ومش قصدي بالكلام دا التناقض الطبيعى اللي في كل انسان لأ ..

التناقض مش بيكون بالدرجة دي


التناقض بيبقى فيه شوية تدرج .. لكن دا بجد قسمة

ولأننا ما ينفعش نعيش مقسومين .. لازم نص يتغير يبقى زي النص التاني


أو النصين يتغيروا ويقفوا في النص.. لازم تلاقي حل وسط

و إلا هتموت
!

لازم المتفائل يبقى واقعي شوية والمتشائم يقلع نضارته السودا

ينسى ان الدنيا جرحته وينسى انه اتظلم ولسة بيتظلم

و يحاول يشوف ان الدنيا حلوة بما ان نصه التاني شايفها حلوة

وبما انه واثق ان العقل واحد والعقل راجح الي حد ما فلازم يفكر شوية في ان احتمال نصه يكون صح

واحتمال تكون فعلاً الدنيا حلوة



لو كنت وصلت - زيي - لمرحلة حاسس فيها انك نصين ،

انك مقسوم لنقيضين


حاول - زيي - تلملم نفسك .. وتقرب نصينك من بعض

وحتى لو أنا فشلت .. ماتخافش .. ممكن انت تنجح




From My facebook's Not's @ 9 Nov. 2008

مكعب سكر




ضايع منى إزازة الميّه
و مش راضية الطيّارة تطير
راح الصبر و رجع الصبر
و تعب القلب و لسّه كتير!
آه يا تى شيرت العمر يا أبيض
لفيت بيك مشاوير مشاوير

أملك صورة انا فيها صغيّر
شكلى اتغير ما عرفتوش
كان فى جيوبى مكعّب سكّر
داب السكّر ما لقيتهوش !!
و اما اتقطعت منى الساعة
وقع الوقت لاقيتنى كبير !

أعرف واحد قال لواحد
اهمل صاحبك و اقسى عليه
واحد قال للواحد نفسه
ا
نت مزعّل صاحبك ليه ؟
واحد حاول يعرف واحد
طلع الواحد صفر كبير
!

.

بلاك تيما

2009-07-02

الله يرحم أيام ما كان ابوه بيبيع فجل على ناصية شارعنا

[ 3 ]

[2 ]

[ 1 ]

zoooooooooom



عربية حلوة معدية على اتنين ماشيين وسايقها راجل شكله محترم بدلة و اخر شياكة

شاورلهم وقال سلامو عليكم




شاورولوا وردوا السلام بصوت عالى

يادوبك العربية عدت من جنبهم

راح الاولانى مصمص شفايفه



وقال للتانى

" الله يرحم ايام ماكان ابوه بيبع فجل على ناصية الشارع
اييييييييييييييييييييه زمن شايف راكب عربية عاملة ازاى ؟!! "




المشهد بيتكرر باشكال مختلفة

وبعبارات مختلفة

" الله يرحم ايام ماكان ابوه شغال عندنا "

" الله يرحم ، دى امها كانت بتشتغل فى البيوت "

" الله يرحم ، ....... إلخ





بجد الموضوع دا بقى مستفز بشكل فظيع

دا انسان محترم تعب وكافح لحد ماوصل

لا سرق ولا ابوه كان حرامى

وكمان لما وصل مابقاش متعالى

ليه الناس شايفه انه مش من حقه يكون انسان كويس ؟!!

كل دا علشان ابوه كان فقير ؟؟!!

طيب ومين فى الدنيا بيفضل على حاله ؟!!

مالازم الدنيا تعمل كده !

طب ماهو لو لازم الفقير يفضل فقير وكحيان طول عمره مهما عمل ماحدش هيشتغل

المصيبة ان الناس بردو مش عاجبهم لو كان واحد غني أباً عن جد معدي من قدامهم

هيقعدوا يمصمصوا في شفايفهم ويقولوا :

" ناس ليها بخت
اهو اللي قدامك دا مولود وفي بقه معلقة دهب
ما تعبش ولا شاف التعب "

بصراحة بقى الناس دي ما يتقالهاش غير كلمة واحدة

" قصر ديل يا أزعــــــــــر "


___________________ موضوع تاني خالص _______

دا رابط الحلقة اللي اتذاعت ع البرنامج العام عن المدونة

اسمعها لو عايز